João 13
13
Ca hohoc cain caximaxut Jeju
1Wixicam pin ac ne na xec nein Páscoa ma', je i ma' xec nein ca tomi' querec te wi urut pain ca judeu urut ca'. Taxi' pin xucun Jeju pain ca maqui' pin ne xec nein ca paca' pin tain cain macan' ca', pain ca in hwet ton con Cote ca. Jeju ma', om ca noc camain' caparut pain ca wari' ne caparut pain macan' ca', je curucun mao na. Je ca an hwet mi' ho' xuhu' pain ca om noc camain' xuhu' ca' naparut.
2Irawin cao' ac urut na. Judas ma', panxica Simão Iscariotes ma', wara coromicat ca' na quem: Quep xiho' toton oro taramaxicon pain ca quep xun cocon Jeju ta na. Tomi' mi' toton con ta na. Wirico Caxicon Jam co mi' non pain ca coromicat ac i ma' nucun. 3Ane wara tomi' con Jeju Cote ca ne: Wum co iri' Taramaxicon. Taramaxicon pe ho' rain oro carawa cocon oro wari' quem ta non. Taxi' nain i ma' Jeju quem. Taxi' xucun pain ca maqui' con Iri' Jam, taxi' xucun pain ca in hwet ton con quem. 4Je ca tequi' pe ca ma'. Hot ac con na iri' curucun womicon, an ac con na toalha, tucu pan ac xucun na pain ximijacon. 5Hohoc tain caximahu' ta ac caparut na pain ca taxipa' urut con ca'. Ji'ao mi' nain com pain bacia, hohoc ac cain na caximaxut, xic pin ac cocon na con toalha co tucu pan xucun pain ximijacon#13.5 Hohoc tain caximahu' ta iri nonon co taxipa' ca Jeju ne, he pan ac caca na. Xi ma' ca taramaxicon co hohoc nain caximacocon oro win ma' ca pane ta. Ane taramaja mi' pan xuhu' ta tococwa co taxipa' ca ne. Ac i ma' na ca an hwet pe mi' tococwa pain ca om xec xec nucun. .
6Wara ca' na Simão Pedro ma', tomi' querec pan ac con na Simão Pedro: Hohoc tain caximam mapa' ra Taramaxicon ne non.
7Om paxi' na ca taraju pa' ma pain carawa ca ara ta' pain xocori ca' Simão Pedro ac con na. Ame ma e', main taraju pa' ra ta non.
8Om na ta, om ca na camain' ne pain ca hohoc main caxima ta ac ca na Pedro.
Om na ta Pedro ac con na. Mo ta om hohoc tain pum, om ca taxipa' ac mapa' ta non.
9Na ra ac ca na. Ta hohoc e' main caxima me ta Taramaxicon ne. Hohoc rain mu je wina ca' quem ac con na.
10Om na, wari' co wara ja' com ma', om pin na homiricon. Na e' na pain ca hohoc e' xine caximacon ta ac con na. Awi paxi' hwe, om pin paxi' na homuruhu' pain xumuhu' ma'. Ane ma' xica' pe cuhu' co homuru cara pain ximicon ma' ne ac caparut na.
11Ma' xica' pe nuhu' co homuru cara ta naparut Jeju. Xi om ne ca taxi' ara con win ma' nuxut co quep xiho' toton nonon oro taramaxicon pain ca quep xun cocon ma'.
12Hohoc pin iri nain caximaxut ne, pe mami' ac con na iri' curucun womicon, xao pe mami' ac cain na maxicon pain pana ca mam' cao' to urut ma'. Tomi' querec ac caparut na: Taraju pa' mahu' pain carawa ca ara mi' xuhu' ca' ne? 13Tomi' iri mahu' ne, Taramaxicon co ca' na taxipa' naparut pain capijacon Iri' Jam ta ac mahu' na. Taramaxicon ne ac mahu' na quem. Hohot na, tomi' xo' mahu', xi wata' ara ne co ca' na taxipa' nuhu' pain capijacon Iri' Jam. Wata' co taramaxicon pe ho' nuhu' ca' quem. 14Je ca tomi' xuhu' ca' ac caparut na. Noro xine. Taramaxicon pe ho' paxi' inuhu'. Ca' na paxi' inuhu' pain capijacon Te quem. Ane om xec xec ta' ne. Xiram pa' inuhu'. Quep xiho' inuhu'. An hwet mi' inuhu' pain ca om noc xuhu' pain ca hohoc tain caximahu' ca' ne. Je ca na e' ne pain ca an xiho' mahu' pain ca om xec xec ne ca' quem. Quep xiho' xujuhu', am hohoc mi' xujuhu' pain caximahu' ma' quem. 15Win ta' ca', ac i ma' tara ca ara mi' xujuhu' quem. 16Je ca tomi' xuhu' ca', tomi' iri'o' inuhu': Om ca hwara' opa tiquin' ca' mahu' pain ca taramaja mi' mahu' ma'. Win ca wari' co taramaja mi' e' non taramaxicon nucun ma', om ca hwara' opa tiquin' ca' con taramaxicon nucun. Win ca wari' co an xin tiquin' nain ca tomi' nucun wari' co tomi' hwet rain ta non ma' quem, om ca hwara' opa tiquin' ca' con co tomi' hwet rain ta non quem. 17Je ca tomi' xuhu' ca', taraju pa' pin hwein ca tomi' xuhu' ca': Mo ta tomi' ha' mahu', param mi' ac cuhu' tara pain ca awi wa Te Iri' Jam ta na ca tomi' caparut.
18Pain ca tomi' xuhu' ne, pain ca param mi' turuhu' pain ca awi wa Iri' Jam ta xuhu' ca', om ca tomi' tomi' xam' xuhu' ta ac caparut na. Xi querec pin' ara xuhu' pain ca xo' tora' qui' xuhu' pane. Querec pin' inain ca coromicat nuhu'. Ane tora' pan xuhu' pane ne. Ma' ta hwet pin ne capijacon Iri' Jam ca xirao' pe ca taramaxicon Davi cara pane, pain ca xirao' pe cain ca tomi' pan ne pane. Ca' na ca xirao' pe nucun pata': Noc pin napa' win ma' ne co cao' pe ho' napa' ma', ac i ma' na ca xirao' nucun pata' pane. 19Wara tomi' hwet inuhu' pain ca noc pin xim capa' ma', pain ca om noc querec capa' ma'. Ma' ta howa mahu' inuhu'. Noc pin iri tarapa' ne, howa ac mahu' tara pain ca wara tomi' hwet xuhu' ca', pain ca wata' ne co taramaxicon co wara tomi' pe ca Te Iri' Jam xuhu' ca'. 20Je ca tomi' xuhu' ca', tomi' iri'o' inuhu' ta ac caparut na. Wari' co tomi' querec te non co hwet roron oro wari' ta ta' cwa', tomi' querec te napa' quem. Wari' co tomi' querec te napa' ma', tomi' querec te non co cwain co hwet roron oro wari' pain macan' ta napa' quem na ca tomi' caparut pane.
Ca tomi' hwet cain wixicon co taxipa' ca co noc pin ton non ma'
21Tomi' iri nain i ma' Jeju ne, toron tamana ac ne na ximicon. Tomi' ac caparut na pain ca taxipa' urut con ca': Ma' napari' co quep xiho' toton nonon co noc nanapa' ma', co quep xim nanapa' ma' naparut. Win ma' nuhu' ta naparut. Tomi' iri'o' inuhu', tomi' mi' tarapa' cocon co noc nanapa' ta naparut.
22Noro ac xujuxut na. He! Ma' co tomi' ca ne ta ac urut na.
23Iri' win ma' ne napa' Jeju. Xao pe ja' pan inon. 24Xiximi' ac capa' na Pedro ma'. Ma' co tomi' ma quem ron ta napa'.
25Joc tomi' ac ton na Jeju. Taramaxicon ne, ma' co tomi' ma ma' quem inon.
26Om na, xin cam tain wijimain capam' pain too ca mam' cao' wa ca'. Wari' co mi' ta' ta' pain, wirico co tomi' ta' ne ac capa' na. An ac cain na wijimain capam', xin cam ac cain na, mi' ac con na pain Judas ma', panxica Simão Iscariotes ma'. 27Cao' pin iri nain Judas ne, corom hwet pin ac con na Caxicon Jam quem. Tomi' ac con na Jeju: Ara hap rain ca ara ta' ma ma' na ca tomi' con ma'.
28Warut pain xao to urut pain pana ca mam' cao' to wa ma', om ca taraju pa' urut pain ca tomi' nucun Jeju. Para tomi' ac i ma' con Judas cara ne urut. 29Ma' nana oro win ma' nuxut co coromicat ca' nana: Om na, mo cut rain carawa nein ca tomi' querec te nexi' ta non. Tara, am mi' roron pain carawa co om nonon carawa con, je tara con, ac i ma' na ca coromicat nucucun. Xi wirico ara ca Judas co querec wet nain dinheiro nuxut ca mi' urut cocon oro wari' co xiram pa' urut ta.
30Cao' pin iri nain capam' Judas ma' ne, hwet mao hap ac ca na. Wara xim pin na quem.
Ca tomi' nucun Jeju ca tomi' ha' je capari' ca'
31Hwet mao iri na Judas ne, tomi' ac caparut na Jeju: Maqui' pin napa' xec nein ca an hwet pe pin tain cain ca awi ne Te ta. Querec pin' tatarapa' oro wari' quem. Querec pin' tatarapa' pain ca hwara' opa ne pain ca awi tamana ne ca', pain ca Iri' Wari' ta' ca'. Querec pin' totoron Te Iri' Jam pata' quem. Querec pin' totoron pain ca hwara' opa nucun pain ca awi tamana nucun quem. 32Querec pin' iri totoron pain ca hwara' opa nucun pain ca awi nucun pata' ne, an hwet pe pan ac cain tara ca hwara' opa ne pain ca awi tamana ne ca' quem, pain ca Panxita' capa' ca' quem. Om ta om om ne, an hwet pe ho' tarain pata' ta na.
33Pe ho' wijimain ca' e' xuhu' ta hwijima' ac caparut na. Pirao' xun paxi' mahu'. Om ta hwet ac mahu' pain ca mao ta' ta' quem. Win ne ca wara tomi' xo' toton oro taramaxicon nexi' pain ca judeu iri' pane. Tomi' ac i ma' inuhu' pain xocori ca' quem.
34Je i ca' xocori ca tomi' ne ca tomi' ha' je xuhu' ca' ac caparut na. Ta noc camain' xujuhu' me ta. Win ne ca om noc camain' xuhu' ca', ac i ma' tara ca om noc camain' xujuhu' quem. 35Mo ta om noc camain' xujuhu', querec pin' querec pin' pi' pin ac cucuhu' tara oro wari' pain ca taxipa' mahu' ma' na ca tomi' caparut ma'.
36Tomi' querec ac con na Pedro: Main ca mao ta' ma ma' quem Taramaxicon ne ac con na.
Om na ta Pedro ac ca na. Ca mao ta' ta' ca', om ca mao ac ma pain xocori ca'. Ame ma e', main maqui' tara xec nein ca hwet xim mapa'. Hwet ac mapa' tara ta non.
37Tomi' querec mami' ac con na Pedro: Para om hwet ac xim pain xocori ca' quem Taramaxicon ne? Mo ta to' pa' pin xun cacapa' pain ca hwet xim ta' ca'. Je i ma' ira, to' pa' ma' tatarapa' pum ne ac con na.
38Iri'o' tara pum ra ac con na Jeju. Ame ma e' Pedro. Om ta aca querec ca me pain ca xec pin ta' ne ca', wara tomi' ac momon tara oro wari': Om ca querec pin' ton ta ac momon tara pata', ma' 3 tara ca tomi' ac i ma' toton ma quem. Tomi' iri'o' inem ta Pedro na ca tomi' con ma'.
Currently Selected:
João 13: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
João 13
13
Ca hohoc cain caximaxut Jeju
1Wixicam pin ac ne na xec nein Páscoa ma', je i ma' xec nein ca tomi' querec te wi urut pain ca judeu urut ca'. Taxi' pin xucun Jeju pain ca maqui' pin ne xec nein ca paca' pin tain cain macan' ca', pain ca in hwet ton con Cote ca. Jeju ma', om ca noc camain' caparut pain ca wari' ne caparut pain macan' ca', je curucun mao na. Je ca an hwet mi' ho' xuhu' pain ca om noc camain' xuhu' ca' naparut.
2Irawin cao' ac urut na. Judas ma', panxica Simão Iscariotes ma', wara coromicat ca' na quem: Quep xiho' toton oro taramaxicon pain ca quep xun cocon Jeju ta na. Tomi' mi' toton con ta na. Wirico Caxicon Jam co mi' non pain ca coromicat ac i ma' nucun. 3Ane wara tomi' con Jeju Cote ca ne: Wum co iri' Taramaxicon. Taramaxicon pe ho' rain oro carawa cocon oro wari' quem ta non. Taxi' nain i ma' Jeju quem. Taxi' xucun pain ca maqui' con Iri' Jam, taxi' xucun pain ca in hwet ton con quem. 4Je ca tequi' pe ca ma'. Hot ac con na iri' curucun womicon, an ac con na toalha, tucu pan ac xucun na pain ximijacon. 5Hohoc tain caximahu' ta ac caparut na pain ca taxipa' urut con ca'. Ji'ao mi' nain com pain bacia, hohoc ac cain na caximaxut, xic pin ac cocon na con toalha co tucu pan xucun pain ximijacon#13.5 Hohoc tain caximahu' ta iri nonon co taxipa' ca Jeju ne, he pan ac caca na. Xi ma' ca taramaxicon co hohoc nain caximacocon oro win ma' ca pane ta. Ane taramaja mi' pan xuhu' ta tococwa co taxipa' ca ne. Ac i ma' na ca an hwet pe mi' tococwa pain ca om xec xec nucun. .
6Wara ca' na Simão Pedro ma', tomi' querec pan ac con na Simão Pedro: Hohoc tain caximam mapa' ra Taramaxicon ne non.
7Om paxi' na ca taraju pa' ma pain carawa ca ara ta' pain xocori ca' Simão Pedro ac con na. Ame ma e', main taraju pa' ra ta non.
8Om na ta, om ca na camain' ne pain ca hohoc main caxima ta ac ca na Pedro.
Om na ta Pedro ac con na. Mo ta om hohoc tain pum, om ca taxipa' ac mapa' ta non.
9Na ra ac ca na. Ta hohoc e' main caxima me ta Taramaxicon ne. Hohoc rain mu je wina ca' quem ac con na.
10Om na, wari' co wara ja' com ma', om pin na homiricon. Na e' na pain ca hohoc e' xine caximacon ta ac con na. Awi paxi' hwe, om pin paxi' na homuruhu' pain xumuhu' ma'. Ane ma' xica' pe cuhu' co homuru cara pain ximicon ma' ne ac caparut na.
11Ma' xica' pe nuhu' co homuru cara ta naparut Jeju. Xi om ne ca taxi' ara con win ma' nuxut co quep xiho' toton nonon oro taramaxicon pain ca quep xun cocon ma'.
12Hohoc pin iri nain caximaxut ne, pe mami' ac con na iri' curucun womicon, xao pe mami' ac cain na maxicon pain pana ca mam' cao' to urut ma'. Tomi' querec ac caparut na: Taraju pa' mahu' pain carawa ca ara mi' xuhu' ca' ne? 13Tomi' iri mahu' ne, Taramaxicon co ca' na taxipa' naparut pain capijacon Iri' Jam ta ac mahu' na. Taramaxicon ne ac mahu' na quem. Hohot na, tomi' xo' mahu', xi wata' ara ne co ca' na taxipa' nuhu' pain capijacon Iri' Jam. Wata' co taramaxicon pe ho' nuhu' ca' quem. 14Je ca tomi' xuhu' ca' ac caparut na. Noro xine. Taramaxicon pe ho' paxi' inuhu'. Ca' na paxi' inuhu' pain capijacon Te quem. Ane om xec xec ta' ne. Xiram pa' inuhu'. Quep xiho' inuhu'. An hwet mi' inuhu' pain ca om noc xuhu' pain ca hohoc tain caximahu' ca' ne. Je ca na e' ne pain ca an xiho' mahu' pain ca om xec xec ne ca' quem. Quep xiho' xujuhu', am hohoc mi' xujuhu' pain caximahu' ma' quem. 15Win ta' ca', ac i ma' tara ca ara mi' xujuhu' quem. 16Je ca tomi' xuhu' ca', tomi' iri'o' inuhu': Om ca hwara' opa tiquin' ca' mahu' pain ca taramaja mi' mahu' ma'. Win ca wari' co taramaja mi' e' non taramaxicon nucun ma', om ca hwara' opa tiquin' ca' con taramaxicon nucun. Win ca wari' co an xin tiquin' nain ca tomi' nucun wari' co tomi' hwet rain ta non ma' quem, om ca hwara' opa tiquin' ca' con co tomi' hwet rain ta non quem. 17Je ca tomi' xuhu' ca', taraju pa' pin hwein ca tomi' xuhu' ca': Mo ta tomi' ha' mahu', param mi' ac cuhu' tara pain ca awi wa Te Iri' Jam ta na ca tomi' caparut.
18Pain ca tomi' xuhu' ne, pain ca param mi' turuhu' pain ca awi wa Iri' Jam ta xuhu' ca', om ca tomi' tomi' xam' xuhu' ta ac caparut na. Xi querec pin' ara xuhu' pain ca xo' tora' qui' xuhu' pane. Querec pin' inain ca coromicat nuhu'. Ane tora' pan xuhu' pane ne. Ma' ta hwet pin ne capijacon Iri' Jam ca xirao' pe ca taramaxicon Davi cara pane, pain ca xirao' pe cain ca tomi' pan ne pane. Ca' na ca xirao' pe nucun pata': Noc pin napa' win ma' ne co cao' pe ho' napa' ma', ac i ma' na ca xirao' nucun pata' pane. 19Wara tomi' hwet inuhu' pain ca noc pin xim capa' ma', pain ca om noc querec capa' ma'. Ma' ta howa mahu' inuhu'. Noc pin iri tarapa' ne, howa ac mahu' tara pain ca wara tomi' hwet xuhu' ca', pain ca wata' ne co taramaxicon co wara tomi' pe ca Te Iri' Jam xuhu' ca'. 20Je ca tomi' xuhu' ca', tomi' iri'o' inuhu' ta ac caparut na. Wari' co tomi' querec te non co hwet roron oro wari' ta ta' cwa', tomi' querec te napa' quem. Wari' co tomi' querec te napa' ma', tomi' querec te non co cwain co hwet roron oro wari' pain macan' ta napa' quem na ca tomi' caparut pane.
Ca tomi' hwet cain wixicon co taxipa' ca co noc pin ton non ma'
21Tomi' iri nain i ma' Jeju ne, toron tamana ac ne na ximicon. Tomi' ac caparut na pain ca taxipa' urut con ca': Ma' napari' co quep xiho' toton nonon co noc nanapa' ma', co quep xim nanapa' ma' naparut. Win ma' nuhu' ta naparut. Tomi' iri'o' inuhu', tomi' mi' tarapa' cocon co noc nanapa' ta naparut.
22Noro ac xujuxut na. He! Ma' co tomi' ca ne ta ac urut na.
23Iri' win ma' ne napa' Jeju. Xao pe ja' pan inon. 24Xiximi' ac capa' na Pedro ma'. Ma' co tomi' ma quem ron ta napa'.
25Joc tomi' ac ton na Jeju. Taramaxicon ne, ma' co tomi' ma ma' quem inon.
26Om na, xin cam tain wijimain capam' pain too ca mam' cao' wa ca'. Wari' co mi' ta' ta' pain, wirico co tomi' ta' ne ac capa' na. An ac cain na wijimain capam', xin cam ac cain na, mi' ac con na pain Judas ma', panxica Simão Iscariotes ma'. 27Cao' pin iri nain Judas ne, corom hwet pin ac con na Caxicon Jam quem. Tomi' ac con na Jeju: Ara hap rain ca ara ta' ma ma' na ca tomi' con ma'.
28Warut pain xao to urut pain pana ca mam' cao' to wa ma', om ca taraju pa' urut pain ca tomi' nucun Jeju. Para tomi' ac i ma' con Judas cara ne urut. 29Ma' nana oro win ma' nuxut co coromicat ca' nana: Om na, mo cut rain carawa nein ca tomi' querec te nexi' ta non. Tara, am mi' roron pain carawa co om nonon carawa con, je tara con, ac i ma' na ca coromicat nucucun. Xi wirico ara ca Judas co querec wet nain dinheiro nuxut ca mi' urut cocon oro wari' co xiram pa' urut ta.
30Cao' pin iri nain capam' Judas ma' ne, hwet mao hap ac ca na. Wara xim pin na quem.
Ca tomi' nucun Jeju ca tomi' ha' je capari' ca'
31Hwet mao iri na Judas ne, tomi' ac caparut na Jeju: Maqui' pin napa' xec nein ca an hwet pe pin tain cain ca awi ne Te ta. Querec pin' tatarapa' oro wari' quem. Querec pin' tatarapa' pain ca hwara' opa ne pain ca awi tamana ne ca', pain ca Iri' Wari' ta' ca'. Querec pin' totoron Te Iri' Jam pata' quem. Querec pin' totoron pain ca hwara' opa nucun pain ca awi tamana nucun quem. 32Querec pin' iri totoron pain ca hwara' opa nucun pain ca awi nucun pata' ne, an hwet pe pan ac cain tara ca hwara' opa ne pain ca awi tamana ne ca' quem, pain ca Panxita' capa' ca' quem. Om ta om om ne, an hwet pe ho' tarain pata' ta na.
33Pe ho' wijimain ca' e' xuhu' ta hwijima' ac caparut na. Pirao' xun paxi' mahu'. Om ta hwet ac mahu' pain ca mao ta' ta' quem. Win ne ca wara tomi' xo' toton oro taramaxicon nexi' pain ca judeu iri' pane. Tomi' ac i ma' inuhu' pain xocori ca' quem.
34Je i ca' xocori ca tomi' ne ca tomi' ha' je xuhu' ca' ac caparut na. Ta noc camain' xujuhu' me ta. Win ne ca om noc camain' xuhu' ca', ac i ma' tara ca om noc camain' xujuhu' quem. 35Mo ta om noc camain' xujuhu', querec pin' querec pin' pi' pin ac cucuhu' tara oro wari' pain ca taxipa' mahu' ma' na ca tomi' caparut ma'.
36Tomi' querec ac con na Pedro: Main ca mao ta' ma ma' quem Taramaxicon ne ac con na.
Om na ta Pedro ac ca na. Ca mao ta' ta' ca', om ca mao ac ma pain xocori ca'. Ame ma e', main maqui' tara xec nein ca hwet xim mapa'. Hwet ac mapa' tara ta non.
37Tomi' querec mami' ac con na Pedro: Para om hwet ac xim pain xocori ca' quem Taramaxicon ne? Mo ta to' pa' pin xun cacapa' pain ca hwet xim ta' ca'. Je i ma' ira, to' pa' ma' tatarapa' pum ne ac con na.
38Iri'o' tara pum ra ac con na Jeju. Ame ma e' Pedro. Om ta aca querec ca me pain ca xec pin ta' ne ca', wara tomi' ac momon tara oro wari': Om ca querec pin' ton ta ac momon tara pata', ma' 3 tara ca tomi' ac i ma' toton ma quem. Tomi' iri'o' inem ta Pedro na ca tomi' con ma'.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil