Svun Mateo 18
18
Ja' li' yaloj ti ja' tsots yabtel chc'otic li much'utic ja' yech yo'onic chac c'u cha'al li c'oxetique
(Mc 9.33-37; Lc 9.46-48; 17.1-2)
1Ti c'alal iyac' tojel aq'uel ti Jesuse, li yajchanc'optaque inopojic ech'el yo' bu ti Jesuse, ja'o isjac'beic:
—¿Much'u ti más ich'bil ta muc' chc'ot yo' bu tspas mantal ti Rioxe? ―Xutic.
2Ti Jesuse, iyic'tal jun c'ox crem isva'an ta o'lol yo' bu tsobolique, 3Ja' yech iyal chac li'i:
—Ta melel chacalbeic, mi muc' bu chabic'tajes abaique, mi mu xaco'oltas abaic chac c'ucha'al li c'oxetique, mu xu' cha'ochic yo' bu tspas mantal ti Rioxe. 4Yech'o un, ti much'u biq'uit chac' sba chac c'ucha'al li c'ox crem li'i, ja' ich'bil ta muc' chc'ot yo bu tspas mantal ti Rioxe. 5Ti much'u chich' ta muc' ta jcuenta vo'on junuc c'ox crem chac c'ucha'al li'i, vo'on chiyich' ta muc'.
Ja' li' yaloj ti c'usi más xi'elsba ti ta jta o jmultique
(Mc 9.42-48; Lc 17.1-2)
6»Ti much'u chac'be sa' smul junuc li c'oxetic ti yich'ojicon ta muq'ue. Más lec ti ac'u yich' chucbel jp'ejuc stanal muc'ta molino ta snuq'ue, ti ac'o yich' jipel yalel c'alal to ta chac mare. 7¡Toj abol sbaic li crixchanoetic li'ic ta sba balamile! Yu'un toj ep li c'usitic ch-lo'loatic o ta mulile. Pero yu'un ono'ox chc'ot yech ti oy c'usitic chmacvan ta bee, ¡pero más to toj abol sba li much'u chac'be sa' smul li xchi'ile ti tsocbe yo'one!
8»Mi ja' chayac' ta mulil lavoc ac'obique. Tsc'an chatuch'ic loq'uel, nom xa jipic ech'el. Ja' más lec mi jun avoc ac'ob cha och ech'el ta vinajele, ja' chopol ti mi tey xchibal avoc ac'ob chavich' jipel ochel ta c'oc' ta sbatel osile. 9Ja' no'ox yech noxtoc mi ja' chayac' ta mulil lasate, tsc'an chapits loq'uel, nom xa jip ech'el, ja' más lec mi jp'ej p'ej asat cha'och ech'el ta vinajele, ja' chopol mi xchi'uc xcha'p'ejel asat chavich' jipel ochel ta c'oq'ue, ti tey chavich' avocole.
Lo'il scuenta jch'ayel chij
(Lc 15.3-7)
10»Q'uelo me abaic, mu me xap'ajic junuc li c'oxetic li'i. Yu'un li yaj angelique, ja' ti much'utic tey sq'uelojbeic o sat ti Jtot tey ta vinajele.
12»¿C'usi chanopic? Ti c'alal oy jun vinic ti oy cien (100) xchije. Mi ich'ay jcotuque, ¿mi mu lamaluc chicta comel ta vitstic li noventa y nuevee (99) ja' chba sa' tal li jcot ch'ayeme? 13Pero mi ista li jcot ti ich'aye, más to jun o yo'on; ja' mu sta yech jun o yo'on li noventa y nueve (99) tey lamal comem ti muc' bu ch'ayeme. 14Ja' no'ox yech la Totic tey ta vinajele, mu sc'an ti ch'ayel chbat junuc li c'oxetic li'i.
Ja' li' yaloj ti c'u x'elan chcac'tic ta pertonal li jchi'iltique
(Lc 17.3)
15»Ti mi oy bu ista smul ta atojol junuc achi'il ta yich'elon ta muq'ue, ba lequil'albo atuc ba ac'bo sna' ti c'usi chopol ispase. Mi laya'ibee, lec chacomic. 16Ti mi mu xa ya'ibe ac'op ta atuque, ic'o ech'el junuc o mi cha'vo'uc achi'il. Yu'un scotol li c'usitic chachapanique persa ono'ox tsc'an cha'vo' o mi oxv'ouc rextico. 17Ti mi muc' xa ya'ibeic noxtoc li c'usi avalbeique, albo scotol li achi'iltac ta yich'elon ta muq'ue. Mi mu xa xch'unbeic acotolic noxtoque, mu xa xa p'isic ta jch'unolajel, comuc c'u cha'al jc'an-loc'-c'usiticuc.
18»Ta melel chacalbeic, scotol ti c'usi chachuquic li' ta sba balamile, chucul chc'ot ta vinajel. Ja' no'ox yech noxtoc, scotol ti c'usi chajitunic li' ta sba balamile, jitujem chc'ot tey ta vinajele.
19»Chacalbeic noxtoc: Mi oy cha'vo'oxuc li' ta balamil ti co'ol ajolic chac'oponic ti Jtot tey ta vinajele, mi oy c'usi chac'anbeique chayac'beic. 20Yu'un mi oy atsoboj sbaic cha'vo' oxvo'uc ta jcuentae, li vo'one teyon ta o'lol avu'unic―xi ti Jesuse.
21Ti Pedroe inopoj ech'el yo' bu ti Jesuse, xi isjac'bee:
—Cajval, ¿jay'ech'el tsc'an chcac' ta pertonal mi ista smul ta jtojol junuc li jchi'ile? ¿Mi xu' ti vuc'ech'el no'oxe? ―Xut.
22Itac'av ti Jesuse:
—Muc' bu chacalbe ti vuc'ech'el no'oxe. Tsc'an chavac' ta pertonal vucub (7) belta ta setentatic (70) ―x'utat yu'un ti Jesuse.
Lo'il scuenta cha'vo' ti oy yilique
23»Ti c'u x'elan tspasvan ta mantal ti Rioxe ja' co'ol c'u cha'al jun rey ti tsc'an cha'i c'uyepal yil li xchi'iltac ta abtele. 24C'alal istambe sq'uelele, tey i'ic'bat tal ti much'u oy lajun mil (10,000) talento yile. 25Ti jun j'abtel taje mu xa xtoj yu'un li yile. Yech'o un, li reye isloq'ues mantal ti ac'u chonatuc ta mozoil scotolic xchi'uc yajnil xchi'uc xch'amaltac, xchi'uc scotol c'usuc yu'un yo' xtoj o li yile. 26Ti c'alal iya'i li vinique, isquejan sba, isc'opon li reye: “Cajval, abulajan malabon to li quile. Chajsutesbe onox scotol.” Xi. 27Li reye ic'uxubaj ta yo'on li xchi'il ta abtele; ixch'aybe scotol li yile, iscolta ech'el.
28»Ti c'alal iloc' ech'el li vinique, isnup ta be jun xchi'il ti oy cien (100) denario yil yu'un uque. Istsac li xchi'ile, ismich'be snuc'. Xi iyalbee: “¡Tojbon ta ora lavile!”, Xut. 29Li xchi'ile isquejan sba uc, isc'anbe vocol: “Abulajan malabon to li quile, chajsutesbe onox scotol.” Xut. 30Pero mu xa smala, ba stic' ta chuquel. Ja' to snopoj tsloq'ues ti mi itojbat scotole. 31Ti c'alal iyil li yan xchi'iltac ta abtel ti c'usi ispase, chopol iyilic. Ba yalbeic ta ora li reye. 32Yech'o un li reye istac ta iq'uel, xi iyalbee: “¡Li vo'ote toj chopol ajol! Li vo'one la jch'aybe scotol la vile yu'un xavocolet xa ta jtojol. 33¿C'u yu'un ti muc' xac'uxubin lachi'il chac c'u cha'al lajc'uxubin li vo'one?” —Xut. 34Li reye icap ta jmec. Iyac'be ta sc'ob li much'utic ch-ilbajinvanic ta chuclebale. Ja'to ta tsloq'ues mi istoj scotol li yile.
35Ti Jesuse xi to iyale:
—Ja' no'ox yech chaxcha'leic ti Jtot tey ta vinajel uque, ti mi mu sjunuluc avo'onic chavaq'uic ta pertonal lachi'ilique ―x'utatic yu'un ti Jesuse.
Currently Selected:
Svun Mateo 18: LeqAC
Highlight
Share
Copy
Want to have your highlights saved across all your devices? Sign up or sign in
© Sociedad Biblica de Mexico AC
