Матвей 27

Иисусонь максызь Пилатнэнь

1Валске марто промкссо весе попонь покштнэ ды раськень прявтнэ састь вейке мельс: маштомс Иисусонь. 2Сынь сюлмсизь Сонзэ, ветизь ды максызь Понтий Пилатонь, римень прявтонть, кедьс.

Иудань янксемазо ды пезэ

3Зярдо Иуда миицясь кармась содамо Иисусонь маштомас судямодонть, сестэ сон янксезевсь, кандынзе колоньгемень сиянь ярмактнень попонь покштнэнень ды прявтнэнень, 4истя мерезь: «Совинь пежетьс, мон миия чумовтомо веренть!» Сынь мерсть каршонзо: «Кодамо минек тевенек? Те тевесь тонь». 5Иуда ёртынзе ярмактнень Пазонь кудонь кияксос, лиссь ды повась.

6Попонь покштнэ пурнызь ярмактнень ды мерсть: «Неть ярмактне – верень питне, секскак Коень коряс а мереви путомс сынст Пазонь кудонь ярмак юткс». 7Вейсэ арсесть рамамс сынст лангс чакшонь тейницянь пакся, козонь калмсемс лия масторонь ломантнень. 8Тень кувалма се паксянтень течис мерить: Верь пакся. 9Истя топавтовсь Еремия пазмарицянть вельде ёвтазесь:

«Сынь сайсть колоньгемень сиянь ярмакт,

питне, конань Израилень ломантне путызь Сонзэ кисэ,

10ды рамасть кисэст чакшонь тейницянь мода,

кода кармавтсь монень Азорось».

Иисус Пилат икеле

11Те шкастонть Иисус аштесь римень прявтонть Пилат икеле, кона кевкстнесь Сонзэ: «Тон евреень Инязорось?» Иисус мерсь тензэ: «Те тон истя кортат». 12Зярдо попонь покштнэ ды прявтнэ чумондсть Эйсэнзэ, Сон каршост мезеяк эзь ёвта. 13Сестэ Пилат кевкстизе Иисусонь: «Нать а марят, зяро чумондомат лангозот таргасть?» 14Ансяк Сон эзь ёвта каршонзо валгак, ды тенень прявтось пек дивась.

Иисусонь судизь куломас

15Римень прявтось коензэ-кирданзо коряс свал покшчинень нолдыль оляс пекстазтнень ютксто вейке, ломантнень вешемаст коряс. 16Се шкане ульнесь пекстазь Варавва, кона ульнесь пек содавикс. 17Зярдо ломантне весе пурнавсть, Пилат кевкстинзе: «Кинь нолдавтомс меленк? Вараввань эли Иисусонь, конадо мерить Пазонь кучовт Идиця?» 18Сон содась: евреень прявтнэ максызь Иисусонь сонзэ кедьс сельмест сявадомань кувалма.

19Сестэ, зярдо Пилат аштесь судиянь таркасо, низэ кучсь тензэ вал: «Мезеяк иля тее те чумовтомо ломанентень: мон ютазь вене неинь Сонзэ эйстэ стака он, кона кармавтымим пек майсеме». 20Те шкастонть попонь покштнэ ды прявтнэ кортызь пурнавозтнень вешемс нолдамс оляс Вараввань, Иисусонь жо маштомс. 21Сестэ Пилат кевкстинзе сынст: «Кавтост ютксто конань мертядо нолдамс тенк?» Сынь рангстасть: «Вараввань!» 22Пилат кевкстинзе: «Мезе сестэ монень теемс Иисус марто, конадо мерить Пазонь кучовт Идиця?» Сынь весе рангстасть ве вайгельсэ: «Крёст лангс вачкодик!» 23Сон таго кевкстсь: «Эно кодамо зыянонть Сон тейсь?» Сынь седеяк пек серьгедсть: «Крёст лангс вачкодик!» 24Зярдо Пилат неизе: мезеяк а тееви, ансяк седеяк касы ломантнень шалномась, сестэ сон вешсь ведь, ломантнень икеле шлинзе кедензэ ды мерсь: «Мон а чуман Те Чумовтомо Ломаненть верьсэ, а вана тынь тынсь ванодо». 25Весе ломантне серьгедсть каршонзо: «Сонзэ верезэ улезэ минек ды эйкакшонок лангсо!» 26Сестэ Пилат нолдызе тенст Вараввань, Иисусонь жо мерсь локшосо керямс ды максомс вачкодемс крёст лангс.

Ушманонь нарьгамотне

27Мейле Пилатонь ушманонзо Иисусонь ветизь азоркудов, косо пурнавсть перьканзо весе ушмантнэ. 28Сынь каявтызь лангстонзо оршамопелензэ ды оршавтсть лангозонзо якстере лангакаямо. 29Прязонзо путсть пупиця куракшонь тарадсто кодазь каштаз, вить кедезэнзэ макссть палка ды икелензэ кумажа лангс пульзязь, пеелезь шумбракстнесть мартонзо: «Шумбра улезэ евреень Инязорось!» 30Мейле сынь сельгенесть лангозонзо, сайнесть кедьстэнзэ палканть ды чавсть Эйсэнзэ пря ланга. 31Кода лангсонзо нарьгамодонть пешкедсть, каявтызь лангстонзо якстере оршамонть ды оршавтызь Эсь оршамопелензэ. Мейле ливтизь Сонзэ крёст лангс вачкодемс.

Иисусонь крёст лангс вачкодемазо

32Ошсто лисемстэ сынь каршо вастызь киринеянь ломаненть, конань лемезэ Симон, ды кармавтызь сонзэ Иисусонь крёстонть кандомо. 33Састь Голгофа* лемсэ таркас, кона чарькодеви кода Пря ловажань тарка. 34Тосо макссть Иисуснэнь симемс сэпе марто човорязь чапамо вина. Сон ансяк варчизе – симеме эзь карма.

35Иисусонь вачкодизь крёст лангс, Сонзэ оршамонзо, жеребейсэ кайсема вельде, явизь эсь ютковаст 36ды мейле озасть ванстомонзо. 37Прянзо вельксэс путсть сёрмадовкс, конаньсэ ёвтазель Сонзэ чумозо: «Те Иисус – евреень Инязоро». 38Мартонзо крёст лангс ульнесть вачкодезь кавто салыцят-маштницят: вейкесь – вить пелензэ, омбоцесь – керш пелензэ. 39Вакска ютыцятне, пряст чаравтозь, згилясть лангсонзо: 40«Я-а, Пазонь кудонь калавтыця ды колмо чис одов стявтыця! Идик ней Эсь прят, бути Тон Пазонь Цёра! Валгт крёстонть лангсто!» 41Истя попонь покштнэяк, Койс тонавтыцятнень, прявтнэнь ды фарисейтнень марто згилязь кортасть: 42«Лиятнень идекшнесь, ансяк Эсь прязо Тензэ а идеви! Бути алкукс Сон Израилень Инязор, кадык ней валги крёстонть лангсто! Сестэ минь кемсынек Сонзэ! 43Паз лангс кемсь; кадык Пазось ней идесыяк, бути ули Сонзэ мелезэ! Эдь Сон кортакшнось: “Мон Пазонь Цёра”». 44Истя жо Сонзэ лангсо згилясть салыцятне-маштницятнеяк, конат вачкодезельть мартонзо крёст лангс.

Иисусонь куломазо

45Чинь куншкане весе масторонть келес теевкшнесь чопода, ды истя ульнесь колмо часонь перть. 46Колмоце часонть малав Иисус верьга вайгельть пижакадсь: «Элий, Элий! Лама сабактани?», конань смустезэ: “Пазом, Пазом! Мекс Монь кадымик?” 47Маласо зярыя аштицятне тень марямсто мерсть: «Сон Илиянь терди!» 48Вейкесь эйстэдест сеске ношкстась, сайсь ведьпанго, начтызе сонзэ чапамо винасо, пезнавтызе палка пес ды венстизе Иисуснэнь симемс. 49А вана лиятне кортасть: «Аштек, вансынек, сы-арась Илия идемензэ!» 50Иисус таго верьга вайгельть пижакадсь, ды оймезэ лиссь. 51Сестэ Пазонь кудосонть коцтонь пирявксось сезевсь кавтов, верде саезь алов. Мастороськак соракадсь, кевпандотнеяк лазновсть, 52калмотнеяк панжовсть ды ламо Пазонь ломантнень кулозь рунгост вельместь. 53Сынь лиссть калмотнестэ ды Иисусонь вельмемадо мейле совасть Пазонь иневанькс ошонтень*, косто сынст неизь ламо ломанть.

54Зярдо сядонь прявтось ды ушмантнэ, конат мартонзо ванстсть Иисусонь, неизь моданть сорноманзо ды весементь, мезе тосо ульнесь, сестэ сынь пек тандадсть ды кортасть: «Алкукс, те ломанесь ульнесь Пазонть Цёразо!» 55Тосо ульнесть ламо ве ёндо ваныця аваткак, конат Иисус мельга ютасть Галилеясто ды лездасть Тензэ. 56Сынст ютксо ульнесть Магдалань Мария, Яков марто Иосиень аваст Мария ды Зеведеень цёратнень аваст.

Иисусонь калмамозо

57Зярдо чизэ чопотетсь, сась Иосиф, Ариматея ошонь сюпав ломань, кона сонськак ульнесь Иисусонь тонавтниця. 58Сон мольсь Пилатнэнь, вешизе Иисусонь уловонть. Пилат мерсь уловонть максомс. 59Иосиф саизе уловонть, тапаризе лияназонь ванькс коцтсо 60ды калмизе од калмозонзо, кона аволь умок чувозель кевпандос. Калмос совамо таркантень сон кевердсь покш кев ды тусь. 61А вана Магдалань Мария ды лия Марияськак аштесть озадо калмонть каршо.

Калмонть ваксс путыть ванстыцят

62Омбоце чистэнть, те ульнесь оймсема чи, Пилатнэнь промсть попонь покштнэ ды фарисейтне 63ды кортасть тензэ: «Чиряз, мелезэнек ледсь: те манчицясь эрямо пингестэнзэ кортась вана кода: “Колмо чиде мейле Мон вельман”. 64Секскак тон кармавт пштистэ ванстомс калмонть колмо чинь перть. Алкукскак, илязо лисе истя: тонавтницянзо сыть веть, саласызь уловонзо ды мерить ломантненень: “Кулозьстэ вельмесь”. Те меельце манямось улевель васенцедентькак берянь». 65Пилат мерсь тенст: «Ванстыцят тенк макстано. Азёдо ды ванстодо калмонть, кода эряви». 66Сынь тусть ды кармасть ванстомо калмонть: кевенть тешкстызь ды путсть ванстыцят.

Currently Selected:

Матвей 27: ОВ

Highlight

Copy