Luku 23

Jisasa Laminao Pondiasa Pailata Kateamo Dokonya Peamino Doko

1 # Matyu 27:1-2,11-14; Make 15:1-5; Jone 18:28-38 Dokopa akali kambuu peteami dupa pitaka sakatatala, Jisasa laminao Pailata katea dokonya peami. 2Pupala tee pyao baa-kisa tenge setao, “Akali dakeme naima tata dupanya kainanya pundu andake mende yaka lasoo, Sisa doko muni takisa namaiyepape lao kaita lyokata, baa Kraisa, kiŋi mendena lao baa tange lata piamopa naimame kandeamana” leami. 3Dokopa Pailatame baa tipa pyoo, “Emba Juumanya Kiŋi dokope?” lea. Dokopa Jisasame baanya pii yanu pyakamaiyoo, “Embame latelyenona” lea. 4Dokopa Pailatame prisa mupapi, endakali kambu pyao kateamipi, dupa lamaiyoo, “Nambame akali dake-kisa tenge mende kandao nanyilyona” lea. 5Dokopa dokaitame kyeto joo lao pituu, “Akali dakeme Galali katao tee pyatala, Judia yuu yakane dupa pitakanya mana lamaiyoo, endakali dupa ingi tuu lasoo ipao, dakenya dopaka pilyamona” leami.

Erote Kateamo Dokonya Jisasa Pena Leamo Doko

6Galali leami doko Pailatame sepala, akali doko baa Galali tangepe lao tipa pia. 7Jisasa doko Eroteme yuu isingi dokonya tange mende-lumu lao Pailatame sepala, baa laminao Erote katea dokonya pena lea. Gii dokopa Erote baa Jerusalema katea. 8Wamba Eroteme Jisasanya lao pii longo mendapu sepala, mirakolo mende pitamopa kandapu laka lao masoo, gii longo nee kaeyao malisoo katea. Kateamopa, Jisasa epeamo kandatala etete auu kaeya. 9Auu kaeyapala Eroteme Jisasa tipa longo mendapu piamopa, baame dupanya yanu pyao pii mende nalea. 10Dokopa prisa mupapi, Mosesanya loo mana nyepaepi, dupa tengesa katapala, kyeto joo baa-kisa tenge seteami. 11Dopa piaminopa Erotepi, baanya amiipi dupame Jisasa-kisa mana koo mendapu minatapu, baa lamba leami. Lamba latala, Eroteme yonge pee etete auu petae mende Jisasanya petakamai, baa laminao Pailata katea dokonya pilyina lea. 12Wamba Pailatapa, Erotepa dolapo yandapipi joo katengembaka doko, gii dokopa tee pyao nyakamba mona seteambi.

Jisasa Poko Itanya Pyao Yukuina Leamino Doko

13 # Matyu 27:15-26; Make 15:6-15; Jone 18:39–19:16 Dokopa Pailatame prisa mupapi, isingi akalipi, endakali dupapi, dupa ipao kambu pina latala 14dokaita lamaiyoo, “Akali dakeme pundu andake mende yaka lasalanya pilyamona lao nyakamame baa laminao nambanya enombanya ipamino. Dokopa baa-kisa tenge mende silyape lao nyakamanya enombanya nambame tipa pipupa, tenge angi mende kandao nanyolo. 15Dopa petala, nambame nyakama Erote kanja pupa lapupa, baame tenge angi mende kandao nanyalamoaka. Akali dake pyao kumasepenge koopi mende baame napia-lamo. 16Dopana, nambame baa kende konjame pyapala yakinatoana” lea.

17Nee andake nenge gii doko epelyamoli pyoo, Pailatame akali anjetae dupanya mende mokata pyakamaingi. 18-19Jerusalema dokonya akali Barabasa lenge mendeme wamba gapomane yanda pimaita, endakali pyao kumaseta petala anjetae palea. Endakali dupa pitakame puu lao, lao pituu, “Jisasa pyao kumasetala, Barabasa mokoka” leami. 20Dopa leaminopa Pailatame Jisasa mokapuli lao masetala, baa pyao kumasala naeyapengena lao deaka lamaiya. 21Dokopa dokaitame puu lao, lao pituu, “Baa poko itanya pyao yuku! Pyao yuku!” leami. 22Dokopa Pailatame paa tepo pyoo dokaita lamaiyoo, “Aipuma? Baame koo aki mende pipya? Baa pyao kumasepenge tenge mende nambame kandao nanyilyona, baa kende konjame pyapala yakinatoana” lea. 23Dopa leaka doko, endakali dokaitapi, prisa mupapi dupame kongo lao, baa pyao yukuina lao, puu lao leami dokome, Pailatanya pii doko pyaanya isa palyiami. 24Dopa piaminosa, dokaitanya leamili pina kaeyatoo lao Pailatame masia. 25Akali mendeme gapomane yanda pimaita, endakali pyao kumaseta piamosa anjinya pyandeami doko mokokena leamili pyoo Pailatame mokatala, Jisasa endakali dupanya masiamili pina lao amii dupa maiya.

Jisasa Baa Poko Itanya Pyao Yukuiyamino Doko

26 # Matyu 27:32-44; Make 15:21-32; Jone 19:17-27 Dokopa amii dupame Jisasa pyao yukulanya laminao peaminopa, akali Sairini tange Saimone lenge doko yuu yakane mendenya katao epea. Epeamopa amii dupame baa minatala, poko ita doko baanya latainya nyoo sakamaitala, soo Jisasa watao pena leami. 27Dokopa enda mendapuame baa lao ee lao yamataka leami dupapi, endakali waka longo mendapupi, dupa kambu pyao baa watao peami. 28Dokopa Jisasame kapilyetala dokaita lamaiyoo, “Nyakama Jerusalema tange enda dupame namba lao ee nalenya, nyakama tangepi, nyakamanya wanepi dupa lao ee lapa. 29Aipumape, gii doko palitamopa endakali dupame lao pituu, ‘Enda ingi pyakilyetaepi, enda wane namandengepi, enda wane andu namaingipi, dupa Goteme auu pisetaena’ latami. 30#Osea 10:8; Rev 6:16Dokopa endakali dupame tee pyao yuu manda dupa lamaiyoo, ‘Nyakama tanapala naima pyala ipupa’ latami. Dopa latala, yuu manda yakane dupa lamaiyoo, ‘Naima sanga pyambala ipupa’ latamiaka. 31Ita saka doko-kisa dopa pilyamino doko, ita sapu doko-kisa aipa pitamipi?” lea.

32Dokopa akali makongao koo pingi lapoma, Jisasa-pipa pyao yukulanya laminao peami. 33Laminao pao yuu Matena Kuli lenge dokonya pyakalyetala, Jisasa baa akali makongao koo pingi lapoma dolapo-pipa pyao yukuiyami. Mende doko baanya kingi tolaetena pyao yukuiyami. Mende doko baanya kingi koeyatena pyao yukuiyami. 34#Sam 22:18Pyao yukuiyaminopa Jisasame lao pituu, “Apane, dakaitame masala naeyao pilyaminona, dupanya koo dupa kame sakamaipi” lea. Dokopa amii dupame baanya yonge pee dupa mokosoo nyemana latala laki piami. 35#Sam 22:7Gii dokopa, Juumanya isingi akalipi, endakali kandatae kateamipi, dupame Jisasa lamba lao, “Baame endakali waka dupa pyoo nyipyana, baa Gotenya yapao nyepae Kraisa-tamo doko, baa tange pyoo nyina kae” leami. 36#Sam 69:21Dokopa amii dupa tengesa ipupala, waene kaa pipae mende nena lao makapusoo pituu, baa lamba lao, 37“Emba Juumanya kiŋi-tamo doko, emba tange pyoo nyepoko” leami. 38Jisasa yukutae katea poko ita ketae dokonya, Giriki piipi, Latene piipi, Ibru piipi dupame dapa lao pepa pyatae katea: “Dake Juumanya kiŋi dokona” latae katea.

39Makongao koo pingi lapoma pyao yukuiyami dolaponya mendeme Jisasa lamba lao, “Emba Kraisa doko-tamo doko, emba tange pyoo nyoo, nalimba apata pyoo nyoaka pipoko” lea. 40Dokopa makongao koo pingi mende dokome akali doko pyalanya lao, “Jisasa pyao yukupengena leamo pii mendai dokoaka emba-kisa latae silyamo doko, embame Gote paka nakaelyepe? 41Nalimbame koo piambano dokonya yole nyepenge doko tolao nyilyambano. Dopaka doko, akali dakeme koo mende napiana” lea. 42Dopa latala baame Jisasa lamaiyoo, “Kamongo, embanya kingdom dokonya ipate gii dokopa namba masepe” lea. 43Dokopa Jisasame baa lamaiyoo, “Nambame emba kiningi langilyo: Indupaka emba namba-pipa Gotenya yuu etete epe dokonya kalyambanona” lea.

Jisasa Kumiamo Doko

44 # Matyu 27:45-56; Make 15:33-41; Jone 19:28-30 # Eks 26:31-33 Gii dokopa kotaka 12 kilokopi mende leamopa, yuu doko pitaka kuiya. Kuiya doko kuiyetaeyaka katao pao, alemandi 3 kilokonya tuu lea. 45Gii dutupanya niki tii napia. Dokopa 3 kilokonya, lotuu anda nee nyetae dokonya panda nee nyetae dotena kame pinyoo lapalapa andake mendeme kame pinyetae katenge doko titi pyao lapo pyoloo pia. 46#Sam 31:5Dokopa Jisasame puu lao wii lao, “Apane, nambanya imambu doko embanya kinginya yakinelyona” lea. Dopa latala baanya imambu doko yakinea. 47Pia dupa pitaka amii 100 isingi dokome kandatala, Gote mambo pyao, “Kiningi etete, akali dake tolatae mende-lamona” lea. 48Kandamana lao endakali kambu pyatae kateami dupame piamo doko kandatala, mona kenda kaeyao andaka pilyiami. 49#Luku 8:2-3Endakali Jisasa kandengema dupa pitakapi, enda Galali tange Jisasa watao epeamipi, dupa kuki londatili katapala, piami dupa pitaka kandatae kateami.

Jisasa Malu Piamo Doko

50-51 # Matyu 27:57-61; Make 15:42-47; Jone 19:38-42 Akali Josepe lenge mende, Juumanya taono Arimatia dokonya tange doko katea. Baa Juumanya kanjole dupanya mende. Baa akali tolatae epe mende. Kanjole yangi dokaitame masiamipi, mana miniamipi dupanya baame yakana nalea. Baame Gotenya kingdom doko malisoo katenge. 52Akali doko Pailata katea dokonya pupala, Jisasanya yonge doko dina lao tee lea. 53Dokopa Pailatame yakana lateamopa, Jisasanya yonge doko kondao nyepala, lapalapa kyeo lapae mendeme yaki petala, malu pipenge kana tumbinya setapae, endakali malu napiami mendenya nyoo setea. 54Setea gii doko, Sambata depa lenge dokonya, Sambata gii doko ipanya tengesa pia. 55Dokopa enda mendapu Galali pituu, Jisasa-pipa epeami dupame watao pupala, malu doko kandata, Jisasanya yonge doko dopa pyoo setelyamo lao kandataka piami. 56#Eks 20:10; Diut 5:14Dopa petala dokaita pilyetala, tunduma pingipi, welepi mendapu depa leami. Depa latala, Gotenya mana setapae dokome Sambatanya koto nyalapape latae singili pyoo koto nyiami.

Currently Selected:

Luku 23: Enga

Highlight

Copy