Матвей 17
17
Иисусонь лиякстомась
1Кото чинь ютазь, Иисус саинзе мартонзо Петрань, Яковонь ды сонзэ Иоанн ялаксонзо ды кустинзе сынст сэрей пандо пряс, косо ульнесть ськамост. 2Тосо икелест Сон лиякстомсь: чамазо кармась сияждомо чи ладсо, оршамопелензэ теевсть цивтёрдыця ашокс. 3Апак учо лиссть тенст Моисей ды Илия, конат кортасть Иисус марто. 4Сестэ Петра мерсь Иисуснэнь: «Азоро! Кода паро миненек тесэ улемс! Улиндеряй мелеть, тейтяно тесэ колмо кудынеть: вейкенть Тонеть, вейкенть Моисейнень, вейкенть Илиянень».
5Зярс сон кортась, сась сияждыця пель ды вельтинзе сынст. Пеленть потсто марявсь вайгель: «Те Монь вечкевикс Цёрам, Монь седей кенярксом. Сонзэ кунсолодо!» 6Те вайгеленть марязь, тонавтницятне истя тандадсть, натой пракшность чамаст лангс. 7Иисус мольсь ваксозост, токинзе сынст ды мерсь: «Стядо, илядо пеле». 8Зярдо сынь кепедизь сельмест, Иисусто башка киньгак эзть нее.
9Пандонть прясто валгомсто Иисус кармавтсь тенст: «Киненьгак илядо ёвтне неезденть Ломантнень Цёранть кулозьстэ вельмемазонзо». 10Сестэ тонавтницянзо кевкстизь сонзэ: «Мекс Койс тонавтыцятне кортыть, васняяк эряви самс Илиянень?» 11Иисус мерсь каршост: «Те виде, Илиянень васняяк эряви самс ды весементь аравтомс эсь тарказонзо. 12Ансяк кортан тенк: Илиясь уш сакшнось, ды ломантне эзизь сода сонзэ, тейсть мартонзо эсест мелест коряс. Истя Ломантнень Цёраськак карми сынст пельде кирдеме ламо пиштемат». 13Сестэ тонавтницянзо чарькодсть: Сон кортась тенст Нававтыця Иоанндо.
Идемевсень колавт цёрынень шумбралгавтома
14Кода сынь валгсть пурнавозь ломантнень ваксс, мольсь Иисуснэнь ве ломань ды сюконязь 15мерсь Тензэ: «Азоро! Ульть седеймарицякс монь цёрам туртов. Сон сэреди пракшны ормасо, пек пишти, кулси: сеедьстэ кайсеви толс эли ведьс. 16Мон тукшныя сонзэ Тонь тонавтницятненень, ансяк сон эзь шумбралгавтово тенст». 17Иисус мерсь: «Вай, неень пингень акемиця ды колазь ломанть! Зярс Монень эряви улемс тынк марто? Зярс Тень кирдемс коронк? Ветинк цёрыненть тей Монень!» 18Иисус кармавтызе идемевсенть лисеме, ды се лиссь сонзэ потсто. Эйкакшось сеске пичкась.
19Мейле тонавтницятне састь Иисус ваксс ськамост ды кевкстизь: «Мекс миненек идемевсесь эзь паневе?» 20Иисус мерсь каршост: «Секс мекс тынк арась кемеманк. Алкукс кортан тенк: улевельгак тынк кемеманк куш горчица видьмешка, ды меревлидеяк те пандонтень айгемс тестэ тов – сон айгевель. Сестэ мезеяк аволь уле тенк атеевикс! 21Истят идемевстне паневить ансяк озномасо ды постонь кирдемасо».
Иисус таго корты куломадонзо
22Галилеясо улемстэст Иисус мерсь тонавтницянстэнь: «Ломантнень Цёрась ули максозь-миезь ломантнень кедь алов, 23конат маштсызь Сонзэ, ансяк мейле колмоце чистэ Сон кулозьстэ вельми». Тонавтницятнень те пек нусмакавтынзе.
Пазонь кудонень каявкс
24Зярдо Иисус ды тонавтницянзо велявтсть Капернаумс, Петра ваксс мольсть Пазонь кудонть туртов каявксонь пурныцят ды кевкстизь: «Паряк, тынк тонавтыцянк панды каявкс?» 25Сон ёвтась: «Нама, панды». Зярдо Петра совась кудонтень, Иисус икельдизе кевкстемасо: «Кода теть маряви, Симон, масторлангонь инязортнэ кинь пельде саить каявкст-пурнавкст: эсь ломанест пельде эли лия масторонь ломанень пельде?» 26Петра каршонзо ёвтась: «Лия масторонь ломанень пельде». Иисус мерсь тензэ: «Лисни: эсь ломанест олякстомтызь пандомадонть? 27Ансяк а карматано кежест савтнеме. Секскак, азё эрьке чирес, каяк ульма. Васенце понгозь калонть саик, кургонзо панжик, ды муят тосто сиянь ярмак. Саик сонзэ, максык тенст Пазонь кудонть туртов каявксокс Монь кисэ ды эсеть кисэ».
Currently Selected:
Матвей 17: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
