João 21:15-17

Pi' pin iri na ca cao' nuxut ne, tomi' querec ac con na Simão Pedro Jeju: Simão, panxica João. Om ca noc mapa'? Tomi' querec te tiquin' ca' mapa' cocon caram cwa' ra non. E'e', taxi' mapa' pain ca om noc xim ca' Taramaxicon ne ac ca na. Je ca tomi' xim ca': Querec wet roron oro wari' ne co an xiho' nanain wijimain ovelha ta ac con na. Tomi' querec mami' ac con na: Simão, panxica João. Om ca noc mapa' na ca tomi' querec mami' con ma'. E'e', taxi' mapa' pain ca om noc xim ca' Taramaxicon ne ac ca na. Je ca tomi' xim ca': Querec wet roron oro wari' ne co an xiho' nanain ovelha ta na pain ca tomi' mami' con ma'. Tomi' querec mami' ac con na quem. Je win 3 pin ne ca tomi' querec con ma': Simão, panxica João. Om ca noc mapa' na ca tomi' querec mami' con ma'. Tomi' xaxa' ac ca na Pedro. Para tama' tomi' querec capa' pain ca om ca noc mapa' capa' ca' ne? 3 pin na ca tomi' querec capa' ma' na ca coromicat nucun. Tomi' ac con na: Taxi' taxi' pi' pin main oro carawa ta Taramaxicon ne. Taxi' mapa' pain ca om noc xim ca' non. Je ca tomi' xim ca' ac con na Jeju. Querec wet roron oro wari' ne co an xiho' nanain ovelha ta non.