Luk 16
16
Jaa lar tuna wo tɨ wa̰y tɨ tina ɓaw na jicina
1Jesu ja gɨ ər bi tɨ wa̰y edɨ «Wo tɨ waani paa na wo tɨ ər mum tɨ tina ɓaw ɓudu, bi hina ja gɨ ər ɓə ər wo tɨ mum ɓaw yṵga ər mum tɨ tina cad-cad. 2Ər soon ər la ər ɓiri ər: “Kəy jaa jo ən laa tɨ əm sul in a? Jul gɨ ən mum ne əm ɓaw lɔ, kəysul ɗolɔ ndogle, əm lɛm ən mum ɓaw cam lo.” 3Gɨna wo tɨ mum ɓaw ɓiri ər ndɔ: “Ən Baali ɓə ən kun tɨ cida, kəyjo ən ɓə kar a? Jo tɨ waal waay le, ən dwari gaw, saal wa̰y ndɔri le tɨ kaar. 4Ay! Ən una wa̰y ne ən ɓə kar ta bi ɓə ən par tɨ a ndɔ ɗa̰y ne ən Baali ɓə ən kun tɨ cida!” 5Ər soon ər Baali na bi tɨ ho̰ni ɓudu na ɓudu. Ər ja gɨ wo ne toni mani: “Ən Baali na hula ti tɨ waa wo tɨ əm sul a?” 6Ər duga gɨ ər: “Olib na nɨm ɓwal aru.” Wo tɨ mum ɓaw ja gɨ ər: “Ko əm maktub tɨ hula, əm ti tɨ lɔr le, tung əm ndɔ, əm kya̰ ɓwal dug mi.” 7Ər ja gɨ wo paa cam: “Əm maan ti tɨ waa a?” Ər duga gɨ ər: “Gembe bɔg aru.” Ər ja gɨ ər: “Ko əm maktub tɨ hula, əm kya̰ ɓɔg dug marta.” 8La Baali bɛ gɨ wo tɨ ər mum tɨ tina ɓaw ɓijim ne taan kəysul ər na mani tɨ jicina tɨ na mum ne kar. Tɨ in jo, bi tɨ dunya̰ le una mum mani tɨ kar gɨ peer ura bi tɨ un ndeeri.
Gursu ne wo bi tan la mum tɨ tina na ɗa̰ygor la
9«Tɨ ɓari! Yin, ən ja gɨ i: Yḭ ka paa kɔr par na gursu ne wo bi tan ndogle lo, nejo gorne dunya̰ mu ɓə tong la gursu ne ɓə tong la gɨna, peer korgɨ ne ɓə i par tɨ a ndɔ tɨ ndɨla sul tɨ un ne yḭ ɓə tɨm na kwi. 10Wo ne a ko ər hul tɨ wa̰y ɓa̰ sul, a ɓə ər hul kula tɨ wa̰y ɗəng sul la. Lɛ wo ne ti tugla tɨ wa̰y ɓa̰ hul lo, ɓə tɨm tugla tɨ wa̰y ɗəng hul lo la. 11Jo a ko i hul tɨ wani ne wo bi tan sul lo a, ka waa ta Ndɨla ɓə gɨ i wani ne ɗa̰ygor ɗoli a? 12Jo a ko i hul tɨ i peer na mum ɓaw lo a, jaa jo ɓə gɨ i ne tuna i sul naa a?
13«Wo tɨ cada ɓə lɛm bələgɨ tɨ ndidi cida kar lo, kəysul ər ɓə ɓudu kumkar la ne ɓudu koor la, ɓee ər ɓə ər ndula kay na wo ɓudu, lɛ ər ɓə wo ɓudu ləg na wa̰y kar lo bad. Wo ɓudu ɓə cida kar gɨ Ndɨla la gɨ gursu la lo.»
Jesu peer Parisyḛ-a
Mat 11.12; Mrk 10.11
14Parisyḛ-a laa jaa ne. A ɗolɔ tɨ Jesu siri kar kəysul a taam gursu nari. 15Jesu ja gɨ a: «Yḭ ka i ndɔ kuna bi tugla tɨ bi ji, lɛ Ndɨla una i ilgɨ. Kəysul wa̰y ne bi taam nari tɨ kɔb tɨ Ndɨla kwi.
16«Gṵ hul ne Moys kya̰ la jaa ne Ndɨla na nebi kya̰ la an kuri na Ja̰ Batis na lula sul, ɗolɔ na lula sul ɗay, a ɗo beel tɨ Jaa Ndinimani tuna Ndɨla na waan sul, la jakaw taam ul mu na dwari tɨ wur tɨ nin.
17«Nəgri sul la ndɨla sul la, ɓə ɗira tɨ daamu, lɛ Ndɨla na jaa taal jang ɓa̰ in ɓə tɨba lo.
18«Wo tɨ lay ne kun ər ii lɛ ər ko paa jak gɨna; ər ka juna la wo ne ko ii ne a kun ka juna la.
Jaa lar tuna wo tɨ wani la Lajar la sul
19«Wo tɨ wani paa wo nin, ər wur ngɔmi ne towol dɨbla la ndinimani la. Ər ti ɓari la, ər twi wa̰y ndinimani na ɗa̰y sul la. 20Wo tɨ ndemni ne ndil ɓə Lajar, ne ər ndula jun na hori ley tɨ ər jaal mu. 21Ər taam tudi burumi ne tɨba tɨ Baali na tabul lɔ tɨ tudi. lɛ Səw kaw hina lebɨn ər hori la. 22Wo tɨ ndemni ne uy. Malayka-a hina a so ər, a si na ər tɨ Abraham taal. Wo tɨ wani ne kaw uy la. A bili ər. 23Ər ten pɛw tɨ bi tɨ ulu na un. Ər huma ər ji gɨna, ər ləg Abraham ɓag na Lajar tɨ ər taal. 24Gɨna, ər ka ngɔr: “Ən ba Abraham, ləg ən jindemni, ton Lajar ka ər wur ər daaka̰ngɨ mu tɨ ndu daan ər do na ən ndila kəysul ən ten pɛw nari tɨ laa daan.” 25Lɛ Abraham duga gɨ ər ɓə: “Ən ɓa̰, jani əm ho̰ni tɨ mum tɨ tina dɨbla ne toni əm ti tɨ daan lɛ Lajar ten pɛw, ndogle, ər hul ɗina ər, lɛ yim, əm ten pɛw. 26La tulɔ baw ɗəng wo tɨ i daan. Nejo wo ɓə lɛm o̰ tɨ i ndɔ saal tɨ i ndɔ lo la wo ɓə lɛm o̰ tɨ i ndɔ hina tɨ yi ndɔ lo la.”
27«Wo tɨ wani ja: “Jo tɨ in gɨna, ən ka gɨ əm kɔgri, ən ba, ton Lajar tɨ ən ba na gə̰y, 28kəysul ən ɓungɨ tɨ ɓərgɨ tɨ luni wo nin, ka ər peer-a nɨ ka, a ka hina tɨ un tɨ pɛw ne lo.” 29Abraham duga gɨ ər: “Əm ɓungɨ na gṵ hul ne Moys kya̰ la, jaa ne Ndɨla na nebi kya̰ la, ka a laa a jaa!” 30Wo tɨ wani ja: “M-m, ən ba Abraham, lɛ jo wo wag tɨ bi ulu daan ja gɨ a gɨna, a ɓə a ɓijim lɔ nɨm.” 31Lɛ Abraham ja gɨ ər: “Jo a laa Moys na gṵ hul lo la, Ndɨla na nebi jaa lo la gɨna, a ɓə lɛm wo ne duga ti jili hul kula lo la.”»
Currently Selected:
Luk 16: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
