Yohana 2
2
Sɨlangsətɨ ngajawne a vɨra Kaana
1A mwaakɨnə bətə, Maryamu nggi nuwogə Yesu a wudə haa sɨlangsətɨ ngajawne a vor vɨra Kaana ite a vor njiya Galili, 2sə mgban mya wa Yesu ka lagbe dan a haa ngajawnəngɨn. 3Ite haɓi inabite ɓwaare a dɨ soɓwo haa ngajawnəngɨn a mbəə kat, nuwogə Yesu a shi hakan a san atɨ, “Haɓi inabitə mbəgə ɓwaare.”
4Yesu a sarə, “Nuwo, ya hye ɗe she? La aa hɨngginə, fəre de aa nda tɨla.”
5Nuwogən a boyə ji-hwoɗyee dɨ ɓyana shee a haa ngajawnəngɨn atɨ, “Ɗam sa kat nda boyownə.”
6Gbyel a hangɨn səgi haɓye mya ɗa ka fara nee sherəkə hangɨn tukoltaka, a wule səgye Yawude a dɨ kangdərən ka haɓye gə kwalə suɓwagə sɨsərən. Nagi ndo sɨkti ɓa nggur kyeɗəwye bəwtə mwaakɨn.
7Yesu a sa myee dɨ ɓyana shee a haa ngajawnəngɨn atɨ, “Namdə səgingɨn ka haɓye.” Təna naadərən pas-pas kat.
8Də nda boyərən, “Kɨnəm haɓingɨn vəmə kpanaate.”
Təna kɨn haɓingɨn a zəkan kaarən. 9Kpanaate a saɓwa haɓingɨn, ndaa le haa haɓi inabitɨngɨn a shi sə, myee mya lyentɨrən ka haɓi inabitɨngɨn nə leyi. Kpanaate a wa ngaja#2.9 Ngaja nə mura nzaa hwoɗye hwel-hwel. 10a san, “Imi a dɨ dɨmaadə haɓi inabitɨ pepeye a kwamətə, ɓwaare kana soɓo a mbəə, mya ɓə shea dɨmaadə i gbaanye. Hɨnggu, hye kəpdə i pepeyee pɨri, ɓəgəng nə hye shea dɨmaadərən.”
11Tiyatɨ ɗa səkushipe da Yesu nə anə nda ɗarən a vor vɨra Kaanate a njiya Galili. A hangɨn Yesu a bɨldə fukatɨ dan, lagbe dan a mwadiyale kan.
12Beetɨ sɨlangsətɨngɨn, Yesu ka nuwogən ka mwafengɨn ɗɨkənə lagbe dan a jengə a muɗə vɨra Kafanawum, təna bə kpe də.
Yesu a om ji-nggalatə gə Shafe
13Ite kwalə Lawutta Yawude sɨka, Yesu a nggɨrə a mudə vor vɨra Urshelima. 14Nda pa ɓwaare a Kwa-Shafe təne dɨ zɨm lumotə, mingɨn nee dɨ ɗərdə naake ka mbage ka ji-guguyi gɨrtə a 'ye mya dɨ hama kaarən a Shafe, myee dɨ nggəddə taa mgban təne nza kat.#2.14 Ji-nggəddə taa a gə Kwa-Shafe gə tən ta nggəɗə ɓwaare də wule taa da Yawude a kana mya mbwa shemtə kan a vor Shafe. 15Yesu a bal sɨfele ka salake, nda omtɨrən kat ka sɨgɨrtə, mbage ka naake, a dɨmdərən gə Kwa-Shafe, nda gbara taa mya pukdən a dɨ nggəddən, nda ləkədə tebɨlyee mya pukdə taa a nəngrən kat a njiya. 16Nda sa myee dɨ ɗərdə ji-guguyi gɨrtə atɨ, “Porəmgə shee dɨməm dərən, ɓe hwunaa mɨndə hwoda Baagi haa zɨm lumoti.”
17Lagbe dan a ɗyanga ka la mya doro vor Malɨmtɨ Ɗəmɗəmtə atɨ, “Hɨnə ka hɨmne ka jiwnə hwoda Baagi kɨr-kɨr ɓətɨ ɗiyə dɨ ləwo huboshi.”#2.17 Naasə: Dyemshe 69.9.
18Mi kpan-kpanye da Yawude a ɗiyən, “Ndawula səkushipə hye ɓa ɗa, a ɓa bɨldə gəte hye gə kaarə a nə shee hye dɨ ɗa?”
19Yesu a luwa a sarən, “Falamə Shafanə, hɨn mgban na maddən a vor bətə mwaakɨn.”
20Yawude a luwa a san, “A Shafa nwosən a nggur kyawatə bəwtə fwat a mbiɗi-tukoltaka, sɨnə hye sa atɨ hye ɓa maddən a vor bətə mwaakɨn?” 21Naarə Shafa Yesu a dɨ kənə nə sɨsən. 22Beetɨ ite Yesu maggə we ka myentə a vor bətə mwaakɨn, lagbe dan a ɗyanga ka la nda boyo. Təna mwadiyale ka ləməgyee mya doro vor Malɨmtɨ Ɗəmɗəmtə ka ləməgyee Yesu a boyərən.
Yesu lee hubo ɓwaare
23Ite Yesu nee a vor Urshelima, a ite ɓwaare nee dɨ shi sɨkwalə Lawuttə da Yawude, myee hananang naa zərgi shikoshopye Yesu a ɗa, a mwadiyale kan. 24Shezə, ndi Yesu ka nənəngɨn, ndaa mwakarən, gəkɨlə ɓə lee sa a vor hubo ɓwaare. 25Ndaa salə ite atɨ ama a boyən le a nə ɓwaara, gə ɓə lee sa a vor hubo ɓwaare.
Currently Selected:
Yohana 2: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
