ಲೂಕ 2
2
ಯೇಸು ಪೈದಹುಯೊತೆ
(ಮತ್ತಾಯ 1:18-25)
1ಯೋ ದನೂಮ ಕೈಸರ್ ಅಗಸ್ಟಸ್‌ನೆ#2:1 ಕೈಸರ್ ಅಗಸ್ಟಸ್ ಕತೊ-ಯೋ ವಖ್ಹತ್‌ಮ ರೋಮ್ ರಾಜ಼್ಭಾರ್ ಚ಼ಲಾವ್‍ ಕರ್ತೊಥೋತೆ ರಾಜ಼. ರೋಮ್‍ನು ರಾಜ಼್ಭಾರ್ ಚಾ಼ಲುಕರಾಸ್ತೆ ಖ್ಹಾರಾಸ್ ದೇಖ್ಹ್‌ಮ ಅದ್ಮಿಖ್ಹಾರಾನಿ ಗಣ್ತಿ ಹೋಣುಕರಿ ಹುಕುಮ್ ದಿದೊ. 2ಆ ಪಹಿಲಿ ಬಾರ್ ಚಾ಼ಲಿತೆ ಅದ್ಮಿನಿ ಗಣ್ತಿ ಹುಯಿರ‍್ಹುಥು. ಕುರೇನ್ಯ ಸಿರಿಯ ದೇಖ್ಹ್‌ನೊ ರಾಜ್ಯಪಾಲ್ ಹುಯಿರ‍್ಹೊಥೋತೆ ತದೆ ಆ ಚಾ಼ಲ್ಯುತೆ. 3ತಮಾಮ್‌ ಅದ್ಮಿ, ಇವ್ಣು-ಇವ್ಣು ನಾಮ್ ಲಿಖಾವನಖ್ಹಾಜೆ ಇವ್ಣ-ಇವ್ಣ ಗಾಮೆ ಗಯು.
4ಇನಖ್ಹಾಜೇಸ್ ಯೋಸೇಫ್‌ಬಿ ಗಲಿಲಾಯನು ನಜ಼ರೇತ್ ಕರಿ ಗಾಮ್‌ಥು ನಿಕ್ಳಿನ್ ಯೂದಾಯ ತಬರ್‌ಖಾನು ಬೇತ್ಲೆಹೇಮ್ ಕರಿ ಗಾಮ್‌ನ ಗಯೊ. ಯೋಸೇಫ ದಾವೀದ್‌ನೊ ಖಾಂದಾನ್‌ವಾಳೊ ಹುಯಿರ‍್ಹೊಥೋತೆ ಇನಖ್ಹಾಜೆ, ದಾವೀದ್‌ನು ಗಾಮ್‍ ಹುಯಿರ‍್ಹೂತೆ ಬೇತ್ಲೆಹೇಮ್‌ನ ಗಯೊ. 5ಯೋಸೇಫ್‌ನಿ ಜೋ಼ಡ್ಮ ಖ್ಹಗೈ ಪಡಿರ‍್ಹಿಥೀತೆ ಮರಿಯನಾಬಿ ಕೇಡೆ ಬಲೈಲಿನ್ ಇನು ನಾಮ್ ಲಿಖಾಡೈಲ್ಯವಾನಖ್ಹಾಜೆ ಗಯೊ. ತದೆ ಯೋ ಪೂರ ದನ್ನಿ ಬೇಜೂನಿ ಥಿ. 6ಇವ್ಣೆ ಬೇತ್ಲೆಹೇಮ್ಮ ಥೂತೆ ತದೆ, ಮರಿಯನ ಲಡ್ಕು ಪೈದಾ ಹುವಾನಿ ವಖ್ಹತ್ ಆಯಿ. 7ತದೆ ಇನೆ ಇನು ಪಹಿಲೋಟು ಪರ್ಖ್ಹೊ ಲಡ್ಕಾನ ಜ಼ಣಿನ್ ಲುಂಗ್ಡಾಮ ಲಪೇಟಿನ್, ಛ಼ತ್ತರ್‌ಮ ರ‍್ಹವಾನ ಝ಼ಗೊಕೊಂತೆ ದೇಖಿನ್, ಇನ ಗೋದ್‌ಡಿಮ ಖ್ಹುಡೈ.
ಮೇಂಢ ಚ಼ರಾವವಾಳು ಅಜು಼ ದೇವ್ನು ದೂತರ್
8ಯೋ ತಬರ್‌ಖಾಮ ಮೇಂಢ ಚ಼ರಾವವಾಳು ಥೋಡು ಜ಼ಣು, ಯೋ ರಾತ್ಮ ಖೇತರ್‌ಮ ಇವ್ಣ ಮೇಂಢಾವ್‍ನಿ ಮಂಧಾನ ದೇಕ್‌ಭಾಲ್ ಕರುಕರ್ತುಥು. 9ತದೆ ಪ್ರಭುನೊ ಏಕ್‌ ದೂತ ಐನ್, ಮೇಂಢ ಚ಼ರಾವವಾಳಾನ ಖ್ಹಾಮ್ಣೆ ಭೀರ‍್ಯೊ. ಪ್ರಭುನು ಉಜಾ಼ಖ್ಹ್‌ ಇವ್ಣ ಅಶ್‌ಪಿಶ್‍ ಭರಾಯು. ಅನ ದೇಖಿನ್ ಇವ್ಣೆ ಡರ್‌ಥಿ ಘಬ್‌ರೈಗಯು. 10ಕತೋಬಿ ದೇವ್‌ನೊ ದೂತನೆ ಇವ್ಣುನ, “ಡರೊ ನಕೊ! ಮೇ ತುಮಾರಖ್ಹಾಜೆ ಅಛ್ಛಿಸಮಾಚಾರ್‌ನ ಲೈರಾಖ್ಯೊಸ್, ಅನೇಥಿ ತಮಾಮ್‌ ಅದ್ಮಿನ ಘಣು ಖ್ಹುಶಿ ಉಶೆ. 11ಯೋ ಶಾತ್‌ಕತೊ, ಆಜ಼್ ದಾವೀದ್‌ನ ನಂಗರ್‌ಮ ತುಮಾರಖ್ಹಾಜೆ ಏಕ್‌ ರಕ್ಷಕ್ ಪೈದಾ ಹುಯಿರ‍್ಹೋಸ್, ಯೋ ಕೋಣ್‌ಕತೊ ಪ್ರಭು ಹುಯಿರ‍್ಹೋತೆ ಕ್ರಿಸ್ತ. 12ಯೋ ತುಮೂನ ಮಾಲುಮ್ ಪಡಾನ ಖ್ಹಣೇದ್ ಶಾತ್‌ಕತೊ, ಲುಂಗ್ಡಾಥಿ ಲಪೇಟಿಹುಯು ಏಕ್‌ ಲಡ್ಕು, ಗೋದ್‌ಡಿಮ ಖ್ಹುತುರ‍್ಹಿಶೇತೆ ತುಮೆ ದೇಕ್‌ಶು” ಕರಿ ಬೋಲ್ಯೊ.
13ಯೋಸ್ ವಖ್ಹತ್‌ಮ ಪರಲೋಕ್‌ಥು ದೇವ್ ದೂತರ್‌ನು ಮೋಟಿ ಝೂ಼ಂಡ್‌ ಆಯಿನ್, ಯೋ ಪಹಿಲು ದೇವ್ ದೂತನ ಜೋ಼ಡೆ ಮಳಿನ್, ದೇವ್ನ ಸ್ತುತಿ ಕರ‍್ಯು:
14“ಉಪ್ಪರ್‌ಲ್ಯಲೋಕ್‍ಮ#2:14 ದೇವ್ ರ‍್ಹವಾನಿ ಝ಼ಗೊ. ದೇವ್ನ ಮಹಿಮೆ ಹುವಾದೆ,
ಅಜು಼ ಧರ್ತಿಪರ್ ದೇವ್ನ ಕೋಣ್ ಖ್ಹಾಜ಼ಸ್ಕಿ ಇವ್ಣುನ ಶಾಂತಿ.
15ದೇವ್‌ದೂತರ್‌ ಇವ್ಣಕಂಥು ಪಾಛು಼ ಪರ್‌ಲೋಕ್ ಚ಼ಲ್ಯುಜಾ಼ವಾನ ಬಾದ್‌ಮ, ಮೇಂಢ ಚ಼ರಾವವಾಳು ಏಕ್‌ಥಿ ಏಕ್‌, “ಅಪ್ಣೆ ಹಮ್ಕೇಸ್ ಬೇತ್ಲೆಹೇಮ್‌ನ ಜೈ಼ನ್, ಪ್ರಭುನೆ, ಅಪ್ಣುನ ಮಾಲುಮ್ ಕರಾಯೋತೆ ಆ ಬಾರೇಮ, ಚಾ಼ಲ್ಯುತೆ ಇನ ದೇಖೆ” ಕರಿ ವಾತೆ ಬೋಲಿಲಿದು.
16ತದೆ ಇವ್ಣೆ ಒಗ್ಗಿಸ್‌ಮ ಜೈ಼ನ್, ಮರಿಯನಾಬಿ ಯೋಸೇಫ್‌ನಾಬಿ ಅಜು಼ ಗೋದ್‌ಡಿಮ ಖ್ಹುತೂಥೂತೆ ಲಡ್ಕಾನಾಬಿ ದೇಖ್ಯು. 17ಮೇಂಢ ಚ಼ರಾವವಾಳನೆ ಲಡ್ಕಾನ ದೇಖಿನ್, ಇನಿ ಬಾರೇಮ ದೇವ್‌ನೊ ದೂತನೆ ಇವ್ಣುನ ಬೋಲ್ಯೋತೆ ವಾತೇನ ಇವ್ಣ ಖ್ಹಾಮ್ಣೆ ಬೋಲ್ಯು. 18ಇನ ಖ್ಹಮ್‌ಜ್ಯೂತೆ ಖ್ಹಾರಾಸ್‌ನೆ, ಮೇಂಢ ಚ಼ರಾವವಾಳು ಇವ್ಣುನ ಬೋಲ್ಯೂತೆ ವಾತೇನಖ್ಹಾಜೆ ಆಶ್ಚರ್ಯಖಾದು. 19ಕತೋಬಿ ಮರಿಯನೆ ಆ ಖ್ಹಾರಿ ವಾತೆನ ಇನ ಮನ್‌ಮ ರಾಖಿನ್, ಇನಿ ಬಾರೇಮ ಸೋಚಾಲಗಿ. 20ಮೇಂಢ ಚ಼ರಾವವಾಳು ಇವ್ಣೆ ದೇಖ್ಯೂತೆ ಅಜು಼ ಖ್ಹಮ್‌ಜ್ಯೂತೆ ಯೋ ಖ್ಹಾರಾನಖ್ಹಾಜೆ, ದೇವ್ನ ಗೀದ್‌ ಬೋಲ್ತು ಅಜು಼ ಸ್ತುತಿ ಕರ್ತುಹುಯಿನ್ ಪಾಛು಼ಫರಿ ಚ಼ಲ್ಯೂಗಯು. ದೇವ್‌ನೊ ದೂತನೆ ಇವ್ಣುನ ಬೋಲ್ಯೊಥೋತೆ ಇಮ್ಮಸ್ ಖ್ಹಾರು ಚಾ಼ಲಿರ‍್ಹೂಥು.
ಯೇಸುನ ನಾಮ್ ಮ್ಹೇಲ್ಯೂತೆ
21ಆಟ್ ದನ್ ಹುವ್ವಾದೀನ್, ಯೋ ಲಡ್ಕಾನ ಖ್ಹತ್ನ ಕರಾನಿ ವಖ್ಹತ್ ಆಯಿ. ತದೆ ಇನ ಯೇಸು ಕರಿ ನಾಮ್ ಮ್ಹೇಲ್ಯು. ಯೋ ಬೇಜೂನಿ ಹುವಾನ ಅಗಾಡಿಸ್ ದೇವ್‌ನೊ ದೂತನೆ ಆಸ್ ನಾಮ್ ಮ್ಹೇಲ್ನು ಕರಿ ಬೋಲ್ಯೊಥೊ.
ಯೇಸುನ ಯೆರೂಸಲೇಮ್‌ನಿ ಮಂದಿರ್‌ಮ ಲಾಯುತೆ
22ಪಾಕ್‍ ಹುವಾನಿ ಬಾರೇಮ ಮೋಶೇನು ಧರ್ಮಶಾಸ್ತ್ರಮ ಹುಕುಮ್ ದೆವೈರ‍್ಹೀಸ್‌ತೆ ಇಮ್‌ ಕರಾನ, ಯೋಸೇಫ್‌ನಾಬಿ ಮರಿಯನ ಯೋ ವಖ್ಹತ್ ಆಯಿ. ಇನಖ್ಹಾಜೆ ಇವ್ಣೆ ಯೋ ಲಡ್ಕಾನ ದೇವ್ನ ಕರಿ ಸಮರ್ಪಣ್‌ ಕರಾನ ಯೆರೂಸಲೇಮ್‌ನು ಮಂದಿರ್‌ಮ ಲೀನ್‌ ಗಯ. 23ಶನಕತೊ ಪ್ರಭುನಿ ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ಇಮ್‌, ಪಹಿಲೋಟು ಪರ್ಖ್ಹೊ ಲಡ್ಕಾನ ದೇವ್ನ ಕರಿ ಸಮರ್ಪಣ್‌ ಕರ‍್ನು. 24ಎತ್ರೇಸ್ ಕಾಹೆತೆ ಇವ್ಣೆ ಪ್ರಭುನ, ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ಇಮ್‌, ಏಕ್‌ ಜೋ಼ಡು ಢೋಳ್‍ನ ನಾತೊ ಬೇ ಪರ‍್ಯಾವಾನು ಚೆಲ್ಕಾನ ಬಲಿ ದೇವ್ಣುಥು.
25ಯೋ ಹಗಾಮ್ಮ ಯೆರೂಸಲೇಮ್ಮ ಸಿಮೆಯೋನ್‌ ಕರಿ ಏಕ್‍ಜ಼ಣೊ ಥೊ. ಯೋ ಏಕ್‌ ನೀತಿವಾಳೊ ಅಜು಼ ದೇವ್ಥಿ ಡರವಾಳೊ ಅದ್ಮಿ ಹುಯಿರ‍್ಹೋಥೊ, ಇಸ್ರಾಯೇಲ್ ಅದ್ಮಿಯೇನ ಸಮಾಧಾನ್‍ ಕರಾವಾಳೊ ಕದೆ ಆವ್‍ಶೆಕರಿ ಟಿವವ್‍ಕರ್‌ತೊಥೊ. ಅಜು಼ ಪವಿತ್ರಾತ್ಮ ಇನಿ ಜೋ಼ಡೆ ಥೊ. 26ಅತ್ರೇಸ್ ಕಾಹೆತೆ ಪ್ರಭು ಮೋಕಲ್‌ಶೇತೆ ಕ್ರಿಸ್ತನ ದೇಖಾತೋಡಿ, ತೂ ಮರಿಶ್‌ ಕೊಯ್ನಿ ಕರಿ ಪವಿತ್ರಾತ್ಮನೆ ಇನ ಬೋಲಿರಾಖ್ಯೋಥೊ. 27ಪವಿತ್ರಾತ್ಮಥಿ ಸಿಮೆಯೋನ್‌ ಮಂದಿರ್‌ಮ ಗಯೊ, ತದೆ ಯೋಸೇಫ್‌ಬಿ ಮರಿಯನೆ ಲಡ್ಕು ಯೇಸುನ ಧರ್ಮಶಾಸ್ತ್ರನಿ ಪದತ್ತಿಘೋಣಿ ಕರ‍್ನು ಕರಿ ಮಂದಿರ್‌ನ ಮಹಿ ಲೀನ್‌ಆಯ. 28ಸಿಮಿಯೋನ್ನೆ ಯೋ ಲಡ್ಕಾನ ಹಾತ್‌ಮ ಪಾಡೀನ್, ದೇವ್ನ ಧನ್ಯವಾದ್ ಕರ್ತೊಹುಯಿನ್,
29“ಪ್ರಭು, ತಾರಿ ವಾತೆ ಚಾ಼ಲಿಗಿ,
ಹಮ್ಕೆ ಸಮಾಧಾನ್‌ಥಿ ಜಾ಼ವಾನ ತಾರೊ ಸೇವಕ್‌ನ ಹುಕುಮ್ ಹುವಾದೆ.
30ಶನಕತೊ, ಖ್ಹುದ್ ಮಾರ ಡೋಳೆಖ್ಹು ತುನೆ ದಿದೋತೆ ರಕ್ಷಣೆನ ದೇಖಿಲಿದೊ,
31ಖ್ಹಾರ ಅದ್ಮಿವೋನ ದೇಖಾನಿಘೋಣಿ ಇನ ದೀರಾಖ್ಯೊಸ್.
32ಯೋ ಪರೈ ಜಾ಼ತ್‌ವಾಳ ಅದ್ಮಿನ ತಾರಿ ಮರ್ಜಿ ವತಾಳವಾಳೊ ಉಜಾ಼ಳು ಹುಯಿರ‍್ಹೋಸ್
ಅಜು಼ ತಾರು ಇಸ್ರಾಯೇಲ್ ಅದ್ಮಿವೋನ ಮಹಿಮೆ ಉಶೆ.
33ಸಿಮಿಯೋನ್ನೆ ಯೋ ಲಡ್ಕಾನಿ ಬಾರೇಮ ಬೋಲ್ಯೋತೆ ವಾತೇನ ಖ್ಹಮ್‌ಜಿನ್‌, ಇನ ಆಯ-ಬಾನೆ ಆಶ್ಚರ್ಯಖಾದು. 34ಸಿಮೆಯೋನ್ನೆ ಇವ್ಣುನ ಆಶೀರ್ವಾದ್‌ ಕರೀನ್, ಇನಿ ಆಯ ಮರಿಯನ, “ಆ ಲಡ್ಕಾಥಿ ಇಸ್ರಾಯೇಲ್ ದೇಖ್ಹ್‌ಮ ಕೈಯೆಕ್ಕಿ ಜ಼ಣು ಪಡಿಜಾ಼ಶೆ ಅಜು಼ ಕೈಯೆಕ್ಕಿ ಉಟ್‌ಶೆ. ಕೈಯೆಕ್ಕಿ ಜ಼ಣು ಅನಿ ವಿರೋದ್ ವಾತೆ ಬೋಲ್‌ಶೇತೇಸ್, ಆ ದೇವ್ಥಿ ಆಯೋತೆ ಕರಿ ಬೋಲಾನು ಖ್ಹಣೇದ್ ಹುಯಿರ‍್ಹಿಶೆ. 35ಅಮ್ ಘಣ ಅದ್ಮಿನಿ ದಿಲ್ನಿ ವಾತೆಖ್ಹಾರಿ ಭಾರ್‌ ನಿಕಳ್‌ಶೆ. ಅಜು಼ ತಾರ ದಿಲ್ನ ತಲ್ವಾರ್‌ ಭೋಕಾವನಿಮತ್ ದುಖ್ ಉಶೆ” ಕರಿ ಬೋಲ್ಯೊ.
36ಆಸ್‌ಕಾಹೆತೆ ಅಸೇರನೊ ಖೂಮ್‌ವಾಳೊ ಫನುವೇಲನಿ ಛೋ಼ರಿ ಅನ್ನಕರಿ ಏಕ್‌ ಜ಼ಣಿ ಪ್ರವಾದ್‌ನೆ ಕರಾವಾಳಿ ಥೀ. ಯೋ ವ್ಯಹಾ ಹುಯಿನ್ ಖ್ಹಾತ್ ವರಖ್ಹ್ ಬಾವ್ರಿನ ಜೋ಼ಡೆ ಬಚಿನ್ ಅಜು಼ ಯೋ ಘಣಿ ಬುಢಿಯಾ ಹುಯಿರ‍್ಹೀಥಿ. 37ತದೆ ಇನ ಚಾರ್ ಉಪ್ಪರ್ ಚಾರಿಖ್ಹ್ ವರಖ್ಹ್ ಹುಯಿರ‍್ಹಾಥ ಅಜು಼ ಯೋ ಮುಂಡಚ್ಚಿ ಹುಯಿರ‍್ಹೀಥಿ. ಯೋ ದೇವ್ನಿ ಮಂದಿರ್‌ನ ಕದೇಬಿ ಮ್ಹೇಲಿನ್ ಕೋ ಜಾ಼ತಿಥಿಂತೆ, ಉಪವಾಸ್ ಅಜು಼ ಪ್ರಾರ್ಥನೆ ಕರ್ತಿಹುಯಿನ್, ರಾತ್-ದನ್ ದೇವ್ನಿ ಆರಾದನೆ ಕರ್ತಿ ರ‍್ಹೇತಿಥಿ. 38ಯೋಸ್ ವಖ್ಹತ್‌ಮ, ಅನ್ನ ಯೋ ಲಡ್ಕಾನ ಆಯ-ಬಾಕನ ಅಯಿನ್, ದೇವ್ನ ಧನ್ಯವಾದ್‌ಕರಿ ಕರಿ ಅಜು಼ ಯೆರೂಸಲೇಮ್‌ನಿ ಛುಟ್ಕಾರ್‌ನಿ ಬಾರೇಮ ಟಿವವ್‍ಕರ್ತುಥೂತೆ ಖ್ಹಾರಾವ್‌ನ, ಯೋ ಲಡ್ಕಾನಿ ಬಾರೇಮ ಬೋಲಿ.
ನಜ಼ರೇತ್‌ನ ಪಾಛು಼ ಫರಿನ್ ಗಯೂತೆ
39ಇವ್ಣೆ ಧರ್ಮಶಾಸ್ತ್ರಮ ಪ್ರಭುನೆ ಬೋಲಿರಾಖ್ಯುತೆ ಖ್ಹಾರುಸ್ ಕಾಮ್ ಕರಾನ ಬಾದ್‌ಮ, ಯೋಸೇಫ ಅಜು಼ ಮರಿಯ ಪಾಛು಼ಫರಿ ಗಲಿಲಾಯ ತಬರ್‌ಖಾನು ನಜ಼ರೇತ್ ಕರಿ ಗಾಮ್‌ನ ಗಯು. 40ಯೋ ಲಡ್ಕು ಮೋಟು ಹುಯಿನ್, ಶಕತ್‍ಮಾಬಿ ಅಜು಼ ಗ್ಯಾನ್‌ಮಾಬಿ ಭರಾಯು. ದೇವ್ನಿ ದಯಾ ಇನ ಉಪ್ಪರ್ ಥೂ.
ಭಾರ ವರಖ್ಹ್‌ನೊ ಯೇಸು ಮಂದಿರ್‌ಮ ಗಯೋತೆ
41 ಹರೇಕ್ ವರಖ್ಹ್‌ಬಿ ಯೇಸುನ ಆಯ-ಬಾ ಪಸ್ಕ ಪೂಜಾ಼ನಖ್ಹಾಜೆ ಯೆರೂಸಲೇಮ್ ಜಾ಼ತೂಥೂ. 42ಯೇಸುನ ಭಾರ ವರಖ್ಹ್ ಹುವ್ವಾದೀನ್, ಇವ್ಣೆ ಜಾ಼ತೂಥೂತೆ ಇಮ್ಮಸ್, ಪಸ್ಕ ಪೂಜಾ಼ನಖ್ಹಾಜೆ ಯೆರೂಸಲೇಮ್‌ನ ಗಯು. 43ಇವ್ಣೆ ಪೂಜಾ಼ನೊ ದನ್‌ಖ್ಹಾರು ಖತಮ್ ಕರೀನ್ ಪಾಛು಼ಫರಿನ್ ಆವಾನಿ ವಖ್ಹತ್‌ಮ ಛೋ಼ಕ್ರು ಯೇಸು ಯೆರೂಸಲೇಮ್ಮಸ್ ರಹಿಗು. ಇನ ಆಯ-ಬಾನ ಅನಿ ಬಾರೇಮ ಮಾಲುಮ್ ಕೋ ಥೂನಿ. 44ಯೋಸೇಫ್‌ಬಿ ಮರಿಯ ಯೇಸು ಝೂ಼ಂಡ್‌‍ಮಾಸ್ ಉಷೆಕರಿ ಸೋಚಿನ್, ಏಕ್‌ ರೋಜ಼್‌ನಿ ಚಾ಼ಲ್ ಎವ್ಡಿ ಚಾ಼ಲ್‌ನಿ ಬಾದ್‌ಮ, ಇವ್ಣ ಮಾಯಮಾತ್ರಕನಾಬಿ, ರ‍್ಹವಾಳು ಖ್ಹಾರಾಕನಾಬಿ ಜೈ಼ನ್ ಢೂಂಡ್ಯು. 45ಕತೋಬಿ ಕಿಜ್ಜಾ಼ಬಿ ಮಳ್ಯೊಕೊಂತೆ ಇನಖ್ಹಾಜೆ, ಯೇಸುನ ಢೂಂಡ್‌ತುಹುಯಿನ್ ಯೆರೂಸಲೇಮ್‌ನ ಪಾಛು಼ ಗಯು. 46ತೀನ್ನೆ ರೋಜ಼್‌ಮ ಯೇಸುನ ಮಂದಿರ್‌ಮ ದೇಖ್ಯು, ಯೋ ಯೆಹೂದ್ಯರ್‌ನ ಬೋಧನೆ ಕರಾವಾಳಾನ ಜೋ಼ಡ್ಮ ಬೇಶಿನ್, ಇವ್ಣೆ ಬೋಲಾತೆ ಖ್ಹಮಜ಼್‌ತೊಹುಯಿನ್, ಅಜು಼ ಪಾಛು಼ ಫರೈನ್ ಸವಾಲ್‌ ಕರುಕರ್ತೊಥೊ. 47ಯೇಸುನಿ ವಾತೇನ ಖ್ಹಮ್‌ಜಾ಼ವಾಳು ಖ್ಹಾರು, ಯೋ ಸೋಚಿ ಪರ್ಖಿನ್ ಗ್ಯಾನ್‌ಥಿ ಜವಾಬ್‌ ದೇಯಿತೆ ದೇಖಿನ್ ಆಶ್ಚರ್ಯಖಾದು. 48ಯೇಸುನ ಆಯ-ಬಾನೆ ಇನ ಹಿಜ್ಜಾ಼ ದೇಖಿನ್ ಮ್ಹೊಡಾಪರ್ ಹಾತ್‌ ಜೋ಼ಡಿಲಿದು. ತದೆ ಇನಿ ಆಯಾನೆ, “ಮಾರ ಛಿಯ್ಯಾ, ತುನೆ ಹಮೂನ ಶನ ಅಮ್ ಕರ‍್ಯೊ? ದೇಕ್, ತಾರೊ ಬಾಬಿ ಮೇ ಘಬ್‍ರೈನ್‌, ಢೂಂಡಿನ್ ಆಯಾನಿ” ಕರಿ ಬೋಲಿ.
49ತದೆ ಯೇಸುನೆ ಇವ್ಣುನ, “ತುಮೆ ಮನ ಶನ ಢೂಂಡ್‌ಣು ಥು? ಮೇ ಮಾರ ಬಾನ ಘರ್‌ಮ ರ‍್ಹೇಣು ಕರಿ ತುಮೂನ ಮಾಲುಮ್ ಕೊಯ್ನಿಕಿ ಶು? ಕರಿ ಜವಾಬ್‌ ದಿದೊ. 50ಕತೋಬಿ ಇನೆ ಬೋಲ್ಯೋತೆ ಜ಼ವಾಬ್‌ನ ಇವ್ಣೆ ಮಾಲುಮ್ ಕರ‍್ಯುಕೊಯ್ನಿ.
51ಬಾದ್‌ಮ ಯೇಸು ಇವ್ಣ ಜೋ಼ಡೆ ನಜ಼ರೇತ್‌ನ ಗಾಮ್‌ನ ಐನ್, ಹಿಜ್ಜಾ಼ ಇವ್ಣಿ ವಾತೆನ ಖ್ಹಮ್‌ಜಿನ್‌ ಥೊ. ಕತೋಬಿ ಇನಿ ಆಯ ಆ ಖ್ಹಾರಿ ವಾತೇನ ಇನ ಮನ್‌ಮ ರಾಖಿರಾಖಿಥಿ. 52ಯೇಸು ಗ್ಯಾನ್‌ಮಾಬಿ ಅಜು಼ ಆಂಗ್‌ತನ್ನಿ ಶಕತ್‍ಮಾಬಿ ಭಡ್ತೊ ಆಯೊ. ಅತ್ರೇಸ್ ಕಾಹೆತೆ ದೇವ್ನಿ ಅಜು಼ ಅದ್ಮಿನಿ ದಯಾ ಇನ ಉಪ್ಪರ್ ಜಾ಼ಖ್ಹತ್ ಹೋತು ಆಯು.
Currently Selected:
ಲೂಕ 2: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
