Matta 21
21
Yesu a pɨrə vor Urshelima
(Markus 11.1-11; Luka 19.28-40; Yohana 12.12-19)
1Tən ta waya a shi gbyel ka Urshelima, təna tɨla gbyel ka nzɨ-vɨrate mya dɨ wa atɨ Betafaji a Motɨ Kade Zetun. Yesu a lyen lagbe dan kpe, 2nda sarən atɨ, “Zəmə vɨrate a humwasəwnə, tee gbyel hwun ɓa naa mbɨrsətə nee a ɓwetə ka nzəngrə kangə hakarə, hwuna para a shikarən ga. 3Ama kana boyownə le, boyəmən atɨ Həmɨmiye nə dɨ mwi, mangɨn ɓa ɗakəwnə hwuna shikarən tan-tan.”
4Angɨn a ɗaasə gəkɨlə mya naadə la kpale a boyo atɨ,
5“Boyəmə mi Siyona,
‘Namə həme dəwnə nee
dɨ shi hakəwnə,
dɨ waya hamama a nə mbɨrsətə
ka mɨni nzə-mbɨrse.’ ”#21.5 Naasə: Zakariya 9.9.
6Lagbengɨn a wudə a ɗa ɓətɨ Yesu a boyərən. 7Təna shi ka mbɨrsətɨngɨn kat ka nzəngrə. Təna pyala rokotye darən a nə mbɨrsəngɨn dɨ kpeyə Yesu a nza nəngrən. 8Ɓwaare hananang a pyala sɨɓwetɨ darən a nə tɨfe, imi mgban a ɓaya jibe kade ta pukə nə tɨfe. 9Təkə-təkətɨ ɓwaarengɨn a luwon kwamətə, imi mgban a koɗə beesən, tən ta gəəshe ta sa atɨ,
“Hosana!
Ɓondiyəm Nze da Dawuda!”
“Həmɨnpwa a fukadən
ndi ma dɨ shi a vor kwakɨ Həmɨmiye!”#21.9 Naasə: Dyemshe 118.26.
“Hosana!
Ɓondiyəm Həmɨnpwa
ndi ma gaarə a vor pwa!”
10Ite Yesu a pɨrə vor Urshelima, haa a maɗə a kangə-kangə kat, ɓwaare ta ɗiyəsə atɨ, “Nda wonə ma?”
11Təkə-təkətɨ ɓwaarengɨn a luwa a sarən atɨ, “Yesu nə, sɨnə kpala dɨma dɨ Nazarat a vor njiya Galili.”
Yesu a om ji-zɨm lumotə gə Kwa-Shafe
(Markus 11.15-19; Luka 19.45-48; Yohana 2.13-22)
12Yesu a pɨrə vor Kwa-Shafe a tiya om myee dɨ zɨm lumotə a hangɨn. Nda ləkədə tebɨlye da myee dɨ nggəddə taa, ka ramye da myee dɨ ɗərdə ji-guguyi gɨrtə. 13Nda sarən atɨ, “Mye doro vor Malɨmtɨ Ɗəmɗəmtə atɨ, ‘Mye ɓa wa hwode atɨ hwoɗi hiwti,’#21.13 Naasə: Ishaya 56.7. shezə hwuna mɨndərən ‘haa ɓota mahəryi.’#21.13 Naasə: Jerimaya 7.11.”
14Welye ka gbəgərye a shi hakan a Kwa-Shafe, nda dɨmərən də oote a sɨsərən. 15Kɨsehəmi kpan-kpanye kat ka ji-lee kəndə ɓashita Musa a naa wule shikoshopye Yesu a dɨ ɗa, ka mɨni ji-kurkurye dɨ gəəshe a Kwa-Shafe atɨ, “Hosana, ɓondiyəm Nze da Dawuda!” Təna ɗa yedi-kɨttə.
16Təna ɗiyən atɨ, “Hye kɨla ləməgyee jee a dɨ boya?”
Yesu a luwa a sarən atɨ, “A hɨn kɨlə. Hwunaa bəl ləməgyee Malɨmtɨ Ɗəmɗəmtə a boyo atɨ,
“ ‘Dɨ kwaamɨ ji-kurkurye
kat ka ji-kpalamyee
dɨ shawa mye ɓa ɓondira’#21.16 Naasə: Dyemshe 8.2.?”
17Nda ɗakarən a dɨmə a muɗə vor Betani, a hangɨn nda bə.
Yesu a ya kada nggwaltə
(Markus 11.12-14,20-24)
18Ka hakpite kpit-kpit, nda dɨmə a dɨ muɗə vor Urshelima, itɨngɨn myatə gən. 19Nda niyə a naa kada nggwaltə a kwaka tɨfe, nda ɗɨrə a wudə də, ndəng ɓa pa mbwotə, shezə jibe ɓəmbə a sɨsə. Nda boyə kada nggwaltɨngɨn atɨ, “Nagi goɗi, tee dɨyi mɨna mbwi!” A hangɨn tee gbyel nggwaltɨngɨn a lɨɓɨkə a kpamə.
20Ite lagbe dan a naa shingɨn, təna ɗa ndəle, təna ɗiyə atɨ, “Ɓə ya kada nggwaltɨngɨn a lɨɓɨkə a kpamə tan-tan tee?”
21Yesu a luwa a sarən atɨ, “Diyalə na dɨ boyownə, hwun kana gə ka mwadiyale, hwunaa ɗa ndəle, hwun ɓa ɗa sa pɨrgə wule a mya ɗa nggwalte. Hwun ɓa sa mote kanyi atɨ, ‘Maɗi, muɗi dɨ fukə vor gbɨnuwtɨ sɨkorən,’ angɨn ɓa nzasə. 22Hwun kana mwadiyale, hwun ɓa luu nagi ndo sə hwuna nyisə vor hiwtə.”
Mya ɗa ndəle ka haa Yesu a ɗɨm gətɨ dan də
(Markus 11.27-33; Luka 20.1-8)
23Beetɨ angɨn, Yesu a pɨrə Kwa-Shafe. Ite sɨne dɨ kənə ɓwaare shee, kɨsehəmi kpan-kpanye ka mi kpan-kpanye da Yawude a ɗiyən le atɨ, “Ka ndo wule gəti hye dɨ ɗa wule shee hye dɨ ɗatɨrən, wonə ɓoyu mgba?”
24Yesu a luwa a sarən atɨ, “Hɨn mgban na ɗiyəwnə le, hwun kana boyi, hɨn mgban na boyownə ma vi gəte na dɨ ɗa shee kaarə. 25Ɓətɨ gəte Yohana a dɨ ɗa batisɨmatə kaarə ɓwa, dɨ pwa naasə mgban dɨ haka ɓwaare ganə a vɨratə nda ɗɨma?”
Təna nidə ləngɨn a wakasərən, təna boyəsə atɨ, “Hɨm kana san atɨ, ‘Dɨ pwa,’ ndi ɓa ɗiyəm atɨ, ‘Ɓə mɨnə ɗa hɨm aa ɓə mwakan?’ 26Hɨm kana san atɨ, ‘Dɨ haka ɓwaare,’ kala ɓwaare nee dɨ gəm, gəkɨlə ɓwaare kat mwa atɨ Yohana kpalə diyalə.”
27Gə-angɨn təna sa Yesu atɨ, “Hinaa leyə.”
Nda sarən atɨ, “Hɨn mgban taa dɨ boyownə ma vi gəte na dɨ ɗa lyentɨnə kaarə.
Byelə səɗe a nə je kpe
28“Mɨnə hwuna nan a vor lana? Ama nə ka ji-morye kpe, nda zə haka nzə-kwamətɨ dan a san atɨ, ‘Nze de, wudə gaashe supo, hye ɗa lyentə də.’
29“Nzəngɨn a luwa a san atɨ, ‘Taa dɨ wudə.’ Dɨ bee, nda səɗə ka yedingɨn a wudə.
30“Baagərən a wudə haka nza hiɗə a boyən lə hiɗə, nzəngɨn a san atɨ, ‘Baa, hɨn mwa hɨn ɓa wudə.’ Shezə ndaa wudə.”
31Yesu a ɗiyərən atɨ, “A vor jingɨn dɨ kpeyə wonə koddə kormi baagən?”
Təna san atɨ, “Ma kwamətə nə.”
Yesu a luwa a sarən atɨ, “Diyalə na dɨ boyownə, ji-luu taa shemtə ka ji-bəə morye nee dɨ pɨrgəwnə a vor həmne da Həmɨnpwa. 32Yohana a shi gəkɨlə nda kənəwnə tɨfə pepeye hwunaa mwakan, shezə ji-luu taa shemtə ka ji-bəə morye a mwadiyale. Hwun mgban beetɨ naa angɨn, hwunaa por-njiya a mwakan.
Byelə səɗe a nə ji-lyentə
(Markus 12.1-12; Luka 20.9-19)
33“Kɨləm a byelə səɗə: A həmɨ gaashi nə də. Nda nggub kade a ka kaanda a takadərən. Nda ra gwe a vor gaashingɨn gə mye ta pedə haɓi inabite dɨ janga dɨ kade gaashingɨn. Nda kangdə rɨgɨmtə a gaashingɨn gə gɨratə. Nda və i ji-hawti gaashingɨn a nə moona tən ɓawa mbwan. Beetɨ angɨn, nda muɗə omotə. 34Ite kadengɨn a mbwo a kən zɨmti, nda lyen kɨse dan a haka ji-hawtɨngɨn gə təna luwan basa dan.
35“Ji-hawtɨngɨn a kər kɨse dan a lyeb ma hiɗə, ma hiɗə mgban təna ɓɨlə, təna kala mwaakɨnətə ka fare. 36Həmɨ gaashingɨn a mɨna lyen imi, mingɨn furi pɨrgə mi kwaməte nda lyenə, ji-hawtɨngɨn a mɨna ɗarən sə hiɗəti. 37A kpawtə kat, həmɨ gaashe a lyen nzəngɨn a hakarən. Nda sa atɨ, ‘Mbak-mbak, tən ɓa kwa naa fukatɨ nze de.’
38“Ite ji-hawtɨngɨn a nan, təna sasə atɨ, ‘Manə nə ɓa mɨnə gaashingɨn. Wam, a mya ɓɨləmrən gələ mya luwom gaashe ndi ɓa mɨnərən.’ 39Sə mgban təna kɨttən a dɨmdən a beetɨ kaanda a ɓɨltən.
40“Fəra həmɨ gaashe ɓa mɨnadə, mɨnə ndi ɓa ɗa ka ji-hawtɨngɨn?”
41Təna luwa a san atɨ, “Ndi ɓa ɓəlgə mi hashingɨn! Nda vədə gaashe dan a tɨfə imi som, a myee ɓawa vən moone dan dɨ vor mbwotɨ kade gaashingɨn tən kana kən zɨmti.”
42Yesu a ɗiyərən atɨ, “Hwunaa bəl shee mya doro vor Malɨmtɨ Ɗəmɗəmtə ma? Atɨ,
“ ‘Faraa ji-nwoshe a kwo,
sɨnə a mya shea kwak mgba-vɨne kan.
Həmɨmiye nə ɗa angɨn sə,
hɨm naa ləngɨn,
hɨm nə dɨ ndəli kan.’#21.42 Naasə: Dyemshe 118.22-23.
43“Gəkɨlə ləngɨn na dɨ səwnə atɨ, mye ɓa nggurgə həmne da Həmɨnpwa gə hakəwnə, a və myee ɓa dɨmaadə mbwotə. 44Ma fukə nə faratɨnə, mangɨn ɓa ɓe yə nyatak-nyatak, ma mgban faratɨngɨn a fukə nəngɨn, mangɨn ɓa myana ɓətɨ humboti.”#21.44 I dorshi tamdə ka kade 44.
45Ite kɨsehəmi kpan-kpanye ka Farise ɓe kɨl byelə səɗe da Yesu, təna leyə atɨ a nəngrən nda dɨ bwe le. 46Təna ɨl tɨfe gə təna kɨttən, shezə kala təkə-təkətɨ ɓwaare nee dɨ gərən gəkɨlə ɓwaare mwa atɨ Yesu kpalə.
Currently Selected:
Matta 21: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
