Ja̰ 11

Lajar na ulu

1Ɓər paa ndil ɓə Lajar tɨba mo̰y. Ər ti tɨ Betani, tɨ Mari la ər ɓun tɨ ii Mart na lɔr hul. 2Tɨ Mari ɓudu ne bɛ itɨr tɨ Wo tɨ wa̰y ɓla sul la pla ər ɗḛygɨ na ər sul ɓwḭ. Tɨ ər ɓun tɨ Lajar jo tɨ mo̰y. 3Ər ɓungɨ tɨ aa toon ja gɨ Jesu ɓə: «Baali, əm paa kɔr tɨ mo̰y.» 4Gorne Jesu laa jaa ne gɨna, ər ja: «Lajar na mo̰y ɓə ər humna lo lɛ, bi ɓə na Ndɨla na dwari una, la Ndɨla ɓa̰ dwari una.»

5Jesu ka Mart la, ər ɓun tɨ ii la, ta Lajar la kum nari. 6Lɛ gorne ər laa ɓə Lajar tɨ mo̰y gɨna, ər ti tɨ un ɗay ɗa̰y tɨ ndidi. 7La Jesu ja gɨ ər bi: «Ka i duga tɨ Jude.» 8Gɨna, ər bi tɨ tomni ja gɨ ər: «Wo tɨ wa̰y ɓla, ɗang ndog le Juyb-a taam ul mu tɨ əm humna na kura, lɛ yim taam duga saal cam a?» 9Jesu duga gɨ a: «Ɗa̰y ɓudu hul lula sul tɨ dɔkɔmɛ kar sap lo a? Jo wo si na tili gɨna, ər ɓə ɗəbgɨ lo, kəysul ər ləg un ndeeri tɨ dunya̰ ɓari. 10Lɛ jo wo si na siyɛl gɨna, ər ɓə ɗəbgɨ, kəysul ər ləg un ɓari lo.» 11La Jesu ja cam: «I ɓun tɨ Lajar wo ley loom, lɛ ən wo saal ər uya̰.» 12Ər bi duga gɨ ər: «Baali, jo ər ley lom gɨna, ər ɓə nina tina.» 13Jesu ja jaa tuna Lajar na ulu sul, lɛ ər bi ilgɨ ɓə ər ley lom bla. 14Gɨna, Jesu ja gɨ a tɨ bayri: «Lajar uy. 15Ən ndula laar ən nari kəysul yḭ teni teni tɨ un ɗay. Tɨ un nejo yḭ ɓə ən hul kula ara. Ka i si tɨ ər ndɔ.» 16Gɨna Tomas ne a soon ər ɓə ho̰ni ja gɨ Jesu na bi tɨ wa̰y edɨ tapeer: «Yi kaw, ka i si i uy na i Baali!»

Jesu tɨ tɨm jili

17Gorne Jesu hina gɨna, a ja gɨ ər ɓə Lajar si tɨ ngalɨm ka ɗa̰y nḛni teni. 18Betani ti ndog na Jerusalɛm, na kelengɨ tɨ tedi, 19la Juyb dɨbla hina tɨ Mari a na Mart ndɔ tɨ a ɓun ulu. 20Gorne Marta laa ɓə Jesu hina gɨna, ər si ər tung ər kwi tɨ ul lɛ Mari ti tɨ gə̰y. 21Mart ja gɨ Jesu: «Baali, hiina əm wo le gɨna, ən ɓun ɓə ulu lo. 22Lɛ ən una ɓə Ndɨla ɓə gɨ əm mum gun ne əm ɓiri naa.» 23Jesu duga gɨ ər: «Əm ɓun ɓə wag tɨ ngalɨm.» 24Mart duga gɨ ər: «Ən una ər ɓə wag na ɗa̰y mu tɨ tong gorne bi tɨ ulu gun ɓə ngalɨm ɗɨb wag.» 25Jesu ja gɨ ər: «Yin tɨ wo tɨ na bi wag tɨ ngalɨm hul la, yin tɨ wo ne ən naa gɨ bi tɨm jili na kwi la. Wo ne ko ən hul jo ər uy kaw, ər ɓə tɨm jili na kwi. 26Bi ton ɗang ti jili lɛ a ko ən hul, a ɓə ulu lo bad. Pay əm ko hul a?» 27Mart duga gɨ ər: «M, Baali, ən ko hul ɓə yim tɨ Mesi, Ndɨla na ɓa̰ ne hina tɨ dunya̰.»

Jesu cḛy Lajar jaa

28Dabra gorne Mart ja jaa ne gɨna, ər si ər soon ər ɓun tɨ ii tɨ Mari la ər hurga gɨ ər jaa ɓə: «Wo tɨ wa̰y ɓla wo le, ər soon əm.» 29Gorne Mari laa jaa ne gɨna, ər o̰ saan tɨ ndal ər si ər ten Jesu. 30Jesu ɗang wur tɨ lɔr hul lo. Ər ti tɨ un ne nɨ Mart si a ten ər tɨ nin. 31Gorne Juyb-a ne a hina tɨ ulu tɨ Mari gə̰y a ləg ər gɨna, a o̰ tɨ ndal a wag na yaal a si tɨ ər lɔ. A ilgɨ ɓə ər wo saal tɨ ngalɨm sul pi tɨ cḛy. 32Mari hina tɨ un ne Jesu lor tɨ nin. Gorne ər ləg ər gɨna, ər tɨba tɨ ər ɗa̰y la ər ja gɨ ər: «Baali, hiina əm wo nin gɨna, ən ɓun ɓə ulu lo.» 33Gorne Jesu ləg ər na cḛy la Juyb ton ne a ti na ər cḛy la gɨna, ngɨnɨm kar ər nɨ ər ndula laar ər lo. 34La ər ɓiri a: «Yḭ bili ər tɨ ɓay a?» A duga gɨ ər: «Baali, hina, əm ləg.» 35Jesu cḛy. 36Juyb-a ja ɓə: «Yḭ ləg, ər ka Lajar kum nari!» 37Tapeer tɨ a daan ja: «Yḭr ne ər təng bi ji nina ji, pay ər lɛm gɨ Lajar ul mu kway tɨ ulu lo a?»

38Jesu angal ti tɨ lɔr lo. Ər duga ər si tɨ ngalɨm sul cam. Tɨ gɔl ne a hul mu na kura ɗəng. 39Jesu ja: «Yḭ jul kura ne teni.» Mart, wo tɨ ulu na ɓun tɨ ii ja gɨ ər: «Wo tɨ wa̰y ɓla, yḭr ɓə uun ɓijim teni, kəysul ka ɗa̰y tɨ nḛni teni.»

40Lɛ Jesu duga gɨ ər: «Toni ən ja gɨ əm: “Jo əm ko hul gɨna, əm ɓə Ndɨla na dwari ləg”.» 41Gɨna a jul kura teni. Jesu so ji tɨ ndal tɨ ndɨlasul la ər ja: «Ən Ba, ən ka gɨ əm barka kəysul əm laa ən jaa na ɗa̰y sul. 42Ən una ɓari ɓə, əm laa ən jaa yɔd. Lɛ ən ja jaa ne ka bi ne lor yeri ən sul jaa la, ka a una ɓə tɨ yim jo əm toon ən.» 43La Jesu ja tɨ ndal na gṵ sɨgra: «Lajar, əm wag tɨ bayri!» 44Wo tɨ ulu wag tɨ bayri, ər ɗa̰y la ər dəgɨ la ər ji la ti tɨ bini na sər na markani. Gɨna Jesu ja gɨ a: «Yḭ cigri ər i nɨm ər ka ər si la.»

Juyb-a na woom taam Jesu humna.

Mat 26.1-5; Mrk 14.1-2; Luk 22.1-2

45Juyb-a dɨbla tɨ ya̰ ton hina tɨ Mari ndɔ daan a ləg wa̰y ne Jesu ka gɨna, a ko a hul. 46Lɛ tapeer wag si. A ten Parisyḛ-a la a jul gɨ a wa̰y ne Jesu ka lɔ. 47Gɨna, bi tɨ hima ɓina na woom a na Parisyḛ-a tay bi nii a ja gɨ a ɓə: «Ɓər ne ka mum ne ɓɔrji dɨbla. Kəy jo yi ɓə kar a? 48Jo yi nɨm nɨ ər ka mum kuna paa ne gɨna, bi gun ɓə ər hul kula la, bi nii tɨ Rom ɓə hina a ɓə i Ndɨla li yunga la ī lɔr yunga gun la.» 49Wo paa tɨ a daan, ər ndil ɓə Kayip. Yḭr tɨ wo tɨ hima ɓina ɗəng na an ne. Ər ja gɨ a: «Yḭ una wa̰y ɓudu lo! 50Kəysul yḭ una ɓə wo ɓudu na ulu tɨ bi dɨbla sul tungni golgo ura bi dɨbla na ulu lo a?»

51Kayip na jaa ne o̰ tɨ may hul lo, Kəysul, na lula sul ne, tɨ yḭr jo ər tɨ wo tɨ hima ɓina ɗəng. Ər ja jaa kuna nebi tɨ Jesu sul tuna ər ulu tɨ bi tɨ dunya̰ sul tungni. 52Ər ɓə ulu tɨ ya̰ jaa ngoy lo, lɛ ər ɓə Ndɨla ɓimi gun ne bra peer tay tɨ un ɓudu tɨ a nina.

53Ɗo lɔ na ɗa̰y ɗay, Juyb-a woom taam ul mu tɨ Jesu humna. 54Nejo, Jesu wag tɨ Juyb dɨbla kwi cam lo. Lɛ ər si tɨ lɔrgɨ ton ti ndog na tap hul, tɨ lɔr ɗəng ne a soon ɓə Eprayim. Ər ti tɨ nin na ər bi.

55Juyb-a na pya̰ tɨ Pak ti ndog. Bi dɨbla o̰ tɨ a lɔr nəgri sul tɨ saal tɨ Jerusalɛm tɨ a ndula ugu tɨ Ndɨla kwi toni barita ɗa̰y tɨ pya̰ kar ɓə hina. 56A taam Jesu lɛ a ten ər lo gɨna, a ɓiri peer tɨ Ndɨla li hul ɓə: «Kəyjo yḭ ilgɨ a? Pay ər ɓə hina tɨ pya̰ kar ɓee ər ɓə hina lo a?» 57Bi tɨ hima ɓina na woom la Parisyḛ-a la, a naa a gṵ kuna ne: «Jo wo ləg Jesu gɨna, ka ər hina ər ja gɨ i, ɓə yini ɓə ər par.»

Currently Selected:

Ja̰ 11: nie

Highlight

Copy