Марк 4

Валвелявкс паксянь видицядо

1Иисус таго кармась тонавтомо эрьке чиресэ. Ваксозонзо промсть истя ламо ломанть, Сонензэ савсь натой венчес озамс, уемс аламодо ве ёнов, аштемс эрькесэнть. Весе ломантне аштесть эрькенть чиресэ. 2Сон тонавтсь эйсэст ламос валвелявкссо. Тонавтомсто кортась тенст: 3«Кунсолодо: вана видицясь лиссь видеме. 4Видемстэ лиссь истя: конат-конат видьмекстнэ прасть ки чирес. Ливтясть нармунть ды кочксизь сынст. 5Лиятне прасть кевев таркас, косо модась аламоль, ды сынь курок лиссть, секс мекс модась ульнесь аволь сэрей. 6Зярдо чизэ кармась пидеме, сестэ сынь пужсть ды коськсть, секс мекс юрост-корёност ульнесть аволь кеметь. 7Лиятне прасть кирмалав юткс; кассть кирмалавтнэ ды сынст лепштизь, секскак видьмекст сынь эзть максо. 8Лиятне прасть паро модас, сеть лиссть, кассть ды макссть видьмекст: кона колоньгеменень кирда, кона кодгеменень кирда, кона сядонь кирда». 9Теде мейле мерсь: «Кинь улить мариця пилензэ – кунсолозо!»

Видицядо валвелявксонть смустезэ

10Зярдо ломантне тосто тукшность, кемгавтовотне ды лия тонавтницянзо кевкстизь Иисусонь те валвелявксонть смусттензэ. 11Сон мерсь тенст: «Тыненк максозь чарькодемс Пазонь Инязорксчинть салавачись, ансяк ве ёнотненень весемесь ёвтневи валвелявкссо.

12Вана секс сынь ванозь ваныть ды ялатеке а неить,

кунсолозь кунсолыть ды ялатеке а чарькодить.

Пазонтеньгак а велявтыть, ды пежетесткак а нолдавить».

13Мейле кевкстинзе сынст: «Арази тыньгак а чарькодьсынк те валвелявксонть смустензэ? Кода эно чарькодьсынк весе лия валвелявкстнэнь? 14Видицясь види вал. 15Улить ломанть, конат молить ки чирес видезенть ёнов. Сынь ансяк марясызь валонть, сы тенст Сатанась ды саласы седеезэст видезенть. 16Лиятне, кода видезесь кевев таркас: неть ломантне марясызь валонть, сеске кенярдозь сайсызь седеезэст. 17Ансяк юрост-корёност аволь кеметь, секскак сынь аштить аволь кувать. Зярдо сы тенст се валонть кисэ кодамояк стакачи эли пансема, сынь сеске потыть кемемастост. 18Лиятне, кода кирмалав юткс видезесь: сынь марясызь валонть, 19Ансяк те пингень мелявкстнэ, сюпавчис правтомась ды лия арсематне совить эйзэст ды лепштясызь валонть, ды сон видьмекст а канды. 20Улить ломанть, конат молить паро модас видезенть ёнов: сынь валонть марясызь, сайсызь ды видьмекст кандыть, – кона колоньгеменень кирда, кона кодгеменень кирда, кона сядонь кирда».

Валонь видестэ чарькодема

21Мейле Иисус кевкстинзе: «Лампиненть нать совавтнесызь кудос кедьге алов эли удома эзем алов путомань кисэ? Мекевланк, сонзэ путнесызь лампань кирдема таркас. 22Эдь мезеяк арась истямо салавань, конась аволь лисе лангс, ды мезеяк арась истямо кекшезь, конась аволь тееве содавиксэкс. 23Кинь улить мариця пилензэ – кунсолозо!»

24Таго кортась тенст: «Мезе марятадо – кирдинк мельсэнк! Кодамо онкссо онкстатадо, истямосо тыненккак онкстазь ули, мик седе ламояк максови тенк, кить кунсолыть. 25Кинь ули, сенень седеяк ламо максови, кинь вана арась, сень кедьстэ саеви сеяк, мезезэ ули».

Видьмекстэ

26Таго Иисус мерсь: «Пазонть Инязорксчизэ моли истямо тев ёнов. Ломанесь видсь пакся. 27Веть сон уды, од чинь ушодовомсто сти. Видьмекстнэ лисить ды касыть, ломанесь а содыяк, кода весе те тееви. 28Эдь модась сонсь касты: тееви лисевкс, мейле пря каи, прясь пешкеди видьмекстэ. 29Зярдо сюрось кенери, ломанесь сеске кучи тарваз марто важот, сась нуема ланго».

Горчица видьмеде

30Иисус таго поладсь: «Мезе марто вейкетстясынек Пазонь Инязорксчинть? Эли кодамо валвелявкссо сонзэ ёвтнесынек? 31Сон горчица видьмень кондямо, кона модас видемстэнзэ весе мода лангонь лия видьметнеде сехте вишкине. 32Зярдо сон касы, весе тикшетнеде покшокс тееви, нолды келейстэ тарадт, ды сонзэ рацяня тарадонзо потс менелень нармунтне натой пизэть тейнить».

33Ламо истямо валвелявкссо Иисус пачтясь ломантненень Пазонь валонть. Сон кортась зняро, зяро тенст чарькодевсь. 34Валвелявкстомо Иисус мезеяк эзь тонавто. Зярдо кадовильть ськамост тонавтницянзо марто, Сон панжилинзе тенст валвелявкстнэнь смустест.

Иисус лоткавты давол

35Теке чинть чокшне Иисус мерсь тонавтницянстэнь: «Печтятано эрькенть омбоце пелев». 36Сынь нолдызь ломантнень, озасть венчентень, конасоль Иисус, ды сыргасть эрькенть чирестэ. Мартост ульнесть лия венчткак. 37Кепететсь виев давол, ведьвелявкстнэ чавовсть венчентень, ведесь кармась совамо эйзэнзэ. 38Иисус те шкастонть венченть песэ удось, прялонзо ульнесь прялкске. Тонавтницянзо пувтызь Сонзэ: «Тонавтыця, Тонеть нать ялатеке, минь эль ёматано?» 39Сон стясь, варманть кардызе, эрькентень мерсь: «Лоткак! Сэтьмелгадт!» Секе шкастонть вармась оймась, ды теевсь пек сэтьме. 40Мейле Сон мерсь тенст: «Мекс тынь истят пелицят? Мекс тынк арась кемеманк?» 41Тонавтницянзо пек тандадозь вейкест-вейкест туртов кортасть: «Те кие Сон истямось, конань натой вармаськак, ведьвелявкстнэяк кунсолыть?»

Currently Selected:

Марк 4: ОВ

Highlight

Copy