Lukas 8
8
May manga Babayi diman Nagkuyug sa kan Hisus
1Pagka dugay naglakaw si Hisus naglibut sa manga kabanwa-banwahan ag sa manga baryu, kaibahan niya ti sampulu may duwa ka tuludluan niya. Itinudlu niya ti Mayad pag Barita sa manga tawu tungkul sa paghari Diyus. Kaibahan niya ti sampulu may duwa ka tuludluan. 2May manga babayi diman nagkuyug sa kan Hisus. Sida pinalwasan labang ag pinaayad kanda manga sakit. Hanggan si Marya kay bansag Magdalina pagka pinalwasan siya pitu ka labang nagkuyug diman sa kan Hisus. 3Hanggan si Huwana, kay asawa ni Kusa, kay katiwala ni Hirudis. Hanggan si Susana ag mayamu waya ti iba babayi siyun ti nag-asikasu sa kanda ni Hisus, kanda ginamit kanda sadili kasiyunan.
Kan Hisus Pahalimbawa sa Magpamgas
(Mat. 13:1-9; Mk. 4:1-9)
4Nagtiripun ti kagadhan tawu ag ginan sa kada banwa may manga nagsulang tabug sa kan Hisus. Nagtultul yi ngani siya usa ka halimbawa sa kanda magkun, 5“May usa ka manugtanman linmakaw hampay mamamgas. Sa kay magpamgas may binhi sinmamad sa saruy dalan, natat-an manga tawu bag-u tininduk manga manuk. 6Kay iba nipamgas sa mabatu. Pagka tinmubu, nalayung ngapu dahil manipis lang pag daga. 7Kay iba nipamgas sa basad kadugihan. Dungan nagtubu ti dugi hanggan binhi. Kinisut dugi ti binhi. 8Dapat ay kay iba nipamgas sa mayad pag daga. Pagka nagtubu, namurak tigus-a ka gatus.” Pagka itinultul ni Hisus inda pag pahalimbawa, inalsa niya kay busis magkun, “Ti may tuli kailangan pagpatingi.”
Ti Turunu manga Pahalimbawa
(Mat. 13:10-17; Mk. 4:10-12)
9Pinaingana siya niya manga tuludluan magkun, “Hintay inda pag pahalimbawa kay kahulugan?” 10Magkun si Hisus, “Ipinakaun Diyus sa kanyu hampay masalman niyu ti madalum pag katutuuhanan udwaya niburayhaw tungkul sa kay paghari Diyus. Dapat sa manga iba pag-itudlu niku sa manga pahalimbawa hampay ‘Una sida magpakabantay, unman sida makasalum, ag una sida magpakapatingi, unman nida maintindihan.’#8:10 Bantayi diman ti Isa. 6:9.”
Kan Hisus Paliwanag sa Pahalimbawa
(Mat. 13:18-23; Mk. 4:13-20)
11Magkun si Hisus, “Inda yi ngani kay kahulugan pag pahalimbawa. Ti binhi imaw ti Bagaw Diyus. 12Tunda yi ngani manga sa saruy dalan imaw ti manga manugpatingi. Bag-u magras-ug ti diyablu, pagpalimutun niya ti Bagaw Diyus ginan sa kanda naisipan hampay sida balaw sumarig sa Diyus ag dayu diman maribri. 13Tunda sa mabatu, imaw ti manga nakadnug lang nagtanggap yi sida magbaya sa Bagaw Diyus. Dapat unman ngap inmaba kay gamut. Sida ngap ud nadugay kanda sarig. Pagka rinmas-ug ti tuksu nagbul-iw sida sa Diyus. 14Ti nalagpak sa dugihan tunda imaw ti manga nakadnug, dapat amat-amat pagkisutun sida sa kaaburiduhan naisipan hanggan sa kayamanan hanggan sa daut pag kagustuhan sitay sa babaw daga. Nakan unman magkamhan kay burak. 15Ti sa mayad pag daga, tunda imaw ti manga mayad pag itinuduk sa kay tagipusuun, inalagaan nida ti Bagaw Diyus kanda nadnugan. Nakan magburak mayamu, balaw mag-urung una makuri.”
Balaw Itagu ti Sulu
(Mk. 4:21-25)
16Sinabi ni Hisus magkun, “Una hintay pag tawu tigsulu kay duag, unman pagtakluban niya anglit, unman diman pag-itagu niya sirung laming, nu unman pag-ibugtang sa kay bugtangan hampay makitan manga manugsaka kay rayaw. 17Dahil unman may mitagu nu unman mahayag gid aban. Unman may milihim nu unman makilala ag bulwatun sa marayaw aban.#8:17 Dahil unman may mitagu nu unman mahayag gid aban. Unman may milihim nu unman makilala ag bulwatun sa marayaw aban: Mahimu ti pagtukuyun lihim tungkul sa paghari Diyus, dapat ipahayag.
18“Isipa niyu nu kabitay kanyu magpatingi. Dahil una hintay pag tawu ti may imaw dugangan waya. Una hintay pag tawu ti unman may imaw, una ti pagsarigan mana niya bul-un diman gid aban ginan sa kanya.”
Kay Ina hanggan Kay manga Patar-ari ni Hisus
(Mat. 12:46-50; Mk. 3:31-35)
19Nag-ati sa kan Hisus kay ina hanggan kay manga patar-ari lalaki, dapat sida unman makapakarani sa kanya dahil sa kadamlan tawu. 20May usa ka tawu nagsabi sa kanya, “Kanmu ina hanggan kanmu manga patar-ari lalaki asan sa luwas balay, kanda mana gustu maghampang sa kanmu.” 21Dapat sinabi ni Hisus magkun, “Inda yi ngani kang ina, kang manga patar-ari ti manga magpatingi sa Bagaw Diyus bag-u kanda pagtupadun.”
Tinamyaw ni Hisus ti Bagyu
(Mat. 8:23-27; Mk. 4:35-41)
22Pagka dugay nagsakay si Hisus sa duunduun hanggan kay manga tuludluan. Magkun siya sa kanda, “Dumipay duy kita tag sa baliw pangpang danaw.” Nagtukun sida ginan sa saruy. 23Sa paglakaw duunduun naturug si Hisus. Bag-u dinuksulan untug sida sa danaw. Nasukadan danum ti duunduun. Madala yi malunud. 24Sida nagpakarani sa kan Hisus, bag-u kanda pinulaw magkun, “Maisturu, Maisturu, kita inda mamatay yi ay.” Pagka nag-imata siya tinamyaw niya ti bagyu hanggan ti mabisug pag humbak. Pagka tinamyaw nagpat-ung yi ag nagkalma. 25Magkun siya sa kanda, “Kabitay duy lugud kanyu sarig?” Nadala sida nadulaw. Magharampangan sida magkun, “Hayga nguna katida pag tawu? Magbilin una sa bagyu una sa danum bag-u magpaniwala ti manga bagyu sa kanya.”
Ipinalwas ni Hisus ti manga Labang ginan sa Tawu
(Mat. 8:28-34; Mk. 5:1-20)
26Nagras-ug sida sa daga manga Girasinu,#8:26 Girasinu: sa iba pag manga kupya sa Giriyigu, Gadarinu; sa iba waya gid manga kupya, Girgisinu. sa katpungan daga Galiliya. 27Pagka dinmugsun si Hisus ginan sa duunduun, may nagsulang sa kanya usa ka tawu taga banwa inapuan manga labang. Dugay yi pag timpu siya unman yi magrutay pag tawu, udyi mag-uli sa kay balay, siyun yi kay ulian sa kalubngan lang. 28Pagka nakakit sa kan Hisus naghuyaw siya napadapa sa kay sarangwan kay irininggit daka magkun, “Hisus duy, hintay kang labut sa kanmu? Kawu ti Anak Diyus makapangyarihan sa tanan. Manuyu aku sa kanmu danga pakurian nimu aku.” 29Dahil sinabihan yi ni Hisus ti labang pagluwas yi sa tawu ginan. Dahil pirmi siya pagdarahun labang nakan kanda pagpakagapusun tarikada hanggan pusas sa lulud para kanda bantayan. Dapat pagka pinuklut maan niya kay manga gapus pagpakatabanun siya labang atag sa pangawakawaan. 30Nagpaingana si Hisus sa kanya, “Hintay kanmu ngaran?” Kay sagut niya, “Kadamlan.” Dahil aduk pag labang ti nagsulud sa tunda pag tawu. 31Bag-u ti manga labang nanuyu sa kan Hisus danga sida pagsugua tag sa kaabasad-basadan. 32Ati sa bantud may maglingaun kadamlan babuy. Nanuyu ti manga labang sa kan Hisus, pahintuluti sida sumulud sa babuy. Pinasnuan ngani niya sida. 33Nagluwas ti manga labang sa tawu bag-u sa manga babuy pag sinmulud. Bag-u nangras sa palagiw ti kagadhan babuy naglinuksu sa yangpas danaw, nagkalalimus sida sa danum.
34Pagka nakitan manga manug-alaga babuy may nangyari, nalagiw sida, kanda itinultul sa banwa hanggan sa manga baryu. 35Bag-u naglinuwang ti manga tawu hampay makitan ti nangyari nu kabitay. Pagka nagpakarani sida sa kan Hisus nakitan nida sa kan Hisus atubangan ti tawu pinalwasan manga labang. Matukawan siya may rutay yi, mahusay yi kay naisipan. Nakan sida tanan nadala gid. 36Nagtultul sa kanda ti manga nakakit nu kabitay kay pinaayad ni Hisus ti inapuan manga labang. 37Bag-u ti tanan tawu mag-uli sa daga manga Girasinu nagsabi sa kan Hisus, “Danga yi mana kawu sitay sa kanmi.” Dahil kinulbaan sida, daka kanda kadalaan. Nagsakay si Hisus sa duunduun, nuli yi siya. 38Dapat nagpakihampang sa kanya ti tawu pinalwasan labang magkun, “Aku duy mana kumuyug sa kanmu.” Dapat siya pinauli ni Hisus magkun, 39“Pag-uli yi lang kawu duy tag sa kam balay. Itultul nimu nu kabitay kay kadaka ti kaayadan kay binwat Diyus sa kanmu.” Nuli yi ngani siya, itinultul niya sa tanan tawu nu kabitay kay kadaka ti binwat ni Hisus sa kanya.
Binuhi Uman ti Usa ka Anak ag Pinaayad ti Usa ka Babayi
(Mat. 9:18-26; Mk. 5:21-43)
40Pagka binmalik maan si Hisus sa baliw dipay danaw, masulung ti kayamuan tawu nagsulang sa kanya. Dahil nagpatigagad sida tanan sa kanya. 41Bag-u may usa ka lalaki nagpakarani sa kan Hisus, kay ngaran si Hairu. Siya pangulu sa simbahan manga Hudiyu. Napayuk-ub siya sa atubangan ni Hisus magkun, “Pag-ati duy mana kawu sa kang balay.” 42Dahil may bugtung anak babayi siya sampulu may duwa ka timpu kay idad ag hirimugtasun yi kay arup.
Dapat sa kay maglakaw ni Hisus atag sa kan Hairu balay, nandurutdutan ti kayamuan tawu sa kanya. 43May usa ka babayi sulud sampulu may duwa ka timpu kay pagsulgan. Hinirut kay panggastus sa manga manugbulung, una sitapu unman may nakapaayad sa kanya. 44Tunda pag babayi nagpakarani sa kan Hisus aday-an nag-igpil sa kay sidsid rutay. Susun ngani nap-ut kay pagsulgan. 45Sinabi ni Hisus, “Si unu nguna ti nag-igpil sa kangku?” Pagka nagtanggi sida tanan, magkun si Pidru, “Maisturu, ipinabusul kawu kayamuan.” 46Dapat sinabi ni Hisus, “May inmigpil sa kangku, dahil naungdan niku may ginmamit kang kamaskihan.” 47Pagka naintindihan babayi balaw maaw milihim kay binwat, nagpakarani siya pagtakigan sa dala. Nagyuk-ub siya sa atubangan ni Hisus bag-u isinabi niya sa atubangan tanan tawu nu hayga inigpilan niya si Hisus ag nu kabitay susun naayadan yi siya. 48Magkun si Hisus sa kanya, “Kawu duy pinaayad yi dahil sa kanmu pagsarig. Pag-uli yi duy kawu, danga yi magkaaburidu.”
49Pagka magbagaw waya si Hisus, rinmas-ug yi ti usa ka lalaki ginan sa ulian pangulu Balay Diyus, nagsabi sa kanya, “Udyi duy kanmu anak babayi, danga yi duy magbalag sa Maisturu.” 50Pagka naalaman ni Hisus, sinabi niya sa kan Hairu, “Danga duy kawu magkadala. Pagsarig lang kawu, umayad di siya.” 51Pagka rinmas-ug si Hisus sa balay, unman pinasnuan niya una hintay ti sumaka kaibahan niya nu unman sida lang ni Pidru ni Huwan ni Santiyagu hanggan kay manga ama ina anak babayi. 52Nanlulumian ti tanan tawu nagkarabayngan dahil sa anak babayi. Dapat ay sinabi ni Hisus, “Danga yi kamu maglumi, dahil siya balaw tigbak, maturugan lang siya.” 53Kinasarin-an nida siya. Alam nida tigbak yi tunda. 54Pagka nahiyaptan niya kay kamang anak nagtawag si Hisus magkun, “Duy anak, pagbangun yi kawu.” 55Pagka binmalik kay arup, rargu nagbangun siya. Magkun si Hisus, “Pakan-i yi duy niyu ti anak karan-unun.” 56Naglingut kay manga ama hanggan kay ina, dapat binilinan sida ni Hisus danga sabiha una sa kantapu inda ti nangyari.
Currently Selected:
Lukas 8: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
Lukas 8
8
May manga Babayi diman Nagkuyug sa kan Hisus
1Pagka dugay naglakaw si Hisus naglibut sa manga kabanwa-banwahan ag sa manga baryu, kaibahan niya ti sampulu may duwa ka tuludluan niya. Itinudlu niya ti Mayad pag Barita sa manga tawu tungkul sa paghari Diyus. Kaibahan niya ti sampulu may duwa ka tuludluan. 2May manga babayi diman nagkuyug sa kan Hisus. Sida pinalwasan labang ag pinaayad kanda manga sakit. Hanggan si Marya kay bansag Magdalina pagka pinalwasan siya pitu ka labang nagkuyug diman sa kan Hisus. 3Hanggan si Huwana, kay asawa ni Kusa, kay katiwala ni Hirudis. Hanggan si Susana ag mayamu waya ti iba babayi siyun ti nag-asikasu sa kanda ni Hisus, kanda ginamit kanda sadili kasiyunan.
Kan Hisus Pahalimbawa sa Magpamgas
(Mat. 13:1-9; Mk. 4:1-9)
4Nagtiripun ti kagadhan tawu ag ginan sa kada banwa may manga nagsulang tabug sa kan Hisus. Nagtultul yi ngani siya usa ka halimbawa sa kanda magkun, 5“May usa ka manugtanman linmakaw hampay mamamgas. Sa kay magpamgas may binhi sinmamad sa saruy dalan, natat-an manga tawu bag-u tininduk manga manuk. 6Kay iba nipamgas sa mabatu. Pagka tinmubu, nalayung ngapu dahil manipis lang pag daga. 7Kay iba nipamgas sa basad kadugihan. Dungan nagtubu ti dugi hanggan binhi. Kinisut dugi ti binhi. 8Dapat ay kay iba nipamgas sa mayad pag daga. Pagka nagtubu, namurak tigus-a ka gatus.” Pagka itinultul ni Hisus inda pag pahalimbawa, inalsa niya kay busis magkun, “Ti may tuli kailangan pagpatingi.”
Ti Turunu manga Pahalimbawa
(Mat. 13:10-17; Mk. 4:10-12)
9Pinaingana siya niya manga tuludluan magkun, “Hintay inda pag pahalimbawa kay kahulugan?” 10Magkun si Hisus, “Ipinakaun Diyus sa kanyu hampay masalman niyu ti madalum pag katutuuhanan udwaya niburayhaw tungkul sa kay paghari Diyus. Dapat sa manga iba pag-itudlu niku sa manga pahalimbawa hampay ‘Una sida magpakabantay, unman sida makasalum, ag una sida magpakapatingi, unman nida maintindihan.’#8:10 Bantayi diman ti Isa. 6:9.”
Kan Hisus Paliwanag sa Pahalimbawa
(Mat. 13:18-23; Mk. 4:13-20)
11Magkun si Hisus, “Inda yi ngani kay kahulugan pag pahalimbawa. Ti binhi imaw ti Bagaw Diyus. 12Tunda yi ngani manga sa saruy dalan imaw ti manga manugpatingi. Bag-u magras-ug ti diyablu, pagpalimutun niya ti Bagaw Diyus ginan sa kanda naisipan hampay sida balaw sumarig sa Diyus ag dayu diman maribri. 13Tunda sa mabatu, imaw ti manga nakadnug lang nagtanggap yi sida magbaya sa Bagaw Diyus. Dapat unman ngap inmaba kay gamut. Sida ngap ud nadugay kanda sarig. Pagka rinmas-ug ti tuksu nagbul-iw sida sa Diyus. 14Ti nalagpak sa dugihan tunda imaw ti manga nakadnug, dapat amat-amat pagkisutun sida sa kaaburiduhan naisipan hanggan sa kayamanan hanggan sa daut pag kagustuhan sitay sa babaw daga. Nakan unman magkamhan kay burak. 15Ti sa mayad pag daga, tunda imaw ti manga mayad pag itinuduk sa kay tagipusuun, inalagaan nida ti Bagaw Diyus kanda nadnugan. Nakan magburak mayamu, balaw mag-urung una makuri.”
Balaw Itagu ti Sulu
(Mk. 4:21-25)
16Sinabi ni Hisus magkun, “Una hintay pag tawu tigsulu kay duag, unman pagtakluban niya anglit, unman diman pag-itagu niya sirung laming, nu unman pag-ibugtang sa kay bugtangan hampay makitan manga manugsaka kay rayaw. 17Dahil unman may mitagu nu unman mahayag gid aban. Unman may milihim nu unman makilala ag bulwatun sa marayaw aban.#8:17 Dahil unman may mitagu nu unman mahayag gid aban. Unman may milihim nu unman makilala ag bulwatun sa marayaw aban: Mahimu ti pagtukuyun lihim tungkul sa paghari Diyus, dapat ipahayag.
18“Isipa niyu nu kabitay kanyu magpatingi. Dahil una hintay pag tawu ti may imaw dugangan waya. Una hintay pag tawu ti unman may imaw, una ti pagsarigan mana niya bul-un diman gid aban ginan sa kanya.”
Kay Ina hanggan Kay manga Patar-ari ni Hisus
(Mat. 12:46-50; Mk. 3:31-35)
19Nag-ati sa kan Hisus kay ina hanggan kay manga patar-ari lalaki, dapat sida unman makapakarani sa kanya dahil sa kadamlan tawu. 20May usa ka tawu nagsabi sa kanya, “Kanmu ina hanggan kanmu manga patar-ari lalaki asan sa luwas balay, kanda mana gustu maghampang sa kanmu.” 21Dapat sinabi ni Hisus magkun, “Inda yi ngani kang ina, kang manga patar-ari ti manga magpatingi sa Bagaw Diyus bag-u kanda pagtupadun.”
Tinamyaw ni Hisus ti Bagyu
(Mat. 8:23-27; Mk. 4:35-41)
22Pagka dugay nagsakay si Hisus sa duunduun hanggan kay manga tuludluan. Magkun siya sa kanda, “Dumipay duy kita tag sa baliw pangpang danaw.” Nagtukun sida ginan sa saruy. 23Sa paglakaw duunduun naturug si Hisus. Bag-u dinuksulan untug sida sa danaw. Nasukadan danum ti duunduun. Madala yi malunud. 24Sida nagpakarani sa kan Hisus, bag-u kanda pinulaw magkun, “Maisturu, Maisturu, kita inda mamatay yi ay.” Pagka nag-imata siya tinamyaw niya ti bagyu hanggan ti mabisug pag humbak. Pagka tinamyaw nagpat-ung yi ag nagkalma. 25Magkun siya sa kanda, “Kabitay duy lugud kanyu sarig?” Nadala sida nadulaw. Magharampangan sida magkun, “Hayga nguna katida pag tawu? Magbilin una sa bagyu una sa danum bag-u magpaniwala ti manga bagyu sa kanya.”
Ipinalwas ni Hisus ti manga Labang ginan sa Tawu
(Mat. 8:28-34; Mk. 5:1-20)
26Nagras-ug sida sa daga manga Girasinu,#8:26 Girasinu: sa iba pag manga kupya sa Giriyigu, Gadarinu; sa iba waya gid manga kupya, Girgisinu. sa katpungan daga Galiliya. 27Pagka dinmugsun si Hisus ginan sa duunduun, may nagsulang sa kanya usa ka tawu taga banwa inapuan manga labang. Dugay yi pag timpu siya unman yi magrutay pag tawu, udyi mag-uli sa kay balay, siyun yi kay ulian sa kalubngan lang. 28Pagka nakakit sa kan Hisus naghuyaw siya napadapa sa kay sarangwan kay irininggit daka magkun, “Hisus duy, hintay kang labut sa kanmu? Kawu ti Anak Diyus makapangyarihan sa tanan. Manuyu aku sa kanmu danga pakurian nimu aku.” 29Dahil sinabihan yi ni Hisus ti labang pagluwas yi sa tawu ginan. Dahil pirmi siya pagdarahun labang nakan kanda pagpakagapusun tarikada hanggan pusas sa lulud para kanda bantayan. Dapat pagka pinuklut maan niya kay manga gapus pagpakatabanun siya labang atag sa pangawakawaan. 30Nagpaingana si Hisus sa kanya, “Hintay kanmu ngaran?” Kay sagut niya, “Kadamlan.” Dahil aduk pag labang ti nagsulud sa tunda pag tawu. 31Bag-u ti manga labang nanuyu sa kan Hisus danga sida pagsugua tag sa kaabasad-basadan. 32Ati sa bantud may maglingaun kadamlan babuy. Nanuyu ti manga labang sa kan Hisus, pahintuluti sida sumulud sa babuy. Pinasnuan ngani niya sida. 33Nagluwas ti manga labang sa tawu bag-u sa manga babuy pag sinmulud. Bag-u nangras sa palagiw ti kagadhan babuy naglinuksu sa yangpas danaw, nagkalalimus sida sa danum.
34Pagka nakitan manga manug-alaga babuy may nangyari, nalagiw sida, kanda itinultul sa banwa hanggan sa manga baryu. 35Bag-u naglinuwang ti manga tawu hampay makitan ti nangyari nu kabitay. Pagka nagpakarani sida sa kan Hisus nakitan nida sa kan Hisus atubangan ti tawu pinalwasan manga labang. Matukawan siya may rutay yi, mahusay yi kay naisipan. Nakan sida tanan nadala gid. 36Nagtultul sa kanda ti manga nakakit nu kabitay kay pinaayad ni Hisus ti inapuan manga labang. 37Bag-u ti tanan tawu mag-uli sa daga manga Girasinu nagsabi sa kan Hisus, “Danga yi mana kawu sitay sa kanmi.” Dahil kinulbaan sida, daka kanda kadalaan. Nagsakay si Hisus sa duunduun, nuli yi siya. 38Dapat nagpakihampang sa kanya ti tawu pinalwasan labang magkun, “Aku duy mana kumuyug sa kanmu.” Dapat siya pinauli ni Hisus magkun, 39“Pag-uli yi lang kawu duy tag sa kam balay. Itultul nimu nu kabitay kay kadaka ti kaayadan kay binwat Diyus sa kanmu.” Nuli yi ngani siya, itinultul niya sa tanan tawu nu kabitay kay kadaka ti binwat ni Hisus sa kanya.
Binuhi Uman ti Usa ka Anak ag Pinaayad ti Usa ka Babayi
(Mat. 9:18-26; Mk. 5:21-43)
40Pagka binmalik maan si Hisus sa baliw dipay danaw, masulung ti kayamuan tawu nagsulang sa kanya. Dahil nagpatigagad sida tanan sa kanya. 41Bag-u may usa ka lalaki nagpakarani sa kan Hisus, kay ngaran si Hairu. Siya pangulu sa simbahan manga Hudiyu. Napayuk-ub siya sa atubangan ni Hisus magkun, “Pag-ati duy mana kawu sa kang balay.” 42Dahil may bugtung anak babayi siya sampulu may duwa ka timpu kay idad ag hirimugtasun yi kay arup.
Dapat sa kay maglakaw ni Hisus atag sa kan Hairu balay, nandurutdutan ti kayamuan tawu sa kanya. 43May usa ka babayi sulud sampulu may duwa ka timpu kay pagsulgan. Hinirut kay panggastus sa manga manugbulung, una sitapu unman may nakapaayad sa kanya. 44Tunda pag babayi nagpakarani sa kan Hisus aday-an nag-igpil sa kay sidsid rutay. Susun ngani nap-ut kay pagsulgan. 45Sinabi ni Hisus, “Si unu nguna ti nag-igpil sa kangku?” Pagka nagtanggi sida tanan, magkun si Pidru, “Maisturu, ipinabusul kawu kayamuan.” 46Dapat sinabi ni Hisus, “May inmigpil sa kangku, dahil naungdan niku may ginmamit kang kamaskihan.” 47Pagka naintindihan babayi balaw maaw milihim kay binwat, nagpakarani siya pagtakigan sa dala. Nagyuk-ub siya sa atubangan ni Hisus bag-u isinabi niya sa atubangan tanan tawu nu hayga inigpilan niya si Hisus ag nu kabitay susun naayadan yi siya. 48Magkun si Hisus sa kanya, “Kawu duy pinaayad yi dahil sa kanmu pagsarig. Pag-uli yi duy kawu, danga yi magkaaburidu.”
49Pagka magbagaw waya si Hisus, rinmas-ug yi ti usa ka lalaki ginan sa ulian pangulu Balay Diyus, nagsabi sa kanya, “Udyi duy kanmu anak babayi, danga yi duy magbalag sa Maisturu.” 50Pagka naalaman ni Hisus, sinabi niya sa kan Hairu, “Danga duy kawu magkadala. Pagsarig lang kawu, umayad di siya.” 51Pagka rinmas-ug si Hisus sa balay, unman pinasnuan niya una hintay ti sumaka kaibahan niya nu unman sida lang ni Pidru ni Huwan ni Santiyagu hanggan kay manga ama ina anak babayi. 52Nanlulumian ti tanan tawu nagkarabayngan dahil sa anak babayi. Dapat ay sinabi ni Hisus, “Danga yi kamu maglumi, dahil siya balaw tigbak, maturugan lang siya.” 53Kinasarin-an nida siya. Alam nida tigbak yi tunda. 54Pagka nahiyaptan niya kay kamang anak nagtawag si Hisus magkun, “Duy anak, pagbangun yi kawu.” 55Pagka binmalik kay arup, rargu nagbangun siya. Magkun si Hisus, “Pakan-i yi duy niyu ti anak karan-unun.” 56Naglingut kay manga ama hanggan kay ina, dapat binilinan sida ni Hisus danga sabiha una sa kantapu inda ti nangyari.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines