Yohanna 12

Ɓaa puk yar nsera yaɓ wa Yeso

1Pee tǝro mindike aa tom Mbukamsa Tadko ɓa, Yeso yǝ kan Betanya, a ham yǝ niksǝ Li'azaru a tina ɓa. 2Kǝnso ɓaa werkǝsǝsǝ mbuseya ɗikira ɓa, Marta yǝ ɓaa mbuseya sase, Li'azaru ɗǝm yǝ fin a ɗaaso ɓaa ɓǝ sesǝ mbuseya ɓa, ke ma Yeso. 3Pa Maryamu yǝ too yaro ma nseera yaɓ wa a kǝnda u koɓaa dem wa, yar siso ǝn yar me nardi. Yǝ puk Yeso a natsa yǝ haatǝ ma nhii a ɗuura ira wa. Nseera yaro yaɓ sǝra aa kung ɗur siso nsaad.

4Pa Yahuda Iskariyoti, fin a ɗaaso emfǝɗkaa ɓisa, yaa kiyǝsaa fang ya, yǝ nkee me, 5“Tomtomni aa pank yar u ma koɓaa dem wa, aa na koɓaa isa hanhanta rau? Koɓaa sǝsa kǝ nkaa a puu an tinima ya tukaa pusapu pu pu taatǝn wa.” 6Yahuda yǝ nkee mara sǝra me yǝn yau hanhanta ra, pa mbu kwasǝ ɓa me yǝn nkwii. Ən sase yǝn masǝ bukra koɓaa ɓosa ya, yǝn tang fin fin ɗaan.

7Pa Yeso yǝɓǝ nkee me, “Saa lee, ka yǝ ti me yǝn warsǝ kaa ɓaa kǝnǝn hok ɓa. 8Sǝ nfee ke ma hanhanta, pa sem nfee sǝsǝ ke ma nase wa ra.”

9Pa ɓaa Yahudawa ɓa dem ɓǝ kurasǝ mara sǝra me Yeso kǝnso wa, pa ɓǝ wo, sem me ɓǝ wǝr Yeso maɗ ra, pa me ɓǝ wǝr Liˈazaru yaa Yeso niksǝsǝ a tina ya. 10Pa me maaso kuɓsa nek mbusa sa, ɓǝ kǝr ɗǝɗa kǝɓa tod Li'azaru wa kǝn, 11me ǝn mara Li'azaru ra ɓaa Yahudawa ɓa dem ɓǝn ɓaa ma wiina ɓa, ɓǝ na ɓongtǝra ma Yeso.

Yeso yǝ kan Urshalima

12Handa nweesǝ wa, ɓeta dem ɓaa ɓǝ wosǝ a hira Mbukamsa ɓa wa, ɓǝ kura me Yeso yaa ɗǝɗa yǝn wowo Urshalima. 13Pa ɓǝ kau parme kwaɗ dibino ya, ɓaa fiɗ a ɗǝɗa, ɓaa sa kaɗɗa, ɓǝn nik kwaro ɓǝn nkee me.

“Nyoota kaɗɗan a Kaa ni!”

“Saltǝra kaɗɗan a sanii, yaa yǝ wosǝ a ɗǝnda Ankundi ya ra!”

“Saltǝra kaɗɗan a kuɓ Isra'ila wa!”

14Pa Yeso yǝ taasǝ au kwarǝra ya wa, yǝ laɓɓa nga ɓaa weesǝ nyoro wa me,

15“Sǝ kura kokto ra, saase ɓaa ur Sihiyona ɓa, sǝ sengge,

kuɓ waaso yǝn wowo,

yǝ laɓsǝ a au kwarǝra ya!”

16A ntiiri emfǝɗkaa ɓǝsa ɓǝ maa mbu nsaad sǝsa ra, ndub a ndiira fer ɓaa toosǝ Yeso wa, pa senda ɓǝ wo me ka ɓaa wee nyor mbusǝsǝ wa a ɗuura iran, ɗǝm ɓaa weesǝ tom mbusǝsa wan.

17Ɓet kaɓǝsǝ ke ma sase a fer yǝ yarsǝ Li'azaru yǝ fiɗ a tina ɗǝm yaa nik a woɗɗa ya, ɓǝ faɗ wiiyo ma nkee ɓeta mbu Yeso tomsǝ ɓa. 18Ɓeta dem ɓǝ fiɗ me ko ɓaa kaɗɗa me ɓǝ kura mbu yǝ tomsǝ nhiinyanhiinya ɓa. 19Pa ɓaa Farisiyawa ɓa ɓǝ nkee ɓaatǝ me, “Sǝ wǝrǝ! Mbu kǝnɗa nkaa ndǝ tom ka sem ra, ai put ntaadi wa nsaad ɓǝ ndiira usu.”

Ɓaa Heliniyawa ɓa ɓǝ kǝr Yeso

20Pa a ɗaaso ɓaa ɓǝ kosǝ me koɓǝ nyoo Kaa ɓa a Mbukamsa wa, ɓaata ɓaa Heliniyawa ka kǝn kǝnso. 21Pa ɓǝ wo a Filibus ni, eɗ Betsaida ya, a put Galili wa, ɓaa kǝna, ɓǝ nkee me, “Antaanda ya, ka tǝn taa me tǝ kan ma Yeso.” 22Pa Filibus yǝ ko yǝ nkee Andarawus, Andarawus ɗǝm ɓǝ wo ma Filibus, ɓǝ nkee Yeso.

23Yeso yǝɓǝ kak me, “Fer usu kanan, u ɓaa ka too Au ete ya wa. 24Nǝn nkeesǝ ɓongtǝra, me ɓaa hok nkaama koma ma a putu aa woɗ nhe ra, kiyǝ kaɗ fin mbusa. Pa me yǝ woɗɗon, kiyǝ haa dem. 25Yaa yǝn yausǝ huurtu usu ya, ka leetǝ. Ɗǝm yaa yǝ ɓisǝsǝ huurtu usu a put ntaadi wa ya, yǝn naa huurtu usu u ko pakarese wa. 26Hana yamni, yaa yǝn tomnǝsǝ tinima ya, tomon ɗaɗ yǝnǝ ɓǝɗǝ. Ham nǝsǝ ɓa, kǝnso ham hoora na kiyaa kaɗ ɓa. Hana yamni, yaa yǝn nyoonǝsǝ ya, Paane kiyǝ na mbarta.”

27“Waso nǝn kura lǝklǝkto a huurtu waano, kǝnǝ tomtom niu? Yaa nǝ nkee me, ‘Paapa, ǝnǝ kon nkweera a fer wau’? Awo, kanǝ wo samto men fer waso. 28Ai Paapa, aa too ɗǝnda nga!”

Pa aa kura kwar ko fiɗɗaa liura, yǝn nkee me, “Nǝ weesǝ toon, ɗǝm kǝnǝ ɓaarǝ naa too.” 29Pa ɓaa ɓǝsǝ kǝnso ɓǝ kurasǝ kwaro wa, ɓǝ nkee me, “Kwengkwengra pamman.” Ɓaata ɓǝ nkee me, “Ən an timira Kaa ya, yǝ kansǝ mara sase.”

30Pa Yeso yǝɓǝ kak me, “Ɓaa tom kanmǝra sǝra me niina ra, pa ɓaa tom me saase. 31Waso ǝn fer ɓaa ka kan kiita put ntaadi wa ɓa, waso ɗǝm ɓaa kǝ hik yaa yǝn tomsǝ kuɓsutu put ntaadi wa ya, a kuɓsutu usu. 32Pa waano me ɓaa nik nǝn a putu nǝn, kǝnǝ wiin ɓeta a nani nsaad.” 33Yǝ nkee maaso me yǝ weɗɗa ɗǝɗa kiya woɗɗa.

34Pa ɓaa ɓǝ kwausǝ sǝɓa, ɓaa kak me, “Masaka waato yǝ weɗɗa me, Almaseho kiyǝ kaɗ pakarese wa. Pa tomtom ni ngǝ nkeesǝ me tomon ɗaɗ aa nik Au ete wau? Ən yamni Au ete kayau?”

35Pa Yeso yǝɓǝ nkee me, “Ɗekɗekto wa kǝ kaɗ ke ma saase u tǝro ngeek wa. Sǝ tomaa siko si ɗekɗekto ke ma saase, me tom ham tebtebto ɓa sǝ ntee ra. Yaa yǝn sikisǝ a tebtebto ya, yǝ maa han yǝ kosǝ ɓa ra. 36Sǝ na ɓongtǝra a ɗekɗekto siso si yǝ nɗing ma saase, me sǝ kang ɓaa ma ɗekɗekto ɓa.

Ɓaa Yahudawa ɓa, faɗ wiiyo ma mbisi naɓongtǝra wa, ma Yeso

Yeso yǝ nkee maaso, pa yǝ faɗ yǝɓǝ nfaa.

37Hana mbu nhiinyanhiinya yǝ tomsǝ nsaad a wii ɓoso siso wa, nding siso, ɓǝ na ɓongtǝra ma sase ra. 38Mbusa tom maaso me aa kung mbu an nawanto Ishaya nkeesǝ wa me,

“Ankundi, yaa na ɓongtǝra ma mara nɗaa niu?

Ən yauni ɗǝm ɓaa weɗɗasǝsǝ kwangto Ankundi yau?”

39Ən siso mbu kwasǝ ɓaa nkaa ɓǝ na ɓongtǝra ra wa, me nga Ishaya yǝ ɓaarǝ yǝ nkee me, 40“Yǝ ntaaɓǝn, yǝɓǝ ɗǝm ti ɓǝ tom ma ɗuura kwakwa ra, ɓǝ wǝr ma nuuwa ɓosa ra, ɓǝ maa ma kuti ɓose ra, me ɓǝ kǝrtǝ ɓǝ wo a nani, nǝ ɓǝ roɓɓo.”

41Ishaya yǝ nkee maaso me yǝ wǝr too Yeso wa, yǝ ɗǝm nkee mara ira.

42Hana maaso, ɓeta dem a ɗaaso wiina wa, ɓǝ na ɓongtǝra ma sasen, pa me kokto ɓaa Farisiyawa ɓa, ɓǝ nkaa ɓǝ nkee me, ɓǝ na ɓongtǝran da, me tom ɓaa ɓǝ pǝǝ a ɗaaso ɓeta wa. 43Me ɓoso ɓǝ yau kon nyoota wa a ɓetani aa faɗ kon nyoota a Kaa ni wa.

44Pa Yeso yǝ nik kwaro yǝ nkee me, “Yaa yǝn nasǝ ɓongtǝra ma niina ya, yǝ na ɓongtǝra ma niina maɗ ra, yǝ na ɓongtǝran ma yaa yǝ timinǝsǝ ya. 45Yaa yǝn senggenǝsǝ ya, yǝn wǝr yaa yǝ timinǝsǝ ya. 46Nǝ wo a put ntaadi wa me nǝ ɗekɗekto, me nsaad yaa yǝ nasǝ ɓongtǝra ma niina ya, yǝ kaɗa ham teptepto ɓa ra.

47Hana yamni yaa yǝ kurasǝ mara na ya, ɗǝm yǝ yau yǝ ɓǝɗ ɗa ya, sem nase kǝna sa kan kiita ya ra. Sem me nǝ wo me nǝ kan kiita put ntaadi wa ra, pa me nǝ wo me nǝ kon nkweera put ntaadi wa wa. 48Pa yaa yǝ mbisinǝsǝ ya, ɗǝm yǝ kon mara nara ya, yǝ ma yaake yaa kiyaa sa kan kiita ya, me nsaad mara nǝ nkeesǝra, ǝn siso kasa kan kiita a si wa, a kaa feɗefeɗe ɓa. 49Me sem ma nkweerane nǝ kansǝ maaso wa ra, pa Paane yaa yǝ timinǝsǝ ya, ǝn sase ma nkweeresi yǝn nkeenǝsǝ mbu kǝnaa fǝɗkǝ ɓa ya, ma ɗǝm mara kǝnaa nkee ra. 50Nǝ maan me taa huurtu pakarese wa, ǝn taasǝ ma lau mbu Kaa nkeesǝ ɓa. Me maaso, mbu nǝn nkeesǝ ɓa nǝn nkee keke nga Paapa yǝ nkeenǝsǝ wa.”

Currently Selected:

Yohanna 12: LLA

Highlight

Copy