Markus 7

Suat so poroodatan nu odu aki

(Mat 15:1-9)

1Lumogaa yo dii si Yisus tinu-tinu lobuw Parisi, om moomontuduk nu Ukum kiat so Yirusalim. 2Nosiou sono nosiro mompomaid Niyo ri mongokan dai mongowaid nu poroodatan nu odu aki suat so poomuugas nu palad.

3Lobuw Parisi om kiawi' lobuw Yaudi mongowaid nu poroodatan nu odu aki nosiro. Dai nosiro mongokan ong dai po kopuugas nu palad, mongowaid nu adat notantu yo iiri. 4Kuwai po adat nosiro nu dai kookan nu onu-onu ya wolion so pasar ong dai po ougasan, om osuang adat wokon soko gama' mongugas nu sangkir, mangkuk, om gonggamon tombaga winaal.

5Pagka soko iri, duato yo sono nosiro si Yisus nu, “Nokuro su dai mongowaid mompomaid Mu no nu poroodatan nu odu aki toko ri? Mongokan nosiro nga dai musuat poomuugas nosiro nu palad,” koo.

6Sumombuto yo si Yisus nu, “Kou yo lobuw musingkopoimaid-poimaid! Bana ya nima tinangar nu Kinoringan nituturan nu poo'abar Niyo gulu ri si Yisaya nu,

‘Totongaron-a nu kolobuwan iitu no mongorumat so Aku,

nga inawo nosiro d'ado ya

pongoondom so Aku.

7D'ado ya kosudaan

nu poongusaa' nosiro so Aku,

so' oturan-a nu lobuw

nituduk nosiro no,

okon-a ko oturan Ku,’

koo ri.#Yis 29:13 8Mongowaid kou nu poroodatan nu lobuw, nga dai mongowaid nu niongosuu' nu Kinoringan,” koo si Yisus.

9Mutongaro po Iyo nu, “Moilo kou mongoganti' nu oturan nu Kinoringan nu poroodatan nu lobuw-a. 10Nilombus ni Musa oturan nu Kinoringan nu gulu ri nu, ‘Orumato yo ino amo muyu no, om isai yo po pokoraai nu ino amo niyo, subai potoyon,’ koo.#Kin 20:12; 21:17; Ot 20:9; Pom 5:16 11Nga montuduk kou sono nu, bang ido koyuwan kuwai otoop itaak so ino amo niyo, nga mutangar iyo nu, ‘Dai ku iri kotaak so kou, so' nokotaak ku yo so Kinoringan,’ koo, 12lobuw oono dai yo muru' monabang po nu ino amo niyo, koo kou. 13Indadi, gama' muyu iitu poogot kou nu poroodatan muyu, om pokomaai-maayan muyu niongosuu' nu Kinoringan. Osuang totongaron muyu osala' om nituduk so lobuw wokon,” koo si Yisus.

Suat so koinsaim nu lobuw

(Mat 15:10-20)

14Mutongaro yo si Yisus so kolobuwan iiri nu, “Rongowo om orotio muyu yo. 15Okon-a ko onu yo po ookan nu lobuw tu su koinsaim nu lobuw om dai sono otoop mongusaa' nu Kinoringan, sondiang ko onu yo po oraai kiat so inawo. 16Pagka soko ono, bang kitolingo kou ya, rongowo muyu yo,” koo si Yisus.

17Nokolaiw-o po si Yisus kiat so lobuw suang-i, om nokaasuw so waloi, duato yo sono Iyo nu mompomaid Niyo ri ong onu orati nu salig-salig iiri. 18Mutongaro yo si Yisus so nosiro nu, “Dai muyu po ka oorotian tinangar Ku iiri? Orati yo po nu iri nga, onu yo po okanon nu lobuw tu niasuw so kobang, lumombus so tian om taion sono. 19Obana ya ono so' dai masuw so inawo, nga ontob-a so tian, om taion-a sono,” koo Iyo. Totongaron ni Yisus iiri nopoorati nu kiawi' ookanon kowasa ya okanon.

20Mutongaro po si Yisus nu, “Onu yo po lumabus kiat so ido koyuwan, ono yo su koinsaim so iyo, 21so' ungkiat-o so inawo mintolang popoduon oraai, sumundal, monakou, mokipopomatoi, 22lumapa', moinsolon, rumoraayan so lobuw, oropuk, mokimurindi, odouraka, musingkaaku-aku om olowong. 23Kiawi' nu ono musit kiat so inawo, om ono yo su koinsaim nu lobuw,” koo si Yisus.

Koimaidan nu ido woinoi bansa Kanaan

(Mat 15:21-28)

24Nopupus iri, mulaiwo yo si Yisus kiat dii om miano yo so ido tontong orani so bandar Tirus om Sidun. Minasuw Iyo so ido waloi, om dai Iyo moingin ong oilaan nu lobuw nu dii Iyo, nga noilaan-a. 25Ido ino kianak nu woinoi sinorungan nu moinat, nokorongou nu dii si Yisus. Miano yo sono iyo dii si Yisus om sumurukudo yo so tiningkuangon Niyo ri. 26Woinoi iiri okon ko bansa Yaudi, nga nopuanak so wonuo nu Punisia so Siria. Minindamo iyo so si Yisus nu iposusub moinat-i kiat so anak niyo ri. 27Sumombuto yo si Yisus nu, “Dai musuat ong isumad so asu ingkookan ipookan so inonakan,” koo.

28Sumombuto yo woinoi iiri nu, “Bana ya nai' ono Tuan, nga insan asu no ya mongokan-a nu pinitak nu inonakan,” koo.

29Mutongaro yo si Yisus so woinoi iiri nu, “Pagka soko ono sambut mu, uli' yo! Linumabus-o moinat-i kiat so anak mu ri,” koo.

30Mulio yo sono iyo om nosiou niyo anak niyo ri mili-gili so poomoturuwan, om bana-bana ya nu linumabus-o moinat-i.

Minomali' si Yisus nu lobuw bongolon om bobou

31Nopupus iri, mulaiwo yo si Yisus kiat so Tirus mian so Liu' Galilia, tinumalib so Sidun, nokolalan so wonuo Opulu Bandar. 32Owito yo sono nu kolobuwan ido koyuwan bongol om bobou dii so Iyo ipoingkam tayon ong opoli'an. 33Owito yo Niyo lobuw iiri sumondiang om susuki yo Niyo tontuduk Niyo ri so tolingo nu lobuw-i, om durai yo tontuduk Niyo ri, om tuduli yo so dila' nu lobuw-i. 34Nopupus iri, tumingaa'o yo Iyo om muinowoo yo kaayo om tongaro yo lobuw iiri nu, “Ipata”, koo, orati niyo “Osukab-o”.

35Iya ya iiri korongou om koputangar-o sono lobuw-i. 36Pogoso yo Niyo nosiro nu dai ipotuturan iri so isai-isai ya, nga nituturan-a nosiro. 37Kiawi' lobuw nokorongou nu iri noiranan om mutangar nu, “Sobana ko owarong gogoma'on Niyo no. Lobuw bongolon om bobou nga poli'an Niyo,” koo.

Currently Selected:

Markus 7: TomPWPgLgPn

Highlight

Copy