Jone 3

Jisasapa Nikodimasapa Pii Leambino Doko

1Akali Nikodimasa lenge, Parasi mende katea. Baa Juumanya isingi akali dupanya mende. 2Akali doko kuka gii mendenya Jisasa petea dokonya ipupala baa lamaiyoo, “Mana Lenge, Gote doko endakali mende-pipa nakalyamopa, endakali dokome embame mirakolo pilyino dopale mende napingi. Tenge dokonya, embame naima mana langyale lao Goteme puu leana lao masilyamanona” lea. 3Dopa leamopa Jisasame baanya pii yanu pyakamaiyoo, “Nambame emba etete kiningi langilyo: Endakali mende dee ŋaŋa joo manja naeyatamo doko, Gotenya kingdom doko baame kapa pao nakandatana” lea. 4Dokopa Nikodimasame baa lamaiyoo, “Endakali angi jepae mende aipa petala ŋaŋa joo mandita? Endakali angi jepae mende aipa petala endanginya inginya pilyetamopa, baa dee ŋaŋa joo endangimi manditape?” lea. 5Dopa leamopa Jisasame yanu pyao, “Nambame emba etete kiningi langilyo: Endakipa Spiritapa dolapome endakali mende ŋaŋa joo manja naeyatamo doko, Gotenya Kingdom dokonya kapa pao kolandala naeyata. 6Endakalimi mandenge doko endakaliaka mandenge. Spiritame mandenge doko spiritaka mandenge. 7Nyakama dee ŋaŋa joo mandipengena langilyo doko embame sepala walu nalape. 8Poo dokome poo lao patoo lao masilyali pyoo lao pelyamopa embame singi. Singiaka doko, anja pituu lelyape, anja lao pelyape lao nakandenge. Dopaleaka joo, Spirita dokome endakali mandyoo nyilyamo dupa aipa petala nyilyape lao embame nakandengena” lea.

9Dopa leamopa Nikodimasame yanu pyao, “Embame lelyeno dupa aipa petala dopa pitape?” lea. 10Dokopa Jisasame lao pituu, “Emba Israele dupanya mana lenge dokome pii dutupanya tenge dupa soo nanyilyipi? 11Nambame emba etete kiningi langilyo: Naimame masingipi, kandengepi dupa lao panamanopa, naimanya pii dupa nyakamame soo nanyilyamino. 12Nambame yuunya singi dupanya nyakama langipupa kiningina lao masala naelyamino doko, kaiti-kisa singi dupanya langitopa aipa petala kiningina lao masetami? 13Endakali mende kaiti-kisa napea. Akalinya Ikiningi, kaiti-kisa katenge doko isa epeamo doko iki kaiti-kisa pea. 14#Nambaa 21:9Endakali napalenge yuu dokonya kanopato aeneme wasepae doko Mosesame minalyiali pyoo, Akalinya Ikiningi doko kaeyala naeyao minalyetami. 15Dopa pitaminopa, Akalinya Ikiningi doko tungi pyatami endakali dupa pitaka kumao alu napinya, lete etete katenge doko nyetami.

16 “Goteme isa yuu dakenya endakali dupa pitaka auu kaeyamo dokome, baanya Ikiningi mendai iki doko maiya. Endakali mendeme Gotenya Ikiningi doko tungi pyatamo doko, baa kumao alu napinya, lete etete katenge doko nyetamopa lao maiya. 17Isa yuu dakenya endakali dupa-kisa tenge setapala tanda maitamopa lao, Goteme baanya Ikiningi doko isa yuu dakenya epena laa naeya. Baanya Ikiningi dokome isa yuu dakenya endakali dupa pyoo nyina lao epena lea. 18Gote Ikiningi doko tungi pilya endakali doko-kisa tenge setapala baa yapala naenge. Baa tungi napilya endakali doko-kisa tenge setapala baa yapatae. Endakali dokome Gote Ikiningi mendai iki dokonya kenge doko tungi napingi dokonya, baa-kisa tenge setapala baa yapatae. 19Goteme endakali dupa-kisa tenge setelyamo doko dake: Tii pipae doko isa yuu dakenya ipao kateamopa, endakali dupanya mana miniami dupa koo dokonyana, iminjetae doko auu kaeyapala tii pipae doko yakineami. 20Endakali koo pingi dupa pitakame nyakamanya koo kalai dupa panakatame-latala, tii pipae doko maka kaeyapala lee pingima. 21Dopaka doko, kiningi pii dokome lelyali pingi endakali dupa Goteme nisimupa mana minilyaminona lao endakali dupame kandena lao, tii pipae dokonya panao epengemana” Jisasame lea.

Jone Kaimbu Pingi Dokome Kraisanya Kenge Minalyiamo Doko

22Maitakao Jisasa baanya disaipolo dupa-pipa Judia yuu dokonya peami. Pupala yuu dokonya gii mendatupa katapala, baame endakali dupa kaimbu pyakamaiya. 23Yuu Salima makisa, yuu Aenone dokonya endaki longo epenge dokonyana, Joneme yuu dokonya kaimbu pyao kateamopa, endakali dupa ipao kaimbu nyepa piami. 24#Matyu 14:3; Make 6:17; Luku 3:19-20(Jone anjala naeyaminopa kaimbu doko nyepa piami.)

25Kuni nasina lao pyoo wasoo nepenge mana dokonya Jonenya disaipolo dupa-pipa Juu mende-pipa pii yanda piami. 26Dokopa Jonenya disaipolo dupa Jone katea dokonya pupala baa lamaiyoo, “Mana Lenge, emba Jodane omotena katao, akali mendenya lao pii lao paneeno akali dokome kaimbu pyamupa, endakali dupa pitaka baa katapya dokonya pelyaminona” leami. 27Dokopa Joneme pii yanu pyao, “Goteme kaiti-kisa katao dopale mende maiya naeyatamo doko, endakalimi nyala naeyatami. 28#Jone 1:20Namba Kraisa doko daa. Kraisa doko ene epena laanya, Goteme namba wambao puu leana lao langio doko nyakamame lao panengema. 29Akali enda kelyenge doko baanya enda kelyapae dokopa tole petengemba. Akali dokonya wane mona setenge dokome enda ene kelyapenge akali dokonya pii lelya doko sepala, baa eteke pingi. Dopaka pyoo namba indupa eteke andake pilyo. 30Baa alyasale katatamopa, namba anasale katapengena” lea.

Kaiti-Kisa Katao Epeamo Akali Doko

31Akali kaiti-kisa katao epeamo dokome endakali dupa pitaka ita minao, baa ketae ulusa-waka. Yuu dakenya-tae endakali dupa yuunya endakali dokonyana, dupame yuunya pii dupaka lengema. Dopaka doko, akali kaiti ulunya katao epeamo dokome endakali dupa pitaka ita minao, baa ketae ulusa-waka. 32Baame siapi, kandeapi dupa lao panelyamopa, endakali dupame soo nanyingima. 33Dopaka doko, akali dokonya pii doko soo nyilya endakali dokome, Goteme kiningi pii lengena lao kyeto joo masingi. 34Goteme Spirita doko longo lao maingi. Dopa pingi dokonya, Goteme epena lea akali dokome Gotenya pii dupa endakali dupa lamaingi. 35#Matyu 11:27; Luku 10:22Takange Goteme baanya Ikiningi doko auu kaenge dokonya, dupa pitaka isina lao baanya Ikiningi dokonya kinginya setea. 36Gote Ikiningi mendai iki doko tungi pilya endakali dokome lete etete katenge doko nyingi. Dopaka doko, Gote Ikiningi dokonya pii doko nepata endakali dokome lete katenge doko nakandata. Gotenya imbu kaenge doko endakali doko-kisa dopa petae singi.

Currently Selected:

Jone 3: Enga

Highlight

Copy