Ja̰ 20

Ngalɨm hul gə̰y bla

Mat 28.1-8; Mrk 16.1-8; Luk 24.1-12

1Na aad na gaan cɔg, gorne lula ɗang wag lo, Mari ii tɨ lɔr tɨ Magdala si tɨ ngalɨm sul. Ər ləg kura tambra ɗəng ne a hul na guwal mu ɓɨrgɨ teni 2Gɨna ər yey ər si ər ten Simo̰ Piyɛr la Jesu na wo paa ne ər ka ər kum nari, ər ja gɨ a: «A jul Baali tɨ ngalɨm hul, lɛ i una un ne a ɗo ər tɨ nin lo.» 3Gɨna Piyɛr a na Jesu na wo ne ər ka ər kum a o̰ a si tɨ ngalɨm sul. 4A ji tɨ ndidi gun a yey, lɛ Jesu na wo ne ər ka kum yey ura Piyɛr la ər an toni tɨ ngalɨm sul. 5Ər gaagɨ ər aan lɛ ər wur tɨ ngalɨm hul lo. 6Simo̰ Piyɛr ne hina tɨ ər bəgri wur tɨ ngalɨm hul. Ər ləg sər tɨ ulu bili ley tɨ lɔr 7la sər ne a bini na ər sul la. Sər ne a bini na ər sul ley ɓudu na sər tɨ ulu bili lo, lɛ ər ley tɨ bini tɨ paa sul tɨ un jak. 8Gɨna Jesu na wo ne ər ka ər kum ne hina toni wur tɨ ngalɨm hul ara, ər ləg wa̰y ne ka paa la ər ko hul. 9Kuri ɗang Jesu na bi tɨ wa̰y edɨ una jaa ne Ndɨla na maktub ja toni ɓə «Jesu ɓə wag tɨ bi tɨ ulu daan lo.» 10Gɨna, Jesu na bi tɨ wa̰y edɨ tɨ ndidi duga, a si tɨ gə̰y.

Jesu ɓla ər ndula gɨ Mari ii tɨ Magdala

Mat 28.9-10; Mrk 16.9-11

11Mari lor ndog na ngalɨm ər wo cḛy tɨ bayri. Gorne ər wo cḛy gɨna, ər gaagɨ ər sul tɨ galɨm hul ləg. 12Ər ləg Ndɨla malayka-a tɨ ndidi. A wur ngɔmi ɓɔr. A ti tɨ un ne a ɗo Jesu na ulu tɨ nin. Ɓudu ti tɨ ər sul la ɓudu tɨ ər ɗəygɨ la. 13Ndɨla na malayka-a ɓiri Mari: «Kəyjaa əm wo cḛy a?» Ər duga gɨ a: «A jul ən Baali, ən una un ne a ɗo ər tɨ nin lo.»

14Gorne ər wo ja jaa tɨ ər mu ɗang gɨna, ər yiga ər ndula la ər ləg Jesu. Lɛ ər una ɓə tɨ Jesu lo bad. 15Jesu ɓiri ər: «Kəyjaa əm wo cḛy a? Ja jo əm wo taam a?» Mari ilgɨ ɓə yḭr tɨ wo tɨ waal waay, la ər ɓiri ər: «Jo tɨ yim jo əm so ər a, ɓla gɨ ən un ne əm ɗo ər tɨ nin, ən ɓə saal ər sula.» 16Jesu soon ər: «Mari!» Ər yiga ər ji la, ər ja gɨ ər jaa na hebrə gṵ: «Rabbuni!» Ne ji ɓə Wo tɨ wa̰y ɓla. 17Jesu ja gɨ ər «Ka ən ndula dula lo, kəysul ən ɗɔl tɨ ən Ba ndɔ tɨ ndal lo ɗang. Lɛ əm si, əm ja gɨ ən ɓungɨ ɓə ən wo saal tɨ ən ba ne tɨ i Ba la ndɔ, ən wo saal tɨ ən Ndɨla ne tɨ i Ndɨla la ndɔ.» 18Mari tɨ Magdala si tɨ Jesu na bi tɨ wa̰y edɨ ndɔ la ər ja gɨ a: «Ən ləg Baali!» La ər jul gɨ a jaa ne ər ja gɨ ər lɔ.

Jesu ɓla gɨ ər bi ər ndula

Mat 28.16-20; Mrk 16.14-18; Luk 24.36-49

19Jesu na bi tɨ wa̰y edɨ tay paa na aad na jeel. A hul limu na lakelele, kəysul a oy gɨ Juyb-a na woom. Jesu wag lor tɨ a daan. Ər ja gɨ a: «Ka lapya ti na i!» 20Gorne ər ja jaa ne tong gɨna, ər ɓla gɨ a ər daa la ər taal la. Jesu na bi tɨ wa̰y edɨ ka ndula laar gorne a ləg a Baali. 21Jesu ja gɨ a cam: «Ka lapya ti na i! Kuna ən Ba toon ən yin kaw ən ton i tɨ dunya̰ hul.» 22Tɨ jaa ne bəgri, ər boor saaw tɨ a sul la ər ja gɨ a: «Yḭ ko Ndɨla laal tɨ i ndɔ. 23Bi ton i hul ɗina tɨ a ɓijim sul a ɓə hul ɗina tina. Lɛ bi ne i hul ɗina tɨ a ɓijim sul lo a, a ɓə hul ɗina tina lo la.»

Jesu a na Tomas

24Gorne Jesu wag tɨ a sul, Tomas ne a soon ər ndil ɓə Didim ne ji ɓə ho̰ni teni wo daan. 25Jesu na bi tɨ wa̰y edɨ tapeer ja gɨ ər: «Yini ləg Baali.» Lɛ Tomas ja gɨ a: «Jo ən ləg njel na tulɔ tɨ ər daa lo la, jo ən wur ən daakangɨ tɨ njel gor la, ən kay ən daa tɨ ər taal ne ten hura lo la gɨna, ən ɓə hul kula lo.»

26Na nja laad tɨ pla Jesu na bi tɨ wa̰y edɨ tay peer tɨ li hul cam. Ɗa̰y ne Tomas wo tɨ a daan. A hul limu na lakelele. Jesu hina la ər lor tɨ a daan. Ər ja gɨ a: «Ka lapya ti na i!» 27La ər ja gɨ Tomas: «Wur əm daakangɨ le, əm ləg ən daa, wur əm daa tɨ ən taal lag la əm mugla əm jaa gaglə, lɛ əm ko hul.» 28Tomas duga gɨ ər: «Ən Baali la ən Ndɨla la!» 29Jesu ja gɨ ər: «Əm ko hul kəysul əm ləg ən. Ndula laar gɨ bi ton ləg lo lɛ a ko hul.»

Kəyjaa a kya̰ maktub ne a

30Jesu ka mum ne ɓɔrji dɨbla tɨ ər bi kwi, lɛ a kya̰ tɨ maktub ne hul gun lo. 31Lɛ ton a kya̰ gɨ i nɨ ka yḭ ko hul ɓə Jesu tɨ Mesi la, Yḭr tɨ Ndɨla na ɓa̰ la. Jo yḭ ko i hul gɨna, yḭ ɓə tɨm jili na kwi tina na ər ndil.

Currently Selected:

Ja̰ 20: nie

Highlight

Copy