Yohana 5
5
Yesu a gwadə a gbəgərə a gaɓaktɨ Betseda
1Beetɨ angɨn, Yesu a wudə Urshelima, gəkɨlə sɨkwale da Yawude. 2A vor Urshelima gbyel ka kwatɨfa mya dɨ wa atɨ Kwatɨfə Mbage, itɨ gaɓaktɨ nee də, mya wa ka kwa-Yawude atɨ Betesda, mya kwapa kwakre tuf a hangɨn. 3A kwaamɨ gaɓaktɨngɨn, ji-ootə a dɨ pukə, welye, gbəgərye ka ji-ootɨ ndongtə a ootɨ mbɨrtɨ sɨtə [a dɨ kula mya ngama haɓye. 4Malyene da Həmɨnpwa kana janga asɨ ngama haɓingɨn, ma kwaməte jengə vorsərən ɓa piyagə sɨtɨ ootɨ dan a ɗɨm sɨtɨ dwattə.]#5.4 Kpawtɨ kada mwaakɨnətə ka a fwaɗətə tamdə a vor i dorshi. 5Ama nee a hangɨn ka ootɨ sɨtə, kyawatə bəwtə mwaakɨn a mbiɗi-fwa-fwat. 6Ite Yesu a naa bəta mangɨn, ɓə leyə mgban atɨ mangɨn bə hangɨn ɓongə ka ootə. Yesu a ɗiyən, “Hye nee dɨ mwi atɨ hye ɗɨm sɨtɨ dwatta?”
7Nzə-ootɨngɨn a luwa a sa Yesu atɨ, “Taa ɓwaara ke ɓa ngguti a jengdi a vor haɓi gaɓaktɨngɨn, hɨn kana ɓərə atɨ ɓa pɨrə vor haɓye, ama a lugi kwamətə a jengə.”
8Yesu a san, “Maɗi tɨfɨt kɨzətɨ dəw woyi.” 9Tee gbyel a hangɨn ootə a dɨmə, nda maɗə a tɨfɨt kɨzətɨ dan a woyo.
Fəra mya nggurəngə ootɨngɨn də, fərə piyatɨ da Yawude. 10Gə ləngɨn, mi kpani Yawude a sa ma ootə a dɨmgən atɨ, “Supo fərə piyati, ɓashitɨ dam a sa, aa wula ama nggur kɨzətɨ dan.”
11Mangɨn a luwa a sarən atɨ, “Ma gwadi na piyagə ootə nə se atɨ, ‘Tɨfɨt kɨzətɨ dəw, ngguri muɗi.’ ”
12Təna ɗiyən, “Nda wonə ma səw atɨ tɨfɨt kɨzətɨ dəw ngguri muɗi?”
13Ndi ma mya nggurəngə ootɨngɨn, ndaa lee ma gwadən, gə Yesu ɗaka hangɨn pɨrə vor təkə-təkətɨ ɓwaare.
14Aa ɓongə Yesu a pa mangɨn a Kwa-Shafe, nda sa mangɨn atɨ, “Hye niya, ɓəgəng hye piyagə oote gu, ɗaka ɗa səhase gəkɨlə ɓe sa hashi pɨrgə oote gu aa yə mɨna bəngra.” 15Mangɨn a muɗə a boyə mi kpan-kpanye da Yawude atɨ Yesu nə gwadən nggurəngə ootɨngɨn.
Gətɨ da Yesu
16Gəkɨlə wule lyente ɓətɨ ite Yesu a dɨ ɗa a fərə piyatɨ da Yawude, təna maɗə ta ɗəmgən ləməgye. 17Də a hangɨn Yesu a sarən, “Baagi nee a kwaamɨ lyentə dɨma supo ndaa ɗakarə nagi a fərə piyatɨ dam, hɨn mgban hɨne a vorsə.”
18Gəkɨlə wule la Yesu a boyo, mi kpan-kpanye da Yawudengɨn a kangə dwat ɓa ɓɨltən a nə shee kpe. Sə kwamətə, nda ɗa lyentə a fərə piyatɨ da Yawude, aa angɨn nə ɓəmbə, nda mɨna sa atɨ Həmɨnpwa nə Baagən, nda dɨ kana nəngɨn ka Həmɨnpwa.
19Yesu a luwa a sarən, “Diyalə na dɨ boyownə, Nze aa dɨ mba asə a ɗa a nənəngɨn, sa nda naa Baagən a dɨ ɗa, sɨnə mgban nda dɨ ɗa. 20Gəkɨlə Baatə a dɨ mwo Nzəngɨn, səngɨn ɗɨki nda bɨlən shee kat nda dɨ ɗa, Baatə ɓa bɨlə Nzəngɨn wule shee pɨrgə inə hwuna naarən a 'ye ndi ɓa ɗa gə hwuna ɗa ndəle. 21Ɓətɨya Baatə a dɨ maddə wogye a vərən myentə, sə mgban Nzəngɨn a dɨ vədə myentə a haka myee nda mwo. 22Aa angɨn nə ɓəmbə, ndi Baatə ndaawa ɓashidə ama, nda ɗaka ɓashitə a tɨfə Nzəngɨn, 23gə ɓwaare kat a ndukodə Nzəngɨn, ɓətɨ təna dɨ ndukodə Baatə. Ma kat aa ndukodə Nzəngɨn, mangɨn aawa ndukodə Baatə a lyanarən.
24“Diyalə na dɨ boyownə, ma kat sardə kwakingɨn kɨlti, nda mwaka ma lyanari a gɨɗən, mangɨn nee ka myente kaaru-kaaru, myaa dɨ ɓashiyə mangɨn ɓashitɨ we, gəkɨlə mangɨn lawuggə we pɨrə myente kaaru-kaaru. 25Diyalə na dɨ boyownə, fəre nee ndi shi, fərəngɨn tɨla, a ite wogye ɓa kɨla kormɨ Nze da Həmɨnpwa, myee kat kɨl kormɨngɨn ɓa ɗɨm mbətə ka myente kaaru-kaaru. 26Naya Baatə a gəə sɨnə kwirə myentə, sə mgban nda ɗɨkdə Nzəngɨn nda gəə sɨnə kwirə myentə. 27Baatə a və Nzəngɨn gətɨ ɓashitə gə sɨnə Nze da Ɓwaara.
28“Ɓe hwunaa ɗa ndəle ka ləngɨn, gəkɨlə fəre nee dɨ shi a ite wogyee kat a vor taane ɓa kɨl kormɨngɨn. 29Tən kat ɓa dɨmagə vor taane, myee ɗa səfeme ɓa maggə we a pɨrə myente kaaru-kaaru. Myee mgban ɗa səhase ɓa maggə we mya ɗarən ɓashitɨ we, a waa kaaru-kaaru. 30Hɨn ka nəna taa dɨ mba asə a ɗa, hɨn kana dɨ ɓashiyə, na dɨ sardə kwaki a haka Baagi. Ɓashitɨ de mgban i diyalə, gəkɨlə taawa ɗa asə a nəna pɨrgə hɨnggə ma lyanari.
Mye takale a nə Yesu
31“Anda hɨnə hiɗə kal-kal dɨ byelə na, la na dɨ boyo lə ɓayə. 32Ama nee də som dɨ byeli takale a na, hɨn leyə atɨ takale dan a na diyalə.
33“Hwuna lyen ɓwaare a haka Yohana ndi mgban nda boyownə diyale a na. 34Nagi ka sate atɨ hɨn taawa mwo takale da ɓwaare a na, kat ka angɨn na boyo sə gəkɨlə hwuna ɗɨm mbətə. 35Yohana nə tikɨla dɨ ləwi dɨ ɓɨri, hwun mgban hwun mwa ɓa nza vor ɓɨrta Yohana a ɗa hanɨngtə a vor bətə ɓyeləng.
36“Hɨnə ka takala pɨrgə hɨnggə Yohana. Gə lyente Baatə a vi na ɗatɨrə a kpawarə kat, kotə ite mgban na dɨ ɗatɨrə, lyentɨngɨn nə ɓa takale a na atɨ Baatə nə lyanari. 37Ndi Baatə ka nənəngɨn, ndi ma lyanari ɓə bwe le a na. Hwunaa ndaga kɨla kormɨngɨn, hwunaa ndaga nan a lee ya nda gə, 38le dan mgban tamdə a hubosəwnə, gəkɨlə hwunaa luwo, hwunaa mwaka ma nda lyana a gɨɗən. 39Hwuna dɨ pyel vor Malɨmtɨ Ɗəmɗəmtə, gəkɨlə hwun leyə atɨ də hwun ɓa ɗɨm myente kaaru-kaaru. Sə mgban Malɨmtɨ Ɗəmɗəmtɨngɨn nə byeli takale a na, 40kat ka angɨn hwuna kwo shite hwun ɓa shi hake gə hwuna ɗɨm myentə.
41“Hɨn taawa ɨl ɓondiha dɨ haka ɓwaare, 42shezə hɨn leyə atɨ hwun tam ka mwoha da Həmɨnpwa a hubosəwnə. 43Na shi a vor kwakɨ Baagi, kat ka angɨn hwunaa luri, ama som kana shi hakəwnə a nənəngɨn, hwun ɓa lurən. 44Hwun ɓa ɗa ya hwuna ɓə mwake? Aɓə hwuna dɨ ɨl ɓondiha dɨ haka ndeyingəwnə ɓwaare ɓəmbə, hwunaawa ɨl humwaha dɨ haka Həmɨnpwa ndi hiɗə kal-kal.
45“Ɓe hwunaa niyə ɓətɨ hɨnə ɓa kaadəwnə a haka Baatə. Ma dɨ kaadəwnə nə Musa, sɨnə she ma hwuna mwakan a bədə myensəwnə a nəngɨn. 46A hwun da mwaka Musa gɨɗən, hwun ɓa nda mwake, gəkɨlə a na nda dorshe. 47Shezə a hwunaa mwaka shee nda doro, hwun ɓa ɗa ya hwuna ɓə mwaka ləməgye de 'ye na boya?”
Currently Selected:
Yohana 5: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
