Yohana 11
11
We da Liyazarus
1Ama nee də, kwakɨngɨn nə Liyazarus. Sɨnə dɨ vor vɨra Betani, də gə Maryamu ka zɨbərə Marta. 2Maryamu tɨngɨn nə pukə Həmɨmiye maare#11.2 Maaranə nee ka pomo ɨhɨng-ɨhɨnge. a mbwayingɨn ngga fegərən ka shewo nəngrə.#11.2 Naasə: Yohana 12.3. Mufəngrən nə Liyazarus a bəə ootə. 3Yə Marta ka Maryamu nə lyenshe boyə Yesu atɨ, “Həmɨmiye, ma hye dɨ mworən nə bəə ootə.”
4Ite Yesu a kɨl ləngɨn, nda sa atɨ, “Wule oote, aa ootɨ wo, ootɨngɨn nə gəkɨlə mya fukadə Həmɨnpwa a ndukodə Nze dan.” 5Yesu a dɨ mwo Marta ka mwafɨrə Maryamu ka Liyazarus. 6Kat ka angɨn, ite nda kɨl lə ootɨngɨn da Liyazarus, nda nzaa sɨnggən bətə kpe a haa nda gə də.
7Nda shea sa lagbe dan atɨ, “Mya mɨna mɨnəmə vor njiya Yawudiya.”
8Lagbe dan a san, “Nzə-kəndəshe, aa ɓəgəng nə Yawude a ɨlə gə təna kalara ka fare, hye ɓa mɨna mɨnə hangɨn ɓə?”
9Yesu a luwa a sarən atɨ, “Aa fəre a dɨ fɨla ka hawure a zə kaade ma? Ma dɨ woyi ka fəre, mangɨn aa dɨ pawo, gəkɨlə sɨne dɨ naa haa gə ɓɨrtɨ vɨratɨnə. 10Ma kana woyo ka tukotə a vor kulitə, də ma a dɨ pawo, gəkɨlə ɗongə ɓɨrtə.”
11Ite nda byelə she a mbəə, nda sarən atɨ, “Ndewegəm Liyazarus ndə bi dɨ shini, hɨn ɓa wudə a dɨ maddən gə shintə.”
12Lagbe dan a san atɨ, “Həmɨmiye, anda shinə nda dɨ shinə ndi ɓa maɗə a piyagə ootɨngɨn.” 13Ləmə wo Yesu a dɨ boyə lagbe dan, təna ngguro atɨ lə shinti.
14Də Yesu a boyərən bwang, “Liyazarus yerə. 15Hanɨnyi gə hɨn tamdə a hakan, sa ɗa hanɨnyi nə gəkɨlə le dəwnə, gə hwuna ɗɨmə a mwake a gɨɗi. Maɗəm mya wudəm.”
16Ndi Tomas a mya dɨ wa atɨ Didemu (naarəngɨn nə zarə), a sa mbiɗisərən atɨ, “Mya wudəm kat gə mya dɨ mbərəm kan.”
Yesu nə mattə gə we sɨnə myentə
17Ite Yesu a tɨlə hangɨn, Liyazarus yerə mye ɗɨk we ka bətə fwat. 18Betani nee gbyel ka Urshelima, wakasərən meltə kpe. 19Imi dɨ vor Yawude hananang a maɗa a shi haka yə Marta ka Maryamu gə təna wunakarən, a tal yedingrən gə mufəngrən a yeri. 20Ite Marta a kɨlə atɨ Yesu nee a nə tɨfe dɨ shi, ngga dɨmə a kultən. Maryamu a mbiɗi hwoɗye. 21Marta a sa Yesu atɨ, “Həmɨmiye, anda hyenə nda ga, mufa aa dɨ nda mbɨrə. 22Kat ka angɨn hɨn leyə atɨ nagi mɨnə hye nyisə Həmɨnpwa ndi ɓa vu səngɨn.”
23Yesu a sarə atɨ, “Mufanga ɓa mɨna maɗə ka myentə.”
24Marta a luwa a san, “Hɨn leyə atɨ ndi ɓa maɗə a fərə mattə gə we a fərə kpawtɨ vɨratə.”
25Yesu a sarə atɨ, “Hɨnə mattə gə we, hɨnə myentə. Ma mwake gɨɗi, nagi nda mbɨrə, ndi ɓa maɗə ka myentə. 26Ma mgban ka myentə mwake gɨɗi, mangɨn aa dɨ ga mbɨrə. Hye mwaka ləngɨn?”
27Ngga san atɨ, “Həmɨmiye, hɨn mwadiyale hyenə Ma Həmɨnpwa a Yaɓwarən Nze da Həmɨnpwa a shi vɨratə.”
28Ite Marta a byelə a mbəə, ngga mɨnə hwoɗye a wa mwafɨngrə Maryamu təna kangə gyenge, ngga sarə atɨ, “Nzə-kəndəshe nə ga, sɨne dɨ mwo naa sa.” 29Ite Maryamu a kɨlə she, ngga bɨrpə a maɗə tan-tan a dɨmə a zə haka Yesu. 30Itɨngɨn Yesu aa nda pɨra a vor vɨratɨngɨn, sɨne a haa Marta a pan də. 31Ite Yawudee shi hwoɗye dɨ tal yedingrə a naa Maryamu bɨrpə maɗə tan-tan, təna dɨmə a koɗərə, təne kana atɨ a taane ngga dɨ muɗə ɓa dɨ tuwo.
32Ite Maryamu a tɨlə haa Yesu a gə də, ngga fukə humwasən a san, “Həmɨmiye, anda hyenə nda ga mufa aa dɨ nda mbɨrə.”
33Yesu ɓe naarə dɨ tuwi, Yawude kwaɗarə mgban nee dɨ təwi, ndi mgban le a hasən nda ɗa yedi-kɨttə ka ləngɨn kɨr-kɨr. 34Nda ɗiyərən, “A ndo haa gə taanəngɨn?”
Təna san atɨ, “Həmɨmiye, wa niyi.”
35Yesu a tuwo. 36Yawudengɨn a sa, “Niyəm, namə mwote nda dɨ mworən!” 37Imi mgban dɨ vorsərən a ɗiyə atɨ, “Ɓətɨ ma wana dii wele, aa kana nda mbədən gə we?”
Yesu a maddə Liyazarus gə we
38Yesu a mɨna ɗa yedi-kɨttə kɨr-kɨr, nda gɨsə gbyel a haka taane. Taanəngɨn nee a gonggoro fara, mya gbə kwaamɨngɨn ka faratə a dyengələn. 39Yesu a sarən atɨ, “Mgbəngtəngəm də faratɨngɨn gə kwaamɨ taane.”
Marta, zɨbə ma ka bətə, a sa Yesu atɨ, “Həmɨmiye, gəngnə we kɨɗə kɨr-kɨr, gə mye ɗɨkə ka bətə fwat supo.”
40Yesu a sarə, “Taa səw atɨ hye kana mwake a gɨɗi, hye ɓa naa fukata Həmɨnpwa ma?” 41Təna mgbəngtəngdə faratɨngɨn gə kwaamɨ taane. Yesu a maddə nəngɨn a pwa, nda ɗa hiwtə a sa, “Baa, hɨnə dɨ ɗəw usəkətə gəkɨlə hye duwa kɨlti. 42Hɨn leyə atɨ hye nee dɨ kɨlti fərə-fərə. Kat ka angɨn na boyo sə gə le da minə kangə haa nə kat, gə-angɨn a gwadərən təna mwake a gɨɗi atɨ hyenə lyanari.”
43Yesu ɓe boyo sə, nda waha ka korme kpan, “Liyazarus, dɨma.” 44Ma mbɨri a dɨmagə taane, tyefingɨn ka mbwayingɨn kat ka humwasən nee mya takə ka foowe.
Yesu a sarən atɨ, “Paramgə foowa, ɗakamən a nda muɗə.”
Mye shalale ɓa ɓɨl Yesu
(Matta 26.1-5; Markus 14.1-2; Luka 22.1-2)
45Ite imi dɨ vor Yawudee hananang shi ɓa wunaka Maryamu a naa sa Yesu a ɗa, təna mwakan atɨ sɨnə Ma Həmɨnpwa a Yaɓwarən. 46Imi mgban dɨ vorsərən a wudə haka Farise a gomo ka sa Yesu a ɗa. 47A hangɨn kɨsehəmi kpan-kpanye ka Farise a wa peta ji-shalale da Yawude kat. Təna ɗiyəsə atɨ, “Ɓə mɨnə mya ɗam? Ndi ma mya dɨ bwe ləngɨn nə woyi dɨ ɗa zərgi shikoshopye hananang. 48Mye kana ɗakamə ma ɓəgəng nda pɨrə humwa ka shee nda dɨ ɗa, ɓwaare kat ɓa mwadiyale kan, yə həmi njiya Roma ɓa mɨna asɨ lugəm Shafe ka njiya dam, mya yerəm ɓaa.”
49Hiɗə dɨ vor mi kpan-kpani Yawude a mya wa atɨ Kayafas, sɨnə Kɨsahəmə kpane mgban, nda byelə a sa, “Mɨnə hwuna leyə ya? Di hwunaa lee asa! 50Ɓə wula ɓwaara hiɗə a mbɨrə gə le da myee dam kat, angɨn nə pɨrgə ite atɨ myee dam kat a mbərə.”
51Lanə Kayafas a boyo, aa a nənəngɨn. Ndaa lee la nda boyo, shezə gə sɨnə Kɨsahəmə kpane, kpalə nda kpalə atɨ Yesu ɓa mbɨrə gə le da Yawude kat, 52aa gəkɨlə le da Yawude ɓəmbə, shezə gə je da Həmɨnpwa 'ye fəli mbəgə vɨratə kat, gə nda mɨnadərən kat, təna peyə a gə hiɗə. 53A fərəngɨn mgban Yawude a peyə a shalasə le gə təna kɨt Yesu a ɓɨlə.
54Gə ləngɨn mgban, Yesu aa yə mɨna woyo haa bwange bwang a waka Yawude a Urshelima, nda dɨmə a muɗə vor vɨrate mya wa atɨ Ifremu gbyel ka ɓaawe. Nda nza hangɨn ka lagbe dan. 55Ite sɨkwalə Lawuttə da Yawude sɨka, ɓwaare hananang a dɨmə dɨ vor vɨre som-som a muɗə vor Urshelima, gə təna ɗa sɨkwalə suɓwagə sɨsərən ɗəmɗəm a luwa kwalə Lawuttɨngɨn. 56Təna woyo ta ɨl Yesu ite təne a Kwa-Shafe, tən ta ɗiyəsə atɨ, “Ya hwuna niya? Ndaa dɨ shi ɗa sɨkwalə sɨlangsətɨngɨn ma?” 57Kɨsehəmi kpan-kpanye ka Farise a boyə ɓwaare atɨ anda mye lee haa Yesu a gə də, a mya boyərən gə təna kɨttən.
Currently Selected:
Yohana 11: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
