ಮತ್ತಾಯ 21

ಯೆಸು ರಾಜಾ಼ ಲಿಂಗತ ಯೆರುಸಲೆಮಮಾ ಪ್ರವೆಶ ಕರ‍ಲ

(ಮಾರ್ಕ 11:1-11; ಲುಕ 19:28-40; ಯೊಹಾನ 12:12-19)

1ಯೆಸು ವರಿ ತಿನಾ ಶಿಷ್ಯಾ ಯೆರುಸಲೆಮನಾ ನಜಿಕ ಗೈನ ಒಲಿವ ತೆಲನಾ ಝಾಡೊನಾ ಡೊಂಗರನಾ ಬಾಜು಼ಮಾ ರ‍್ಹಯಲ ಬೆತ್ಫೆನೆ ಆಯಲ್ಪರ 2ಯೆಸು ಬೆ ಶಿಷ್ಯಾವೊನೆ ಬಲೈನ, ತುಮಾರಾ ಕ್ಹಾಮಾರ‍್ಹಯಲ ಖೆಡಾ ಗಾಮೊನೆ ಜಾ಼ವೊ; ಗಯಲ ಬಬ್ಬರ ತ್ಯಾ ಭಾಂದಲ ಗದ್ಡಾನೆ ತಿನಾ ಕ್ಹಾತೆ ರ‍್ಹಯಲ ಗದ್ಡಾನು ಬಚ಼್ಚು ದೆಕ್ಯೊಶಿ; ತ್ಯುನೊನೆ ಛೊಡೈನ ಮಕನ ಲಿನ ಆವೊ. 3ಕುನ್ನತಬಿ ತುಮೊನೆ ಸುತಬಿ ಕದ್ಯಾಮ, ‘ಎ ಹಮಾರಾ ಪ್ರಭುನೆ ಚಾ಼ಯೆ ಥಯಾಸ’ ಕೈನ ತುಮೆ ಕವೊ; ತೆ ತೆಳಾಮಾಜ಼ ತ್ಯುನೊನೆ ಛೊಡಿನ ದಿವಸ ಕೈನ ವಳಾಯೊ. 4ಪ್ರವಾದಿ ಕದಲ ವಾತ ಪುರಾ ಥಾವಾನಾಹುತಿ ಇಮ್ಮ ಥಯು; ತೆ ಸುವೈ ಕದ್ಯಾಮ, 5ಚಿಯೊನ ದಿಕ್ರಿ, ದೆಕ, ತಾರೊ ರಾಜೊ಼ ತುಕನ ಆವಾಡ್ಯೊಸ; ತೆ ಚೊಕಿ ಗುಣಾ ರ‍್ಹಯಲವಾಲೊ ಥೈನ ಗದ್ಡಾನೆ, ಹೊ ಗದ್ಡಾನಾ ಬಚ್ಚಾ಼ಪರ ಚ಼ಡಿನ ಆವಾಡ್ಯೊಸ ಕೈನ ಕವೊ ಕವಾನುಜ಼ ವ್ಹೈ. 6ತೆಳಾಮಾ ಶಿಶ್ಯಾ ಗೈನ ಯೆಸು ತ್ಯುನೊನೆ ಅಪ್ಪಣೆ ದಿದಲ ತಿಮ್ಮ ಕರ‍್ಯಾ. 7ಗದ್ಡಾನೆ ವರಿ ತಿನಾ ಬಚ್ಚಾ಼ನೆ ಲಿನ ಐನ ತ್ಯುನಾ ಉಪ್ಪರ ತ್ಯುನಾ ವಣ್ಣಾ ಘಾಲಲ್ಪರ ಯೆಸು ಚ಼ಡಿನ ಬೈಟ್ಯೊ. 8ತೆಳಾಮಾ ಮನ್ಹೊನಾ ಗುಂಪಮಾ ಘನಾ ಜ಼ನಾ ತ್ಯುನಾ ವಣ್ಣಾ ವಾಟಮಾ ವಚ್ಚಾ಼ಯಾ ಬಿಜಾ ದಕ್ಹಾಜ಼ನಾ ಝಾಡೊಕ್ಹು ಟೊಂಗಿಯೊ ವಾಟಮಾ ವಚ್ಚಾ಼ಯಾ. 9ತಿನಾ ಅಗಾ ಪಾಚಾ಼ ಜಾವಾಲಾ ಮನಕ್ಹೊ, ದಾವಿದನಾ ದಿಕ್ರಾ ಹೊಸನ್ನಾ! ಕರ್ತಾನಾ ನಾಮಪರ ಆವಾಲೊ ಧನ್ಯ ವ್ಹೈ! ಉಪ್ಪರಲ್ಯಾ ಲೊಕಮಾ ಹೊಸನ್ನಾ ಕೈನ ವದ್ರ್ಯಾ. 10ಯೆಸು ಯೆರುಸಲೆಮನಾ ಮ್ಹೈ ಜಾ಼ತಾಮಾ ಗಾಮಾ ಕ್ಹಾರಾ ಗದ್ದಲ ಥೈನ, ಆ ಕುನ್ನ ವ್ಹೈ? ಪುಚ್ಯಾ಼. 11ತೆನೈಸೊ ತೆ ಗುಂಪನಾ ಮನಕ್ಹೊ, ಎ ಗಲಿಲಾಯನೊ ನಜರೆತನೊ ಯೆಸು ವ್ಹೈ ಕೈನ ಕದ್ಯಾ.

ಯೆಸು ದೆವಾಲಯಮಾ ಗಯಲ

(ಮಾರ್ಕ 8:11-13; ಲುಕ 12:54-56)

12ಪಾಚಾ಼ತೊ ಯೆಸು ದೆವಾಲಯಮಾ ಗೈನ ತಿಮಾ ಇಕ್ಕಾನು ಲಿವಾಲಾನೆಬಿ ಕ್ಹಾರಾವೊನೆ ಭಾರೊ ಘಾಲಿನ ದೊಕ್ಡಾ ಬದ್ಲಿ ಕರಾನು ಟೆಬಲ ಕ್ಹಬುತರನಾ ಪೆಟಗಿಯೊನೆ ಢಕ್ಲಿ ಪಾಡ್ಯೊ. 13ತೆ ತ್ಯುನೊನೆ, ‘ಮಾರು ಘರ ಪ್ರಾರ್ಥಾನು ಘರ ಥಯುಸ. ಕೈನ ಬರದಲ ಛೆ; ತೆನೈಸೊ ತುಮೆ ತಿನೆ ಚೊ಼ಟ್ಟಾವೊನು ಘರ ಕರಾಡ್ಯಾಸ ಕೈನ ಕದ್ಯೊ. 14ತೆಳಾಮಾ ತ್ಯಾ ರ‍್ಹಯಲ ಕುಡ್ಡಾ ಲಂಗ್ಡಾ ದೆವಾಲಯಮಾ ತೆ ಆತಾಮಾ ತ್ಯುನೊನೆ ಅರಾಮ ಕರ‍್ಯೊ. 15ತೆನೈಸೊ ಕ್ಹಾಸ ಯಾಜಕೊ ಶಾಸ್ರ್ತಿಯೊ ತೆ ಕರಲ ಆಶ್ಚರ್ಯ ಕರಲ ಕಾಮೊ ದೆಕಿನ ವರಿ ದಾವಿದನಾ ದಿಕ್ರಾ ಹೊಸನ್ನ ಕೈನ ಪಟ್ಟಾ ವದ್ರಾನು ದೆಕಿನ ಸಿಟ್ಟ ಥಯಾ. 16ತಿನೆ , ಅವ್ನೆ ಕವಾನು ಐಕಾಡ್ಯೊಸು ಕೈನ ಕತಾಮಾ ಯೆಸು, ಹಾ, ಐಕಾಡ್ಯೊಸ, ತೆನೈಸೊ ‘ ನ್ಹಾನಾ ಬಚ್ಚಾ಼ನಾ ಮ್ಹೊಡಾಕ್ಹು ದುದ್ದ ಪಿವಾನಾ ಬಚ್ಚಾ಼ನಾ ಮ್ಹೊಡಾಕ್ಹು ತು ಸ್ತೊತ್ರಾನೆ ತಯ್ಯಾರ ಕರಸಿ’ ಕವಾನು ತುಮೆ ಕೆಳಾಮಾಬಿ ಓದ್ಯಾವಸೆತೊ? ಕೈನ ಪುಚ್ಯೊ಼. 17ತೆಳಾಮಾ ತ್ಯುನೊನೆ ಛೊಡಿನ ಗಾಮತೊ ಗೈನ ಬೆಥನ್ಯಾನೆ ಐನ ತ್ಯಾ ರಾತೆ ಕ್ಹುರಯೊ.

ಯೆಸು ಉಂಬ್ರೊನಾ ಝಾಡನೆ ಕ್ಹರಾಪಲ

(ಮಾರ್ಕ 11:12-14)

18ಪಾಟೆ ಯೆಸು ಗಾಮೆ ಗೈನ ಆತಾಮಾ ಭುಕ್ಕ ಲಾಗಿತಿ. 19ವಾಟಮಾ ಯಕ್ಕ ಅಂಜು಼ರನಾ ಝಾಡನೆ ದೆಕಿನ ತಿನಾ ಕ್ಹಾಮೊ ಗೈನ ತಿಮಾ ಕ್ಹಾಲಿ ಪಾಲೊ ರ‍್ಹವಾನು ದೆಕಿನ ತಿನೆ, ಅನಾಪರ ತಾರಾಮಾ ಕೆಳಾಮಾಜ ಫಲ ದಿಯುಜ಼ ನೈ ಕೈನ ಕದ್ಯೊ. ತೆ ಟೆಮಾ ತೆ ಅಂಜುರನು ಝಾಡ ಕ್ಹುಕ್ಹೈ ಗಯು. 20ಶಿಷ್ಯಾ ತೆ ದೆಕಿನ ಘಾಬ್ರಾ ಥೈನ, ಆ ಅಂಜುರನು ಝಾಡ ಯಕ್ಕಜ಼ ಟೆಮಾ ಕ್ಹುಕ್ಹೈ ಗಯುತೊ ಕೈನ ಘಾಬ್ರಾ ಥಯಾ. 21ತೆನೈಸೊ ಯೆಸು, ತುಮೊನೆ ಕ್ಹರಿಜ ಕೌಸ ತುಮೆ ಸಂಶೆಕರೆವಾಚಿ಼ ನಂಬ್ಯಾಮ ಆ ಅಂಜುರನು ಝಾಡನೆ ಕರಲ ನಿಂಗತ ತುಮೆಬಿ ಕರೊಶಿ ತೆನೈಸೊ ಎ ಡೊಂಗರನೆ ‘ ತು ಕಿತ್ತಿಲಿನ ಗೈನ ಸಮಂದರಮಾ ಪಡ’ ಕೈನ ಕದ್ಯಾಮ ತೆಬಿ ಥಾವಸ. 22ತುಮೆ ಭರೊಕ್ಹೊ ಕರಿನ ಪ್ರರ್ಥಾನಾಮಾ ಸುಸು ಮಾಂಗಿಲಿವೊಸಿ ತೆ ಕ್ಹಾರು ಹೊಂದಸ ಕೈನ ಕದ್ಯೊ.

ಯೆಸುನಿ ಅದಿಕಾರನಾಹುತಿ ಸವಾಲ ಕರ‍ಲ

(ಮಾರ್ಕ 11:27-33; ಲುಕ 20:1-8)

23ತೆ ಥಯಲ್ಪರ ಯೆಸು ಯೆಸು ದೆವಾಲಯಮಾ ಐನ ಭೊದನೆ ಕರ್ತಾಮಾ ಖಾಸ ಯಾಜಕೊ ಮನಕ್ಹೊನಾ ಮ್ಹೊಟಾ ತಿಕನ ಐನ, ತುಮೆ ಕಯಾ ಅದಿಕಾರಕ್ಹು ಎ ಕ್ಹಾರು ಕರಾಡ್ಯೊಸ? ಆ ಅದಿಕಾರ ತುನೆ ದಿದಲವಾಲೊ ಕುನ್ನ ವ್ಹೈ? ಕೈನ ಪುಚ್ಯಾ. 24ಯೆಸು ತ್ಯುನೊನೆ ಕದಲ ಸುವೈ ಕದ್ಯಾಮ, ಮಿಬಿ ತುಮೊನೆ ಯಕ್ಕ ಪ್ರಶ್ನೆ ಪುಚ್ಚು಼ಸ; ತಿನೆ ತುಮೆ ಮನೆ ಉತ್ತರ ದಿದ್ಯಾಮ ತೆಳಾಮಾ ಮಿ ಕಯು ಅದಿಕಾರಕ್ಹು ಎ ಕರುಸ ಕೈನ ತುಮೊನೆ ಕೌಸ. 25ಬಾಪ್ತಿಸ್ಮಾ ದಿವಾನು ಅದಿಕಾರ ಯೊಹಾನನೆ ಕಿಜಾ಼ತು ಐಯುತು ಪರಲೊಕತು ನೈತೊ ಮನಕ್ಹೊಕ್ಹು? ಕದ್ಯೊ. ತೆಳಾಮಾ ತ್ಯುನೆ, ಪರಲೊಕತು ಐಯುಸ ಕೈನ ಹಮೆ ಕದ್ಯಾಮ, ‘ತಿಮ್ಮ ರ‍್ಹಯಾಮ ತುಮೆ ತಿನೆ ಕಾ ನಂಬ್ಯಾ ನತ್ತಿ’ ಕೈನ ಅಪೊನೆ ಪುಚ್ಚಸ; 26"ಮನಕ್ಹೊಕಂತು ಐಯುಸ ಕೈನ ಕದ್ಯಾಮ, ಅಪೊನೆ ಮನಕ್ಹೊನೊ ಭೆ ಛೆ. ಯೊಹಾನ ಪ್ರವಾದಿ ವ್ಹೈ ಕೈನ ಮನಕ್ಹೊ ವಪ್ಪಿಲಿದ್ಯಾಸ್ತೊ ಕೈನ ತ್ಯುನೊ ತ್ಯುನೊಮಾಜ಼ ಬೊಲ್ಲಿವಾಡ್ಯಾತಾ. 27ತೆ ಥಯಲ್ಪರ ತ್ಯುನೆ, ಹಮೊನೆ ಗ್ವತ್ತ ನತ್ತಿ ಕೈನ ಯೆಸುನೆ ಕದ್ಯಾ. ತೆಳಾಮಾ ಯೆಸು ತ್ಯುನೊನೆ ಕೈ ಅದಿಕಾರಕ್ಹು ಮಿ ಎ ಕ್ಹಾರು ಕರಾಡ್ಯೊಸ ಕೈನ ಮಿಬಿ ತುಮೊನೆ ನೈ ಕತೊ.

ಬೆ ದಿಕ್ರಾವೊನಿ ಸಾಮ್ಯ

28ತೆನೈಸೊ ತುಮೊನೆ ಕಿಮ ದಿಕ್ಹಸ? ಯಕ್ಕ ಮನಕ್ಹನೆ ಬೆ ಬಚ್ಚಾ಼ ವ್ಹತಾ. ತೆ ಪಸ್ಟಲ್ಯಾ ಬಚ್ಚಾ಼ ಕೈನ ಐನ, ದಿಕ್ರಾ ತು ಆಜ಼ನಾ ದಿನ್ನೆ ಗೈನ ದ್ರಾಕ್ಷಿಯೊನಾ ಮಳಾಮಾ ಕಾಮ ಕರ, ಕೈನ ಕತಾಮಾ 29ತೆಳಾಮಾ ತೆ ಪಟ್ಟೊ, , ಮಿನೈ ಜಾ಼ತೊ ಕೈನ ಕದ್ಯೊತುಬಿ ವರಿ ತಿನು ಮನಸ ಬದಲಿ ಕರ್ಲಿನ ಮಳಾಮಾ ಗಯೊ. 30ತೆಳಾಮಾ ತಿನಾ ಬಿಜೆಕ್ಲಾ ದಿಕ್ರಾಕನ ಐನ ತೆಜ಼ ವಾತ ಕತಾಮಾ, ಬಾ ಮಿ ಜೌ಼ಸ, ಕೈನ ಕದ್ಯೊತುಬಿ ಗಯೊಜ಼ ನೈ. 31ಎ ಭಂಬಿ ಜ಼ನಾವೊಮಾ ಬಾಪನಿ ವಾತನೆ ಕುನ್ನ ವಿಧೆಯ ಥಯು? ಕೈನ ಪುಚ್ತಾ಼ಮಾ ತ್ಯುನೆ ಪಸ್ಟಲ್ಯೊ ಕೈನ ಕದ್ಯಾ. ತೆಳಾಮಾ ಯೆಸು ತ್ಯುನೊನೆ ಸುಂಕವಾಲಾ, ವೈಭಿಚಾರ ಕರಾಲಿಯೊ ತುಮೊತಿ ಪೈಲಾ ಕ್ಹುದಾನಿ ರಾಜ್ಯಮಾ ಜಾ಼ವಸ ಕೈನ ತುಮೊನೆ ಕ್ಹರಿಮಾಜ಼ ಕೌಸ. 32ಕಾ ಕದ್ಯಾಮ ಯೊಹಾನ ಕ್ಹರಿನಿ ವಾಟ ದೆಕಾಡಾಲೊ ಥೈನ ತುಮೊಕನ ಆಯೊ. ತುಮೆ ತಿನೆ ನಂಬ್ಯಾ ನೈ. ಸುಂಕವಾಲಾ ವರಿ ವೈಭಿಚಾರ ಕರಾಲಿಯೊ ತಿನೆ ನಂಬಿಯೊ; ತುಮೆ ಎ ಕ್ಹಾರು ದೆಕ್ಯಾತಬಿ ಪಶ್ಚಾತಾಪ ಪಡ್ಯಾ ನೈ, ತಿಪರ ಬರೊಕ್ಹೊ ಕರ‍್ಯಾ ನೈ.

ದ್ರಾಕ್ಷಿಯೊನಾ ಮಳಾನೆ ವತ್ತಿ ಲಿದಲವಾಲಾವೊನಿ ಸಾಮ್ಯ

(ಮಾರ್ಕ 12:1-12; ಲುಕ 20:9-19)

33ಬಿಜಿ಼ ಸಾಮ್ಯ ಐಕೊ, ಯಕ್ಕ ಘರ್ನೊ ಮಾಲಕ ವ್ಹತ್ತೊ. ತಿನೊ ಯಕ್ಕ ದ್ರಾಕ್ಷಿಯೊನೊ ಮಳೊ ವ್ಹತೊ. ತಿನಾ ಸುತ್ತೆ ಬೆಲಿ ಭಾಂದಿನ, ತಿಮಾ ದ್ರಾಕ್ಷಯೊನೊ ಘಾಣೊ ಘಾಲಿನ, ಕೈದಾನು ಝೊಪ್ಡು ಭಾಂದಿನ, ತೆ ದ್ರಾಕ್ಷಯೊನೊ ಮಳೊ ಬಿಜಾ಼ವೊನೆ ವತ್ತಿ ಘಾಲಿನ ತೆ ಬಿಜಾ಼ ದೆಶೆ ಗಯೊ. 34ಫಲ್ಲ ದಿವಾನೊ ಟೈಮ ನಜಿಕ ಆತಾಮಾ ತೆ ಮಳಾನೊ ಮಾಲಕ ತಿನೊ ವಾಟೊ ಲಿವಾನಾ ಹುತಿ ತೆ ವತ್ತಿ ಘಲ್ಲಿದಲವಾಲಾವೊಕನ ತಿನಾ ಆಳೊನೆ ಮೊಕಲ್ತಾಮಾ, 35ತೆ ವತ್ತಿ ಘಾಲ್ಲಿದಲವಾಲಾ ತೆ ಮೊಕ್ಲಲ ಆಳೊಮಾನಾ ಯಕ್ಲಾನೆ ಮಾರ‍್ಯಾ, ಯಕ್ಲಾನೆ ಕತ್ರಿಪಾಡ್ಯಾ, ಯಕ್ಲಾನೆ ದಗ್ಡಾ ಮಾರಿನ ಖಲಾಸ ಕರಿಪಾಡ್ಯಾ. 36ತೆ ಮಾಲಕ ವರಿಯಕ್ಕೆಬ ಹಜು಼ನ ಘನ್ನಾ ಜ಼ನಾವೊನೆ ಮೊಕಲ್ತಾಮಾ ತ್ಯುನೆ ತ್ಯುನೊನೆಬಿ ತಿಮ್ಮಜ಼ ಕರಿಪಾಡ್ಯಾ. 37ಲಾಸ್ಟಮಾ ತಿನಾ ದಿಕ್ರಾನೆತಬಿ ಮೊಕಲ್ಯೊಮ ತಿನೆತಬಿ ಮರಯಾದಿ ದಿವಸ ಕೈನ ತಿನಾ ದಿಕ್ರಾನೆ ಮೊಕಲ್ಯೊ. 38ತೆನೈಸೊ ತೆ ಮಳೊ ವತ್ತಿ ಘಾಲ್ಲಿದವಾಲಾ ತಿನಾ ದಿಕ್ರಾನೆ ದೆಕಿನ, ಎಜ಼ ಉತ್ತರಾಧಿಕಾರಿ ವ್ಹೈ ಕೈನ, ಆವೊ ಇನೆಜ಼ ಖಲಾಸ ಕರಿಪಾಡಿಯೆ, ಇನೊ ರ‍್ಹಯಲ ಕ್ಹಾರುಜ಼ ಅಪೆ ಲಿಪಾಡಿಯೆ. ಕೈನ ತ್ಯುನೊ ತ್ಯುನೊಮಾಜ಼ ಬೊಲ್ಲಿದ್ಯಾ. 39ತಿನೆ ದ್ರಾಕ್ಷಿಯೊನಾ ಮಳಾಮಾತಾ ಢಕ್ಲಿನ ಕಲಾಸ ಕರಿಪಾಡ್ಯಾ. 40ತಿಮ ರ‍್ಹಯುಮ ದ್ರಾಕ್ಷಿಯೊನೊ ಮಳಾನಾ ಮಾಲಕ ಆತಾಮಾ ತೆ ವತ್ತಿ ಘಾಲ್ಲಿದಲವಾಲಾವೊನೆ ಸು? ಕರಸ. ಕದ್ಯೊ. 41ತ್ಯುನೆ ತಿನೆ, ತೆ ಕೆಟ್ಟವಾಲಾವೊನೆ ವರಿ ಕ್ರುರ ತನಾಕ್ಹು ಖಲಾಸ ಕರಿನ ಕರೆಟ್ಟ ಟೈಮ್ಮಾ ಫಲ್ಲಮಾ ವಾಟೊ ದಿವಾಲಾನೆ ಬಿಜಾ಼ ವತ್ತಿವಾಲಾವೊನೆ ತೆ ಮಳೊ ವತ್ತಿ ಘಾಲಸ ಕೈನ ಕದ್ಯಾ. 42ಯೆಸು ತ್ಯುನೊನೆ, ಘರ ಭಾಂದಾಲಾ ನಕೊ ಕೈನ ಠುಕ್ರಾಯಲ ದಗ್ಡೊಜ಼ ಖಾಸ ಮುಲಾನೊ ದಗ್ಡೊ ಥಯೊ; ಎ ಕರ್ತಾಕ್ಹುಜ಼ ಥಯು. ವರಿ ತೆ ಕ್ಹಾರು ಅಪ್ನಾ ಡೊಳಾನೆ ಆಶ್ಚರ್ಯನಿಂಗತ ದಿಕ್ಹಸ ಕವಾನು ತುಮೆ ಧರ್ಮಶಾಸ್ತ್ರಮಾ ಕೆಳಾಮಾಬಿ ಒದ್ಯಾ ನತ್ತಿ ಸು? 43ತಿನಾ ಹುತಿ ಕ್ಹುದಾನು ರಾಜ್ಯ ತುಮೊಮಾತು ಕಾಡಿನ ತಿನೆ ಫಲ್ಲ ದಿವಾಲಾ ಮನಕ್ಹೊನೆ ದಿವಸ. 44ಎದಗ್ಡಾಪರ ಪಡಾಲೊ ತುಕ್ಡಾ ತುಕ್ಡಾ ಥಾವಸ; ಎ ದಗ್ಡೊ ಕಿಪರ ಪಡಸ ತೆ ತ್ಯುನೊನೆ ಪುಡಿ ಪುಡಿ ಕರಸ. ಕೈನ ಕದ್ಯೊ. 45ಖಾಸ ಯಾಜಕೊ ಫರಿಸಾಯರೊ ತೆ ಕದಲ ಸಾಮ್ಯ ಐಕಿನ ತ್ಯುನಾಹುತಿಜ಼ ಕವಾಡ್ಯೊಸ ಕೈನ ತಿಳದಿಲಿನ ಯೆಸುನೆ ಬಂದಿ ಕರಾನಾ ಹುತಿ ಟೈಮ ದೆಕಾಡ್ಯಾತಾ. 46ತೆನೈಸೊ ತ್ಯುನೆ ತಿನೆ ಬಂದಿ ಕರಾನಾಹುತಿ ಕೊಶಿಶ ಕರ‍್ಯಾತುಬಿ ಮನಕ್ಹೊ ತಿನೆ ಪ್ರವಾದಿ ವ್ಹೈ ಕೈನ ತಿಳದಿಲಿದಲ ಹುತಿ ಮನಕ್ಹೊನಾಹುತಿ ಭುಚಕ್ಯಾ.

Currently Selected:

ಮತ್ತಾಯ 21: NTSrr23

Highlight

Copy