ಲೂಕ 7
7
ಯೇಸುನೆ ಖ್ಹೋ ಶಿಪಾಯಿನೊ ಮೋಟಾನೊ ಏಕ್‌ ಆಳ್‌ನ ಅಛ್ಛು಼ ಕರ‍್ಯೊತೆ
(ಮತ್ತಾಯ 8:5-13)
1ಯೇಸುನೆ ಅದ್ಮಿನ ಆ ಖ್ಹಾರಿ ವಾತೆನ ಬೋಲಿನ್ ಖ್ಹಮ್‌ಜಾ಼ಡನ ಬಾದ್‌ಮ, ಯೇಸು ಕಪೆರ್ನೌಮ್‌ನ ಗಯೊ. 2ಹಿಜ್ಜಾ಼ ಖ್ಹೋಶಿಪಾಯಿನೊ ಮೋಟಾನೊ, ಪ್ಯಾರ್‌ನೊ ಆಳ್‌ ಏಕ್‌ ಜ಼ಣೊ, ರೋಗ್‌ ಆಯಿನ್ ಮರಾನಿ ಹಾಲ್‌ಮ ಥೊ. 3ಯೋ ಖ್ಹೊ ಶಿಪಾಯಿನೊ ಮೋಟಾನೆ, ಯೇಸುನಿ ಬಾರೇಮ ಖ್ಹಮ್‌ಜಿನ್‌, ಯೆಹೂದ್ಯರ್‌ನ ಶಾಣವ್‍ಮ ಥೋಡ ಜ಼ಣಾನ ಇನಾಕನ ಮೋಕ್ಲಿನ್, ಇನ ಆಳ್‌ನ ಅಛ್ಛು಼ ಕರ‍್ನು ಕರಿ ಬೋಲಿಲಿದೊ. 4ಇವ್ಣೆ ಯೇಸುಕನ ಆಯಿನ್, “ತಾರೇಥಿ ಮದತ್ ಕರೈಲ್ಯವಾನ ಯೋ ಅದ್ಮಿ ಲ್ಹಾಯಕ್‌ ಹುಯಿರ್ಹುಸ್. 5ಯೋ ಅಪ್ಣ ಅದ್ಮಿನ ಪ್ಯಾರ್ ಕರಾವಾಳೊ ಹುಯಿರ‍್ಹೋಸ್ ಅಜು಼ ಇನೇಸ್‌ ಅಪ್ಣಖ್ಹಾಜೆ ಸಬೆ ಭರಾವನು ಮಂದಿರ್‌ನ ಭಂದೈದಿದೊತೆ” ಕರಿ ಬೋಲಿನ್ ಯೇಸುನ ಗಿಂಗಾವಲಗಾಖ್ಹತರ್‌,
6ಯೇಸು ಇವ್ಣ ಜೋ಼ಡೆ ಗಯೊ. ಯೇಸು ಘರ್‌ಕನ ಆಯಿನ್ ಪೋಚಾ಼ನ ಜ಼ರ ದೂರ್ ಥೋತೆ ತದ್ದೇಸ್, ಯೋ ಖ್ಹೋಶಿಪಾಯಿನೊ ಮೋಟಾನೆ ಇನ ದೋಸ್ತ್ ಖ್ಹಾರಾವ್‌ನ ಯೇಸುಕನ ಬೋಲಿ ಮೋಕ್ಲಿನ್, “ಪ್ರಭು, ತೂ ಖ್ಹತ್‌ನಕೊ, ತೂ ಮಾರ ಘರ್‌ಕನ ಆವಾಯೆತ್ರೆ ಲ್ಹಾಯೇಕ್‌ ಮಾರಮ ಕೊಯ್ನಿ. 7ಅತ್ರೇಸ್ ಕಾಹೆತೆ ತಾರಕನ ಆವಾನಾಬಿ ಮೇ ಲ್ಹಾಯೇಕ್‌ನೊ ಕಾಹೆ. ಕತೋಬಿ ತೂ ಖಲಿ ಏಕ್‌ ವಾತೆ ಬೋಲ್ಯೋತೊ ಬಶ್‌ ಮಾರ ಸೇವಕ್‌ನ ಅಛ್ಛು಼ ಉಶೆ. 8ಮೇಬಿ ಬೀಜಾ಼ನ ಹಾತ್ಹೇಟ್ ಕಾಮ್ ಕರಾವಾಳೊ ಹುಯಿರ‍್ಹೋಸ್. ಮಾರ ಹಾತ್ಹೇಟ್ ಸಿಪಾಯಿಖ್ಹಾರು ಛಾ಼. ಮೇ ಇವ್ಣಾಮ ಏಕ್‌ ಜ಼ಣಾನ ಜಾ಼ ಕರಿ ಬೋಲ್ಯೊತೊ ಯೋ ಜಾ಼ಸ್‌, ಬಿಜ್ಜೇಕ್‌ ಜ಼ಣಾನ ಆವ್ಣುಕರಿ ಬೋಲ್ಯೋತೊ ಆವಸ್. ಮಾರ ಆಳ್‌ನ ಅಮ್ನು-ಅಮ್ನು ಕಾಮ್ ಕರ್‌ ಕರಿ ಬೋಲ್ಯೋತೊ ಯೋ ಕರಸ್” ಕರಿ ಬೋಲ್ಯೊ.
9ಆ ವಾತೆನ ಖ್ಹಮ್‌ಜಿನ್‌ ಯೇಸುನೆ ಇನಿ ಬಾರೇಮ ಆಶ್ಚರ್ಯಖೈನ್, ಇನ ಪೀಠೆ ವಳ್ಯಾವ್‌ತುಥೂತೆ ಝೂ಼ಂಡ್‌ಣ ಫರಿ ದೇಖಿನ್, “ಮೇ ತುಮೂನ ಬೋಲುಸ್ಕಿ, ಮೇ ಅತ್ರೆ ಮೋಟಿ ವಿಶ್ವಾಸ್‌ನ ಇಸ್ರಾಯೇಲ್‌ ಆದ್ಮಿಮಾಬಿ ಕೋ ದೇಖ್ಯೋನಿ” ಕರಿ ಬೋಲ್ಯೊ.
10ಅನ ಬಾದ್‌ಮ ಯೋ ಟಪಾಲ್ ದ್ಯವಾಳು ಪಾಛು಼ ಫರಿ ಯೋ ಅದಿಕಾರಿನ ಘರ್‌ಕನ ಜೈ಼ನ್, ಯೋ ಆಳ್‌ನ ಅಛ್ಛು಼ ಹುಯಿರ‍್ಹುಥೂತೆ ದೇಖ್ಯು.
ಯೇಸುನೆ ಮುಂಡಚ್ಚೀನೊ ಛಿಯ್ಯಾನ ಜಿವಾಡ್ಯೋತೆ
11ಅನ ಬಾದ್‌ಮ ಯೇಸು ನಾಯಿನ್ ಕರಿ ಏಕ್‌ ಗಾಮ್‌ನ ಗಯೊ. ಇನ ಜೋ಼ಡ್ಮ ಇನು ಶಿಷ್ಯರ್‌ ಅಜು಼ ಅದ್ಮಿನಿ ಮೋಟಿ ಝೂ಼ಂಡ್‌ಬಿ ಥೂ. 12ಯೇಸು ಗಾಮ್‌ನ ಮಹಿ ಜಾ಼ವಾನು ದರ‍್ವಾಜ಼ಕನ ಆವಾದಿನ್, ಮರಿಗಯೂತೆ ಏಕ್‌ ಮುರ್ದಾನ ಗಾಮ್‌ಥಿ ಭಾರ್ ಪಳ್ಳಿನ್‌ ಉಳ್ಯಾವ್ತೂಥು. ಯೋ ಮರಿಗಯೂತೆ ಅದ್ಮಿ ಇನಿ ಆಯಾನ ಏಕ್‍ನೊ ಏಕ್‌ ಛಿಯ್ಯೊ ಹುಯಿರ‍್ಹೋಥೊ. ಇನಿ ಆಯ ಮುಂಡಚ್ಚಿ ಹುಯಿರ‍್ಹೀಥಿ, ಯೋ ಗಾಮ್‌ನು ಅದ್ಮಿನಿ ಮೋಟಿ ಝೂ಼ಂಡಸ್ ಯೋ ತಯೇಡ ಕೇಡೆ ಥು. 13ಪ್ರಭುನೆ ಯೋ ತಯೇಡಾನ ದೇಖಿ ಗೋರ್‌ಖೈನ್, “ರೋವ್‌ ನಕೊ” ಕರಿ ಇನ ಬೋಲ್ಯೊ. 14ಅಜು಼ ಖಾಟ್ಲಾಕನ ಜೈ಼ನ್, ಇನ ಛೀಮ್‌ತಖ್ಹತರ್‌, ಪಳ್ಳಿನ್‌ ಜಾ಼ವವಾಳು ಭೀರಿಗಯು. ತದೆ ಯೇಸುನೆ, “ಜಾ಼ನ್ಜ಼ಮಾನ್ ಛೋ಼ಕ್ರಾ ಉಟ್, ಕರಿ ಮೇ ತುನ ಬೋಲುಸ್!” ಕರಿ ಬೋಲ್ಯೊ. 15ತದೆ ಯೋ ಮರಿಗಯುಥೂತೆ, ಯೋ ಛೋ಼ಕ್ರು ಉಠಿ ಬೇಶಿನ್, ವಾತೆ ಬೋಲಾಲಗ್ಯು, ತದೆ ಯೇಸುನೆ ಯೋ ಛೋ಼ಕ್ರಾನ ಇನಿ ಆಯಾನ ದಿದೊ.
16ಅನ ದೇಖಿನ್, ಹಿಜ್ಜಾ಼ ಥೂತೆ ತಮಾಮ್‌ ಅದ್ಮಿ ಡರಿನ್, ದೇವ್ನ ಸ್ತುತಿ ಕರ್ತುಹುಯಿನ್, “ಏಕ್‌ ಮಹಾನ್ ಪ್ರವಾದಿ ಅಪ್ಣಕನ ಐರ‍್ಹೋಸ್! ದೇವ್ ಇನ ಅದ್ಮಿನ ಬಚಾ಼ಡಾನ ಐರ‍್ಹೋಸ್” ಕರಿ ಬೋಲ್ಯು.
17ಯೇಸುನಿ ಬಾರೇಮಾನಿ ಆ ಖಬರ್‌, ಯೂದಾಯ ದೇಖ್ಹ್‌ಮ ಅಜು಼ ಇನ ಅಶ್‌ಪಿಶ್‌ನು ತಮಾಮ್‌ ಮುಲಕ್‌ಮ ಫೈಲಿಗಯು
ಯೇಸು ಅಜು಼ ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ
(ಮತ್ತಾಯ 11:2-19)
18ಯೋಹಾನನು ಶಿಷ್ಯರ್‌ ಚಾ಼ಲ್ಯುತೆ ಖ್ಹಾರಿ ಬಾರೇಮ ಯೋಹಾನ್ನ ಬೋಲ್ಯು. 19ತದೆ ಯೋಹಾನನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, “ತೂಸ್‌ಕಿ ಶು ಯೋ ಆವ್‌ಶೇತೆ ಅದ್ಮಿಕಿ? ನಾತೊ ಹಮೆ ಬಿಜೇಕ್‌ನಖ್ಹಾಜೆ ಟಿವಾವ್‌ಣು” ಕರಿ ಪುಛಾ಼ವಾನಖ್ಹಾಜೆ, ಇವ್ಣುನ ಮಾಲಿಕ್‍ಕನ ಮೋಕ್‌ಲ್ಯೊ.
20ಇವ್ಣೆ ಯೇಸುಕನ ಆಯಿನ್, “ತೂಸ್‌ಕಿ ಶು ಯೋ ಆವ್‌ಶೇತೆ ಅದ್ಮಿ? ಕೊಯಿನ್ತೊ ಹಮೆ ಬಿಜ್ಜೇಕ್‌ ಅದ್ಮಿನಖ್ಹಾಜೆ ಟಿವಾವ್‌ಣು? ಕರಿ ಫುಛಾ಼ವಾನಟೇಕೆ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನೆ ಹಮೂನ ತಾರಕನ ಮೋಕ್ಲಿರಾಖ್ಯೊಸ್” ಕರಿ ಬೋಲ್ಯು.
21ಯೋಸ್‌ ವಖ್ಹತ್‌ಮ, ಯೇಸುನೆ ಕೈಯೆಕ್ಕಿ ಅದ್ಮಿನು ರೋಗ್‌ರಾಯೊನ ಅಛ್ಛು಼ ಕರ‍್ಯೊ, ಅಜು಼ ಭೂತ್‌ ಧರಿರಾಖವಾಳನ ಛೋ಼ಡಾಯೊ. ಅತ್ರೇಸ್ ಕಾಹೆತೆ ಘಣ ಕಾಣ ಅದ್ಮಿನ ಡೋಳಾನ ಜೋ಼ತ್ ದಿದೊ. 22ಬಾದ್‌ಮ ಯೇಸುನೆ ಯೋಹಾನ್ನ ಶಿಷ್ಯರ್‌ನ, “ತುಮೆ ಹಜ಼್ಜಾ ದೇಖ್ಯಾತೆ ಅಜು಼ ಖ್ಹಮ್‍ಜ್ಯಾತೆ ಇನಿ ಬಾರೇಮ ಯೋಹಾನ್ನ ಜೈ಼ನ್ ಬೋಲೊ. ಕಾಣು ದೇಕ್‌ಶೆ, ಲಂಗ್ಡು ಚಾ಼ಲ್‌ಷೆ, ಖೋಡ್‍ ರ‍್ಹವಾಳು ಪಾಕ್‌ ಉಶೆ, ಭೈರು ಖ್ಹಮಜ಼್‌ಶೆ, ಮರಿಗಯುಹುಯು ಜಾನ್‌ ಲೀಲಿಶೆ ಅಜು಼ ಗರೀಬ್‌ನ ಸುವಾರ್ತೆ ಬೋಲವ್‍ಕರಸ್. 23ಮಾರಿ ಬಾರೇಮ ಶಕ್ ಕರಾಕೊಂತೆ ಇವ್ಣೇಸ್ ಧನ್ಯ ಹುಯಿರ್ಹುಸ್ ಕರಿ ಬೋಲ್ಯೊ.
24ಯೋಹಾನನು ಶಿಷ್ಯರ್‌ ಚ಼ಲ್ಯೂಜಾ಼ವಾದೀನ್, ಯೇಸುನೆ ಅದ್ಮಿನಿ ಝೂ಼ಂಡ್‌ನ ಯೋಹಾನ್ನಿ ಬಾರೇಮ ಬೋಲಾಲಗ್ಯೋಕಿ, “ಶಾತ್‌ ದೇಕ್ಣು ಕರಿ ತುಮೆ ಯೋಹಾನಕನ ಉಜ್ಜಾ಼ಡಿ ಝ಼ಗೋಮ ಗಯಾಥ? ವಹಿರಾಮ ಹಲಾಸ್ತೆ ಘಾಖ್ಹ್‌ನ ಡಂಟ್‍ನಾಕಿಶು? 25ನಾತೊ ತುಮೆ ಶಾತ್‌ ದೇಕ್ಣುಕರಿ ಗಯಾಥ? ಶನ್ಗಾರ್‌ನ ಲುಂಗ್ಡ ಪೇರ‍್ಹಿರಾಖಾಸ್ತೆ ಅದ್ಮಿನಾಕಿಶು? ಅಮ್ನು ಲುಂಗ್ಡು ಪೇರ‍್ಹಿನ್‌ ಅರಾಮ್‌ನಿ ಜಿ಼ಂದ್‌ಗಿ ಚ಼ಲಾವವಾಳು ಖ್ಹಾರು ಮಹೇಲ್‌ಮ ರ‍್ಹೇಸ್! 26ಇಮ್‍ಕತೊ ಮನ ಬೋಲೊ, ಶಾತ್‌ ದೇಕ್ಣು ಕರಿ ಬಹರ್ ಗಯಾಥ? ಪ್ರವಾದೀನಾಕಿ ಶು? ಒಹೊ ಖ್ಹಾಚಮಾಬಿ, ಮೇ ಬೋಲುಸ್ಕಿ ಏಕ್‌ ಪ್ರವಾದಿಥೀಬಿ ಮೋಟಾನ ತುಮೆ ದೇಖ್ಯ. 27‘ದೇವ್ನೆ ಹಂದೇಕ್‌, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್, ಯೋ ತೂ ಜಾ಼ವಾನಿ ವಾಟ್ನ ಖ್ಹೂದು ಕರ್ಶೆ’ ಕರಿ ಲೀಖೈರ‍್ಹೂಸ್ತೆ ಯೋ ಯೋಹಾನನಿಸ್ ಬಾರೇಮ#7:27 ಮಲಾಕಿ-3:1 28ಮೇ ತುಮೂನ ಬೋಲುಸ್ಕಿ, “ಜ಼ಮೀನ್‌ಪರ್ ತಯೇಡಾನ ಪೇಟೆ ಪೈದಹುಯುತೆ ಹರೇಕ್ ಅದ್ಮಿಮ ಯೋಹಾನಸ್‌ ಮೋಟೊ. ಕತೋಬಿ ದೇವ್ನಿ ರಾಜ್ಯಮ ಅಖ್ಖೇಥಿ ನ್ಹಾನೊ ಜಿನ್‌ಕುಬಿ ಯೋಹಾನಥಿ ಮಹಾನ್ ಹುಯಿರ‍್ಹೋಸ್.
29ಯೋಹಾನ ಬೋಲ್ಯೋತೆ ಇಮ್‌ ತಮಾಮ್‌ ಅದ್ಮಿ ಅಜು಼ ಶುಂಕ ವಶೂಲ್ ಕರಾವಾಳುಬಿ ದೇವ್‌ನೊ ಮಾರಗ್ ಖ್ಹಾಚಕರಿ ಮಾನಿಲಿದು. ಇನಖ್ಹಾಜೆ ಇವ್ಣೆ ಖ್ಹಾರು ಯೊಹಾನ್ನ ಹಾತೇಥಿ ಬ್ಯಾಪ್ತಿಸ್ಮ ಕರೈಲಿದು. 30ಕತೋಬಿ ಫರಿಸಾಯರ್ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಇವ್ಣಿ ಬಾರೇಮ ದೇವ್ನಿ ಮರ್ಜಿನ ಝಿಟ್ಕಾರಿನ್, ಯೋಹಾನ್ನ ಹಾತೇಖ್ಹು ಬ್ಯಾಪ್ತಿಸ್ಮ ಕೋ ಲಿದೂನಿ.
31ಅಜು಼ ಯೇಸುನೆ ಅಮ್ ರ‍್ಹವಾಪರ್, “ಆ ಹಗಾಮ್ನ ಅದ್ಮಿನ ಖಿವಿ ಪರಕ್ಮ ಬೋಲು? ಇವ್ಣೆ ಕಿಮ್ಕಿ ಘೋಣಿ ಛಾ಼? 32ಬಜಾ಼ರ್‌ಮ ಬೇಶಿನ್, ಹಮೆ ತುಮಾರಖ್ಹಾಜೆ ವಾಖ್ಹ್‌ಳಿ ವಜಾ಼ಡ್ಯ, ತುಮೆ ಖೇಲ್ಯಕೊಯ್ನಿ; ಹಮೆ ಅಂದ್ರೋಖ್ಹ್‌ನು ಗೀದ್‌ ಬೋಲ್ಯ, ಕತೋಬಿ ತುಮೇತೊ ರೋಯಾ ಕೊಯ್ನಿ” ಕರಿ ಬೋಲಾತೆ ಲಡ್ಕಾನಿಘೊಣಿ ಛಾ಼. 33ಕಿಮ್‌ಕತೊ, ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಆಯೊ, ಯೋ ರೋಟೊ ಖಾತೋಥೊಕೊಯ್ನಿ ಅಜು಼ ದ್ರಾಕ್ಷಿನು ರಖ್ಹ್‌ ಪೀತೋಥೊಕೊಯ್ನಿ, ತುಮೆ ಇನ ಭೂತ್‌ ಧರಿರಾಖ್ಯುಸ್ ಕರಿ ಬೋಲೋಸ್. 34ಅದ್ಮಿನೊ ಛಿಯ್ಯೊ ಆಯೊ, ಯೋ ಖಾಣುಪಾಣಿ ಲ್ಯವಾಳೊ ಹುಯಿರೋಸ್. ‘ತುಮೆ ಬೋಲೊಸ್ಕಿ, ದೇಖೋಲೊ, ಆ ಅದ್ಮಿ ಖಾಣನು ಮರ್‌ತೇಲ್‌ ಅಜು಼ ಪೀಕುಡ್ಕ, ಪಾಪಿಬಿ ಖರಾಬ್ ಅದ್ಮಿನೊ ದೋಸ್ತಿ” ಕರಿ. 35ಕತೋಬಿ ದೇವ್ನಿ ಗ್ಯಾನ್‌ತೊ ಖ್ಹಾಚಸ್‌ಕರಿ, ಇನ ಮಾನಿಲ್ಯಾವಾಳಥೀಸ್ ಮಾಲುಮ್‌ಪಡಸ್” ಕರಿ ಬೋಲ್ಯೊ.
ಪರಿಸಾಯವಾಳೊ ಸಿಮೋನನ ಘರ್‌ಮ ಯೇಸು
36ಫರಿಸಾಯರ್‌ಮ ಏಕ್‌ ಜ಼ಣಾನೆ, ಯೇಸುನ ಖಾಣನ ಆವ್ಣುಕರಿ ಬೋಲಿಲಿದೊ. ಇನಾಖ್ಹಾಜೆ ಯೇಸು ಇನ ಘರೆ ಜೈ಼ನ್ ಖಾಣು ಖಾವಾನ ಬೇಶಿಗಯೊ. 37ಯೋ ಗಾಮ್ಮ ಏಕ್‌ ಪಾಪೇಲಿ ತಯೇಡ ಥೀ. ಇನೆ ಯೇಸು ಯೋ ಫರಿಸಾಯರ್‌ನ ಘರ್‌ಮ ಛಾ಼ ಕರಿ ಮಾಲುಮ್‌ ಕರಿಲೀನ್, ಏಕ್‌ ಬಂಡಾನಿ#7:37 ಆ ಶೀಶಿನ ‘ಅಲಬಾಶ್‌ಟರ್’ ಕರಿ ಧೋಳೊ ಅಜು಼ ಪೀಳೊ ಘಣ ಅಛ಼್ಛ ಬಂಡೇಥಿ ಬಣಾಯುಹುಯು ಶೀಶಿಮ ವಾನು ತೇಲ್ನ ಲೀನ್ ಹಿಜ್ಜಾ಼ ಆಯಿ. 38ಯೋ ಯೇಸುನ ಪೀಠೆ ಇನ ಗೋಡಾಕನ ಭೀರಿನ್, ರೊವ್‌ತಿಹುಯಿನ್, ಇನ ಗೋಡಾನ ಆಂಝೇ಼ಖ್ಹು ಭಿಜೈ಼ನ್, ಬಾದ್‌ಮ ಇನ ಮುಡ್‌ಕ್ಯಾನ ಕೇಖ್ಹ್‌ಥಿ ಯೇಸುನ ಗೋಡ ನೂಛಿ ಅಜು಼ ಇನ ಗೋಡಾನ ಬುಚ್ಚಾ಼ ದೀನ್, ಯೋ ವಾನು ತೇಲ್ನ ಇನ ಗೋಡಾಪರ್ ನಾಖಿ. 39ಯೇಸುನ ಖಾಣನ ಬುಲಾಯೊಥೋತೆ ಫರಿಸಾಯರ್‌ನೆ ಅನ ದೇಖಿನ್, “ಆ ಪ್ರವಾದಿಸ್ ರ‍್ಹಯೊಹೋತ್ತೊ, ಇನ ಛೀಮುಕರಾತೆ ಕೋಣ್ ಕರಿ ಮಾಲುಮ್‌ ಕರಿಲಿದೊಹೋತ್; ಆ ಕಿಮ್ನು ಪಾಪ್‌ಮ ಜಿವ್ಣು ಚ಼ಲಾವ್‍ಕರಾಸ್‌ ಕರಿ ಮಾಲುಮ್‌ ಕರಿಲಿದೊಹೋತ್!”
40ತದೆ ಯೇಸುನೆ, “ಸೀಮೋನ್, ತುನ ಬೊಲಾನಿ ಏಕ್‌ ವಾತ್ ಛಾ಼” ಕರಿ ಬೋಲ್ಯೊ.
ತದೆ ಸೀಮೋನ್ನೆ, “ಗುರು, ಬೋಲ್” ಕರಿ ಬೋಲ್ಯೊ.
41ತದೆ ಯೇಸುನೆ, “ಏಕ್‌ ಶೌಕಾರ್‌ನ ಬೇ ಜ಼ಣ ಕರ್‌ಜ್ಯಾ ಥಾ; ಏಕ್‌ ಜ಼ಣೊ ಪಾಚ಼್ ಖ್ಹೊ ರೂಪಾನ ಬಿಲ್ಲಾ ದೇವ್ಣುಥು; ಬಿಜ್ಜೇಕ್‌ ಜ಼ಣೊ ಅಡೈವಿಖ್ಹ್‌ ರೂಪಾನಬಿಲ್ಲಾ ದೇವ್ಣುಥು. 42ಯೋ ಭೇ ಜ಼ಣಾನಾಬಿ ಫೇಡಾನ ಹಾತ್‌ ಕೋ ಹುಯೂನಿ. ಇನಖ್ಹಾಜೆ ಯೋ ಭೇ ಜ಼ಣಾನು ಕರಜ಼್ ಮ್ಹೆಂದಿದೊ. ಇಮ್‍ಕತೊ, ಯೋ ಭೇ ಜ಼ಣಾಮ ಕೋಣ್ ಯೋ ಶೌಕಾರ್‌ನ ಜಾ಼ಖ್ಹತ್ ಪ್ಯಾರ್ ಕರ್ಶೆ?” ಕರಿ ಬೋಲ್ಯೊ.
43ಸೀಮೋನನೆ, “ಕಿನೆ ಜಾ಼ಖ್ಹತ್ ಕರಜ಼್ ಲೀರಾಖ್ಯೊಥೋಕಿ ಯೋಸ್‌ ಕರಿ ದೆಖಾವಸ್” ಕರಿ ಬೋಲ್ಯೊ. ತದೆ ಯೇಸುನೆ ಇನ, “ತುನೆ ಬರಾಬರ್‌ಥಿ ತೀರ್ಪ್‌ ದಿದೊ. ಕರಿ ಬೋಲ್ಯೊ. 44ತದೆ ಯೇಸುನೆ ಯೋ ತಯೇಡ ಭಣಿ ಫರಿನ್, ಸೀಮೋನ್ನ, “ಆ ತಯೇಡಾನ ದೇಖ್ಯೊಕಿ ಶು? ಮೇ ತಾರ ಘರೆ ಆಯೊ, ತೂ ಮಾರ ಗೋಡಾನ ಪಾಣಿ ಕೋ ದಿದೋನಿ. ಕತೋಬಿ ಆತೊ, ಇನ ಡೋಳಾನ ಆಂಝೇ಼ಥಿ, ಮಾರ ಗೋಡ ಧೋಯಿನ್‌, ಇನ ಮುಡ್‌ಕ್ಯಾನ ಕೇಖ್ಹ್‌ಥಿ ನೂಛಿ. 45ತುನೆ ಮನ ಏಕ್‌ ಹಲ್ಲಾಬಿ ಬುಚ್ಚಾ಼ ಕೋ ದಿದೋನಿ, ಆತೊ ಮೇ ಮಹಿ ಆಯೊ ತಪ್‌ಥೊ ಮಾರ ಗೋಡಾನ ಬುಚ್ಚಾ಼ ದ್ಯವಾನ ಕೋ ಮ್ಹೇಲಿನಿ. 46ತೂ ಮಾರ ಮುಡ್‌ಕ್ಯಾನ ತೇಲ್‌ ಲಗಾಡ್ಯೊಕೊಯ್ನಿ, ಕತೋಬಿ ಆತೊ ಮಾರ ಗೋಡಾನ ವಾನುತೇಲ್ ಲೋಥಿ. 47ಇನಖ್ಹಾಜೆ ಮೇ ಬೋಲುಸ್ಕಿ, ಅನೆ ವತಾಳಿತೆ ಜಾ಼ಫ ಪ್ಯಾರ್ ದೇಖ್ಯೂತೆ, ಅನು ಪಾಪ್ ಘಣು ರ‍್ಹಯುತೋಬಿ ಮಾಪ್‌ ಹುಯಿಗಯು. ಕತೋಬಿ ಕಿನ ದರ್ರಾಖ್ಹು ಪಾಪ್ ಮಾಪ್‌ ಹುಯುಕಿ, ಯೋ ದರ್ರಾಖ್ಹು ಪ್ಯಾರ್ ಕರಾಸ್.
48ತದೆ ಯೇಸುನೆ ಯೋ ತಯೇಡಾನ, “ತಾರು ಖ್ಹಾರೂಸ್ ಪಾಪ್ ಮಾಪ್‌ ಹುಯಿಗಯು” ಕರಿ ಬೋಲ್ಯೊ.
49ಯೇಸುನ ಜೋ಼ಡ್ಮ ಖಾಣನ ಬೆಠುಥೂತೆ ಖ್ಹಾರು, “ಪಾಪ್ ಖ್ಹಾರುಬಿ ಮಾಪ್‌ ಕರಿನಾಖಿದ್ಯವಾನ ಆ ಕೋಣ್?” ಕರಿ ಇವ್ಣ-ಇವ್ಣಾಮಸ್ ಬೋಲಿಲಿದು.
50ಕತೋಬಿ ಯೇಸುನೆ ಯೋ ತಯೇಡಾನ, “ತಾರಿ ವಿಶ್ವಾಸಸ್ ತುನ ಬಚಾ಼ಡ್ಯು; ಶಾಂತಿಥಿ ಜಾ಼” ಕರಿ ಬೋಲ್ಯೊ.
Currently Selected:
ಲೂಕ 7: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
