ಲುಕ್ 21

ವಿದವೆಚಿ ದಿನ್ಗಿ

(ಮಾರ್ಕ್ 12:41-44)

1ಯೇಸುನಿ ನದಾರ್ ವರ್ ಕರುನ್ ಬಗ್ಲ ತವಾ ಥೊಡಿ ಸಾವ್ಕಾರ್ ಲೊಕ ದೇವ್ಳಾತ್ಲೆ ಪಿಟಿತ್ ದಿನ್ಗಿ ಗ್ಯಾಲತ್ಯಾಲಿ ದಿಸ್ಲಿತ. 2ತವಾ ಯೇಕ್ ಗರಿಬ್ ವಿದವೆನಿ ದೊನ್ ಆನ ಗ್ಯಾತ್ಲ. 3ತೆ ಯೇಸುನಿ ಬಗುನ್, “ತುಮಾನಾ ಖರ‍್ಯಾನಿ ಸಾಂಗ್ತೊ ಹೆ ಗರಿಬ್ ವಿದವೆನಿ ಸಗ್‍ಳ್ಯಾಂಚಿವ್ನಿ ಜಾಸ್ಥಿ ಗ್ಯಾತ್ಲ” ಮನ್ಲಾ. 4ಕಸ ಮಂಜೆ ತ್ಯಾ ಸಗ್‍ಳ್ಯಾಂಚಾನಿ ಆಪ್‌ಲ್ಯಾನಾ ಪುರೊ ವ್ಹವುನ್ ಉರ್‌ಲ್ಯಾಲ್ಯಾತ್ಲ ದಿನ್ಗಿ ದಿಲೆ; ಹಿನಿ ಆಪ್ಲೆ ಗರಿಬ್ ತಿತ್ ಆಪ್‌ಲ್ಯಾ ಜೀವ್ನಾಲಾ ಆಸ್‍ಲ್ಯಾಲ ಸಗ್ಳ ದಿಲ್ಯಾ” ಮನ್ಲಾ.

ಯೇಸುನಿ ದೇವ್ಳಾಚಾ಼ ನಾಸ್ ವ್ಹಯಾಚಾ಼ ಸಾಂಗ್‌ಲ್ಯಾಲ

(ಮತ್ತಾಯ್ 24:1-2; ಮಾರ್ಕ್ 13:1-2)

5ಶಿಶಾತ್ಲ ಥೊಡ ಜಾ಼ನ್ ದೀವುಳ್ ಚಾ಼ಂಗಲ್ಯಾ ದೊಂಡ್ಯಾಂಚಾನಿ ಆನಿ ಮಾಗ್ನ ಕೆಲ್ಯಾಲ್ಯಾ ದಾಗಿನ್ಯಾಂಚಾನಿ ಸುಬಿವ್‍ಲ್ಯಾ!” ಮನ್ಲ. 6ಫನ್ ಯೇಸುನಿ ತ್ಯನಾ, “ತುಮಿ ಹ್ಯ ಸಗ್ಳ ಬಗ್ತಾಸಾ ಹಿತ್ತ ದೊಂಡ್ಯಾವರ್ ದೊಂಢ ರಾಹ್ಯಾಚೆ ಆಂದಿ ಸಗ್ಳ ಪಾಡುನ್ ಗಾಲ್ಹಾಚ಼ ದಿಸ್ ಯನಾರ್” ಮನ್ಲಾ.

ತರಾಸ್ ಆನಿ ಜಾ಼ಚ್

(ಮತ್ತಾಯ್ 24:3-14; ಮಾರ್ಕ್ 13:3-13)

7ತವಾ ಶಿಶಾಂಚಾನಿ, “ಪ್ರಭು ತ್ಯ ಕವಾ ವ್ಹನಾರ್? ತ್ಯ ವ್ಹತಾನಾ ಕ್ಯಾ ವಳಕ್ ದಿಸ್ನಾರ್? ಮನ್ಹುನ್ ತ್ಯಲಾ ಇಚಾರ್ಲ.

8ತವಾ ಯೇಸುನಿ ಕ್ಯಾ ಸಾಂಗ್ಲ ಮಂಜೆ, “ತುಮಿ ಫಸು ನಾಹಿ ಆಸ ಬಗಾ ಕಾ ಮಂಜೆ ಖುಬ್ ಜಾ಼ನ್ ಯವುನ್ ಮಾಜ಼ ನಾವ್ ಸಾಂಗುನ್ ಮಿಚ್ ಕ್ರಿಸ್ತ ಮಿಚ್ ಕ್ರಿಸ್ತ ಮನ್ಹುನ್ ತೆ ದಿಸ್ ಜ಼ವಳ್ ಆಲ ಮನ್ಹುನ್ ಸಾಂಗ್ತಿಲ: ತ್ಯಂಚೆ ಮಾಗ್ನಿ ಜಾ಼ವು ನಕೊಸಾ, 9ತ್ಯವ್ಡಸ್ ನವ್ಹ ಮಾರಾಮಾರ‍್ಯಾ ಗೊಂದೊಳ್ ವ್ಹತ್ಯಾಲ ತುಮಿ ಐಕ್ತಾನಾ ಗಾಬ್ರು ನಕೊಸಾ; ಕಾ ಮಂಜೆ ಹ್ಯ ಸಗ್ಳ ಆಂದಿ ವ್ಹಯಾಚಿ ಗರಜ಼್ ಹಾ; ಫನ್ ತವಾಸ್ ಸಮಾಪ್ತ್ ವ್ಹನಾರ್ ನಾಹಿ ಮನ್ಲಾ.

10ಮಂಗ್ ಯೇಸುನಿ ತ್ಯನಾ ಕ್ಯಾ ಸಾಂಗ್ಲ ಮನ್‌ಲ್ಯಾವ, “ದೇಶಾಂಚೆ ವರ್ ದಿಸ್ರಿ ದೇಶಾ ರಾಜಾಂಚೆ ಆಡ್ವ ದಿಸ್ರಾ ರಾಜ಼ ಉಟ್ನಾರ್. 11ಆನಿ ಮೊಟಾ ಭೂಕಂಪ ವ್ಹನಾರ್; ಜಾ಼ಗ ಜಾ಼ಗ ಬರ್ಗಾಲ್ ಪಡ್ನಾರ್; ಉಪದ್ರವಾತ್ ಆನಿ ಆಬ್ಳಾತ್ ಮುಟಿ ಕಾಮ ಗಡ್ನಾರ್. 12ಫನ್ ಹ್ಯ ಸಗ್ಳ ವ್ಹಯಾಚೆ ಆಂದಿ ತೆ ತುಮಾನಾ ದರುನ್ ಸಭಾಸ್ಥಾನಾತ್ ಆನಿ ಕಚ್ಚೆರಿತ್ ಕುಂಡುನ್ ಅಧಿಕಾರ‍್ಯಾಂಚಾ ತಾಬ್ಯಾತ್ ದಿವುನ್ ಮಾಜಾ ನಾವಾಪಸುನ್ ರಾಜಾಂಚೆ ಮೊರ‍್ಹ ಜಾ಼ಚ಼್ ದೇನಾರ್ 13ಹಿ ಬರಿ ಖಬರ್ ಸಾಂಗಾಯಾ ತುಮಾನಾ ಉಪೆಗ್ ವ್ಹನಾರ್ 14ತ್ಯಾ ಯಳಾಲಾ ಕ್ಯಾ ಉತ್ತರ್ ದಿಯಾ ವ್ಹಯಿ ಮನ್ಹುನ್ ತುಮಿ ಆಂದಿಸ್ ಕ್ಯಾಳ್ಜಿ ಕರುನಕೊಸಾ. 15ಕಾ ಮಂಜೆ ತುಮ್ಚ ವಾದಿ ಸಗ್ಳ ಮೊರ‍್ಹ ಉಬರಾಹ್ಯಾ ಮೊರ‍್ಹ ಬೊಲಾಯಾ ವ್ಹವುನಾಹಿ ಆಸ್ಲ ಬೊಲ್‌ನ್ಯಾಚ಼ ಗಿನ್ಯಾನ್ ಮೀಸ್ ತುಮಾನಾ ದೆತೊ 16ಫನ್ ತುಮ್ಚೆ ಆಯಿಬಾ, ಬಾಹು, ಮಾಯಾದಯಾಚ಼, ಸುಪ್ತಿ, ತುಮಾನಾ ದರೂನ್ ದೆನಾರ್ ಆನಿ ತುಮ್ಚಾತ್‍ಲ್ಯಾ ಖುಬ್ ಜ಼ನಾನಾ ಜೀವಾನಿ ಮ್ಯಾರ‍್ನಾರ್. 17ಆನಿ ಮಾಜಿಸ್ ಲಾಗುನ್ ಸಗ್ಳಿ ಲೊಕ ತುಮಚಾ಼ ರಾಗ್‌ ಕರ್ನಾರ್ 18ಫನ್ ತುಮ್ಚೆ ಡುಯಿತ್ಲಾ ಯೊಕ್ ಕ್ಯೊಸ್ ಸಾಹಿತ್ ನಾಸ್ ವ್ಹನಾರ್ ನಾಹಿ 19ತುಮಿ ಇಸ್ವಾಸಾತ್ ಘಟ್ ದಿರ‍್ಹಾನಿ ರಾವಾ ತವಾ ತುಮಚಾ಼ ಜೀವ್ ಮಿಳಿವ್ಸಿಲಾ.

ಯೇಸುನಿ ಯೇರುಸಲೇಮಿಚಾ಼ ನಾಸ್ ವ್ಹಯಾಚ಼ ಸಾಂಗ್‌ಲ್ಯಾಲ

(ಮತ್ತಾಯ್ 24:15-21; ಮಾರ್ಕ್ 13:14-19)

20ಫನ್ ಯೆರುಸಲೇಮಿತ್ ಸೈನ್ಯಾಂಚಾ಼ ಯಡಾ ಪಡ್‍ಲ್ಯಾಲಾ ತುಮಿ ಬಗ್ತಾನಾ ತ್ಯ ನಾಸ್ ವ್ಹಯಾಚಾ಼ ಕಾಲ್ ಜ಼ವಳ್ ಆಲ್ಯಾ ಮನ್ಹುನ್ ಸಮ್ಜುನ್ ಗೆವ್ಹಾ.

21ತವಾ ಯುದಾಯಾತ್ ಆಸ್‍ಲ್ಯಾಲಿ ಗುಢ್ಯಾಂಚಿವ ಪಳುನ್ ಜಾ಼ವುಂತ; ಕೊನ್ ಪೆಠತ್ ಆಸ್‌ಲ್ಯಾಲಿ ಪ್ಯಾಟ್ ಸುಡುನ್ ಜಾ಼ವುಂತ. ಸೇತಾತ್ನಿ ಆಸ್‌ಲ್ಯಾಲಿ ಪೆಠ್ಹತ್ನಿ ಜಾ಼ವು ನಾಹಿತ.

22ಕಾ ಮಂಜೆ ಕ್ಯಾಯ್‌ದ್ಯಾತ್ ಲಿವಲ್ಯಾಲ ಸಗ್ಳ ಗಢಾಯಾ ವ್ಹಯಿ ಮನ್ಹುನ್ ತೇ ದಂಡಾಚ಼ ದೀಸ್ ಜಾ಼ಲ್ಯಾತ. 23ತ್ಯಾ ದಿಸಾತ್ ಗರ್ವಾರ್ ಕರ್ನಿನಾ ತಾನ್ಯಾ ಬ್ಯಾಯ್ಕಾನಾ ವ್ಹತ್ಯಾಲಾ ತರಾಸ್ ಕ್ಯಾ ಸಾಂಗು? ಹೆ ಸಿಮವ ಮೊಟಾ ಸಂಕಟ್ ಯಯಿಲ್ ಹ್ಯಾ ಲೊಕಾಂಚಿವ ದೇವಾಚಿ ಮುಟಿ ಸಿಕ್ಶೆ ಯನಾರ್. 24ತಿ ಥಲವಾರಾಂಚಿವ ಪಡ್ತಿಲ; ತ್ಯನಾ ಪರದೇಶೆತ್ನಿ ದರುನ್ ನೆನ್ಹಾರ್ ಪರ‍್ದೇಶೆತ್‍ಲ್ಯಾಂಚಾ಼ ಟಾಯಿಮ್ ಸಪ ಪರ‍್ಯಾತ್ ಯೆರುಸಲೇಮ್ ಪರದೇಶೆತ್‍ಲ್ಯಾಂಚಿಪ್ನಿ ತುಡುವುನ್ ಗಿಹುನ್ ರಾನ್ಹಾರ್.

ಮಾನ್ಸಾಚಾ ಲೇಕಾಚ಼ ಯನ

(ಮತ್ತಾಯ್ 24:29-31; ಮಾರ್ಕ್ 13:24-27)

25ಆನಿ ದಿಸ್ ಚಾ಼ಂದ್ ಚಾನ್ಯಾತ್ನಿ ವಿಚಿತ್ರ ವಳಕ್ ದಿಸ್ನಾರ್ ದರ್ಥಿವ ಸಗ್‌ಳ್ಯಾ ದೇಶಾತ್ನಿ ತರಾಸ್ ಯನಾರ್ ಸಮಿಂದೋರಾಚ ಆನಿ ಲ್ವಾಟಾಂಚೆ ಆವಾಜಾ಼ನಿ ಲೊಕಾನಾ ಭೆ ಬರ್ನಾರ್. 26ಆಬ್ಳಾತ್ಲಿ ಬಳ ಡಳಮಳ್ಳಿತ ಮನ್ಹುನ್ ಮಾನ್ಸ ಬಿಹುನ್ ಪರಪಂಚಾತ್ ಕ್ಯಾ ಯತ್ಯಾ ಮನ್ಹುನ್ ಬಿಹ್ಯಾಲಿತ. 27ತ್ಯಾಸ್ ಯಳಾಲಾ ಮಾನ್ಸಾಚಾ಼ ಲ್ಯೊಕ್ ಬಳಾನಿ ಮೊಟೆ ಮೈಮೆನಿ ಡಘಾತ್ನಿ ಯತ್ಯಾಲಾ ತೀ ಬಗ್ನಾರ್.

28ಫನ್ ಹ್ಯ ವ್ಹತಾನಾ ವರ್‍ ಬಗಾ, ತುಮ್ಚಿ ಡುಯಿ ಉಚ಼್ಲಾ ತುಮ್ಚಿ ಸುಟ್ನುಕ್ ಜ಼ವಳ್ ಆಲೆ ಮನ್ಲಾ.

ಅಂಜು಼ರಾಚಾ ಜಾ಼ಢಾಚಾ಼ ಪಾಠಾ

(ಮತ್ತಾಯ್ 24:32-35; ಮಾರ್ಕ್ 13:28-31)

29ಯೇಸುನಿ ತ್ಯನಾ ಯೇಕ ಕ್ಯಾಯ್ನಿನಿ ಕ್ಯಾ ಸಾಂಗ್ಲ ಮಂಜೆ, “ಅಂಜು಼ರಾಚ಼ ಆನಿ ದುಸ್ರಿ ಜಾ಼ಡ ಬಗಾ 30ತೀ ಪಾಲಾವ್ಲಿತ ಮಂಜೆ ತ್ಯ ತುಮಿ ಬಗುನ್ ಆತಾ ಉನಾಳಾ ಜ಼ವಳ್ ಆಲಾ ಮನ್ಹುನ್ ತುಮಿಸ್ ಸಮಜು಼ನ್ ಗೆಥಾಸಾ. 31ತಸಸ್ ತುಮಿ ಹ್ಯ ಸಗ್ಳ ವ್ಹತ್ಯಾಲ ಬಗ್ತಾನಾ ದೇವಾಚ ರಾಜೆ ಖುಬ್ ಜ಼ವಳ್ ಹಾ ಮನ್ಹುನ್ ಸಮಜು಼ನ್ ಗೆವ್ಹಾ.

32ಸಗ್ಳ ಹಿ ಗ್ಯೊಶ್ಟ್ ವ್ಹಯಿ ಪರ್ಯಾತ್ ಹಿ ಪಿಳ್ಗಿ ಮರುನ್ ಜಾ಼ನಾರುಸ್ ನಾಹಿ ಮನ್ಹುನ್ ತುಮಾನಾ ಖರ‍್ಯಾನಿ ಸಾಂಗ್ತೊ. 33“ದರ್ಥಿ ಆಬಾಳ್ ಪುಸುನ್ ಜಾ಼ತಿಲ ಫನ್ ಮಾಜ಼ ಸಬಾತ್ ಕಂದಿಸ್ ಪುಸುನ್ ಜಾ಼ನಾರುಸ್ ನಾಹಿತ.

ಜಾ಼ಗರಾವ್ಹಾ

34ತುಮ್ಚೆ ಗುಶ್ಟಿತ್ ಸಂಬಾಳುನ್ ರಾವ್ಹಾ. ಖಾದಿ ಪಿದಿನಿ ಪರಪಂಚಾಚೆ ಕ್ಯಾಳ್ಜಿನಿ ತುಮ್ಚಿ ಮನ್ ಬರ‍್ಹುನ್ ಜಾ಼ವುನ್ ತ್ಯೊ ದಿಸ್ ತುಮ್ಚಿವ ಆಚಾನಕ್ ಯಯಿಲ್.

35ತ್ಯೊ ದಿಸ್ ಸಗ್‍ಳ್ಯಾ ಲೊಕಾಂಚಿವ ಫ್ಯಾಸ್‌ಕ್ಯಾಚೆಗತ್ ಯನಾರ್. 36ಫನ್ ಯಯಿ ಆಸ್‍ನಾರ‍್ಯಾ ಹ್ಯಾ ಸಗ್‌ಳ್ಯಾ ಗುಶ್ಟಿತ್ನಿ ಚು಼ಕ್ವುನ್ ಗಿಹ್ಯಾ ಮಾನ್ಸಾಚಾ ಲೇಕಾಚೆ ಮೊರ‍್ಹ ಉಬಿರಾಹ್ಯಾ ತುಮಿ ಪುರಾ ಶಕ್ತ ವ್ಹಯಿ ಜೊ಼ಗ ಸಗ್‍ಳ್ಯಾ ಕಾಲಾತ್ ಜಾ಼ಗಿ ರಾಹುನ್ ದೇವಾಪ ಮಾಗ್ನ ಕರೀತ್ ಸಂಬಾಳುನ್ ರಾವ್ಹಾ ಮನ್ಲಾ.

37ಯೇಸು ದಿಸಾಚಾ಼ ದೇವ್ಳಾತ್ ಶಿಕ್ವಿತ್ ರ‍್ಯಾಚಾ ಬಾಹಿರ್ ಜಾ಼ವುನ್ ಒಲೀವ್ ಜಾ಼ಢಾಚಾ ಗುಢ್ಯಾವ ರಾಹಿತ್ ಹುತ್ತಾ. 38ಲೊಕ ಸಗ್ಳಿ ತ್ಯಚ಼ ಸಿಕ್ಶನ್ ಐಕಾಯಾ ವ್ಹಯಿ ಮನ್ಹುನ್ ಖಾಯಿಮ್ ಸಕಾಳ್ಚಿ ದೇವ್ಳಾತ್ ತ್ಯಚಿಪ ಯಯಿತಿತ.

Currently Selected:

ಲುಕ್ 21: NTGMi23

Highlight

Copy