ಯೋಹಾನ 6
6
ಯೇಸುನೆ ಪಾಚ಼್ ಹಜಾ಼ರ್ ಅದ್ಮಿನ ಖಾಣು ಖಡಾಯೋತೆ
(ಮತ್ತಾಯ 14:13-21; ಮಾರ್ಕ 6:30-44; ಲೂಕ 9:10-17)
1ಅನ ಬಾದ್‌ಮ ಯೇಸು ಗಲಿಲಾಯ ದರ‍್ಯಾವ್ನು ಪಾರ್ಲಿ ಬಾಜೂ಼ಮ ಚ಼ಲೆಗಯೊ ಇನ ತಿಬೇರಿಯಾನು ದರ‍್ಯಾವ್ ಕರೀಬಿ ಬೋಲಾಸ್. 2ಅದ್ಮಿನಿ ಘಣಿ ಮೋಟಿ ಭೀಡ್ ಯೇಸುನ ಪೀಠೆ ಗಯು, ಶನಕತೊ ಇವ್ಣೆ ಖ್ಹಾರು ಯೇಸುನೆ ರೋಗ್‌ಮ ರ‍್ಹವಾಳನ ಅಛ್ಛು಼ ಕರ‍್ಯೊತೆ ಅದ್ಭುತ್‌ನ ಖ್ಹಾರು ದೇಖ್ಯೂಥು. 3ತದೆ ಯೇಸು ಪಹಾಡ್‌ಪರ್ ಚ಼ಢೀನ್, ಇನ ಶಿಷ್ಯರ್ನ ಜೋ಼ಡೆ ಬೇಶಿಗಯೊ. 4ಯೆಹೂದ್ಯರ್‌ನ ಪಸ್ಕ ಪೂಜಾ಼ನಿ ವಖ್ಹತ್ ಖನ್ನೆ ಐಗೈಥಿ. 5ಯೇಸುನೆ, ಇನಾಕನ ವಳ್ಯಾವ್‌ತುಥೂತೆ ಅದ್ಮಿನಿ ಮೋಟಿ ಭೀಡ್‌ಣ ದೇಖ್ಯೊ. ಅಜು಼ ಫಿಲಿಪ್ಪನ, “ಆ ಅದ್ಮಿ ಖ್ಹಾರಾನ ಪೂರಯೆತ್ರು ರೋಟಾ ಅಪ್ಣೆ ಕಿಜ್ಗಾ಼ಥು ಲೈಯೆ?” ಕರಿ ಪುಛಾ಼ಯೊ. 6ಫಿಲಿಪ್ಪನ ಪರ್ಖಾನಖ್ಹಾಜೆ ಯೇಸುನೆ ಅಮ್ ಪುಛಾ಼ಯೋತೆ; ಖ್ಹಾಚಿ ಶಾತ್ ಕತೊ, ಯೋ ಶಾತ್ ಕರ‍್ನು ಕರಿ ಇನ ಅಗಾಡಿಸ್ ಮಾಲುಮ್‌ ಥೂ.
7ತದೆ ಫಿಲಿಪ್ಪನೆ, “ಹಜ಼್ಜ ಛಾ಼ತೆ ಹರೇಕ್ ಅದ್ಮಿನ ಏಕೇಕ್‌ ಟುಕ್‌ಡೊ ರೋಟೊ ದೇಣುಕತೋಬಿ, ಬೇಖ್ಹೊ ರೂಪಾನ ಪಾವ್‍ಲೆಥೀಬಿ ಜಾ಼ಖ್ಹತ್ ಹೋಣು”#6:7 ಕತೊ, ಛೊ಼ ಮಹಿನಾನು ಶಂಬ್‌ಳ ಕರಿ. ಕರಿ ಬೋಲ್ಯೊ.
8ತದೆ ಯೇಸುನೊ ಬಿಜೇಕ್ ಜ಼ಣೊ ಶಿಷ್ಯ ಹುಯಿರ‍್ಹೊಥೋತೆ, ಸೀಮೋನ್ ಪೇತ್ರನೊ ಭೈ ಅಂದ್ರೆಯನೆ, 9ಯೇಸುನ, “ಹಜ್ಜಾ಼ ಛಾ಼ತೆ ಏಕ್‌ ಛೋ಼ಕ್ರಕನ ಪಾಚ಼್ ಘೌನ ರೋಟಾ ಅಜು಼ ಬೇ ಮಾಛ಼್‌ಲಾ ಛಾ಼, ಕತೋಬಿ ಅತ್ರಾಖ್ಹಾರ ಅದ್ಮಿನ ಯೋ ಪೂರ್‌ಶೆಕೊಯ್ನಿ” ಕರಿ ಬೋಲ್ಯೊ.
10ಯೇಸುನೆ ಇವ್ಣುನ, “ಅದ್ಮಿನ ಖ್ಹಾರು ಬೇಖ್ಹೊ ಕರಿ ಬೋಲ್” ಕರಿ ಬೋಲ್ಯೊ. ಯೋ ಝ಼ಗೋಪರ್‌ ಘಣು ಘಾಖ್ಹ್‌ ಫುಟಿರ‍್ಹೂಥು. ಅದ್ಮಿಖ್ಹಾರು ಘಾಖ್ಹ್‌ಪರ್‌ ಬೇಶಿಗಯು. ಇವ್ಣಾಮ ಪರ್ಖ್ಹಾ ಅದ್ಮಿಸ್‌ ಕಮ್‌ಶಿಕಮ್ ಪಾಚ಼್ ಹಜಾ಼ರ್‌ಜ಼ಣು ಥೂ. 11ಯೇಸುನೆ ಯೋ ರೋಟಾನ ಪಾಡೀನ್, ದೇವ್ನ ಧನ್ಯವಾದ್ ಕರೀನ್, ಹಿಜ್ಜಾ಼ ಬೆಠುಥೂತೆ ಅದ್ಮಿನ ವಾಟಪಾಡಿ ದಿದೊ. ಮಾಛ್ಲಾ಼ನಾಬಿ ಇಮ್ಮಸ್ ವಾಟಪಾಡಿ ದಿದೊ, ತಮಾಮ್‌ ಅದ್ಮಿ ಇವ್ಣುನ ಕೆತ್ರು ಹೋಣುಕಿ ಎತ್ರು ಖಾದು. 12ಇವ್ಣೆ ಖ್ಹಾರು ಖೈನ್, ಪೇಟ್ ಭರೈಜಾ಼ವಾನಿ ಬಾದ್‌ಮ ಯೇಸುನೆ ಇನ ಶಿಷ್ಯರ್ನ, “ಉಭ್‌ರ‍್ಯುತೆ ಟುಕ್ಡಾವ್‍ನ ಎಕ್ಟು ಕರೊ, ಕೆಹೂಬಿ ಖರಾಬ್ ನಾಹೊಣು” ಕರಿ ಬೋಲ್ಯೊ. 13ತದೆ ಇವ್ಣೆ ಯೊ ಪಾಚ಼್ ಘೌನ ರೋಟಾನ ಟುಕ್ಡಾವ್‍ನ ಎಕ್ಟು ಕರಾಖ್ಹತರ್, ಭಾರ ಟೋಕ್ರಾ ಭರಾಯು.
14ಯೇಸುನೆ ಕರ‍್ಯೊತೆ ಆ ಅದ್ಭುತ್ ದೇಖ್ಯೂತೆ ತದೆ ಅದ್ಮಿಖ್ಹಾರು ಅಮ್ ಬೋಲ್ಯು, “ಖ್ಹಾಚ಼ಮಾಬಿ ಜಗತ್‌ಮ ಆವ್ಣುತೆ ಪ್ರವಾದಿ ಆಸ್ ಹುಯಿರೊಸ್” ಕರಿ ಬೋಲ್ಯು. 15ಅದ್ಮಿಖ್ಹಾರು ಇನ ಧರೀನ್, ಜು಼ಲಮ್‌ಥಿ ರಾಜ಼ಕರಾನ ಸೋಚುಕರಾಸ್ ಕರಿ ಯೇಸುನೆ ಮಾಲುಮ್‌ ಕರಿಲಿದೊ; ಇನಖ್ಹಾಜೆ ಯೋ ಹಿಜ್ಜಾ಼ಥೊ ಎಕ್ಲೋಸ್ ಪಾಛು಼ ಪಹಾಡ್‌ಪರ್ ಚ಼ಲೆಗಯೊ.
ಯೇಸುನೆ ಪಾಣಿಪರ್‌ ಚಾ಼ಲ್ಯೋತೆ
(ಮತ್ತಾಯ 14:22-33; ಮಾರ್ಕ 6:45-52)
16ಖ್ಹಾಂಜ಼್ ಹುವ್ವಾದೀನ್, ಯೇಸುನ ಶಿಷ್ಯರ್‌ ದರ‍್ಯಾವ್‌ಕನ ಆಯು. 17ಡೋಣ್‌ ಚ಼ಢೀನ್, ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಕಪೆರ್ನೌಮ್ಮ ಗಯು. ತದ್ದೇಸ್ ಅಂಧಾರು ಹುಯಿಗಯುಥು, ಅಜು಼ ಯೇಸು ಇವ್ಣಾಕನ ಬಿಜೂ಼ಬಿ ಕೋ ಐರ‍್ಹೋಥೋನಿ. 18ತದೆ ಘಣೊ ಮೋಟೊ ವಹಿರೊ ಜೋ಼ರೇಖ್ಹು ವಾಗುಕರ್ತೊಥೋತೆ ಇನಖ್ಹಾಜೆ, ದರ‍್ಯಾವ್‌ಮ ಝೋ಼ಕಾಳೊ ಜಾ಼ಖ್ಹತ್ ಹುವ್ವಾಲಗ್ಯೋಥೊ. 19ಇವ್ಣೆ ಡೋಣ್ಣಾ ಹುಟ್ ಘಾಲಿನ್ ಚ಼ಲಾವ್ತಹುಯಿನ್, ತೀನ್‌ಕಿ-ಚಾರ್ ಮೈಲ್#6:19 ಏಕ್‌ ಮೈಲ್ ಕತೊ ಡೋಡ್ ಕಿಲೊ ಮೀಟರ್. ಜೈ಼ನ್‌ ಪೋಚಾ಼ನ ಬಾದ್‌ಮ ಯೇಸು ಪಾಣಿಪರ್‌ ಚಾ಼ಲ್ತೊಹುಯಿನ್‌ ಡೋಣ್ಣಾ ಖನ್ನೆ ವಳ್ಯಾವಾತೆ ದೇಖಿನ್‌, ಇವ್ಣೆ ಡರಿಗಯಾ. 20ಯೇಸುನೆ ಇವ್ಣುನ, “ಡರೊ ನಕೊ, ಯೊ ಮೇಸ್”! ಕರಿ ಬೋಲ್ಯೊ. 21ತದೆ ಇವ್ಣೆ ಇನ ಡೋಣ್‌ಮ ಬುಲೈಲ್ಯವಾನ ಕರ‍್ಯಾ, ತದ್‌ನು-ತದ್ದೇಸ್ ಇವ್ಣೆ ಜಾ಼ವ್ಣುಥೂತೆ ಝ಼ಗೋಕನ ಡೋಣ್‌ ಜೈ಼ನ್‌ ಪೋಚಿಗಯ್.
ಅದ್ಮಿಖ್ಹಾರು ಯೇಸುನ ಢೂಂಡಿನ್ ಆಯೂತೆ
22ಇನ ಅಗಲ್ಯದನ್ನೆ ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಥೂತೆ ಅದ್ಮಿಖ್ಹಾರು ಹಿಜ್ಜಾ಼ ಎಕ್ಕಸ್ ಡೋಣ್‌ ಥೀಕರಿ ಇವ್ಣುನ ಮಾಲುಮ್‌ಥು. ಯೋ ಡೋಣ್‌ಮ ಖಲಿ ಶಿಷ್ಯರಸ್‌ ಗಯ, ಯೇಸು ಶಿಷ್ಯರ್ನ ಜೋ಼ಡೆ ಕೋ ಗಯೋನಿ ಕರಿ ಇವ್ಣುನ ಮಾಲುಮ್‌ ಥೂ. 23ಎತ್ರಾಸ್‌ಮ, ಬಿಜಿ ಡೋಣ್‌ ಖ್ಹಾರು ತಿಬೇರಿಯಾಥು ಐನ್, ಪ್ರಭುನೆ ಧನ್ಯವಾದ್ ಕರೀನ್, ಅದ್ಮಿನ ರೋಟ ಖಡಾಯೋತೆ ಝ಼ಗೋಕನಾಸ್‌ ಆಯು. 24ಅದ್ಮಿಖ್ಹಾರು, ಯೇಸುಬಿ ಇನ ಶಿಷ್ಯರ್‌ ಹಿಜ್ಜಾ಼ಕೊಂತೆ ದೇಖಿನ್‌, ಯೋ ಡೋಣೇಮ ಚ಼ಢೀನ್, ಯೇಸುನ ಢೂಂಡ್‌ತುಹುಯಿನ್, ಕಪೆರ್ನೌಮ್‌ನ ಗಯು.
ಯೇಸುಸ್ ಜಾನ್ನೊ ರೋಟೊ
25ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಯೇಸು ಮಳಾದಿನ್, ಅದ್ಮಿಖ್ಹಾರು ಇನ, “ಗುರು, ತೂ ಕದೆ ಹಜ್ಜಾ಼ ಆಯೊ?” ಕರಿ ಪುಛಾ಼ಯು.
26ಯೇಸುನೆ ಇವ್ಣುನ, “ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಮನ ಢೂಂಡಾಸ್ತೆ ಮಾರು ಖ್ಹಣೇದ್ ಕಾಮ್ನ ಖ್ಹಾರು ದೇಖಿನ್‌ ಕಾಹೆ ಪಣ್ಕಿ, ಯೋ ರೋಟಾವ್ನ ಖೈನ್, ಪೇಟ್ ಭರೈಲಿದಾತೆ ಇನಖ್ಹಾಜೇಸ್. 27ಖ್ಹಡಿಜಾ಼ಸ್ತೆ ಖಾಣಾನಖ್ಹಾಜೆ ನಕೊ ರಾಬೊ; ತುಮೂನ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನ ಹುವಾಸ್ತೆ ಖಾಣಾನಖ್ಹಾಜೆ ರಾಬೊ, ಅಮ್ನು ಖಾಣನ ಅದ್ಮಿನೊ ಛಿಯ್ಯೊ ತುಮೂನ ದಿಶೆ, ಅನಖ್ಹಾಜೆಸ್ ಬಾ ಹುಯಿರ‍್ಹೋತೆ ದೇವ್ನೆ ಇನ ನೇಮಕ್ ಕರ‍್ಯೊ, ಶಾಸನ್ನೊ ಮುದ್ರೊ ಮಾರಿರಾಖ್ಯೋಸ್‌” ಕರಿ ಬೋಲ್ಯೊ.
28ತದೆ ಅದ್ಮಿಖ್ಹಾರು ಯೇಸುನ, “ಹಮೆ ಕೆಹು ಕಾಮ್ ಕರ‍್ನು ಕರಿ ದೇವ್ ಆಖ್ಹ್ ಕರಾಸ್?” ಕರಿ ಪುಛಾ಼ಯು.
29ಯೇಸುನೆ,ಇವ್ಣುನ “ದೇವ್ನೆ ಮೋಕ್‌ಲ್ಯೊತೆ, ತುಮೆ ವಿಶ್ವಾಸ್‌ ಕರ‍್ನು ಕರಿ ಬೋಲಾನುಸ್ ದೇವ್ ತುಮಾರೇಥಿ ಆಖ್ಹ್ ಕರಾಸ್ತೆ ಕಾಮ್” ಕರಿ ಜ಼ವಾಬ್ ದಿದೊ.
30ಇವ್ಣೆ ಇನ, “ಇಮ್‍ಕತೊ, ತೂ ದೇವ್‍ಥಿ ಆಯೊಹುಯೊ ಕರಿ ಹಮೆ ದೇಖಿನ್‌, ತುನ ವಿಶ್ವಾಸ್‌ ಕರಾನಿಘೋಣಿ ಕೆಹು ಖ್ಹಣೇದ್ ಕರಿ ವತಾಳಸ್‌?” ಕರಿ ಪುಛಾ಼ಯು. 31“ಹಮಾರ ಗುರುಗುರಬ್‌ಲ್ಯವ್‌ನೆ ಉಜ್ಜಾ಼ಡಿ ಝ಼ಗೋಮ ಮನ್ನಾ ಖಾದು, ಸೊರ್ಗಾಥು ಇವ್ಣುನ ಖಾವಾನಖ್ಹಾಜೆ ಇನೆ ರೋಟೊ ದಿದೊ ಕರಿ ಧರ್ಮಶಾಸ್ತ್ರಮ ಲೀಖೈರ‍್ಹೂಸ್‌ನಿ” ಕರಿ ಬೋಲ್ಯು.#6:31 ವಿಮೋಚನ ಕಾಂಡ 16:4,15; ನೆಹೆಮಿಯ 9:15
32ತದೆ ಯೇಸುನೆ ಇವ್ಣುನ, “ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಸೊರ್ಗಾಮ ತುಮೂನ ರೋಟೊ ದಿದೋತೆ ಮೋಶೆನೆ ಕಾಹೆ ಪಣ್ಕಿ ಮಾರೊ ಬಾ ಸೊರ್ಗಾಥು ಖ್ಹಾಚೊ಼ ರೋಟಾನ ದಿಶೆ. 33ದೇವ್ ದೇಸ್ತೆ ಯೋ ರೋಟೊ, ಸೊರ್ಗಾಥು ಉತ್ರಿ ಐರ‍್ಹುಥು, ಅಜು಼ ಜಗತ್ನ ಜಾನ್‌ ದೇಸ್.
34ತದೆ ಅದ್ಮಿಖ್ಹಾರು, “ಅಲಾ, ಗುರು, ಯೋ ರೋಟಾನ ಹಮೂನ ಹಮೇಶ ದೇ” ಕರಿ ಇನ ಬೋಲ್ಯು.
35ಯೇಸುನೆ ಇವ್ಣುನ, “ಮೇಸ್ ಜಾನ್ನೊ ರೋಟೊ, ಮಾರಕನ ಆವಾಳಾನ ಕದೇಬಿ ಭುಕ್ ಕೋ ಲಾಗ್‌ಶೇನಿ. ಮಾರಾಮ ವಿಶ್ವಾಸ್‌ ಕರಾವಾಳನ ಕದೇಬಿ ಠೋಖ್ಹ್‌ ಕೋ ಲಾಗ್‌ಶೇನಿ. 36ಕತೋಬಿ ತುಮೆ ಮನ ದೇಖ್ಯಾತೋಬಿ, ವಿಶ್ವಾಸ್‌ ಕರ‍್ಯಾಕೊಂತೆ ಛಾ಼ ಕರಿ ಮೇ ಅಗಾಡಿಸ್ ಬೋಲ್ಯೋನಿ. 37ಬಾ ಮನ ದೇಸ್ತೆ ಇವ್ಣೆ ಖ್ಹಾರು ಮಾರಕನ ಆವ್‌ಶೆ, ಅಜು಼ ಮಾರಕನ ಆವಾಳಾನ ಪಾಛು಼ಮೇ ಧಕೇಲಿಶ್‌ ಕೊಯ್ನಿ. 38ಮೇ ಸೊರ್ಗಾಥು ಉತ್ರಿ ಆಯೋತೆ ಮಾರಿ ಮರ್ಜಿ ಕರಾನ ಕಾಹೆ, ಪಣ್ಕಿ ಮನ ಮೋಕ್‌ಲ್ಯೊತೆ ಇನಿ ಮರ್ಜಿಸ್‌ ಪೂರಕರಾನ. 39ದೇವ್ನೆ ಮನ ದಿದೋತೆ ಅದ್ಮಿಮ ಏಕ್‌ನಾಬಿ ಮೇ ಗುಮೈನಾಲೇವ್ಣುತೆ, ಅಂತಿಮ್‌ ದನ್ಮ ಮೇ ಇವ್ಣ ಖ್ಹಾರಾನ ಪಾಛು಼ ಜಿವ್ತು ಉಠಾಡ್ನು ಕರಿ ಬೋಲಾನುಸ್ ದೇವ್ನಿ ಮರ್ಜಿ. 40ಇನಾಟೇಕೆ ಛಿಯ್ಯಾನ ದೇಖಿನ್‌, ಇನಾಮ ವಿಶ್ವಾಸ್‌ ಕರಾವಾಳ ಹರೇಕ್ನ ಹರ್‌ಹಮೇಶಾನಿ ಜಿ಼ಂದ್‌ಗಿ ಮಳ್‌ಣು ಕರಿ ಬೋಲಾನು ಬಾನಿ ಮರ್ಜಿ ಹುಯಿರ‍್ಹುಸ್‍, ಅಜು಼ ಖ್ಹರ್ತಿನ ದನ್ಮ ಮೇ ಇವ್ಣುನ ಪಾಛು಼ ಜಿವ್ತು ಉಠಾಡಿಶ್‌” ಕರಿ ಬೋಲ್ಯೊ.
41ಯೇಸುನೆ, “ಸೊರ್ಗಾಥು ಉತ್ರಿನ್ ಆಯೋತೆ ರೋಟೊ ಮೇಸ್” ಕರಿ ಬೋಲ್ಯೋತೆ ಇನಖ್ಹಾಜೆ, ಯೆಹೂದ್ಯವಾಳು ಇನಿ ಬಾರೇಮ ಮಶ್ಲಾ ಮಾರ‍್ಯು. 42ಅಜು಼, “ಆ ಯೋಸೇಫ್‍ನೊ ಛಿಯ್ಯೊ ಯೇಸು ಕಾಹೆಕಿ ಶು? ಅನ ಆಯಾ-ಬಾ ಅಪ್ಣುನ ಮಾಲುಮ್‌ನಿ? ಹಮ್ಕೆ ಆ, ಪರ್‌ಲೋಕ್‌ಥು ಉತ್ರಿನ್ ಆಯೊ ಕರಿ ಬೋಲಾಸ್ತೆ ಕಿಮ್?” ಕರಿ ಬೋಲ್ಯು.
43ತದೆ ಯೇಸುನೆ ಇವ್ಣುನ, “ತುಮಾರ ತುಮಾರಮ ಭಣ್‍ಕಾನು ಭೀರಾಖೊ.” 44ಮನ ಮೋಕ್‌ಲ್ಯೊತೆ ಬಾ ಮಾರಕನ ಅದ್ಮಿನ ಮೋಕ್ಲಾಸ್‌; ಅಜು಼ ಮೇ ಇವ್ಣುನ ಖ್ಹರ್ತಿನ ದನ್ಮ ಜಿವ್ತು ಉಠಾಡಿಶ್‌, ಬಾನೆ ಮೋಕ್‌ಲ್ಯೊಕೊಂತೆ ಕೋಣ್‌ಬಿ ಮಾರಕನ ಆವಾನ ಕೋ ಹುವಾನಿ. 45ಪ್ರವಾದಿಖ್ಹಾರು ಲೀಖಿರಾಖ್ಯುಸ್, ಅಜು಼ ಇವ್ಣೆಖ್ಹಾರು ದೇವ್‍ಥಿ ಶಿಕಿಹುಯು ಹುಯಿರ‍್ಹಿಶೆ, ಕೋಣ್ ಬಾಥಿ ಖ್ಹಮ್‌ಜಿನ್‌ ಶಿಕಾಸ್ಕಿ ಯೊ ಮಾರಕನ ಆವಸ್. 46ಅನಿ ಮತ್‌ಲಬ್, ಕೋಣ್ ತೋಬಿ ಬಾನ ದೇಖಿರಾಖ್ಯುಸ್‌ ಕರಿ ಕಾಹೆ, ದೇವ್‌ಕಂಥೊ ಆಯೋತೆ ಎಕ್ಕಸ್ ಜ಼ಣಾನೆ ಬಾನ ದೇಖಿರಾಖ್ಯೊಸ್. 47ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಕೋಣ್ ವಿಶ್ವಾಸ್‌ ಕರಾಸ್ಕಿ, ಇವ್ಣುನ ಹರ್‌ಹಮೇಶಾನಿ ಜಿ಼ಂದ್‌ಗಿ ಮಳಿರ‍್ಹಿಶೆ. 48ಮೇಸ್ ಜಾನ್ನೊ ರೋಟೊ. 49ತುಮಾರ ಗುರುಗುರಬ್‌ಲ್ಯ ಉಜ್ಜಾ಼ಡಿ ಝ಼ಗೋಮ ಮನ್ನಾ ಖಾದು, ಅಜು಼ ಇವ್ಣೆ ಮರಿಗಯು. 50ಸೊರ್ಗಾಥು ಉತ್ರಿನ್ ಆಯೋತೆ ರೋಟೊ ಕೋಣ್ ಕೋಣ್‍ಖಾಸ್ಕಿ, ಇವ್ಣೆ ಮರ್‌ಶೆ ಕೊಯ್ನಿ. 51ಕತೋಬಿ ಸೊರ್ಗಾಥು ಉತ್ರಿ ಆಯೋತೆ ರೋಟೊ ಕೋಣ್ ಖಾಸ್ಕಿ ಯೊ ಮರಕೊಯ್ನಿ. ಹರ್‌ಹಮೇಶ ಜಿವ್ತು ರ‍್ಹಿಶೆ; ಅಜು಼ ಮೇ ದೆವ್‍ಸ್ತೆ ರೋಟೊ ಮಾರಿ ಬೋಟಿಸ್‌, ಆ ಜಗತ್‌ ಜಿವಾದೆ ಕರಿ ಮೇ ಅನ ದೀಶ್‌ತೆ” ಕರಿ ಬೋಲ್ಯೊ.
52ತದೆ ಯೆಹೂದ್ಯವಾಳು, “ಆ ಅದ್ಮಿ ಇನಿ ಬೋಟಿನ ಅಪ್ಣುನ ಕಿಮ್ ಖವಾನ ದಿಶೆ?” ಕರಿ ಇವ್ಣ-ಇವ್ಣ ಮಹಿಸ್ ಅಬ್ಬಾಜ಼ಬ್ಬಿ ವಾತೆ ಕರಾಲಗ್ಯು.
53ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಅದ್ಮಿನೊ ಛಿಯ್ಯಾನು ಬೋಟಿನ ನಾ ಖಾದಾತೊ, ಅಜು಼ ಇನು ಲ್ಹೋಯಿನ ನಾ ಪೀದಾತೊ ತುಮಾರ ಮಹಿ ಜಾನ್‌ ಕೊ ರ‍್ಹಿಶೇನಿ. 54ಕೋಣ್ ಮಾರಿ ಬೋಟಿನ ಖಾಸ್ಕಿ, ಮಾರು ಲ್ಹೋಯಿನ ಪಿಯ್ಯಾಸ್‍ಕಿ ಇವ್ಣುನ ಹರ್‌ಹಮೇಶಾನಿ ಜಿ಼ಂದ್‌ಗಿ ಛಾ಼, ಅಜು಼ ಮೇ ಇನ ಖ್ಹರ್ತಿನ ದನ್ಮ ಜಿವ್ತು ಉಠಾಡಿಶ್‌. 55ಮಾರಿ ಬೋಟಿ ಖ್ಹಾಚ ಖಾಣು ಅಜು಼ ಮಾರು ಲ್ಹೋಯಿ ಖ್ಹಾಚ ಪಾನ್ಕ ಹುಯಿರ‍್ಹುಸ್‍. 56ಮಾರಿ ಬೋಟಿನ ಖೈನ್, ಮಾರೂ ಲ್ಹೋಯಿನ ಪಿಯ್ಯಾವಾಳು ಯೊ ಮಾರಾಮ ರ‍್ಹೇಸ್‌, ಅಜು಼ ಮೇ ಇವ್ಣಾಮ ಜಿವಿರ‍್ಹೀಶ್‌. 57ಜಿವ್ತೊ ಹುಯಿರ‍್ಹೋತೆ ಬಾನೆ ಮನ ಮೋಕ್ಲಿರಾಖ್ಯೊಸ್, ಅಜು಼ ಮೇ ಇನೇಥಿಸ್ ಜಿವ್‌ಸ್‌. ಇನಖ್ಹಾಜೆ ಕೋಣ್ ಮನ ಖಾಸ್ಕಿ ಯೋ ಮಾರೇಥಿ ಜಿವ್‌ಶೆ. 58ಹೈರುತೆ ಸೊರ್ಗಾಥು ಉತ್ರಿ ಆಯೋತೆ ರೋಟೊ ಆಸ್. ತುಮಾರ ಗುರುಗುರಬ್‌ಲ್ಯ ಮನ್ನಾ ಖಾದು ಅಜು಼ ಮರಿಗಯು. ಕತೋಬಿ ಕೋಣ್ ಆ ರೋಟಾನ ಖಾಸ್ಕಿ ಯೋ ಕದೇಬಿ ಜಿವ್ತೊ ರ‍್ಹಿಶೆ.”
59ಯೇಸುನೆ ಕಪೆರ್ನೌಮ್‌ನು ಸಭೆ ಭರಾವನು ಮಂದಿರ್‌ಮ ಆ ಖ್ಹಾರು ಬೋಲಿವತಾಳ್ಯೊ.
ಹರ್‌ಹಮೇಶಾನಿ ಜಿ಼ಂದ್‌ಗೀನಿ ವಾತೆ
60ಅನ ಖ್ಹಮ್‌ಜಿನ್‌, ಇನ ಶಿಷ್ಯರ್‌ಮ ಘಣು ಜ಼ಣು, “ಆ ಜಾ಼ಖ್ಹತ್ ಕಠಣ್ಣಿ ವಾತ್ ಅನ ಕೋಣ್ ಖ್ಹಮಜ಼್‌ಶೆ” ಕರಿ ಬೋಲ್ಯು.
61ಇನ ಶಿಷ್ಯರ್‌ ಅನಿ ಬಾರೇಮ ಮಶ್ಲಾ ಮಾರುಕರಸ್ ಕರಿ ಯೇಸುನೆ ಮಾಲುಮ್‌ ಕರಿಲೀನ್, “ಆ ವಾತೇಥಿ ತುಮಾರ ದಿಲ್ನ ಟೋಚಾ಼ಯುಕಿ ಶು? 62ಏಕ್‌ ಬಾರ್ ತುಮೆ, ಅದ್ಮಿನೊ ಛಿಯ್ಯಾನ ಪಹಿಲೆ ಕಿಜ್ಜಾ಼ಥೋಕಿ ಹಿಜ಼್ಜ ಜಾ಼ಶೇತೆ ಇನ ದೇಖ್ಯಾತೊ ತುಮೆ ಶಾತ್ ಕರ್‌ ಶು? 63ಜಾನ್‌ ದೇಸ್ತೆ ದೇವ್‌ನು ಆತ್ಮ ಹುಯಿರುಸ್ ಅದ್ಮಿನು ಹಿಮ್ಮಥ್ಥಿ ಫಾಯಿದೊ ಕೊಯ್ನಿ; ಮೇ ತುಮೂನ ಖಿವು ವಾತ್ನ ಬೋಲ್ಯೋಕಿ ಯೊ ದೇವ್‌ನೊ ಆತ್ಮ ಹುಯಿರ‍್ಹೂಸ್. ಅಜು಼ ಯೋ ಜಾನ್ನ ದೇಸ್. 64ತೋಬಿ ತುಮಾರಾಮ ಥೋಡು ಜ಼ಣು ನಂಬಾಕೊಯ್ನಿ” ಕರಿ ಬೋಲ್ಯೊ. ಕೋಣ್ ಇನ ನಂಬುಕರಾಕೊಯ್ನಿ ಅಜು಼ ಕೋಣ್ ಇನ ಧೋಕೇಥಿ ಧರಿದಿಶೇತೆ ಕರಿ ಬೋಲಾನು ಪಹಿಲೇಥುಸ್ ಯೇಸುನ ಮಾಲುಮ್‌ ಥೂ. 65ಅಜು಼ ಯೇಸುನೆ ಬೋಲ್ತೊ ಹುಯಿನ್, “ಬಾನಿ ಮರ್ಜಿಕೊಂತೆ ಕೋಣ್‌ಬಿ ಮಾರಕನ ಆವಾನ ಕೋ ಹುವಾನಿ ಕರಿ ಮೇ ತುಮೂನ ಬೋಲ್ಯೊತೆ ಅನಾಖ್ಹಾಜೆ” ಕರಿ ಬೋಲ್ಯೊ.
66ತಪ್‌ಥು ಇನ ಶಿಷ್ಯರ್‌ಮ ಕೈಏಕ್ ಜ಼ಣು ಇನ ಮ್ಹೆಂದಿನ್ ಚ಼ಲಿಗಯು ಅಜು಼ ಯೇಸುನಿ ಜೋ಼ಡ್ಮ ಆವವಾಳು ಘಣುಜ಼ಣು ಇನ ಮ್ಹೆಂದಿನ್ ಪಾಛು಼ ಚ಼ಲಿಗಯು. 67ತದೆ ಯೇಸುನೆ ಇನ ಭಾರ ಶಿಷ್ಯರ್ನ, “ತುಮೇಬಿ ಚ಼ಲಜಾ಼ವ್ಣು ಕರಿ ಛಾ಼ಕಿ ಶು?” ಕರಿ ಪುಛಾ಼ಯೊ.
68ಸೀಮೋನ್ ಪೇತ್ರನೆ ಯೇಸುನ, “ಪ್ರಭು, ತುನ ಮ್ಹೆಂದಿನ್ ಹಮೆ ಕಿಜ್ಗಾ಼ ಜ಼ಯ್ಯೆ? ತಾರಕನ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನಿ ವಾತೆ ಛಾ಼. 69ಹಮೆ ತಾರಾಮ ವಿಶ್ವಾಸ್‌ ಕರಿಯೇಸ್, ಅಜು಼ ತೂ ದೇವ್‍ಥಿ ಆಯೋತೆ ಪರಿಶುದ್ ಅದ್ಮಿ” ಕರಿ ಬೋಲ್ಯೊ.
70ತದೆ ಯೇಸುನೆ, “ತುಮುನ ಭಾರ ಜ಼ಣಾನ ಮೇ ಚೂ಼ಣಿನ್ ಕಾಡ್ಯೊಕೊಯ್ನಿಕಿ ಶು? ರ‍್ಹಯುತೋಬಿ ತುಮಾರಾಮ ಏಕ್‌ ಜ಼ಣೊ ಶೈತಾನ್ ಹುಯಿರ‍್ಹೋಸ್” ಕರಿ ಜವಾಬ್‌ ದಿದೊ. 71ಯೇಸುನೆ ಸೀಮೋನ್ ಇಸ್ಕರಿಯೋತನೊ ಛಿಯ್ಯೊ ಹುಯಿರೋತೆ ಯೂದನಿ ಬಾರೇಮ ಆ ವಾತೆ ಬೋಲ್ಯೋತೆ. ಯೂದ ಭಾರ ಜ಼ಣ ಶಿಷ್ಯರ್‌ಮ ಏಕ್‍ಜ಼ಣೊ ಹುಯಿರೋಥೊ, ಯೇಸುನ ದೋಕೇಥಿ ಧರಿದೆವಾಳೊ ಯೋಸ್.
Currently Selected:
ಯೋಹಾನ 6: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
