Матвей 5
5
Алкуксонь уцяска
1Зярдо Иисус несь ламо ломанть, Сон кузсь пандо пряс ды озась. Тонавтницянзо промсть перьканзо, 2ды Сон кармась тонавтомост истямо валсо:
3«Уцяскавт сеть, конатне чарькодить эсь кажовчист#5:3 кажовчи – бедность Пазонть икеле,
эдь сынст ули Менельсэнть Инязорксчист.
4Уцяскавт сеть, конат ризныть-авардить:
Пазось сынст оймавтсынзе.
5Уцяскавт апокшкавтницятне:
сынст кедь алов Пазось макссы масторлангонть.
6Уцяскавт сеть, конатненень Пазонь меленть топавтомась
вачочинь ды симема самонь кондямо:
Пазось сынст бажамонть топавтсы.
7Уцяскавт лиянень седеймарицятне:
сыненсткак Пазось путы седеймарямо.
8Уцяскавт сеть, конатнень ванькс седеест:
сынь несызь Пазонть.
9Уцяскавт сеть, конат теить ладямо ломантнень ютксо:
Пазось ловсынзе сынст Эсензэ эйкакшокс.
10Уцяскавт сеть, конатнень пансить
Пазонь мелень топавтоманть кисэ:
сынст ули Менельсэнть Инязорксчист.
11Уцяскавт ультядо тынь, зярдо Монь кисэ тынк кармить покордамонк, пансеменк ды лангозонк кенгелезь эрьва кодамо апаро валонь кортамо. 12Кенярдодо ды эрьгеледе: менель лангсо тыненк те ули сюпавдояк сюпавсто пандозь. Истя пансесть пазмарицятненьгак, конат эрясть тынденк икеле».
Масторлангонь салось ды валдось
13«Тынь – теке мода лангонь сал. Салось ёмавтындерясы танстензэ, сестэ кодаяк сон одов а тееви саловокс. Сон мезекскак маштовомо а карми, ансяк ёртома ушов, косо чалгсеви якиця ломанень пильге ало. 14Тынь – теке масторлангонь валдо. Пандо прясо аштиця ошось кодаяк а кекшеви сельмеде. 15Кирвазтезь лампантькак а кекшнесызь кедьге алов, мекевланк сонзэ путнесызь лампань кирдема таркас, ды сон валдомты весе кудосотненень. 16Кадык тынк валдонккак ломантненень истя сияжды: кадык сынь несызь тынк вадря тевенк ды шнасызь менелень Тетянк».
Иисус ды Моисеень Коесь
17«Илядо арсе, келя, Мон сынь Коенть эли пазмарицянь сёрмадовкстнэнь полавтомо. Мекевланк, Мон сынь сынст топавтомо, аволь полавтомо! 18Видестэ кортан тенк: зярс кармить аштеме менелесь ды масторось, Койстэнть натой ве кикскеяк эли вишкине тешкскеяк а ёми, зярс весе сон а топавтови. 19Секскак, кие колы куш вейкенть, вельть вишкиненть, кармавтовкстнэнь#5:19 кармавтовкс – заповедь эйстэ ды лия ломантькак тенень тонавты, се Менельсэнть Инязорксчисэнть ловозь ули весемеде вишкинекс. Кие сонсь топавтсы Коенть ды лия ломантькак тенень тонавты, се Менельсэнть Инязорксчисэнть ловозь ули инекс. 20Тенде Мон кортан тенк вана мекс: бути а карматадо Пазонь меленть топавтомо Койс тонавтыцятнеде ды фарисейтнеде пек седе парсте, сестэ Менельсэнть Инязорксчинтень а совавтадо».
Кежде ды пелькстамодо
21«Тынь содатадо, мезе кармавтозель кезэрень ломантненень: “Иля маштне” ды “Кие машты ломань, сень максома судс”. 22Мон вана кортан тенк: эрьвась, кона стяко кежиявтни малавиксэнзэ лангс, судс таргама. Кие вана мери малавиксэнстэнь: “Тон чавола пря ломанят”, сень таргама Инепромксонь судс. Кие лиянень мери: “Тон Паздо потыцят”, сень ёртома тоначинь амадниця толс. 23Секскак кандындерят тон алтарь лангс Пазонтень казне ды тосо лединдеряй мелезэть: тонь малавиксэть кирди лангозот кодамо-бути покоркс, 24– сестэ кадык казнеть тоско, алтаренть икеле, мольть ды васняяк ладяк малавиксэть марто, мейле сак мекев ды кандык казнеть Пазонтень. 25Кияк судиндеряй мартот ды вети эйсэть судс, ладик тынк пелькстамонть мартонзо тов молемстэ, зярс ули шкат. Тень а теиндерясак, сестэ пелькстыцясь ветятанзат чумондомс судиянень, судиясь макстанзат пекстамо кудонь прявтонтень, ды тонь ёрттадызь пекстамо кудос. 26Видестэ кортан теть: тосто а лисеват се шкас, зярс а пандсак весементь меельце трёшникень пес».
Ускурямодо ды явомадо
27«Тынь марсинк кармавтовксонть, конасонть ёвтазель кезэрень ломантненень: “Иля ускуря#5:27 ускурямс – улемс авидекс мирде эли ни икеле; прелюбодействовать”. 28Мон вана кортан тенк: эрьвась, кие варшты лиянь ни лангс визьксэнь мель марто, се седейсэнзэ уш ускурясь мартонзо. 29Бути вить сельметь совавты эйсэть пежетьс, таргик сонзэ ды ёртык! Седе паро теть ёмавтомс рунгонь вейке пелькс, аволь кода весе рунгот ули ёртозь тоначинь толс. 30Бути вить кедеть совавты эйсэть пежетьс, керик сонзэ ды ёртык! Седе паро теть ёмавтомс рунгонь вейке пелькс, аволь кода весе рунгот ули ёртозь тоначинь толс.
31Кармавтозель истяяк: “Кие явиндеряй нинзэ эйстэ, максозо тензэ явомадо конёв”. 32Мон вана кортан тенк: кие яви нинзэ эйстэ аволь усксевема тувталонь кувалт, се сонзэ аравтсы ускурямонь ки лангс. Кие урьваксты явозенть лангс, сеяк ускури».
Пежетькстамодо
33«Тень эйстэяк тынь содатадо, мезе кармавтозель кезэрень ломантненень: “Иля колсе пежетькстазь#5:33 пежетькстамс – божамс; клясться алтамо” ды “Топавт сень, мезе Азоронть икеле пежетькстазь алтыть теемс”. 34Мон вана тенк кортан: тунь илядо пежетькста: менеленть эйсэяк – те Пазонть озамо тарказо, 35моданть эйсэяк – те Пазонть пильгень оймамо тарказо, Ерусалименть эйсэяк – те ине Инязоронть ошозо. 36Иля пежетькста мик эсь прят эйсэяк, эдь тонеть вейкеяк черь а тееви ашокс эли раужокс. 37Улезэ тынк валонк ансяк “эно”, бути алкукс меленк ёвтамс “эно”; эли ансяк “арась”, бути алкукс меленк ёвтамс “арась”. Мезе путови лиясь, се лисни Апаронть пельде».
Кежень пандомадо
38«Тынь марсинк кармавтовксонть, конасонть ёвтазель: “Сельмень кисэ – сельме, пеень кисэ – пей”. 39Мон вана кортан: кеж кежсэ илядо пандо. Бути кияк ришттянзат тонь вить чамаумарь ланга, велявтык тензэ омбоцентькак. 40Бути кияк арси суд вельде саемс кедьстэть алга панарот, максык тензэ ланга оршамопелетькак. 41Бути кияк тонь кармавттанзат мартонзо молеме ве вайгельбе, мольть мартонзо кавто. 42Кедьстэть вешицянтень – макст. Иля велявто сень эйстэяк, кона арси кедьстэть саемс мезеяк долкс».
Вечкеде душманонк
43«Тынь марсинк кармавтовксонть, конасонть ёвтазель: “Вечкть малавиксэть, душманот лангс кеж кирдть”. 44Мон вана кортан тенк: вечкеде эсенк душмантнэнь, чанстядо-баславадо тынк сюдыцятнень, тееде паро тынк лангс кежень кирдицятненень ды ознодо сетнень кисэ, кить покордыть ды пансить эйсэнк. 45Ансяк те невтьсы: тынь ультядо менелень Тетянк эйдекс. Эдь Сон максы чивалдо партнэнень ды зыянонь теицятненень, пиземеяк кучни кода видечисэтненень, истя авидечисэтнененьгак. 46Бути тынь карматадо вечкеме ансяк сетнень, конат тынк вечкить, мезень кисэ сестэ тынь учотадо Пазонть пельде казне? Натой каявксонь-налогонь пурныцятнеяк тейнить истя! 47Бути тынь шумбракстнетядо ансяк ялганк-оянк марто, мезе истямо пек паро теиде? Натой виде Пазонь асодыцятнеяк истя тейнить! 48Секскак, уледе истя пештязь парочисэ, кода пештязь парочисэ менелень Тетянк».
Currently Selected:
Матвей 5: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
