ಮತ್ತಾಯ 23
23
ಯೇಸುನೆ ಪರಿಸಾಯರ್ ಅಜು಼ ಮೋಶೆನಿ ವಚನ್ನ ಶಿಕಾಡವಾಳ ಶಾಸ್ತ್ರಿಯೇನಿ ಬಾರೇಮ ಝೇತಾಯೊತೆ
(ಮಾರ್ಕ 12:38-39; ಲೂಕ 20:45-46)
1ಅನಕೇಡೆಥು ಯೇಸುನೆ ಅದ್ಮಿನಿ ಝೂ಼ಂಡ್‌ನ ಅಜು಼ ಇನ ಶಿಷ್ಯರ್‌ನ ಬೋಲ್ಯೊ. 2ಪಂಡಿತ್‍ಖ್ಹಾರುಬಿ ಫರಿಸಾಯವಾಳೂಬಿ ಮೋಶೆನಿ ಖುಡ್‍ಶಿಪರ್ ಬೆಠುರ‍್ಹುಸ್‍. ಶಾಸ್ತ್ರಿಯೇನ ಅಜು಼ ಪರಿಸಾಯರ್‌ನ ಹಕ್‌ ಛಾ಼. 3ಇನಖ್ಹಾಜೇಸ್ ತುಮೆ ಇವ್ಣೆ ಬೋಲಾತೆ ಇನಖ್ಹಾರಾನ ಖ್ಹಮಜ಼್‌ಣು ಅಜು಼ ಇನೀನಿಘೋಣಿ ಚಾ಼ಲ್ನು; ಇವ್ಣೆ ಕತೋಬಿ ಚಾ಼ಲಿಲೇಸ್ತೆ ಇಮ್‌ ನಾ ಚಾ಼ಲಿಲೇವ್ಣು, ಶನಕತೊ ಇವ್ಣೆ ಬೋಲಾತೆ ಇಮ್‌ ಇವ್ಣೇಸ್ ಕೋ ಕರಾನಿ. 4ಇವ್ಣೆ ಘಣು ವಜ಼ನ್ನು ಭೋಜಾ಼ನ ಭಾಂದಿನ್, ಅದ್ಮಿನ ಖಾಂದಾಪರ್ ನಾಖಾಸ್, ಕತೋಬಿ ಇವ್ಣೆತೊ ಚಿಟಂಗ್‌ಳಿಥೀಬಿ ಇನ ಕೋ ಛೀಮಾನಿ. 5ಇವ್ಣೆ ಅದ್ಮಿನ ಖ್ಹಾರು ದೆಖಾವಾದೆ ಕರಿ ಇವ್ಣು ಕಾಮ್ನ ಕರಾಸ್. ವಚನ್ ಲೀಖೈರ‍್ಹೂತೆ ಪಟ್ಟಿಯೇನ ತಾಳ್ವಪರ್ ಅಜು಼ ಡಂಟ್‌ಪರ್ ಭಾಂದಿರಾಖಾಸ್ತೆ ದೇಖೊ. ಇವ್ಣೆ ಪೇರ‍್ಹಾಸ್ತೆ ಝ಼ಗ್ಗಾವ್‍ನ ಗೊಂಡಾನ ಲಾಂಬು ಕರಿಲೇಸ್! 6ಅತ್ರೇಸ್ ಕಾಹೆತೆ, ಮಾನ್-ಮಿಝ಼್ವಾನೇನಿ ಝ಼ಗೋಮ ಖ್ಹಾರು ಖ್ಹಾರೇಥಿ ಖ್ಹಾಮ್ಣೆ, ಅಜು಼ ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಅಖ್ಖಾನ ದೆಖಾವಾನಿಘೋಣಿ ಖ್ಹಾಮ್ಣೆ ಬೇಖ್ಹ್‌ಣು ಕರಿ ಇವ್ಣೆ ಆಖ್ಹ್ ಕರಾಸ್. 7ದುಕಾನೇನಿ ಗಲ್ಲಿಯೇಮ ಅದ್ಮಿಖ್ಹಾರು ಇವ್ಣುನ ಖ್ಹಲಾಮ್ ಕರ‍್ನು ಕರಿ ಅಜು಼ ಗುರುಕರಿ ಬೋಲೈಲೇವ್ಣು ಕರಿ ಬೋಲನುಸ್ ಇವ್ಣಿ ಆಖ್ಹ್. 8ಕತೋಬಿ ತುಮೆ ಗುರು ಕರಿ ನಕೊ ಬೋಲೈಲಿಶು; ಶನಕತೊ ಕ್ರಿಸ್ತ ಎಕ್ಕಸ್‍ಜ಼ಣೊ ತುಮೂನಛಾ಼ತೆ ಗುರು ಅಜು಼ ತುಮೆಖ್ಹಾರು ಭೈಯೇ ಭೇನೆನಿಘೋಣಿ ಹುಯಿರ‍್ಹಾಸ್. 9ಆ ಧರ್ತಿಪರ್ ತುಮೆ ಕಿನಾಬಿ ‘ಬಾ’ ಕರಿ ನಕೊ ಚಿಕರ್‌ಶು, ಶನಕತೊ ಸೊರ್ಗಾಮ ಛಾ಼ತೆ ಎಕ್ಕಸ್ ಜ಼ಣೊ ತುಮಾರೊ ಬಾ ಹುಯಿರ‍್ಹೂಸ್. 10ಅಜು಼ ತುಮೆ ‘ಮೋಟೊ’ ಕರಿ ನಕೊ ಬೋಲೈಲಿಶು; ಶನಕತೊ ಕ್ರಿಸ್ತ ಎಕ್ಕಸ್ ಜ಼ಣೊ ತುಮಾರೊ ಮೋಟೊ. 11ತುಮಾರಾಮ ಮಹಾನ್ ಕರಿ ರ‍್ಹವಾಳೊ ತುಮಾರೊ ಆಳ್‌ನಿಘೋಣಿ ರ‍್ಹೇಣು. 12ಇನುಯೋಸ್ ಮೋಟೊಕರಿ ಬೋಲೈಲ್ಯವಾಳೊ ಹೇಟು ಹುಯಿಜಾ಼ಶೆ, ಇನುಯೋಸ್ ಹೇಟುಕರಿ ಬೋಲೈಲ್ಯವಾಳೊ ಯೋ ಮೋಟೊ ಹುಯಿಜಾ಼ಶೆ.
ಯೇಸುನೆ ಇವ್ಣು ಖೋಟ್ ದಿಲ್‌ಪರ್‌ ಗಲತ್‌ ಲಗಾಡ್ಯೋತೆ
(ಮಾರ್ಕ 12:40; ಲೂಕ 11:39-42,44,52; 20:47)
13“ಮೋಶೆನಿ ವಚನ್ನ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ಅದ್ಮಿಖ್ಹಾರು ಸೊರ್ಗಾನು ರಾಜ್ಯಮ ಜಾ಼ವಾನು ಬಾಕಲ್‌ನ ತುಮೆ ಖ್ಹಾಮ್ಣೆ ಮೂಚಿನಾಖೋಸ್, ತುಮೇಬಿ ಮಹಿ ಕೋಜಾ಼ಯ್ನಿ ಅಜು಼ ಮಹಿ ಜಾ಼ವ್ಣುಕರಿ ಕರಾವಾಳಾನಾಬಿ ಕೋ ಮ್ಹೇಲೋನಿ. 14ಅಲಾ ಠಗಾರು ಖ್ಹಾರ ಪಂಡಿತ್ ಪರಿಸಾಯವಾಳ ಅದ್ಮಿಖ್ಹಾರು ದೇಖಾದೆಕರಿ ಲಾಂಬಿ ಪ್ರಾರ್ಥನೆ ಕರೋಸ್ ತುಮೆ ಮುಂಡಚ್ಚಿನ ಶೊತ್‌ನ ಗಳಿಲಿನ್ ನಾಟಕ್ ಕರೋಸ್. ಇನಖ್ಹಾಜೆ ತುಮೆ ಘಣಿ ನಿಶತ್‌ ಲೀಲಿಶು.
15ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮೆ ಏಕ್‌ ಜ಼ಣಾನ ತುಮಾರಿ ಧರಮ್ಮ ಮಳೈಲ್ಯವಾನಖ್ಹಾಜೆ ದರ‍್ಯಾವ್‍ನ ಖ್ಹಾರು ಉಲಾಂಗಿನ್, ಬಿಜ಼-ಬಿಜ಼ ದೇಖ್ಹ್‌ನ ಜಾ಼ವೋಸ್. ಅಜು಼ ಯೋ ಮಳಾನ ಬಾದ್‌ಮ ತುಮಾರೇಥಿ ಬೇ ಪಟ್ ನರಕ್‌ನ ಜಾ಼ವಾನಿಘೋಣಿ ಇನ ಕರೋಸ್!
16ವಾಟ್‌ ವತಾಳವಾಳ ಕಾಣ ಅದ್ಮಿಯೆ, ತುಮಾರಿ ಹಾಲ್ನ ಶಾತ್ ಬೋಲು! ಏಕ್‌ ಜ಼ಣೊ ಮಂದಿರ್‌ಪರ್ ಆಣ್ ಲಿದೋತೊ, ಯೋ ಶಾತ್ ಆಣ್ ಕಾಹೆ, ಕತೋಬಿ ಏಕ್‌ ಜ಼ಣೊ ಮಂದಿರ್‌ನು ಖ್ಹೊನ್ನಾಪರ್‌ ಆಣ್ ಲಿದೋತೊ, ಇನ ಚ಼ಲಾವ್ಣುಸ್ ಚ಼ಲಾವ್ಣು’ ಕರಿ ಬೋಲೋಸ್. 17ತುಮೆಖ್ಹಾರು ಕಾಣ ಬುಧ್ಧು ಹುಯಿರ‍್ಹಾಸ್! ಕೆಹು ಮೋಟು? ಖ್ಹೊನ್ನುಕಿ, ಮಂದಿರ್‌? ಖ್ಹೊನ್ನಾನ ಪರಿಶುದ್ ಕರ‍್ಯುತೆ ಮಂದಿರ್‌ ಕಾಹೇಕಿಶು? 18ಎತ್ರೇಸ್ ಕಾಹೆತೆ, ‘ಏಕ್‌ ಜ಼ಣೊ ಚಾ಼ಚ಼ರ್‌ಪರ್ ಆಣ್ ಲಿದೋತೊ, ಯೋ ಶಾತ್ ಆಣ್ ಕಾಹೆಕರಿ ಬೋಲೊಸ್‍, ಕತೋಬಿ ಇನಮಾನಿ ಕಾಣ್ಕೆಪರ್ ಆಣ್ ಲಿದುತೋ ಇನ ಚ಼ಲಾವ್ಣುಸ್ ಚ಼ಲಾವ್ಣು’ ಕರಿ ತುಮೆ ಬೋಲೋಸ್. 19ತುಮೆ ಕೆತ್ರೆ ಕಾಣ ಹುಯಿರ‍್ಹಾಸ್! ಕೆಹು ಮೋಟು? ಕಾಣ್ಕೆಕಿ, ಕಾಣ್‌ಕೆನ ಪಾಕ್ ಕರಾಸ್ತೆ ಚಾ಼ಚ಼ರ್‌? 20ಚಾ಼ಚ಼ರ್‌ಪರ್ ಆಣ್ ಲ್ಯವಾಳೊ, ಖಲಿ ಚಾ಼ಚ಼ರ್‌ಪರಸ್ ಕಾಹೆ, ಇನಾಪರ್ ಮ್ಹೇಲಾಸ್ತೆ ಖ್ಹಾರಿಸ್ ಕಾಣ್ಕೆಪರ್ ಆಣ್ ಲ್ಯಾವದಾಖ್ಹಲ್; 21ಮಂದಿರ್‌ಪರ್ ಆಣ್ ಲ್ಯವಾಳೊ, ಖಲಿ ಮಂದಿರ್‌ಪರಾಸ್‌ ಕಾಹೆ, ಇನಾಮಹಿ ರ‍್ಹವಾಳೊ ದೇವ್‌ಪರ್‌ಬಿ ಆಣ್ ಲ್ಯಾವದಾಖ್ಹಲ್. 22ಅಜು಼ ಸೊರ್ಗಪರ್ ಆಣ್ ಲ್ಯವಾಳೊ, ದೇವ್ನಿ ಸಿಂಹಾಸನ್‍ಪರ್‌ಬಿ, ಇನಾಪರ್ ಬೇಖ್ಹಾವಾಳಪರ್‌ಬಿ ಆಣ್ ಲ್ಯಾವದಾಖ್ಹಲ್.
23ಮೋಶೆನಿ ವಚನ್ನ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮಾರಕನ ಛಾ಼ತೆ ಹರೇಕ್‍ಮಾಬಿ ಪುದೀನ, ಖ್ಹೋಪ್ ಅಜು಼ ಜೀರಮಾಬಿ ದಖ್ಹ್‌ಮ ಏಕ್‌ ಭಾಗ್‌ ದೇವ್ನ ಕರಿ ತುಮೆ ದೆವೋಸ್. ಕತೋಬಿ ಧರ್ಮಶಾಸ್ತ್ರಮ ಬೋಲಾಸ್ತೆ ನ್ಯಾವ್‌ನಾಬಿ, ಗೋರ್‌ನಾಬಿ ಅಜು಼ ವಿಶ್ವಾಸ್‍ನಾಬಿ ಮ್ಹೇಲಿಲಿದಾ. ಆ ಖ್ಹಾರಿ ಹುಕುಮ್‌ನಿಘೋಣಿ ಪಹಿಲೆ ಚಾ಼ಲೊ ಅಜು಼ ಯೋ ಖ್ಹಾರು ಕರಾನಬಿ ನಕೊ ಮ್ಹೇಲೊ. 24ವಾಟ್‌ ವತಾಳವಾಳ ಕಾಣ! ತುಮೆ ಮಛ್ಛರ್‌ನ ಛಾ಼ಣಿನ್ ಕಾಡೋಸ್, ಕತೋಬಿ ಊಟ್ನ ಗಳಿಲೆವೊಸ್!
25ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್ ತುಮಾರಿ ಹಾಲ್ನ ಶಾತ್ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮೆ ತುಮಾರು ಹಂಡ್‌ಕು ಅಜು಼ ಥಾಳಿ ಭಾರ್‌ ಪಾಕ್‌ಥಿ ಮಾಂಜ಼ಸ್. ಕತೋಬಿ ಇನಮಹಿ ದೋಚಿಲ್ಯವಾನುಬಿ, ಲಾಲಚ಼್‌ಥೀಬಿ ಭರೈರ‍್ಹೇಸ್. 26ಫರಿಸಾಯರ್ ತುಮೆ ಕಾಣ ಹುಯಿರ‍್ಹಾಸ್! ಪಹಿಲೆ ಹಂಡ್ಕನ ಮಹಿ ಅಛ್ಛಿನಿತರ ಧೋವೊ, ತದೆ ಹಂಡ್ಕನ ಭಾರ್‌ಬಿ ಪಾಕ್ ಹುಯಿಜಾ಼ಶೆ.
27ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್ ತುಮಾರಿ ಹಾಲ್ನ ಶಾತ್ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹೋಸ್! ತುಮೆ ಚು಼ನ್ನೊ ಮರೈರ‍್ಹೇಯಿತೆ ಮಖ್ಹಾಣ್ಯನಿಘೋಣಿ ಹುಯಿರ‍್ಹಾಸ್. ಯೋ ಮಖ್ಹಾಣ್ಯ ಭಾರ್‌ ಅಛ್ಛು಼ ದೆಖಾವಸ್, ಕತೋಬಿ ಮಹಿ ಮರ‍್ಯಾಮುರ್ದಾನ ಹಡ್‌ಕ್ಯಾ ಅಜು಼ ಖ್ಹಾರಿಸ್ ತರ‍್ಹಾನು ಖ್ಹಡ್ಯು ಭರೈರ‍್ಹೇಸ್. 28ಇಮ್ಮಸ್ ತುಮೇಬಿ, ಭಾರ್‌ಲ್ಯ ಅದ್ಮಿವೋನ ನೀತಿವಾಳ ಕರಿ ದೆಖಾವೋಸ್, ಕತೋಬಿ ತುಮಾರ ಮಹಿ, ಖೋಟ್ ಅಜು಼ ಪಾಪ್ ಭರೈರ‍್ಹೂಸ್.
ಯೇಸು ಇವ್ಣಿ ಡಂಡ್‌ನ ಅಗಾಡಿಸ್ ಬೋಲಿನ್‌ವಾತಾಳ್ಯೋತೆ
(ಲೂಕ 11:47-51)
29ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್ ತುಮಾರಿ ಹಾಲ್ನ ಶಾತ್ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ತುಮೆ ಪ್ರವಾದಿ ಖ್ಹಾರಾನಖ್ಹಾಜೆ ಅಛ್ಛಿ ಮಖ್ಹಾಣ್ಯನಿ ಘವಿಯೇನ ಬಣಾವೋಸ್, ಅಜು಼ ನೀತಿವಾಳಾನ ಮಖ್ಹಾಣ್ಯವ್‍ನ ಶನ್‌ಗಾರ್ ಕರೋಸ್; 30ಹಮಾರ ಗುರುಗುರುಬ್‌ಲ್ಯವ್‍ನ ಜಂಗ್‌ಮ ಹಮೆ ರ‍್ಹಯಾಹೋತ್ತೊ, ಆ ಪ್ರವಾದಿ ಖ್ಹಾರಾನ ಮಾರ‍್ಯುತೆ ಖೂನಿಮ ಭಾಗಿ ಹುಯಹೊತ್‍ಕೊಯ್ನಿ’ ಕರಿ ಬೋಲೋಸ್. 31ಇಮ್‍ಕತೊ, ತುಮೆ ಪ್ರವಾದಿ ಖ್ಹಾರಾನ ಮಾರ‍್ಯೂತೆ ಇವ್ಣ ಲಡ್ಕಾ ಹಮೆ ಕರಿ ತುಮಾರು ತುಮೇಸ್ ಸಾಕ್ಷಿ ಬೋಲಿಲೆವೊಸ್. 32ಅಛ್ಛು಼ಸ್, ತುಮಾರ ಗುರುಗುರಬ್‍ಲ್ಯಾನಿ ಪಾಪ್ನ ತುಮೆ ಪೂರ ಕರೊ! 33ಅಲ ಖ್ಹಾಪ್ ಅಜು಼ ಖ್ಹಾಪ್‌ನಿ ಪಿಳ್ಗಿವಾಳ, ತುಮೆ ನರಕ್‌ನಿ ತೀರ್ಪ್‌ಥಿ ಛು಼ಕ್‍ಶು ಕರಿ ಕಿಮ್ ಸೋಚೋ಼ಸ್? 34ಇನಖ್ಹಾಜೇಸ್ ಮೇ ಬೋಲುಸ್ಕಿ, ಮೇ ತುಮಾರಕನ ಪ್ರವಾದಿಯೇನಾಬಿ, ಗ್ಯಾನಿ ಅದ್ಮಿಖ್ಹಾರಾನಾಬಿ ಅಜು಼ ಬೋದಕರ್‌ ಖ್ಹಾರಾನ ಮೋಕ್ಲೀಶ್; ತುಮೆ ಇವ್ಣಾಮ ಥೋಡಾನ ಮಾರಿನಾಕ್‌ಶು, ಅಜು಼ ಥೋಡಾನ ಶಿಲ್‌ಬೇಪರ್ ನಾಕ್‌ಶು ಅಜು಼ ಬಿಜು಼ ಥೋಡಾನ ತುಮಾರಿ ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಕೊಳ್ಡೇಥಿ ಮಾರಿನ್ ಗಾಮ್‌ಥು-ಗಾಮ್‍ ನಖ್ಹಾಡಿಲಿಜಾ಼ಶು. 35ಅಮ್ ನೀತಿವಾಳೊ ಹುಯಿರ‍್ಹೋತೆ ಹೇಬೆಲ್‍ನು ಲ್ಹೊಯಿಥಿ ಧರೀನ್, ತುಮೆ ಮಂದಿರ್‌ನಾಬಿ ಅಜು಼ ಚಾ಼ಚ಼ರ್‌ನ ಇಚ಼್‌ಮ ಮಾರಿನಾಖ್ಯಾತೆ ಬರಕೀಯಾನೊ ಛಿಯ್ಯೊ ಜಕರೀಯಾನು ಲ್ಹೋಯಿತೋಡಿ, ಧರ್ತಿಪರ್ ರಂಚಾ಼ಯುತೆ ಹರೇಕ್ ನೀತಿವಾಳಾನು ಲ್ಹೋಯಿನು ಮಾರ್ ತುಮಾರ ಮುಡ್‌ಕ್ಯಪರ್ ಆವ್‌ಶೆ. 36ಮೇ ತುಮೂನ ಖ್ಹಾಚಾಮ ಬೋಲುಸ್, ಅಖ್ಖು ಅಪರಾದ್‌ ಆ ಪಿಳ್ಗಿಪರ್ ಆವ್‌ಶೆ!
ಯೇಸು ಯೆರೂಸಲೇಮ್‌ನಖ್ಹಾಜೆ ರೋಯೊತೆ
(ಲೂಕ 13:34-35)
37ಯೆರೂಸಲೇಮ್‌, ಯೆರೂಸಲೇಮ್‌! ಪ್ರವಾದಿ ಖ್ಹಾರಾನೊ ಜಾನ್‌ ಕಾಡಾವಾಳಿ! ದೇವ್ನೆ ತಾರಕನ ಮೋಕ್‌ಲ್ಯೊತೆ ಅದ್ಮಿಖ್ಹಾರಾನ ಬಂಡೊ ಫೇಕಿನ್, ಮಾರವಾಳಿ! ಮುರ್‌ಗಿ ಚೇಲ್ಕಾನ ಇನಿ ಪಾಖ್ಡಿಯೆಮ ಪೆಖ್ಹಾಡಿಲೇಯಿತೆ ಇಮ್‌, ತಾರ ಲಡ್ಕಾವ್ನ ಮೇ ಪೆಖ್ಹಾಡಿಲೇವ್ಣು ಕರಿ ಮನ ಕೆತ್ರಿಕ್ಕಿಹಲ್ಲ ಮನ್‍ಹುಯು, ಕತೋಬಿ ತುನ ಪಣ್ಕಿ ದಿಲ್‌ ಕೋಥುನಿ. 38ಹಂದೇಕ್, ತಾರಿ ಮಂದಿರ್‌ ಉಜ್ಜಾ಼ಡಿ ಪಡಿಜಾ಼ಶೆ. 39ಹಂಕೇಥು ಧರೀನ್, ‘ಪ್ರಭುನ ನಾಮ್‌ಪರ್‌ ಆವಾಳಾನ ಆಶೀರ್ವಾದ್‌ ಹುವಾದೆ’ ಕರಿ ತುಮೆ ಬೋಲಾತೋಡಿ, ತುಮೆ ಮನ ಪಾಛು಼ ದೇಕ್‌ಶುಸ್ ಕೊಯ್ನಿ ಕರಿ ಮೇ ತುಮೂನ ಬೋಲುಸ್” ಕರಿ ಬೋಲ್ಯೊ.
Currently Selected:
ಮತ್ತಾಯ 23: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
