Luka 1
1
Mgbaalə dor malɨmtɨnə
1Makpane Tiyofilus, ɓwaare hananang ɓərə gə təna dorshe a nə shee Həmɨnpwa a ɗa a wakasəm. 2Mi kwaməte naa shingɨn ka diingrən vədə nəngrən gəkɨlə təna bwe ləngɨn, tənə pɨri boyenə ləməgingɨn. 3Hɨn mgban na nza a nidə shingɨn kpəkəkə dɨ tiyatə. Gə-angɨn makpane Tiyofilus, na niyə ɓə wula na doru shee kat ɗa, a sherəku də ləməgingɨn tərəng-tərəng, 4gəkɨlə hye leyə mbak-mbak atɨ, ləməgyee mya boyo kat diyalə.
Malyene a hiwa ka mwasaa Yohana
5A nzata Hiridus, hama Yawudiya, a kɨsahəmə da Həmɨnpwata Yawudeti nə də, mya dɨ wa atɨ Zakariya, a saare da kɨsehəmye, a mgba kɨsahəmaa mya wa atɨ Abija. Mesən Alisabatu nə dɨ kwirə kɨsehəmye a saare da Haruna. 6Tən dɨ kpeyə mi pepeyi a humwaa Həmɨnpwa, təna dɨ koddə gɨrahaa Həmɨnpwa a və Musa pepe. 7Ɓə tən, taa ji kaarən, gə Alisabatu jinti, tən kat tən iiragə mwasatə.
8Lyentə ɓe taka shi saare da yə Zakariya, mya nggɨltən kɨsahəmə gə lyentə a Shafe.#1.8 Shafe nə vɨnə hiwta Yawude a Urshelima. 9Ite ta koɗə kwalə nggɨl kɨsehəmye da Yawude, mya nggɨltən gə hamatə ka sɨ ɨhɨng-ɨhɨngye#1.9 Sɨ-ɨhɨng-ɨhɨngye nə sa ka pomo pepeye. a Shafe. 10Ite sɨne a Shafəngɨn dɨ hama ka sɨ ɨhɨng-ɨhɨngye, ɓwaare kat a kanggə haa bwange ta ɗa hiwtə, ta kularən.
11Də a hangɨn a vor Shafe malyene da Həmɨnpwa a dɨma ka Zakariya, a kangə gyenge, a basa zɨməngə kɨritə. 12Ite Zakariya a nan, haa a gən vut, ka kala. 13Malyene a san, “Zakariya, ɓe kala aa gu, Həmɨnpwa kɨl hiwte hye dɨ ɗa. Mesa Alisabatu ɓa mwasəw nze, kwaka hye ɓa ɗɨkən nə Yohana. 14Haa ɓa nɨngu hye ndarangə ka mwasasən, sə mgban haa ɓa nɨngə imi hananang gə ləngɨn. 15Nzanga ɓa gəə ma tikɨsə kɨr-kɨr da Həmɨnpwa. Ndaa dɨ ga sop vwe, ka sa kat dɨ ɗɨkdə ɓwaara nda kpasə, gə ka wapsən Pitɨ Ɗəmɗəmtə ɓa janga a nəngɨn, a nza ɓwaa kan. 16Mi Israila hananang, a myee ɗeyi, ndi ɓa viriwadərən a haka Həmɨnpwatɨ darən. 17Sɨnə nzə-fwa humwatə a ɓa luwo Həmɨmiye kwamətə, sɨnə ɓa koɗə mbwayi kpale da Həmɨnpwa a mya wa atɨ Iliya kat ka gətɨ dan. Ndi ɓa gwadə sɨnggə je ta ɗyanga ka jingrən a nidərən təna mɨna a peyə a gə hiɗə. Myee mgbɨləha ɗaka Həmɨnpwa mgban, yedingrən ɓa mɨna a banga a tɨfe, təna mɨna a haka Həmɨnpwa gə lyenta Yohana.”
18Zakariya a ɗiyə malyene atɨ, “Na ɗa ya na ɓə leyə atɨ la hye boyo ɓa nzasə? Gə hɨn iira, meshi mgban iira.”
19Malyene a luwa a san, “Hɨnə Jibɨrailu, na duwa kangə haka Həmɨnpwa gə lyentə. Ndi lyanari a hakəw ka lə fema nə.” 20Gə tee mwadiyale ka lanə na boyu, gə-angɨn mgban tee ɗiyə mba byele baa fəra mya mwasa nzəngɨn kan, də kormi ɓa naa a fəra mya kənə.
21Myee kanyi dɨ kula Zakariya a ndələ ka sa ɗa nda ɓə ɓwanga a vor Shafe. 22Ite nda dɨma, ndaa mba byele ka ɓwaare, ndi ta ɗyefi ka tɨfəngɨn. Də təna leyə atɨ ɓə naa haa a vor Shafe.
23Ite bətɨ lyentɨ dan a Shafe ɓe naa, nda mɨnə hwoɗye. 24Aa ɓongə, mesən Alisabatu a ɗɨm waptə, ngga gbə nəngrə a hwoɗye lyekətye tuf. 25Ngga sa, “Səfema Həmɨnpwa a ɗe a porigə sopye a wulakenə ɓa ɗa ɓwaare aa diyə ushiri.”
Malyene a hiwa ka mwasa Yesu
26-27Həmɨnpwa a lyana malyene dan Jibɨrailu a haka rikite mya wa atɨ Maryamu a vɨrate mya wa atɨ Nazarat a njiya Galili. Itɨngɨn lyekəti wapta Alisabatu nee tukoltaka. Maryamu tɨngɨn nə mura mya wa atɨ Yusufu a tiyagərə ɓa ɗɨmə. Yusufu nə dɨ kwirə Dawuda. 28Malyene a pɨra a wunakarə, nda sarə atɨ, “Həmɨnpwa nee kəw, luu fukatə hye mate Həmɨnpwa a vu humwa-shengtə a wulakəw, na Həmɨmiye a gə ɓwaa kəw.”
29Le a ɓwa Maryamu, kala a gərə ka ləməgyee malyene a boyo, ngga ndələ ka naarə ləngɨn. 30Malyene a sarə atɨ, “Maryamu, ɓe kala aa gu, hye ɗɨm humwa-shengtə a haka Həmɨnpwa! 31Hye nee ɓa ɗɨm waptə, a mwasa nze, kwakɨngɨn nə Yesu. 32Ndi ɓa gə ka fukatə kɨr-kɨr taa mbati kaarə, mya warən atɨ Nze da Həmɨnpwa ndi Həmɨ gətə kat. Həmɨnpwa ɓa fukadə həmne dan a koɗə kwirə Baagən Dawuda. 33Ndi ɓa ɗa həmne a nə hwoda Yakubu kat, həmne dan ɓa nza kaaru-kaaru.”
34Maryamu a ɗiyə malyenəngɨn atɨ, “Na ɗa ya na mwasa nze, a taa ndaga lee mure?”
35Malyene a luwarə atɨ, “Pitɨ Ɗəmɗəmtə ɓa janga a nanga, gətɨ da Həmɨnpwa ɓa takada. Gə-angɨn nza hye ɓa mwasa nzə-ɗəmɗəmə, mya warən atɨ Nze da Həmɨnpwa. 36Zə niyi, kat ka iirata nji-nuwogu Alisabatu, a ite jinti ka ɓongtə, kote ɓəgəng ka waptə lyekətye tukoltaka. 37Taa asə də gbaagə Həmɨnpwa ka ɗatə.”
38Maryamu a sa malyene atɨ, “Hɨn kɨsata Həmɨnpwa nə, sa nda kana ke kat na a nzasə.” Də malyene a ɗakarə a muɗə.
Maryamu a zə haka Alisabatu
39Mya bə aa ɓongə, Maryamu a maɗə tan-tan a muɗə itɨ vɨrati a wake mogi Yawudiya. 40Ngga zə a pɨrə hwoda Zakariya a wunaka Alisabatu. 41Naya Alisabatu ɓe kɨla wunakaha da Maryamu, nza a yedingrə a rɨfə, Pitɨ Ɗəmɗəmtə a janga a nə Alisabatu. 42Alisabatu a maddə kormɨngrə a sa, “Həmɨnpwa bɨlu pepetə pɨrgə mbiɗiti mandye kat, nzaa hye ɓa mwasa mgban Həmɨnpwa ɓa bɨlən pepetə. 43Mɨnə na gəwnə! Də nuwogə Həmɨnpwatɨ de a shike ka pepetə. 44Ite na kɨla kormi wunakaha dəw, nzanə a yedi a rɨfə ka hanɨngtə. 45Pepeta Həmɨnpwa nee kəw, gə hye mwadiyale ka ite atɨ Həmɨnpwa ɓa naadə la nda boyu!”
Dimsə ɓondiha da Maryamu
46Maryamu a sa,
“Hɨnə dɨ ndukodə Həmɨnpwa
ka huboshi hiɗə.
47Hɨnə dɨ ɓondi Həmɨnpwa Nzə-mbəshi,
48gəkɨlə ndi ɗyanga ke
hɨn kɨsatɨ dan ite aa tɨl asə,
gəngnə vɨratə kat ɓa leyə atɨ
Həmɨnpwa fukadi.
49Gə Həmɨ gətə ɗe sə kpane,
ndi Ma ɗəmɗəme.
50Nda dɨ ɗa purutɨ
myee dɨ kalan-gbəətə
a nzatɨrə kaaɗəng
dɨma a nzatɨnə ɓəgəng.
51Ɓə ɗa sə kɨr-kɨre,
myee ka ndukodə ne,
nda dɨ gbatarən
kat ka ɗyengle darən,
təna woyo hyeɗə-hyeɗə.
52Nda dɨ hyata həmye
a jangadərən gə ruutə,
myee hyata nəngrən mgban
nda nggɨrdərən a pwa ɓətɨ həmi.
53Myee ka myatə,
Həmɨnpwa a dɨ vərən sɨzɨmtə,
nda om ji-gɨnətə
təna pwal tyefingrən
a muɗə dɨ payya.
54Həmɨnpwa a dɨ ɗyanga ka kɨse dan
tən mi Israila a gwadərən,
nda dɨ ɗa purusərən,
55ɓətɨ nda boyə yə sɨnggəm lanə
a nzadən kaaru-kaaru,
a tən yə jigəm Ibɨraim ka myee dan.”
56Maryamu a ɗa lyekətye mwaakɨn a haka Alisabatu ngga ɓə mɨnə hwoɗye.
Mwasa Yohana nzə-ɗa batisɨmatə
57Ite lyekəti mwasata Alisabatu ɓe kənə, ngga mwasa nzə-mure. 58Ite ji-vɨnəgərə kat ka myee darə ɓe kɨl lə ɗate Həmɨnpwa a ɗa purusə, təna ɗa hanɨngtə.
59Beetɨ bətə fwa-fwat, təna shi ka nze gə lakəwne. Tən mwo atɨ təna ɗɨkə nze kwake ka kwakɨ baagən atɨ Zakariya. 60Də nuwogə nze a sa atɨ, “Ə'ə, a mya warən atɨ Yohana.”
61Təna sarə atɨ, “Taa ndəng ma a vor myee dəwnə ka wule kwaka atɨ Yohana.”
62Təna ɗiyə baagə nze le ka tefingrən, ɓətɨ byelə gbenyi, gə təna lee kwaka nda dɨ mwo atɨ ɓwaare a wa nze kan. 63Zakariya a ɗilə sa ndi ɓa dorshe a nəngɨn, ite mya vən nda doro atɨ, “Kwakɨngɨn nə Yohana.” Ɓwaare a ndələ ka ləngɨn. 64Də a hangɨn jiimə Zakariya a para, kwaamɨngɨn a wunə, nda tiya byele ta ɓondi Həmɨnpwa. 65Kala a gə ji-vɨnəte a bətɨ hangɨn kat, ka sa ɗa. Ləngɨn a ngguro a mbəgə mogi Yawudiya. 66Myee kɨl ləngɨn kat a Yawudiya a ndələ, təna ɗiyəsə atɨ, “Ɓə ndawulasə nza ɓa pasaa?” Gə Həmɨnpwa nee ɓwaa kan!
Zakariya a ɓondi Həmɨnpwa ka kpaltə
67Pitɨ Ɗəmɗəmtə a janga a nə Zakariya nda tiya kpaltə. 68Ndi ta sa atɨ,
“Ɓondiyəm Həmɨmiye,
Həmɨnpwata mi Israila,
nda shi gələ nda luwa myee dan.
69Həmɨnpwatɨ dam və miye
Nzə-mbəha ndi ma ka gətə
dɨ kwirə kɨsa dan Dawuda,
70ɓətɨya nda boyo dɨ kwaamɨ
kpali ɗəmɗəmye dan kaaɗəng,
71atɨ ndi ɓa mbədəm gə tɨfə ji-nyaagəm
ka ji-kwo nəngəm.
72Gəkɨlə angɨn ndi ɓa ɗa purutɨ
yə sɨnggəm ka səfeme
gə nda ɗyanga ka kɨləsətɨ ɗəmɗəmte
nda ɗa kaarən kɨnɨnɨng.
73Sə nda boyə yə jigəm Ibɨraim a nzadən,
74atɨ ndi ɓa mbədəm gə tɨfə ji-nyaagəm.
Də mye ɓa kalan-gbəətə
aa ka kala,
75ka hubosəm ɗəmɗəm
ka pepete taa mbati kaarə.
76Hye nze de mgban,
mya wara atɨ kpale da Həmɨnpwa.
Hyenə ɓa luwo Həmɨmiye kwamətə
gə hye ɗadə tɨfe dan.
77Hyenə ɓa boyo myee da Həmɨnpwa atɨ
tən ɓa ɗɨm mbətə tən kana por-njiya,
Həmɨnpwa ɓa nggurərəngə
səhase darən.
78Gəkɨlə mwoha da Həmɨnpwa
ka fyemtɨ dan ɓa ɓɨrə nəngəm ɓətɨ fərə fɨlati,
79ka myee nza vor fyemi we,
a vor kulitə,
ɓɨrtə ɓa takaa dərən a zə kaarən
a daatɨfə myentə ka ɗoltə.”
80Yohana a nduko a tɨl ɓwaara, a pɨrə humwa ka lele. Nda nza vor kaake a dɨmə fəra Həmɨnpwa a lyentən a haka mi Israila.
Currently Selected:
Luka 1: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
