Markus 4

Salig-salig suat so poosasad nu sampug

(Mat 13:1-9; Luk 8:4-8)

1Montuduko po si Yisus so imbing nu Liu' Galilia ri. Lumogaa yo sono lobuw suang tumutuk dii so Iyo, indadi sinumakoi-a Iyo so alud om lobuw-i minundii so imbing-i.#Luk 5:1-3 2Osuang nituduk Niyo so nosiro maid nu salig-salig nu,

3“Rongowo muyu yo! Ido koyuwan noposasad nu sampug. 4Posasad iyo ri, kuwai nopitak so lalan, om lumogaa yo sono su bombolog#4:4: bombolog; intawa: pumpulu mongaawi' moninduk nu sampug iiri. 5Kuwai ya nopitak so tana' kikowotuan om onipis su tana'. Tinumuu' ya sampug oono, 6nga kumodato yo po, linumonot sono so' dai nokolalom su wakat. 7Kuwai ya nopitak so koruwian. Tinumuu' ya nga notopu'an nu koruwian-i, om nolonot om dai nokopubua'. 8Nga kuwai ya nopitak nu sampug iiri so tana' owarong. Tinumuu' yo sono, om inumokang om minubua'. Pinumpung-i kuwai yo tolu nopulu, onom nopulu om kuwai ya sampai maatus minitalan,” koo si Yisus.

9Mutongaro po Iyo nu, “Bang kitolingo kou ya, rongowo muyu yo,” koo.

Tomod ni Yisus musalig-salig

(Mat 13:10-17; Luk 8:9-10)

10Iya nu ido-ido si Yisus, lumogaa yo sono dii so Iyo opulu om duo mompomaid Niyo ri om wokon moongowaid so Iyo ri mongoduat ong onu orati nu salig-salig iiri. 11Sumombuto yo si Yisus so nosiro nu, “Tinaakan kou yo nu Kinoringan nu pongoorotian suat so gama' Niyo mogkuasa soko raja nu lobuw poimaid so Iyo. 12Ono yo ko' solig-soligon Ku montuduk so nosiro tayon ong,

‘Monsiou pona nosiro

nga soko dai ya kotondu'.

Orongou pona nosiro

nga soko dai ya korongou om dai koorati.

Bang kotondu' nosiro om koorati,

mululi' ya nosiro so Kinoringan om ompunan Niyo,’

koo ri,” koo si Yisus.#Yis 6:9-10

Orati nu salig-salig suat so poosasad

nu sampug

(Mat 13:18-23; Luk 8:11-15)

13Mutongaro yo sono si Yisus so nosiro nu, “Bang dai muyu oorotian salig-salig iiri, dai kou ya koorati nu salig-salig wokon. 14Lobuw posasad iiri soko lobuw potuturan nu tinongaran nu Kinoringan. 15Sampug nopitak so lalan-i, iri yo su soko lobuw mongorongou nu tinongaran nu Kinoringan, nga dai ya oorotian nosiro. Lumogaa yo sono Wowaidon nu Moinat monolod nu tinongaran iiri so inawo nosiro om olupaan sono. 16Sampug nopitak so tana' kikowotuan-i, iri yo lobuw nu insan-o mongorongou nu tinongaran iiri om poimaid sono nu sobana ko osudu' inawo, 17nga dai ya kosondot so inawo nosiro, om sontagal-o olupaanan-o. Bang kikoogutan-o nosiro intawa indoraayon so' nopoimaid nu ono, dai yo sono poimaid nosiro. 18Om sampug nokosasad so koruwian-i, iri yo kolobuwan mongorongou nu tinongaran iiri, 19nga gumagau-o po nosiro suat so kokoyaan, om koinginan so kowiawan nosiro kondiri, olupaan-o sono nosiro tinongaran nu Kinoringan, om gogoma'on nosiro nga dai yo musuat so koinginan Niyo. 20Nga sampug nokosasad so tana' owarong-i, iri yo lobuw mongorongou nu tinongaran nu Kinoringan, poimaid-o sono om gogoma'on nosiro musuat so koinginan nu Kinoringan, soko sampug nisasad om osuang pinumpung. Kuwai yo tolu nopulu, onom nopulu om kuwai ya maatus minitalan,” koo si Yisus.

Salig-salig suat so politaan om sukuban

(Luk 8:16-18)

21Mutongaro po si Yisus nu, “D'ado ya lobuw monikit nu politaan om tutuban sono nu montaya, intawa isusuk so poomoturuwan, sondiang ko nisiit so dilanggau.#Mat 5:15; Luk 11:33 22Ono sono tu, kuwai yo pontudukan Ku dai oorotian nu lobuw, nga ong wagu kointolang-a nu Kinoringan om oorotian nai'.#Mat 10:26; Luk 12:2 23Bang kitolingo kou ya, rongowo muyu yo itu no kowarong-warong!” koo si Yisus.

24Mutongaro po si Yisus so nosiro nu, “Kimati muyu yo onu yo po rongowon muyu! Sukuban pokayon muyu so lobuw, ono ya su pokayon nu Kinoringan suat so kou.#Mat 7:2; Luk 6:38 25Lobuw mongkinongou om mongoorati nu pontudukan Ku no, koorati iyo. Nga lobuw dai mongkinongou nu pontudukan Ku no, nokuro ong sabat-a oorotian nga lumiong,” koo si Yisus.#Mat 13:12; 25:29; Luk 19:26

Salig-salig suat so linsou tumuu'

26Mutongaro po si Yisus nu, “Koduung ong mogkuasa Kinoringan soko raja, gama' Niyo soko ido koyuwan posasad nu linsou so umo. 27Awi moturuw iyo, runat mugogoma'on iyo, linsou iiri tumuu' yo sono om inumokang, nga dai ya oilaan niyo ong onu kourug-urug nu iri. 28Iri yo tana' ri su nopookang nu tuu' nu linsou iiri, gulu po tangkai, taruk, om bua' nai' kionsi. 29Noonsak-o po bua' iiri, kotuo yo sono nu lobuw noposasad-i iya nu poongotu'an,” koo.#Yl 3:13

Salig-salig suat so linsou oworos

(Mat 13:31-32,34; Luk 13:18-19)

30Mutongaro po si Yisus nu, “Mongaabar Aku nu gama' ong mogkuasa yo Kinoringan soko raja, ono yo 31soko linsou oworos nisasad so umo. Togna ri oworos om dai poduli'on nu lobuw, 32nga kotuu' po, ourug sono nu kayu okutuw, osiou nu lobuw suang, om murumun#4:32: murumun; intawa: murumbun su bombolog so raan-o,” koo.

33Soko ono yo poomontuduk ni Yisus nu lobuw suang maid nu boroginis salig-salig ontob oorotian nosiro. 34Dai Iyo mutangar-tangar so nosiro ong okon ko solig-soligon Niyo. Nga bang Iyo ya om mompomaid Niyo ri, potarang Iyo sono nu kiawi'-awi' oono.

Nopoingkoyod si Yisus nu uos opogon

(Mat 8:23-27; Luk 8:22-25)

35Awi-awi nu runat iiri, tongaro yo ni Yisus mompomaid Niyo ri nu, “Kayo toko yo muripau,” koo. 36Laiwi yo nosiro lobuw suang iiri, om sumokoyo yo mompomaid ni Yisus so alud sokoi-sokoyan laid Niyo ri, om tumulako yo nosiro. Kuwai ya alud wokon sinokoyan nu lobuw sumuut so nosiro. 37Muoso yo sono nu opogon, om liu' ri nga ginumumbang sampai nosungoyan alud-i, 38nga moturuw si Yisus so muri ri. Riosi yo Iyo nu mompomaid Niyo ri om tongaro yo nu, “Oo Guru! Dai mu ka poduli'on? Matoi toko yo itu!” koo.#4:38: so muri ri, minubantal.

39Rumioso yo si Yisus om suuo yo Niyo uos-i nu, “Odog-o!” koo, om gumbang-i, “Intoron-o!” koo. Minintoron-o sono muos, om liu' ri nga d'ado yo muad gimpung. 40Mutongaro yo si Yisus so mompomaid Niyo ri nu, “Nokuro su lumaa' kou? Dai po ka poimaid kou?” koo.

41Sobana ko linumaa' nosiro om mutotongar-tongaro yo nu, “Isai ka lobuw iitu no su uos om gumbang nga musimaid suu'on Niyo?” koo.

Currently Selected:

Markus 4: TomPWPgLgPn

Highlight

Copy