Матвей 26

Иисусонь каршо арсема

1Зярдо Иисус прядынзе весе неть кортамотнень, сестэ мерсь тонавтницянстэнь: 2«Кавто чинь ютазь, кода тынь содатадо, ули евреень Инечи. Ды Ломантнень Цёрась максозь ули вачкодемс крёст лангс».

3Секе чистэнть попонь покштнэ, Койс тонавтыцятне ды прявтнэ пурнавсть Кайафа попонь прявтонть кудос 4ды арсесть ёжовчисэ кундамс Иисусонь ды маштомс. 5«Ансяк тень эряви теемс аволь покшчистэ, – кортасть сынь, – иляст кепедеве ломантне».

Иисусонь вадемась

6Зярдо Иисус ульнесь Бетаниясо Симононь кедьсэ, кона икеле сэредекшнесь проказа ормасо, 7мольсь тосо ваксозонзо ве ава. Сон кандсь алебастрань* кедьгесэ тантей чине питней ой, конасонть валнызе ярсамсто Иисусонь прянзо. 8Тень неемстэ тонавтницянзо ацирьгалезь кортасть: «Мезекс истямо стяконь ёмсевтемась? 9Те оесь миемаль покш питнеде ды ярмактнень явшемаль пурныцянень!»

10Иисус, сынст ацирьгалемадонть содазь, мерсь тенст: «Мекс аванть мелензэ колсесынк? Сон Монень тейсь паро тев. 11Пурныцятне свал тынк марто, Мон жо аволь свал. 12Авась оень валомасонть анокстызе рунгом калмамос. 13Видестэ кортан тенк: весе масторлангсонть, косо ули ёвтнезь Кенярксов кулясь, тосо кундасызь те аванть лемензэ ды ёвтыть седеяк, мезе сон тейсь Монень».

Иуда тееви миицякс

14Сестэ кемгавтово тонавтницятнень ютксто вейкесь, Иуда Искариот, мольсь попонь покштнэнень 15ды мерсь: «Зяро макстадо монень, бути мон миса тенк Иисусонь?» Сынь путсть тензэ колоньгемень сиянь ярмакт. 16Те шкастонть саезь Иуда кармась вешнеме ён шка сыненст Иисусонь миемга.

Инечинь ярсамонь анокстамо

17Ламбамсто сюкоронь покшчинь васенце чистэнть тонавтницянзо мольсть Иисус ваксс ды кевкстизь: «Косо мерят анокстамс Теть инечинь ярсамонть?» 18Сон мерсь: «Азёдо ошов ве ломаннень ды мереде тензэ: “Тонавтыцясь корты: Монь шкам сась малав. Тонь кедьсэ мелем ярсамс тонавтницян марто инечинь ярсамодо”». 19Тонавтницятне тейсть истя, кода тенст мерсь Иисус, ды анокстызь инечинь ярсамонть.

Инечинь чокшнень ярсамо

20Чокшне Иисус озась столь экшс кемгавтово тонавтницянзо марто. 21Ярсамсто Сон мерсь тенст: «Алкукс кортан тенк: вейкесь эйстэнк мисамам». 22Тонавтницянзо прасть покш ризксэс ды кармасть вейке-вейкест мельга кевкстнеме: «Азоро, те уш аволь мон?» 23Сон мерсь каршост: «Монь мисамам се ломанесь, кона Монь марто вейсэ навизе ваканс кшинть. 24Ломантнень Цёрась Эсь эрямо кинзэ прядсы истя, кода теде ёвтазь Пазонь Сёрмадовкссо. Ансяк кодамо зыян пры се ломаненть лангс, кона мисы Ломантнень Цёранть! Седе паро улевель, бути те ломанесь аволь чачояк». 25Сестэ мииця Иудаськак кевкстизе сонзэ: «Тонавтыця, те уш аволь мон?» Иисус мерсь тензэ: «Тень ёвтык тонсь». 26Ярсамсто Иисус сайсь кши, чанстизе-баславизе, синтризе, ды тонавтницянзо ланга явшемстэ мерсь: «Саинк ды ярсадо, те Монь рунгом». 27Мейле сайсь кече, Пазонтень сюкпрянь ёвтазь, максызе тенст ды мерсь: «Весе симеде эйстэнзэ: 28Те Монь вересь, Пазонть марто од вейсэньлувонь#26:28 вейсэньлув – завет, союз верь, кона валови весень пежетест нолдамонь кисэ. 29Кортан тенк: те шкадонть мейле Мон а карман симеме винаумарень винадо се чинть самс, зярдо карман симеме мартонк од винадо Монь Тетянь Инязорксчисэнть». 30Мейле сынь моравтсть ды тусть Ойумарькс пандо лангов.

Иисус ёвты Петрань прянь кайсемадо

31Сестэ Иисус мерсь тенст: «Те вестэнть тынь весе потатадо Монь эйстэ, эдь Пазонь Сёрмадовкссо ёвтазь истя:

“Мон маштса ваныцянть, ды стадань реветне срадыть”.

32Седе мейле, зярдо Мон улян кулозьстэ вельмевтезь, тынденк икеле молян Галилеяв». 33Петра мерсь каршонзо: «Кадык весе лиятне потыть эйстэть, мон истя зярдояк а теян!» 34Иисус мерсь тензэ: «Видестэ кортан теть: те вестэнть атякшось а кенери моразевемеяк, кода тон колмоксть прят каясак Монь эйстэ». 35Петра мерсь тензэ: «Зярдояк а каяса прям Эйстэдеть, куш куломс тень савозо мартот!» Истя кортасть весе лия тонавтницятнеяк.

Иисус озны Гетсиманиясо

36Сестэ Иисус тонавтницянзо марто пачкодсь ве таркас, конань лемезэ Гетсимания*. Сон мерсь тонавтницянстэнь: «Аштеде тесэ, зярс Мон молян ды ознан тосо». 37Мартонзо саинзе Петрань ды кавонест Зеведеень цёратнень. Сонензэ прась ризкс ды седей сэредькс, 38ды Сон мерсь тенст: «Оймем куломс ризны. Аштеде тесэ Монь марто, ды илядо удо». 39Сон тусь аламодо ве ёнов, прась сэрьсэнзэ мода лангс ды ознось: «Тетяй, улиндеряй те теевемашка, ютавтык те пиштемань кеченть Монь вакска! Ансяк топавтовозо Тонь мелесь, аволь Монсесь».

40Иисус сась тонавтницянзо ваксс ды муинзе сынст удомсто. Сон мерсь Петранень: «Тынь Монь марто мик ве часкак апак удо эзиде кирдеве? 41Илядо удо, ознодо, аволиде понго снартнемас-варчавтнемас. Тынк оймесь анок паронтень, ансяк обуцянк-коронк лавшо». 42Иисус таго тусь, омбоцеде ознось: «Тетяй, бути а ютавтови Монь вакска те пиштемань кечесь, Монень апак симе, сестэ кадык топавтови Тонь мелесь!» 43Зярдо велявтсь, таго стардынзе сынст удомсто: сельмест конявильть. 44Сон кадынзе сынст, таго тусь ды колмоцеде ознось секе валтнэсэ. 45Мейле сась тонавтницянзо ваксс ды мерсь тенст: «Тынь яла удотадо ды оймсетядо! Вана сась се шкась, зярдо Ломантнень Цёрась максозь ули пежетевень кедьс. 46Стядо, адядо! Вана Монь миицясь малазонок сась».

Иисусонь кундамозо

47Иисусонь кортамо шкастонть сась Иуда, кемгавтовотнень ютксто вейкесь. Сонзэ марто састь попонь покштнэнь ды прявтнэнь пельде кучозь ламо ломанть торо ды цётмар марто. 48Иуда миицясь икелев кортась мартост тешкстэнть: «Конань мон паласа, се Сон, саинк Сонзэ». 49Сон сеске мольсь Иисус ваксс ды мерсь: «Шумбрачи, тонавтыця!» – ды палызе Сонзэ. 50Иисус мерсь тензэ: «Ялгай, мекс тон сыть?» Сестэ лиятнеяк састь Иисус ваксс, каявсть лангозонзо ды кундызь Сонзэ. 51Сестэ вейкесь Иисус мартотнень ютксто таргизе торонзо, вачкодизе попонь прявтонь важонть ды керизе пилензэ. 52Иисус мерсь тензэ: «Путык торот кундозонзо! Эрьвась, торонь кепедицясь, тородо кулыяк. 53Эли тон арсят, Монень а вешеви Тетянь кедьстэ лезкс? Сон сеске кучоволь кемгавтово ушмот ангелт ды седе ламояк! 54Ансяк кода сестэ топавтовить Пазонь Сёрмадовкстнэ истя улемадонть?» 55Мейле Иисус мерсь пурнавозь цёратненень: «Мекс тынь сыде Монь саеме торо ды цётмар марто, теке салыця-маштниця мельга? Эрьва чистэ Мон озадолинь мартонк Пазонь кудосо, тонавтынь эйсэнк, ды тынь Монь эзимизь сае. 56Ансяк ней весе те истя теевсь пазмарицянь сёрмадовкстнэнь топавтомга».

Сестэ весе тонавтницянзо кадызь Сонзэ ды оргодсть.

Инепромксось суди Иисусонь

57Иисусонь кундыцятне саизь Сонзэ, ветизь Кайафа попонь прявтонть кудос. Тозонь уш пурнавсть Койс тонавтыцятне ды прявтнэ. 58Петра мольсь мельганзо ве ёно попонь прявтонь пирявтонть потс пачкодемс ды совась тозонь. Тосо сон озась ванстыцятнень юткс ваномо, мейсэ весе те прядови. 59Попонь покштнэ, прявтнэ ды весе Инепромксоськак вешнесть Иисусонь каршо кенгелема яволявкст сонзэ маштомга 60ды эзть мукшно, куш ламо сакшность кенгели яволявтыцят, ялатеке чумонзо эзть муе. Окойники састь кавто кенгели яволявтыцят 61ды мерсть: «Те ломанесь кортась: “Монень Пазонь кудось калавтови ды колмо чис одс стявтови”». 62Сестэ попонь прявтось стясь ды кевкстизе Иисусонь: «Мекс чатьмонят? Мекс мезеяк а ёвтат чумондомаст каршо?» 63Иисус ялатеке чатьмонсь. Таго попонь прявтось мерсь Тензэ: «Эри Пазонть сельмензэ икеле энялдан теть: ёвтак видьстэ тенек: алкукс Тон – Пазонь кучовт Идицясь, Пазонь Цёрась?» 64Иисус мерсь тензэ: «Тень ёвтык тонсь. А вана Мон ёвтан тенк: курок тынь несынк Ломантнень Цёранть Весеменькирдинть вить ёно озадо аштемстэ ды менелень пельтнень лангсо самсто». 65Сестэ попонь прявтось сезизе оршамонзо ды серьгедсь: «Сон Пазонть эйсэ нарьги-покорды! Мезекс тенек лия яволявтыцятне? Вана ней тынсь маринк Пазонть лангсо нарьгамонзо! 66Кода арсетядо: мезе теемс мартонзо?» Сынь мерсть каршонзо: «Сон чумо ды секскак эряви маштомс». 67Теде мейле кармасть чамазонзо сельгенеме ды чавомонзо, лиятне кайсесть Тензэ чама ланга 68ды кортасть: «Содык, Пазонь кучовт Идиця, кие риштинзеть?»

Петрань прянь кайсемазо

69Петра аштесь озадо попонь прявтонь пирявтонть потсо, зярдо мольсь ваксозонзо ве важо ава ды мерсь: «Тонгак ульнить Галилеянь Иисус марто». 70Сон весемень икеле каизе прянзо: «Аздан, мезть тон кортат». 71Орта ушов лисемстэ Петрань неизе лия важо ава, кона мерсь тосо аштицятненень: «Теяк ульнесь Назаретэнь Иисус марто». 72Сон таго каизе прянзо ды божазь-пежетькстазь мерсь: «Пежеть, мон а содаса те ломаненть!» 73Аламо шкань ютазь тосо аштицятне мольсть Петранень ды мерсть: «Алкукс, тонгак сынст ютксто: кортавксот кувалт содават!» 74Сестэ сон кармась сюдомо ды божамо-пежетькстамо: «Мон аздаса те ломаненть!» Сеске моразевсь атякш. 75Петрань мельс ледсть Иисусонь ёвтавт валтнэ: «Атякшось а кенери моразевемеяк, кода тон колмоксть прят каясак Монь эйстэ». Сон лиссь ушов ды кармась риксэ авардеме.

Currently Selected:

Матвей 26: ОВ

Highlight

Copy