Матвей 21

Иисус ласте сови Ерусалимс

1Зярдо Иисус тонавтницянзо марто састь Ерусалим малав, сынь пачкодсть Бетфагия велес, кона ашти Ойумарькс пандонть#21:1 ойумарькс – оливковое дерево, маслина; Ойумарькс пандо – Елеонская гора чиресэ. Иисус кучинзе икелев кавто тонавтницянзо 2ды мерсь тенст: «Азёдо икеленк аштиця велентень. Тосо тынь сеске нетядо содозь авака осёл вашо марто. Юкстинк сонзэ ды ветинк сынст Монень. 3Кияк мериндеряй тенк мезеяк, сестэ ёвтадо: “Сынь эрявить Азоронтень, – Сон сеске сынст велявтсынзе”». 4Весе те истя теевсь вана мекс: эрявсь топавтовомс валтнэнень, конатнень Азорось икеле ёвтынзе пазмариця вельде:

5«Ёвтадо Сион тейтерентень*:

Вана сы теть Инязорот!

Сон сэтьме ды юты ласте од осёл лангсо,

стака канстонь ускицянть вашонзо лангсо».

6Тонавтницятне тусть ды тейсть истя, кода тенст мерсь Иисус. 7Ветясть авака осёл вашо марто, вельтизь лангост эсь оршамопельсэст, ды Иисус озась лангозост. 8Ламо ломанть ацнесть эсь оршамопелест кинть ланга, лиятне керсесть чувтосто тарадт ды ацнесть эйсэст ки лангонть. 9Иисус икеле ды мельга молиця ломантне сеересть:

«Осанна* Давидэнь Цёранстэнь!

Улезэ чанстязь-баславазь Азоронть лемсэ Сыцясь!

Осанна Верепазонтень!»

10Зярдо Иисус совась Ерусалимс, весе ошось шалнозевсь ды ломантне кевкстнесть: «Те кие?» 11«Те Иисус, Галилеянь Назаретстэ пазмариця», – ёвтнесть мартонзо сазтне.

Иисус Пазонь кудосо

12Иисус совась Пазонь кудонь пирявксонть потс ды панинзе тосто весе микшницятнень-рамсицятнень. Сон сявордтнинзе ярмаконь полавтницятнень столест ды гулькань микшницятнень эземест. 13Сонсь кортась тенст: «Пазонь Сёрмадовкссонть ёвтазь: “Монь кудонтень кармить мереме ознома кудо”, а вана тынь теинк сонзэ салыцянь-маштницянь пизэкс».

14Пазонь кудосонть мольсть ваксозонзо сокорт, ёколдыцят, – Сон сынст шумбралгавтынзе. 15Попонь покштнэ ды Койс тонавтыцятне пек кежиявтсть, кода неизь Сонзэ теевть тамашатнень ды эйкакштнэнь, конат сеересть Пазонь кудосонть: «Осанна Давидэнь Цёранстэнь!», 16ды мерсть Иисуснэнь: «Марясыть, мезть сынь пижнить?» Иисус мерсь тенст: «Эно, марян! Арази тынь зярдояк эзиде ловно Пазонь Сёрмадовкссто: “Вишка ды потиця эйкакшонь кургсо Тон анокстыть Эстеть ванькс шнамо”?» 17Иисус кадынзе сынст тоско, лиссь ошстонть ды тусь Бетанияв, косо печтизе вентькак.

Иисус ды инжир чувто

18Валске, ошов велявтомсто, Иисусонь вачсь пекезэ. 19Ки чирестэ сон несь инжир чувто, мольсь ваксозонзо, ансяк лопадо башка мезеяк лангстонзо эзь муе. Сестэ Иисус мерсь чувтонтень: «Кадык зярдояк тонь лангсо а улить инжирт!» Инжир чувтось сеске коськсь. 20Зярдо тонавтницятне тень неизь, пек дивазевсть: «Мекс истя сеске инжир чувтось коськсь?» 21Иисус каршост мерсь: «Кемеде Монень: карминдеряй улеме кемеманк, ды а карминдерятадо кавтолдомо, сестэ тейсынк аволь ансяк сень, мезе Мон теинь инжир чувтонть марто. Мериндерятадо сестэ натой те пандонтень: “Кепедевть ды ёртовт иневедьс!” – истя улияк. 22Весе, мезе озномсто кемезь вештядо, максозь ули тенк».

Иисусонь азорксчиде кевкстемась

23Зярдо Иисус таго совась Пазонь кудонь пирявксонть потс ды тосо кармась тонавтомо, мольсть ваксозонзо попонь покштнэ ды прявтнэ, кевкстизь: «Кодамо азорксчисэ теят Тон неть тевтнень? Кие максызе Теть те азорксчинть?» 24Иисус мерсь каршост: «Монгак максан тенк вейке кевкстема. Ёвтындерятадо Монень, Монгак ёвтаса тенк, кодамо азорксчисэ Мон теян неть тевтнень. 25Иоаннонь нававтомась косто ульнесь? Менельстэ эли ломантнень пельде?» Сынь кортнесть эсь ютковаст истя: «Мериндерятано: “Менельстэ”, – Иисус кевкстьсамизь: “Мекс эно эзиде кеме тензэ?” 26Мериндерятано: “Ломантнень пельде”, – пельтяно ломантнеде, эдь Иоаннонь весе ловить пазмарицякс». 27Секс мерсть Иисусонь каршо: «А содатано». Сестэ Иисус сынст каршо мерсь: «Монгак а ёвтан тенк, кодамо азорксчисэ теян неть тевтнень».

Кавто цёрадо валвелявкс

28Иисус поладызе кортамонзо: «Мезе ёвтатадо истямо тевенть кувалма? Ве ломаненть ульнесть кавто цёранзо. Сон мольсь васенценть ваксс ды мерсь: “Цёрам, азё течи важодть винаумарькс пиресэ”. 29А вана се каршонзо мерсь: “А молян”. Ансяк мейле янксезевсь ды тусь винаумарькс пирев. 30Тетясь мольсь омбоценть ваксс ды ёвтызе текень. Се каршонзо мерсь: “Нама, тетяй, молян”. Ансяк сонсь эзь моле. 31Кона кавтост ютксто топавтызе тетяст мелензэ?» Сынь мерсть Тензэ: «Васенцесь».

Иисус мерсь тенст: «Кемеде Тень: каявксонь-налогонь пурныцятне ды ускуриця аватне тынденк икеле совить Пазонть Инязорксчинтень. 32Эдь Иоанн сакшнось видечинь кинь невтеме, а вана тынь эзиде кеме тензэ. Ансяк каявксонь пурныцятне ды ускуриця аватне кемсть тензэ. Тынь тынсь тень неинк ды ялатеке эзиде янксе ды эзиде кеме тензэ».

Винаумарькс пире мельга якицядо валвелявкс

33Иисус яла кортась: «Кунсолодо лия валвелявкс: ульнесь вейке видиця-сокиця азор. Сон озавтсь винаумарькс пире, пиризе пирявтсо, эйзэнзэ чувсь винаумарень чемерямо латко, тейсь ванстома башня ды сиведсь пиренть мельга якицят. Сонсь тусь лия масторов. 34Зярдо сась винаумарень пурнамо шкась, сестэ сон кучинзе важонзо сиведезь якицятненень таликанзо кисэ. 35Сиведезь якицятне кундызь сонзэ важотнень, вейкенть ваткизь-киськедизь, омбоценть маштызь, колмоценть жо чавизь кевсэ. 36Азорось таго кучсь лия важот, васенцетнеде ламо. Сынст мартояк сынь тейсть истя. 37Окойники сон кучизе эсензэ цёранзо, арсезь: “Паряк монь цёранть эйстэ визделгадыть”. 38Ды зярдо винаумарь пирень мельга якицятне неизь цёранть, мерсть вейкест-вейкест туртов: “Те буень поладыцязо. Адядо, маштсынек сонзэ, ды сонензэ кадовикс весе ули-парось ули минек!” 39Сонзэ кундызь, винаумарь пирестэнть вырновтызь ды маштызь.

40Зярдо велявты пирень азорось, мезе теи неть сиведезь якицятнень марто?» – кевкстинзе Иисус. 41Сынь мерсть каршонзо: «Неть лия ломанень пиштевтицятнень сон макссынзе стака пиштемань куломас. А вана винаумарь пирес сиведи лия якицят, конат кармить максомо тензэ таликанзо аравтозь шкасто».

42Иисус мерсь тенст: «Арази тынь зярдояк эзиде ловно Пазонь Сёрмадовкссто:

“Се кевесь, конань ёртызь кудонь теицятне,

теевсь ужонь-уголонь кирдиця юр кевекс.

Тень теизе Азорось,

ды миненек сон неяви тамашакс”?»

43Иисус кортась: «Секскак мерян тенк: саезь ули эйстэнк Пазонть Инязорксчизэ ды максозь ули се раськентень, кона карми кастомо сонзэ алкуксонь умарть. 44Эрьвась, кие пры те кевенть лангс, томбави, ды кинь лангс кевесь пры, сень лепштясы».

45Зярдо попонь покштнэ ды фарисейтне кунсолость Иисусонь валвелявкстнэнь, сестэ сынь чарькодсть: кортамось моли сынст кувалма. 46Сынст ульнесь мелест кундамс Иисусонь, ансяк пельсть ломантнеде. Весе Иисусонь ловсть пазмарицякс.

Currently Selected:

Матвей 21: ОВ

Highlight

Copy