Matta 14
14
We da Yohana nzə-ɗa batisɨmatə
(Markus 4.14-29; Luka 9.7-9)
1A vor bətɨngɨn, ndi Hiridus hamaa njiya Galili a kɨl ləməgye a nə Yesu, 2nda sa myee nda nza kaarən atɨ, “Yohana nzə-ɗa batisɨmatə nə maggə taane ka myentə! Səngɨn ɗɨki nda ɗɨm gətɨ ɗa shikoshopye.”
3Gə Hiridus liyaa kɨr Yohana ɓoyo ɗongə gbərəwe gə le da Hirodiya, metɨ jibiyəngɨn Filibus, 4gəkɨlə fərə-fərə Yohana a dɨ boyə Hiridus atɨ, “Ɓashita Musa aa və humwatə hye luu metɨ jibiyanga a nza kaarə meti.” 5Gə ləngɨn Hiridus a mwo atɨ nda ɓɨl Yohana, shezə kala ɓwaare a dɨ gən gəkɨlə ɓwaare nee gon Yohana ka sate atɨ ndi kpale da Həmɨnpwa nə.
6A fərə sɨlangsətɨ mwasa həmɨn Hiridus, njita Hirodiya a dɨma a wuro humwaa omyee paya kat, hanɨngə Hiridus ka wure darə. 7Nda gbə, a sa njitə atɨ, nagi mɨnə ngga nyisən ndi ɓa vərə. 8Nuwogərə a boyərə lə sa nggi ɓa nyisən. Njitə a sa həmɨn atɨ, “Vi nə Yohana a papitə ɓəgəng.” 9Le a hasə həmɨn kɨr-kɨr, gəkɨlə ɓə gbə a humwaa omyee nza kat. Taa itɨ ɗati də ndi ɓa ɗa nda kworə le, nda boyo atɨ a mya və njitɨngɨn sa ngga ɗiləngɨn. 10Mya wudə vɨnə gbərəwe a dɨ banga nə Yohana. 11Mya shikan ka nəngɨn a papitə a və njitə ngga dɨ və nuwogərə. 12Lagbe da Yohana asɨ nggur kada sɨsən a dɨ ɗɨkə, təna zə a dɨ boyə Yesu ləngɨn.
Yesu a zɨmdə morye haru bəw laka tuf
(Markus 6.30-44; Luka 9.10-17; Yohana 6.1-14)
13Ite Yesu a kɨl lə sa ɗa, nda ɗaka hangɨn a pɨrə koombotə, a ɗaka ɓwaare a muɗə a haa dɨsərən. Ɓwaare ɓe kɨlə atɨ ndi muɗə, təna dɨmgə vɨre darən a koɗən ka mbwayingrən. 14Ite Yesu a kpasə kwakatə, a nggɨragə koombotə, nda naa kaɓa təkə-təkətɨ ɓwaare, nda ɗa purusərən, a dɨmərən də oote a sɨtɨ ji-ootə.
15Ite kaade nee dɨ ɗa, lagbe dan a shi hakan a san atɨ, “Vor kaakə hanə, kaade nee dɨ ɗa, ndɨka hye boyə ɓwaare təna təkəsə a muɗə ji-vɨre kur-kuryee a hangɨn gə təna ɗər sɨzɨmtə a zɨmə.”
16Yesu a sarən atɨ, “Ɓe tənaa muɗə, hwunə ɓa vərən sɨzɨmtə təna zɨmə.”
17Təna san atɨ, “Hinə ka goɓoryi buroditə tuf ka vaakye kpe ganə mba-mba.”
18Yesu a sarən atɨ, “Wam kaarən ganə.” 19Nda boyə ɓwaare kat atɨ a təna nza nə kaake. Ite nda luu buroditɨngɨn tuf ka vaakye kpe, nda maddə nəngɨn a pwa a ɗa usəkətə, nda taka buroditɨngɨn, nda və lagbe dan, təna ɓyana ɓwaare. 20Ɓwaare a zəmshe kat a hyaɓa. Lagbe dan a pedə mosəryee mbiɗi konye bəw a mbiɗi-kpe pas-pas. 21Furo moryee zɨmshe ɓa ɗa haru bəw laka tuf, myaa bəl furo mandye ka je.
Yesu a woyə nə haɓye
(Markus 6.45-52; Yohana 6.15-21)
22Aa ɓongə Yesu a boyə lagbe dan atɨ təna pɨrə koombotə a lyembərə a nggɨrə itɨ ɓayati, nda kangə a gə ɓwaare kwasatə. 23Ite nda gərən kwasatə a mbəə, nda nggɨrə nə mwe dɨsərən a ɗa hiwtə. Kaade a ɗa sɨne a nə mwotə dɨsərən. 24Itɨngɨn mgban koombotə ndə a nə haɓye ɓong-ɓong ka kwakatə, ɗogoli hawe nee dɨ ɗyanggaradə koombotɨngɨn gəkɨlə hawa dɨ tawa.
25Ka haa kɨɗatə dung-dung, Yesu a shea dɨmə a zə hakarən, ndi ta woyə nə haɓi gərəngɨn. 26Ite lagbe dan a nan dɨ woyə nə gbɨnuwe, kala a gərən, təna gəəshe atɨ, “Kpiriti.”
27A hangɨn gbyel Yesu a sarən atɨ, “Mbam ɗəng, ɓe kala aa gəwnə, hɨnə!”
28Bitrus a luwa a san atɨ, “Həmɨmiye, anda hyenə, zə boyi na woyo a zə hakəw a nə haɓye.”
29Yesu a san atɨ, “Wa.”
Bitrus a jenggə vor koombotə a tiya wetə a nə haɓye ta zə haka Yesu. 30Ite nda na ɗogoli hawa dɨ tawa a nə haɓye, kala a gən, nda tiya ɗimtə, nda gəəshe a sa Yesu, “Həmɨmiye, zə gwadi, mbədi.”
31Yesu a ɗifdə tɨfəngɨn tan-tan a kɨsarən. Nda san atɨ, “Mwadiyale dəw nə ɓyeləng. Mɨnə ɗa hye ndəla?”
32Ite təna pɨrə vor koombotə, hawe a saraa. 33Myee a vor koombotə a kalan-gbəətə, təna san atɨ, “Diyalə, hyenə nze da Həmɨnpwa.”
34Koombotə ɓe kpasə, təna nggɨrə vor vɨraa Jenisarat. 35Ite mi hangɨn a leyə atɨ Yesu nə, təna lyenəsə she a bətɨ njiyangɨn kat. Ɓwaare a payadə ji-ootə kat a hakan. 36Təna nyisən atɨ a nda mwa ji-ootə a pa baapa rukute dan. Sə mgban myee kat pan, təna piyagə ootɨ darən.
Currently Selected:
Matta 14: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
Free Reading Plans and Devotionals related to Matta 14
Courage for Every Day
The Ministry Of The King | Matthew 8-14 Explained
Wicked Women Of The Bible Devotions
