Ja̰ 17

Jesu soon Ndɨla ər bi jaa

1Gorne Jesu ja jaa tong teni gɨna, ər uma ər ji tɨ ndɨlasul la ər ja ɓə: «Ən Ba, lula sul lɛm teni. Əm wur taan tɨ əm ɓa̰ sul nɨ ka əm ɓa̰ kaw wur taan tɨ əm sul la. 2Kuna əm naa gɨ ər dwari tɨ bi tɨ dunya̰ sul gun nɨ ka ər naa gɨ bi ton əm naa gɨ ər tɨm jili na kwi. 3Tɨm jili na kwi na una, tɨ una ɓə yim tɨ Ndɨla ɓudu kam lag-lag ne kuri, la tɨ Jesu Krist ne əm toon ər una la. 4Ən wur taan tɨ əm sul tɨ dunya̰ la, ən tong cida ne əm naa gɨ ən tɨ kar la. 5Ndogle, ən Ba, əm wur gɨ ən taan ne toni əm wur tɨ ən sul tɨ əm ndɔ pi gorne ɗang əm ɗo dunya̰ lo. 6Ən ɓla əm ndil gɨ bi ton əm naa gɨ ən tɨ dunya̰ hul. Ya̰ tɨ əm maan la əm naa a gɨ ən, ta a ka hormo̰ tuna əm jaa la. 7Lula sul ne, a una ɓə mum gun ne əm naa gɨ ən o̰ tɨ əm ndɔ. 8kəysul ən naa gɨ a jaa ne əm naa gɨ ən la, a ko ɓari la. A una ɓari ɓə ən o̰ tɨ əm ndɔ la, yim jo əm toon ən la.

9«Ən ha̰wni ən ɗa̰y tɨ əm kwi ya̰ jaa, lɛ bi tɨ dunya̰ jaa lo. Kəysul ya̰ tɨ bi ton əm naa gɨ ən, la a tɨ əm maan la. 10Kuna mum gun ne tɨ ən maan, tɨ yḭm maan la, ta mum gun ne tɨ yim maan, tɨ yin maan la. Ta mum ton wur taan tɨ ən sul la. 11Gḛy tɨ kwi le, Yin wo teni tɨ dunya̰ ne hul, lɛ ya̰ wo tɨm tɨ dunya̰ hul. Ən Ba wo ndeeri, yin wo saal tɨm ndɔ. Yim mam ɓaw na əm ndil na dwari, nɨ ka ti ɓudu kuna yi tɨ ɓudu. 12Gorne ən ti na a, ən ɓaw a na ndil ne əm naa gɨ ən na dwari. Ən ɓaw a nɨ wo ɓudu tɨ a daan in haam lo, lɛ yḭr ɓa̰ tɨ kud ngoy jo haam, nɨ ka jaa ne a kya̰ tɨ Ndɨla maktub hul ti kuri#17.12 Psa 41.10. 13Na lula sul ne, ən wo saal tɨ əm ndɔ. Ən ja gɨ a jaa ne in kəysul ka ən ndula laar sir a hul gorne ɗang ən wo tɨ dunya̰ na a. 14Ən naa gɨ a əm jaa, la bi tɨ dunya̰ koor a la. Ya̰ tɨ dunya̰ maan lo, kuna yin tɨ dunya̰ maan lo la. 15Ən ɓiri ka əm jul-a tɨ dunya̰ hul lo, lɛ əm ɓaw-a Wo ɓijim jaa. 16Kəysul ya̰ tɨ bi tɨ dunya̰ lo kuna yin tɨ wo tɨ dunya̰ lo la. 17Əm ka nɨ ka a ti əm bi marway tɨ kuri ja hul, kəysul, əm jaa tɨ kuri. 18Kuna Əm toon na ən tɨ dunya̰, yin kaw, ən toon a tɨ dunya̰ la. 19Yin, ən kay ən ndɔ jak ya̰ jaa, nɨ ka ya̰ kaw a kay a ndɔ jak gɨ yim tɨ kuri hul la.

20«Ən ha̰wni ən ɗa̰y ya̰ jaa ngoy lo, lɛ ən ha̰wni ən ɗa̰y bi ne so hul naa gɨ ən na jaa ne wag tɨ a mu la. 21Ən ha̰wni ən ɗa̰y tɨ əm kwi ka a duga a ti bi ɓudu. Kuna yim ba, əm wo tɨ ən ndɔ la, yin, wo tɨ əm ndɔ la. Nejo bi tɨ dunya̰ ɓə hul kula ɓə yim jo əm toon ən. 22Yin naa gɨ a taan ne əm naa gɨ ən, ka a ti ɓudu kuna yi tɨ ɓudu la. 23Yin ti na a la, yim ti na yin la, nejo ya̰ ɓə tɨm bi ɓudu kuri la. Kuna paa ne gɨna, bi tɨ dunya̰ ɓə una ɓə yim jo əm toon ən la, əm ka ən kum la. 24Ən Ba, ən taam ɓə un ne ən ti tɨ nin, ka bi ne əm wur tɨ ən daa hul ti tɨ nin a ləg taan ne əm wur tɨ ən sul na a ji. Kəysul əm ka ən kum toni barita əm ɗo dunya̰. 25Ən Ba wo tugla, bi tɨ dunya̰ una əm lo, lɛ yin una əm la, ya̰ kaw a una ən ɓə yim jo əm toon ən. 26Ən ɓla gɨ a əm ndil la, ən ɓə gɨ a ɓla cam la, ka kumkar ne ən ten tɨ əm ndɔ gə̰y na a la, yin kaw, ən ɓə tɨm tɨ a ndɔ la.»

Currently Selected:

Ja̰ 17: nie

Highlight

Copy