ಮಾರ್ಕ 4
4
ಪಂಡಾ ಛಿಡ್ಕಾವಾಳನಿ ಬಾರೇಮ ಮತ್ಲಬ್‌ನಿ ಖೇಣಿ
(ಮತ್ತಾಯ 13:1-9; ಲೂಕ 8:4-8)
1ಯೇಸು ಪಾಛೊ಼ ಗಲಿಲಾಯ ದರ್ಯಾವ್ನ ಕನಾರೆಕನ ವಚನ್ ಬೋಲಿ ದೆವ್‌ಕರ್ತೋಥೊ. ಘಣು ಅದ್ಮಿ ಇನಾಕನ ಐನ್ ಭರೈರ‍್ಹುಥೂತೆ ಇನಖ್ಹಾಜೆ ಯೇಸುನೆ ಪಾಣಿಮ ಭೀಥಿತೆ ಡೋಣ್‌ಪರ್‌ ಚ಼ಢೀನ್ ಬೇಶಿಗಯೊ. ಯೋ ಅದ್ಮಿಖ್ಹಾರು ಭಾರ್‌ ಕನಾರೆಕನ ಭರೈರ‍್ಹೂಥು. 2ತದೆ ಯೇಸುನೆ ಇವ್ಣುನ ಮತ್ಲಬ್‌ನಿ ಖೇಣಿಯೇಥಿ ಘಣಿ ಬಾರೇಮ ಬೋಲಿದಿದೊ.
3ಇನೆ ಬೋಲ್ಯೋಕಿ, “ಹೈಕಡ್ ಖ್ಹಮ್‌ಜೊ಼! ಏಕ್‌ ಅದ್ಮಿ ಖೇತರ್‌ಮ ಪಂಡಾ ಛಿಡ್ಕಾನಖ್ಹಾಜೆ ಗಯೊ. 4ಯೋ ಪಂಡಾ ಛಿಡ್ಕಾನಿ ವಖ್ಹತ್‌ಮ ಥೋಡ ಪಂಡಾ ವಾಟ್ನ ಶೇಡೆ ಪಡೀನ್‌ ಜಿನಾವರ್ ಖ್ಹಾರು ಆಯಿನ್‌ ಇನ ಚ಼ರಿಲಿದು. 5ಬಿಜು಼ ಥೋಡ ಪಂಡಾ ಜಾ಼ಖ್ಹತ್ ಮಾಟಿಕೊಂತೆ ಬಂಡಾನಿ ಜ಼ಮೀನ್ಪರ್ ಪಡ್ಯು, ಛಿವರ್‌ ಮಾಟಿ ಥೀತೆ ಇನಖ್ಹಾಜೆ ಪಂಡಾ ಒಗ್ಗಿಸ್‌ಮ ಫುಟಿ ಆಯು. 6ಕತೋಬಿ ದನ್ ಚ಼ಢೀನ್ ತಡ್ಕೊ ಪಡಾನ ಬಾದ್‌ಮ, ಯೋ ಶೊಶಿಯೆ ಮುರ್‌ಝೈ಼ಗಯು. ಅಜು಼ ಮಹಿತೋಡಿ ಜ಼ಡೆ ಕೋ ಮ್ಹೇಲಿರಾಖ್ಯುಥುಂತೆ ಇನಖ್ಹಾಜೆ, ಯೋ ಶೊಶಿಯೆ ಒಗ್ಗಿಸ್‌ಮ ಖ್ಹುಕೈಗಯು. 7ಅಜು಼ ಥೋಡ ಪಂಡಾ ಕಾಟಾನ ಡಾಗ್‌ಮ ಪಡ್ಯು. ಯೋ ಕಾಟಾನು ಝಿಕ್ರುಖ್ಹಾರು ಮೋಟುಹುಯಿನ್, ಯೋ ಶೊಶಿಯೇಪರ್‌ ಮೂಚೈ಼ಜೈ಼ನ್ ಫುಟಾನ ಕೋ ಮ್ಹೇಲ್ಯೂನಿ. ಅನಖ್ಹಾಜೆ ಯೋ ಶೊಶಿಯೆ ಪಂಡಾ ಮ್ಹೇಲ್ಯು ಕೊಯ್ನಿ. 8ಬಿಜು಼ ಥೋಡ ಪಂಡಾ ಅಛ್ಛಿ ಜ಼ಮೀನ್ಪರ್ ಪಡ್ಯ. ಯೋ ಪಂಡಾ ಫುಟೀನ್, ಮೋಟು ಹುಯು ಅಜು಼ ಪಂಡಾ ಮ್ಹೇಲ್ಯು: ಇನಾಮಾನು ಥೋಡು ಡೋಡಿಖ್ಹ್‌ ಪಂಡಾಲಗು, ಥೋಡು ತೀನಿಖ್ಹ್‌ ಪಂಡಾಲಗು, ಅಜು಼ ಥೋಡು ಖ್ಹೋ ಪಂಡಾಲಗು ಮ್ಹೇಲ್ಯು”.
9ಬಾದ್‌ಮ ಯೇಸುನೆ, “ಕಿನ-ಕಿನ ಖ್ಹಮ್‌ಜಾ಼ನ ಕಾನ್‌ ಛಾ಼ಕಿ, ಇವ್ಣೆ ಕಾನ್‌ ಜೋ಼ಡಿ ಖ್ಹಮ್‌ಜೊ಼!” ಕರಿ ಬೋಲ್ಯೊ.
ಖೇಣಿನಿ ಉದ್ದೇಶ್
(ಮತ್ತಾಯ 13:10-17; ಲೂಕ 8:9-10)
10ಬಾದ್‌ಮ ಯೇಸು ಎಕ್ಲೊ ರ‍್ಹವಾನಿ ವಖ್ಹತ್‌ಮ, ಇನು ಭಾರ ಶಿಷ್ಯರ್‌ ಅಜು಼ ಇನಜೋ಼ಡೆ ರ‍್ಹವಾಳು ಬಿಜು಼ ಖ್ಹಾರು ಅದ್ಮಿ ಇನಾಕನ ಐನ್, ಯೋ ಮತ್ಲಬ್‌ನಿ ಖೇಣಿಯೇನಿ ಬಾರೇಮ ಪುಛಾ಼ಯು. 11ತದೆ ಯೇಸುನೆ ಇವ್ಣುನ ಫರೈನ್ ಬೋಲ್ಯೋಕಿ, “ದೇವ್ನಿ ರಾಜ್ಯನಿ ಲಪಿರ‍್ಹೀತೆ ಖ್ಹಾಚಿ ವಾತೆಖ್ಹಾರಿ ತುಮೂನ ದೆವೈರ‍್ಹೀಸ್. ಕತೋಬಿ ಬಿಜು಼ ಖ್ಹಾರು ಭಾರ್‌ಲ್ಯು ಅದ್ಮಿ, ಯೋ ಖ್ಹಾರಿ ವಾತೆನ ಮತ್ಲಬ್‌ನಿ ಖೇಣಿಯೇಥಿ ಖ್ಹಮ್‌ಜಾ಼ಸ್‌. 12ಶನಕತೊ,
‘ಇವ್ಣೆ ಡೋಳೆಖ್ಹು ದೇಖ್ಯುತೋಬಿ
ದೆಖಾವ್ಣು ನಾ;
ಕಾನ್‍ಥಿ ಖ್ಹಮ್‌ಜುತೋಬಿ
ಪರಖ್‌ಣು ನಾ.
ಇಮ್‌ ಕಾಯಿತೋಬಿ ದೇಖಿ, ಪರ್ಖಿಲಿದುತೊ, ಇವ್ಣೆ ದೇವ್ ಭಣಿ ಫರಿಜಾ಼ಶೆ,
ಅಜು಼ ದೇವ್ ಇವ್ಣುನ ಮಾಪ್‌ ಕರಿನಾಕ್‌ಶೆ ಕರೀಸ್, ಯೋ ಖ್ಹಾರಿ ಖ್ಹಾಚಿ ಲಪಡೈರ‍್ಹೀಸ್’.#4:12 ಯೆಶಾಯ 6.9-10
ಯೇಸುನೆ ಪಂಡಾ ಛಿಡ್ಕಾವಾಳನಿ ಮತ್ಲಬ್‌ನಿ ಖೇಣಿನಿ ಬಾರೇಮ ಬೋಲಿವತಾಳ್ಯೋತೆ
(ಮತ್ತಾಯ 13:18-23; ಲೂಕ 8:11-15)
13ಬಾದ್‌ಮ ಯೇಸುನೆ ಇವ್ಣುನ, “ಆ ಮತ್ಲಬ್‌ನಿ ಖೇಣಿ ತುಮೂನ ಮಾಲುಮ್‌ಪಡ್ಯು ಕೊಯ್ನಿಕಿ ಶು? ಇಮ್‍ಕತೊ, ಮೇ ಬೋಲುಸ್ತೆ ಬಿಜಿಖ್ಹಾರಿ ಮತ್ಲಬ್‌ನಿ ಖೇಣಿಯೇನ ತುಮೆ ಕಿಮ್ ಮಾಲುಮ್‌ ಕರ್ಶು? 14ಯೋ ಪಂಡಾ ಛಿಡ್ಕಾವಾಳೊ ಕತೊ ದೇವ್ನಿ ವಚನ್ನ ಬೋಲಿದ್ಯವಾಳೊ ಕರಿ. 15ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮಜ಼್‌ತಾಸ್‌, ಶೈತಾನ್ ಐನ್ ಇವ್ಣಮಾನಿ ವಚನ್ನ ಕಾಡಿನಾಖಿದೇಸ್. ಅವ್ಣೇಸ್ ಪಂಡಾ ಪಡ್ಯಾತೆ ವಾಟ್ನ ಶೇಡೆನಿ ಮಾಟಿ ಹುಯಿರ‍್ಹುಸ್‍. 16-17ಬಿಜು಼ ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮಜ಼್‌ತಾಸ್‌, ಖ್ಹುಶಿಥಿ ಒಗ್ಗಿಸ್‌ಮ ಮಾನಿಜಾ಼ಸ್. ಕತೋಬಿ ಯೋ ವಚನ್ನ ಇವ್ಣ ಮಹಿ ಜ಼ಡ್‌ ಮ್ಹೇಲಿನ್ ಫುಟಾದೇಯಿಕೊಯ್ನಿ. ಇವ್ಣೆ ಥೋಡಾಸ್ ದನ್ ದೇವ್ನಿ ವಚನ್ನ ನಂಬಾಸ್, ಬಾದ್‌ಮ ಯೋ ವಚನ್ನಖ್ಹಾಜೆ ಬಿಜಾ಼ಥಿ ಖ್ಹತಾಪ್ಣಿ ನಾತೊ ವದೇಖ್ಹೊ ಆಯುತೊ, ಜ಼ಲ್ದೀಸ್‍ಮ ಪಡಿಜಾ಼ಸ್‌. ಅವ್ಣೇಸ್ ಪಂಡಾ ಪಡ್ಯಾತೆ ಬಂಡಾಪರ್‌ನಿ ಮಾಟಿ ಹುಯಿರ‍್ಹೂಸ್. 18-19ಬಿಜು಼ ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮ್‌ಜುತೋಬಿ, ಜಗತ್ನಿ ಸೋಚ್‌ಮಾಬಿ, ಧನ್‌-ದೌಲತ್‌ಪರ್‌ನಿ ಲಾಲಚ್‍ಮಾಬಿ, ಅಜು಼ ಬಿಜಿ ಖ್ಹಾರಿ ತರ‍್ಹಾನಿ ಆಖ್ಹ್ ಇವ್ಣ ಮಹಿ ಭರೈನ್, ಇವ್ಣೆ ಖ್ಹಮ್‌ಜುತೆ ದೇವ್ನಿ ವಚನ್ನ ಉಪ್ಪರ್ ಮೂಚಿನ್ ದಾಬಿದೇಸ್. ಇನಾಖ್ಹಾಜೆ ಇವ್ಣೆ ಫಲ್ ಕೋದೇಯ್ನಿ. ಅವ್ಣೇಸ್ ಯೋ ಕಾಟಾನಿ ಝಿಕ್ರಾವ್‌ಮ ಪಂಡಾ ಪಡ್ಯಾತೆ ಝ಼ಗೊ ಹುಯಿರ‍್ಹೂಸ್. 20ಬಿಜು಼ ಥೋಡು ಅದ್ಮಿ ಪಂಡಾ ಪಡ್ಯಾತೆ ಅಛ್ಛಿ ಜ಼ಮೀನ್ ಹುಯಿರ‍್ಹೂಸ್. ಅವ್ಣೆ ವಚನ್ನ ಖ್ಹಮ್‌ಜಿನ್‌, ಇನ ಮಾನಿಲೇಸ್ ಅಜು಼ ಡೋಡಿಖ್ಹ್‌ ತೋಡಿ, ತೀನಿಖ್ಹ್‌ ತೋಡಿ ಅಜು಼ ಖ್ಹೋ ತೋಡಿ ಜಾ಼ಖ್ಹತ್-ಜಾ಼ಖ್ಹತ್ ಪಂಡಾ ಮ್ಹೇಲಾಸ್” ಕರಿ ಬೋಲ್ಯೊ.
ದೀವೊ ಲಗಾಡಿನ್ ಉಪ್ಪರ್ ಮ್ಹೇಲಾನಿ ಬಾರೇಮ
(ಲೂಕ 8:16-18)
21ಅತ್ರೇಸ್ ಕಾಹೆತೆ ಯೇಸುನೆ ಇವ್ಣುನ, “ಕೋಣ್‌ಬಿ ದೀವೊ ಲಗಾಡಿನ್ ಹಂಡಾಮಾಕಿ ನಾತೊ ಪಲಂಗ್‌ನ ಹೇಟ್‌ಕಿ ಲಪಾಡಿನ್ ಮ್ಹೇಲಾಸ್ಕಿ ಶು? ಇಮ್‌ ಕಾಹೆತೆ, ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಕೊಯ್ನಿಕಿ ಶು? 22ಲಪೈರ‍್ಹೂತೆ ಖ್ಹಾರುಸ್‌ ಉಜಾ಼ಳಾಮ ಭಾರ್‌ ದೆಖಾವ್‌ಶೇಸ್‌ ದೆಖಾವ್‌ಶೆ, ಮೂಚೈ಼ರ‍್ಹವಾನು ಖ್ಹಾರು ನಿಕಳ್‌ಶೇಸ್ ನಿಕಳ್‌ಶೆ. 23ಖ್ಹಮ್‌ಜಾ಼ನ ಕಾನ್‌ ರ‍್ಹವಾಳು ಖ್ಹಾರು ಕಾನ್‌ ಜೋ಼ಡಿ ಖ್ಹಮ್‌ಜೊ಼!” ಕರಿ ಬೋಲ್ಯೊ.
24ಬಿಜು಼ ಇವ್ಣುನ ಯೇಸುನೆ, “ತುಮೆ ಖ್ಹಮ್‌ಜಾ಼ತೆ ವಚನ್ನ ಮನ್ ಲಗಾಡಿನ್ ಖ್ಹಮ್‌ಜೊ಼! ತುಮೆ ಅಲಕ್ನಿ ಬಾರೇಮ ಕಿಮ್ ಮಾಪಿನ್‌ ದೇಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ಮಾಪ್‌ಶೆ, ಎತ್ರೇಸ್ ಕಾಹೆತೆ ಇನೇಥಿಬಿ ಜಾ಼ಖ್ಹತ್ ತೂಕ್‌ಶೆ.#4:24 ಮೇ ಬೋಲೂಸ್ತೆ ವಚನ್ನ ಬರೋಬರ್‌ಥಿ ಮನ್ ಲಗಾಡಿನ್ ಖ್ಹಮ್‌ಜೊ಼. ತುಮೆ ಕೆತ್ರೆ ತೂಕಿನ್ ತುಮಾರು ಮನ್ನ ದೇವ್ನಿ ವಚನ್ ಶಿಕಾನ ದೆವೋಸ್ಕಿ ಇನೇಥಿಬಿ ಜಾ಼ಖ್ಹತ್ ದೇವ್ ತೂಕಿನ್ ಇನಿ ವಾಕ್ಯಾನಿ ಗ್ಯಾನ್ ತುಮೂನ ದಿಶೆ. 25ಕಿನಾಕನ ಛಾ಼ಕಿ ತಿನ ಬಿಜೂ಼ಬಿ ದೆವಾವ್‌ಶೆ, ಕಿನಾಕನ ಕೊಯ್ನಿಕಿ ಇವ್ಣಕಂಥು ಛಾ಼ತೇಬಿ ಥೋಡು ಕಾಡಿಲಿಶೆ” ಕರಿ ಬೋಲ್ಯೊ.
ಪಂಡಾ ಫುಟಾನಿ ಬಾರೇಮ ಮತ್ಲಬ್‌ನಿ ಖೇಣಿ
26ಯೇಸುನೆ ಬಿಜೂ಼ಬಿ ಇವ್ಣುನ ಬೋಲ್ತೋಹುಯಿನ್, “ದೇವ್ನಿ ರಾಜ್ಯ ಅಮ್ ಛಾ಼, ಕಿಮ್‌ಕತೊ; ಏಕ್‌ ಜ಼ಣೊ ಇನಿ ಜ಼ಮೀನ್‌ಮ ಪಂಡಾ ಛಿಡ್‌ಕ್ಯೊ. 27ಅಜು಼ ಯೋ ಅದ್ಮಿ ರಾತ್‌ನು ಖ್ಹುವ್ವಾನು, ವ್ಹಾಣಾನು ಉಠಿರ‍್ಹವಾನು ಕರ್ತುರ‍್ಹೇಸ್‌. ಅಮ್ ರ‍್ಹವಾನಿ ವಖ್ಹತ್‌ಮ ಇನ ಮಾಲುಮಸ್ ಪಡಾಕೊಂತೆ ಪರಕ್ಮ ಯೋ ಪಂಡಾ ಫುಟಿನ್ ಮೋಟ ಹುವಾಸ್. 28ಜ಼ಮೀನ್ ಪಹಿಲೆ ಅನಾಜ಼್ ಉಬ್‌ಜಾ಼ವಸ್, ಕಿಮ್‌ಕತೊ ಪಹಿಲೆ ಡೀರಿಯೆ ದೆಖಾವಸ್, ಇನಾಕೇಡೆಥು ಬುಟ್ಟು ನಿಕ್ಳಾಸ್, ಬಾದ್‌ಮ ಬುಟ್ಟುಭರಿ ದಾಣ ಭರಾವಸ್. 29ಅನಾಜ಼್ ಪಿಕ್‌ವಾನ ಬಾದ್‌ಮ, ಯೋ ಅದ್ಮಿ ಖ್ಹುಗ್ಗೀನ ಹಗಾಮ್ ಐಗುಕರಿ, ಪಿಕಾವಾಳೊ ದರಾತಿಥಿ ಇನ ವ್ಹಾಡಲಗಾಸ್” ಕರಿ ಬೋಲ್ಯೊ.
ರಾಯಿನ ದಾಣಾನಿ ಬಾರೇಮಾನಿ ಮತ್ಲಬ್‌ನಿ ಖೇಣಿ
(ಮತ್ತಾಯ 13:31-32,34; ಲೂಕ 13:18-19)
30ಬಿಜು಼ ಯೇಸುನೆ ಬೋಲ್ಯೋಕಿ, “ದೇವ್‌ನು ರಾಜ್ಯ ಅಮ್ ಕರಿ ಅಪ್ಣೆ ಶನ ಜೋ಼ಡೆ ಏಕ್‌ ಕರಿಯೆ? ನಾತೊ ಅಪ್ಣೆ ಖೆವಿ ಮತ್ಲಬ್‌ನಿ ಖೇಣಿ ಬೋಲಿನ್ ದೇವ್ನಿ ರಾಜ಼್‌ನ ವತಾಳೆ. 31ಯೋ ಅಮ್ ಹುಯಿರ‍್ಹೂಸ್, ಏಕ್‌ ಅದ್ಮಿ ಜಗತ್‌ಮ ಖ್ಹಾರೇಥಿ ನ್ಹಾನು ಪಂಡು ಹುಯಿರ‍್ಹೂತೆ, ರಾಯಿನ#4:31 ಇಸ್ರಾಯೇಲ್‌ ದೇಖ್ಹ್‌ಭಣಿ ಪಿಕಾವಾನು ರಾಯಿನು ಝಾ಼ಡು ತೀನ್ ಮೀಟರ್ ಲಾಂಬು ಮೋಟ ಝಾ಼ಡಾನಿಘೋಣಿ ರ‍್ಹೇಸ್, ಇನ ಮಹಿ ಉಡಂತು ಜಿನಾವರ್ ಜಿನುಕು ವಖ್ಹೆಜಾ಼ಯ್. ದಾಣಾನ ಪಾಡಿನ್, ಜ಼ಮೀನ್‌ಮ ಗಾಡಸ್. 32ಥೋಡ ದನ್ನ ಬಾದ್‌ಮ ಯೋ ಮೋಟು ಹುಯಿನ್, ಖ್ಹಾರ ಭಾಜಿಪಾಲಾನ ಝಾ಼ಡೆಥೀಬಿ ಮೋಟು ಹುಯಿನ್, ಮೋಟಿ-ಮೋಟಿ ಡಾಳಿಯೆ ಮ್ಹೇಲಾಸ್. ತದೆ ಆಬ್‌ಮಾಥು ಉಡಂತು ಜಿನಾವರ್ ಖ್ಹಾರು ಮ್ಹಾಳೊ ಭಾಂದಿನ್ ವಖ್ಹಾಸ್” ಕರಿ ಬೋಲ್ಯೊ.
33ಯೇಸುನೆ ಅಮ್ನಿ ಖ್ಹಾರಿ ಘಣಿ ಮತ್ಲಬ್‌ನಿ ಖೇಣಿಯೇಥಿ, ಅದ್ಮಿಖ್ಹಾರು ಕೆತ್ರೆ ಮನ್ ಲಗಾಡಿನ್ ಖ್ಹಮ್‌ಜಿನ್‌ ಪರ್ಖಾನ ಹುವ್ವಾಸ್‌ಕಿ, ಎತ್ರೇಸ್ ದೇವ್ನಿ ವಚನ್ ಬೋಲಿ ಖ್ಹಮ್‌ಜಾ಼ಡ್ಯೊ. 34ಯೋ ಶಾತ್‌ ಬೋಲ್ಯೊತೋಬಿ ಮತ್ಲಬ್‌ನಿ ಖೇಣಿಯೇಥೀಸ್‌ ಬೋಲ್ತೋಥೊ. ಕತೋಬಿ ಇನ ಶಿಷ್ಯರ್‌ಕನ ಅಲಕ್ ರ‍್ಹವಾನಿ ವಖ್ಹತ್‌ಮ, ಯೋ ಖ್ಹಾರಿ ಮತ್ಲಬ್‌ನಿ ಖೇಣಿಯೇನ ಛೋ಼ಡಿನ್ ಖ್ಹಮ್‌ಜಾ಼ಡ್‌ತೊಥೊ.
ಯೇಸುನಿ ವಾತ್‌ಪರ್ ತೋಫಾನ್ ಭೀರಿಗಯೂತೆ
(ಲೂಕ 8:22-25)
35ಯೋ ದನ್ನೆ ಖ್ಹಾಂಜ಼್ ಹುಯಿಜಾ಼ತಖ್ಹತರ್‌ ಯೇಸುನೆ ಇನ ಶಿಷ್ಯರ್‌ನ, “ಚಾ಼ಲೊ, ದರ್ಯಾವ್ನ ಪಾರ್ಲಿ ಕನಾರಿ ಜ಼ಯ್ಯೆ಼” ಕರಿ ಬೋಲ್ಯೊ. 36ತದೆ ಶಿಷ್ಯರ್‌ಖ್ಹಾರು ಯೋ ಅದ್ಮಿನಿ ಭೀಡ್‌ಣ ಮ್ಹೆಂದಿನ್, ಯೇಸು ಬೆಠೋಥೋತೆ ಯೋಸ್ ಡೋಣ್‌ಪರ್‌ ಚ಼ಢಿನ್‌ ಇಮ್ಮಸ್ ಇನ ಬುಲೈಲಿನ್ ಗಯ. ಇವ್ಣ ಜೋ಼ಡ್ಮ ಬಿಜಿ ಖ್ಹಾರಿ ಡೋಣ್‌ಬಿ ಥಿ. 37ಜಾ಼ತಿವಖ್ಹತ್‌ಮ ಏಕ್‌ದಮ್ ಮೋಟೊ ವಹಿರೊ ವಾಗಿನ್, ಮೋಟೊ ಝೋ಼ಕಾಳ್ಯೊ ಉಠೀನ್ ಯೋ ಡೋಣ್ಣಾ ಮಾರ್ ಪಡ್‌ತಾಖ್ಹತರ್, ಯೋ ಡೋಣ್‌ಮ ಪಾಣಿ ಭರಾವಲಗ್ಯೂಥು. 38ಯೇಸು ಡೋಣ್ಣಾ ಪಾಛ಼್‌ಲಿ ಬಾಜು಼ಮ ಶಿರಾಣು ಟೇಕಿನ್ ಖ್ಹುತೋಥೊ. ತದೆ ಶಿಷ್ಯರ್‌ನೆ ಇನ ಉಠಾಡಿನ್, “ಗುರು, ಹಮೆ ಮರ್‌ವಾನ ಆಯಾನಿ ತುನ ಜ಼ರಾಬಿ ಫಿಕರ್‌ಕೊಯ್ನಿಕಿ ಶು? ಕರಿ ಬೋಲ್ಯ.
39ತದೆ ಯೇಸುನೆ ಉಠೀನ್ ಯೋ ವಹಿರಾನ, “ಖ್ಹೊಪ್‌ ರ‍್ಹೆ!” ಅಜು಼ ದರ್ಯಾವ್ನ “ಶೊಪೊ ಹುಯಿಜಾ಼!” ಕರಿ ಹುಕುಮ್‌ದಿದೊ. ಅಮ್ ಬೋಲ್ತಾಸ್‌ನ ವಹಿರೊ ಖ್ಹೊಪೊ ಪಡಿಗಯು, ಅಜು಼ ಖ್ಹಾರು ಖ್ಹೊಪೊ ಪಡಿಗಯು. 40ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ತುಮೆ ಶನ ಡರೋಸ್ತೆ? ಅಜೂ಼ಬಿ ತುಮೂನ ವಿಶ್ವಾಸ್ ಕೊಯ್ನಿಕಿ ಶು?” ಕರಿ ಬೋಲ್ಯೊ.
41ಕತೋಬಿ ಇವ್ಣೆ ಘಣು ಡರಿಜೈನ್, “ಆ ಅದ್ಮಿ ಕೋಣ್ ಉಶೆ? ವಹಿರೋಬಿ, ದರ‍್ಯಾವ್‌ಬಿ ಜಿನು ಆ ಬೋಲಾತೆ ಇಮ್‌ ಖ್ಹಮ್‌ಜಾ಼ಸ್‌ನಿ!” ಕರಿ ಏಕ್‌ಥಿ ಏಕ್‌ ಬೋಲಿಲಿದು.
Currently Selected:
ಮಾರ್ಕ 4: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
