Марк 9

1Иисус мерсь тенст: «Видестэ кортан тенк: конат-конат тесэ аштицятнень эйстэ куломо а кенерить, кода несызь Пазонь Инязорксчинь самонть весе вийсэнзэ».

Иисусонь лиякстомась

2Кото чинь ютазь Иисус саинзе мартонзо Петрань, Яковонь ды Иоаннонь, кустинзе сынст сэрей пандо пряс, косо ульнесть ськамост. Тосо икелест Сон лиякстомсь. 3Оршамопелензэ теевсть кувтолдыцякс, пек ашокс, теке лов, конат масторлангсо кодамояк ашолгавтыцянень истя а ашолгавтовить.

4Лиссть тенст Илия марто Моисейть, конат кортасть Иисус марто. 5Сестэ Петра мерсь Иисуснэнь: «Тонавтыця! Кода паро миненек тесэ улемс. Эрьга, тейтяно колмо кудынеть: вейкенть Тонеть, вейкенть Моисейнень, вейкенть Илиянень». 6Эдь сон сонськак эзь сода, мезть кортамс, эдь сынь пек тандадозельть.

7Лиссь пель, вельтинзе сынст, ды пеленть потсто каятотсь вайгель: «Те Монь вечкевикс Цёрам, кунсолодо Сонзэ». 8Тонавтницятне сеске варштасть пертьпельга, киньгак ваксстост, Иисусто башка, эзть нее.

9Пандонть прясто валгомсто Иисус кармавтсь тенст: «Киненьгак илядо ёвтне неезденть Ломантнень Цёранть кулозьстэ вельмемазонзо». 10Сынь Иисусонь валтнэнь кирдсть мельсэст, ды эсь ютковаст кортнесть, мезе те кулозьстэ вельмемась. 11Мейле тонавтницянзо кевкстизь сонзэ: «Мекс Койс тонавтыцятне кортыть, васняяк эряви самс Илиянень?» 12Сон мерсь каршост: «Те виде, Илиянень васняяк эряви самс ды весементь аравтомс эсь тарказонзо. Ломантнень Цёрантень, кода сёрмадозь Сонзэ эйстэ, ламо сави пиштемс ды кирдемс нарьгамот. 13Ансяк кортан тенк: Илиясь сакшнось, ды ломантне тейсть мартонзо эсест мелест коряс, кода ёвтазельгак пазмарицятнень вельде».

Аванькс оймеялтсо колазь цёрынень шумбралгавтомась

14Мейле Иисус сась лия тонавтницянзо ваксс, несь перькаст ламо ломанть ды Койс тонавтыцят, конат пелькстасть мартост. 15Иисусонь неезь, весе ломантне дивазь капшазевсть каршозонзо, шумбракстнесть мартонзо. 16Сон кевкстинзе Койс тонавтыцятнень: «Мезень кувалма тесэ пелькстамось?» 17Ломантнень ютксто вейкесь мерсь каршонзо: «Тонавтыця, мон ветякшныя Теть цёрам, сонзэ эйсэ аванькс оймеялт, кона теизе акортыцякс. 18Косто а кундасы сонзэ, ёртсы масторов, сон карми човонь нолдамо, пейсэнзэ чикордомо, весе чувтоми мик. Мон вешинь Тонь тонавтницятнень пельде панемс аванькс оймеялтонть, ансяк эзь паневе тенст».

19Сон мерсь каршозонзо: «Вай, неень пингень акемиця ломанть! Зярс Монень эряви улемс тынк марто? Зярс Тень кирдемс коронк? Ветинк цёрыненть Монень». 20Ветизь сонзэ Иисуснэнь. Аванькс оймеялтсо колазесь ансяк неизе Сонзэ, оймеялтось сеске цёрыненть рестедизе: сон прась масторов, кеверькшнесь ды пансь човт. 21Иисус кевкстизе тетянзо: «Умок-аволь истямокс теевсь?» Сон ёвтась: «Эйкакш пингестэ. 22Сонзэ ёмавтомань кисэ аванькс оймеялтось ламоксть кайсизе толскак, натой ведьскак. Бути саты виеть мезеяк теемс, ульть седеймарикс, лездак тенек». 23Иисус мерсь тензэ: «Бути саты виеть теемс»? «Весемесь тееви сенень, кие кеми». 24Эйкакшонть тетязо сеске сельведь марто серьгедсь: «Кеман, Азоро! Лездак монь кемеманть виензамо!»

25Зярдо Иисус несь, промить седеяк ламо ломанть, кардызе аванькс оймеялтонть, мерсь: «Тон акортыцякс ды амарицякс теиця оймеялт! Кортан теть: лиссть эйстэнзэ ды икелепелев зярдояк иля совсе эйзэнзэ». 26Оймеялтось серьгедезь, цёрыненть пек сорновтозь, лиссь. Цёрынесь теевсь теке кулозекс, ламот мик кортасть, сон кулось. 27Иисус саизе кедте, кепедизе сонзэ, ды сон стясь.

28Мейле, зярдо Иисус совась кудос, ды кадовсь тонавтницянзо марто ськамонзо, сынь кевкстизь Сонзэ: «Мекс миненек оймеялтось эзь паневе?» 29Сон ёвтась тенст: «Истямо оймеялтось кодаяк лиякс а паневи, ансяк озномасо ды постонь кирдемасо».

30Иисус ды тонавтницянзо кадызь те тарканть ды тусть Галилеянь трокс. Сонзэ ульнесь мелезэ, кияк теде аволь сода, 31эдь Сонензэ эрявсь тонавтомс тонавтницянзо. Сон кортась тенст: «Ломантнень Цёрась ули максозь-миезь ломантнень кедь алов, маштсызь Сонзэ, ды маштомадо мейле колмоце чистэ Сон кулозьстэ вельми». 32Ансяк сынь эзизь чарькоде неть валтнэнь смустест, кевкстнемензэ жо пельсть.

Кие весемеде покш?

33Иисус сась Капернаум ошс. Зярдо Сон ульнесь тонавтницянзо марто кудосо, кевкстинзе сынст: «Мезде тынь ки лангсо эсь юткованк кортыде?» 34Сынь чатьмонсть: ки лангсо сынь эсь ютковаст пелькстасть – кие эйстэст весемеде покшось. 35Иисус озась, тердинзе кемгавтовонест, мерсь тенст: «Кинь мелезэ покшокс улемс, се улезэ весемеде вишкине ды весенень урекс». 36Мейле Иисус сайсь эйкакш, аравтызе тонавтницянзо куншкас, кутмордызе ды кортась тенст: 37«Кие саи эстензэ Монь лемем кисэ вейке истямо эйкакш, се Монь сайсамам. Кие Монь сайсамам, се аволь ансяк Монь, Кучицямгак сайсы».

Кие аволь минек каршо, се минек кисэ

38Иоанн каршонзо мерсь: «Тонавтыця! Минь неинек ломань, кона Тонь лемсэ идемевсть панси, ансяк сонсь мартонок а яки. Минь кардынек сонзэ, мекс сон минек марто а яки». 39Иисус мерсь: «Илинк карда сонзэ: кие Монь лемсэ тамашат теи, сенень Мондень берянь вал а ёвтави. 40Кие аволь тынк каршо, се тынк кисэ. 41Кемеде Монень: кие максы тенк ведь кече секс, мекс тынь Христосонь, се питнень пандомавтомо а кадови.

42А вана кие совавты пежетьс куш вейкешка неть Монень кемиця вишкинетнень-асодавикстнэнь ютксто, сенень седе паро улевель, поводевельть кирьгазонзо яжамо покш кев ды ёртовлизь иневедьс. 43Бути тонь кедеть совавты эйсэть пежетьс, керик сонзэ. Ве кедтеме пингеде пингень эрямонтень совамось ули теть седе паро, кавто кедь марто тоначинь амадниця толс ёртомадонть, 44косо сынст сэви суксосткак а кулыть ды толоськак а мадни. 45Бути тонь пильгеть совавты эйсэть пежетьс, керик сонзэ. Ёколдозь пингеде пингень эрямонтень совамось ули теть седе паро, кавто пильге марто тоначинь амадниця толс ёртомадонть, 46косо сынст сэви суксосткак а кулыть ды толоськак а мадни. 47Бути тонь сельметь совавты эйсэть пежетьс, таргик сонзэ. Ве сельме марто Пазонь Инязорксчинтень совамось ули теть седе паро, кавто сельме марто тоначинь амадниця толс ёртомадонть, 48косо сынст сэви суксосткак а кулыть ды толоськак а мадни.

49Эрьвась салтови толонь пачк ютазь ды эрьва аноксоськак салтови салсо. 50Салось лезэв, ёмавтындерясы вана сон растонзо, сестэ кода тейсак одов саловокс? Ванстынк эсенк эйсэ салонть ды эрядо ялгаксчисэ эсь юткованк».

Currently Selected:

Марк 9: ОВ

Highlight

Copy