Matyo 27

Jesu wo Pilat kwi

Mrk 15.1; Luk 23.1-2; Ja̰ 19.28-32

1Na gaan cɔg, bi tɨ hima ɓina na woom gun la, bi nii tɨ bi sul sula la, a so a gṵ tɨ jaa tɨ ulu kay tɨ Jesu sul. 2A ɓəw ər a hina na ər, a naa ər gɨ guberno̰ Pilat ne tɨ wo tɨ Rom.

Judas na ulu

Mrk 1.18-19

3Gorne Judas ne so Jesu sul, laa ɓə a kay jaa tɨ ulu tɨ Jesu sul gɨna, ər ndɨnga ər ndɔ la ər duga na sele dug-meta ər naa gɨ bi tɨ hima ɓina na woom la bi nii tɨ bi sul la. 4Ər ja gɨ a: «Ən ka ɓijim kəysul ən so wo mu beel sul!» Lɛ a duga gɨ ər: «Wa̰y ɓudu ne usu i in teni, tɨ əm jaa!» 5Gɨna Judas ɗoli sele tɨ Ndɨla li taal lɛ ər si ər ɗo suwal. 6Bi tɨ hima ɓina na woom to sele la a ja ɓə: «Ī gṵ hul naa gɨ ī ul mu tɨ sele ne bɛ tɨ bra̰ tɨ Ndɨla maan hul lo kəysul, tɨ sele tɨ hima.» 7Gorne a laa paa mu tɨ gursu ne sul gɨna, a si a huna na wo tɨ baay mura na waal tɨ na bi ɓoy bili. 8Nejo marway kakamle a soon waal ne ndil ɓə: «waal tɨ hima.» 9Gɨna jaa ne Ndɨla na nebi Jeremi ja tɨ kuri. Ər ja ɓə: «A so sele dug-meta a huna na ər kəysul tɨ towol ne ɓimi tɨ Israhel kay tɨ ər sul. 10La a huna na wo tɨ baay mura na waal, kuna Baali so na ər gṵ.»

Guberno̰ Pilat ɓiri Jesu jaa

Mrk 15.2-5; Luk 2.5,13-15; Ja̰ 18.28-33, 19.4-6

11Jesu lor tɨ guberno̰ Pilat kwi. Guberno̰ ɓiri ər jaa: «Yim tɨ wa̰ay tɨ Juyb-a maan a?» Jesu duga gɨ ər: «Jo əm ja tɨ əm mu ɗay.» 12Lɛ tuna jaa ne bi tɨ hima ɓina la woom tɨ bi sul kay tɨ ər sul gɨna, ər duga gɨ a jaa ɓudu tɨ sul lo. 13Gɨna Pilat ja gɨ ər: «Əm laa jaa ne a kay tɨ əm sul lo a?» 14Ne kaw ər duga gɨ ər jaa ɓudu in tɨ sul lo. Jaa ne ɓɔr Pilat ji nari. 15Na Juyb-a na pya̰ tɨ Pak kar na an sul, guberno̰ nɨm wo tɨ dangay ɓudu ne bi hul taam tɨ ndal. 16Na lula sul ɗay, wo ɓudu ne ndil cḛy nari wo tɨ dangay, ər ndil tɨ Jesu Barabas. 17Pilat ləg bi dɨbla tay peer gɨna, ər ɓiri a: «Ja jo yḭ taam ɓə ən nɨm gɨ i tɨ ndal a? Barabas ɓee Jesu ne a soon ər Mesi a?» 18Kəysul ər una ɓə bi tɨ hima ɓina na woom wur Jesu tɨ ər daa na wuri ji. 19Gorne Pilat ti tɨ goblə tɨ sarya kar sul, ər ii toon jaa gɨ ər: «Ka əm ndɔ wur tɨ ɓər tugla ne na jaa daan lo. Kəysul, kakamle, nenɨm ɓɔr ən ji nari tuna ər sul.» 20Bi tɨ hima ɓina na woom la, bi tɨ bi sul sula la, a do bi lɔ ka a ɓiri Barabas lɛ ka a hun Jesu. 21Guberno̰ Pilat duga so jaa ɓiri a: «Bi tɨ ndidi ne daan jaa jo yḭ taam ɓə ən nɨm ər tɨ ndal gɨ i a?» A duga gɨ ər: «Barabas jo!» 22Pilat ɓiri a cam: «Kəyjo i taam ɓə ən ka na Jesu ne i soon ər Krist a?» La bi gun ka ngɔr cam: «Əm ɗɨb ər tɨ tɨla tɨ tərgɨ sul!» 23Pilat ɓiri a cam: «Kəy ɓijim jo ər ka a?» Lɛ a ka ngɔr na dwari cam: «Əm ɗɨb ər tɨ tɨla tɨ tərgɨ sul!» 24Na lula sul ɗay, Pilat una wa̰y ne ər ɓə kar lo, lɛ bi na ngɔr jo ura dwari, gɨna, ər so ndu, ər ugu ər daa tɨ bi kwi la ər ja ɓə: «Ɓər tugla ne na hima ɓə tɨba tɨ ən sul lo, lɛ tuna yḭ may na sul!» 25Bi gun ko mu ɓə: «Ka ɓər ne na hima tɨba tɨ i sul la, tɨ i ɓimi sul la!» 26Gɨna Pilat nɨm Barabas ka bi ndula laar a la, ər naa gṵ ka a ɗɨb Jesu na ngaar la, ta a ɗɨb ər tɨ tɨla tɨ tərgɨ sul.

A ka Jesu siri

Mrk 15.16-20; Ja̰ 19.2-3

27Gɨna, Pilat na əli si na Jesu tɨ guberno̰ na bang hul. Tɨ un ɗay, əli kur gun tay peer tɨ ər sul. 28A jul ər sər le a wur gɨ ər sər ɗəng hiina.#27.28 Sər gol hiina tɨ woom na sər. 29A hin jugɔ na humi a wur tɨ ər sul la, a wur gɨ ər uun#27.29 Uun ne ti kuna wa̰ay na ngurum. tɨ ər daa tɨ lɨma sul. A ha̰wni a ɗa̰y ndurmu tɨ ər kwi a ka ər siri. A ja ɓə: «Lapya Wa̰ay tɨ Juyb-a maan!» 30A tɨbɨn hirgɨ tɨ ər ji la a so uun a ɗɨb na ər sul la. 31Gorne a ka ər siri gun gɨna, a jul sər ɗəng tɨ ər ndɔ a yɛr na may sər, ta a si na ər a ɗɨb ər tɨ tɨla tɨ tərgɨ sul.

Jesu wo tɨ tɨla tɨ tərgɨ sul

Mrk 15.21-32; Luk 23.26-43; Ja̰ 19.17-27

32Gorne əli wag tɨ lɔr mu tɨ bayri gɨna, a ten ɓər paa ne tɨ wo tɨ Siren. Ər ndil ɓə Simo̰. A par ər na dwari nɨ ər yəg Jesu na tɨla tɨ tərgɨ. 33Gorne a an tɨ un ne a soon ɓə Golgota, ne ji ɓə «sul kṵuna» gɨna, 34a naa gɨ Jesu ham bḛ ne a tang na kuma somni#27.34 Wa̰y yḭḭ ne ka bi tɨ dangay pɛw ɗina ɓa̰ndḛni.. Jesu lang, lɛ ər ɓini yḭḭ. 35Gorne a ɗɨb ər tɨ tɨla tɨ tərgɨ sul gɨna, a ɓaan gɨ peer ər sərgɨ a toy na mbara. 36La a ti ɗay, a ɓaw ər. 37A ɗɨb baar tɨ ər sul tɨ ndal, a kya̰ na jaa ji ne a hun na ər tɨ nin. A ja ɓə: «Tɨ Jesu, Juyb-a na Wa̰ay.» 38A ɗɨb bi tɨ ɓijim kar tɨ ndidi na ər tɨ tɨla tɨ tərgɨ sul la. Ɓudu tɨ ər lɨma sul la, paa tɨ ər gɨlay sul la.

39-40Bi tɨ ɗira tɨ ul sul ɓurum ər la, a ɗɨb a sul a ja ɓə: «Yim ne əm ja ɓə əm ɓə Ndɨla li yunga lɛ əm ɓə kaaw tɨ ɗa̰y tɨ tedi hul ma? Jo əm tɨ Ndɨla Ɓa̰ kuri gɨna, əm jir tɨ tɨla tɨ tərgɨ sul.» 41Bi tɨ hima ɓina na woom la, bi tɨ gṵ hul ɓla la, bi nii la, a ka Jesu siri kuna paa ne la. A ja gɨ peer ɓə: 42«Ər nen bi lɛ ər lɛm ər ndula nina lo! Yḭr ne ər tɨ Israhel na wa̰ay. Ndogle, ka ər jir tɨ tɨla tɨ tərgɨ sul ka yini ləg gɨna, yini ɓə ər hul kula la! 43Ər ko Ndɨla hul, ka Ndɨla nen ər ndogle, jo ər ka ər kum kuri, kəysul ər ja ɓə: “Yin tɨ Ndɨla ɓa̰!”» 44Bi tɨ sugi ne a ɗɨb a tɨ tɨla tɨ tərgɨ sul tɨ Jesu taal kaw, a ɓurum ər kuna paa ne la.

Jesu na ulu

Mrk 15.33-41; Luk 23.44-49; Ja̰ 19.28-30

45Na tili, un gun tɨ nəgri sul duga syɛl marway lula tɨ tedi tɨ jeel. 46Na lula tɨ tedi, Jesu ka ngɔr tɨ ndal, ər ja: «Eli, Eli, lama sapaktani.» Ne ji ɓə: «Ən Ndɨla, ən Ndɨla, kəyja əm ɓini ən a?» 47Bi tapeer ne lor tɨ un ɗay, a ja ɓə: «Yḭ laa, ər soon Eli!» 48Tɨ daamu wo paa tɨ a daan yey si so sipo̰ ər wur tɨ ndu man ji ər kay tɨ uun mu ər hina ər kay tɨ Jesu mu ka ər njum. 49Lɛ tapeer ja ɓə: «A̰y ɓam, ka i ləg pay Eli ɓə hina ər jir tɨ tɨla tɨ tərgɨ sul a?»

50Lɛ Jesu, ɗo ngɔr tɨ ndal cam, la ər uy#27.50 Ər uy lɛ ər ulu tɨ kuna bi tɨ ndidi ne lor tɨ ər taal maan lo la.. 51Na lula sul ɗay, sər ɗəng ne a tung na Ndɨla li daan da̰r tɨ ndal marway jir tɨ lɔr. Nəgri sul dig la, kurgɨ ɓerɨm la. 52Ngəlɨm mu təng la bi ndeeri tɨ Ndɨla maan ne a uy toni a wag tɨ ngalɨm. 53A wag tɨ ngalɨm a wur tɨ Jerusalɛm lɔr ndeeri hul gorne Jesu wag tɨ ngalɨm. A ɓla a ndɔ gɨ bi dɨbla. 54Gorne əli aru na wa̰ay la bi ton ɓaw Jesu, a ləg nəgri sul dig la mum gun ne ka paa la gɨna, ayri ka a nari, la a ja ɓə: «Kuri, ɓər ne tɨ Ndɨla na ɓa̰!»

Josep bili Jesu

Mrk 15.42-47; Luk 23.50-56; Ja̰ 19.38-42

55Gorne a lor a wo ulu bili, aa tapeer dɨbla lor ɓag ləg a. Tɨ aa ton an Jesu lɔ ɓag tɨ Galile pi la a ka gɨ ər cida la. 56Tɨ a daan, Mari tɨ Magdala la, Mari, ne tɨ Jak a na Josep-a na̰ la, Jebede na ɓimi na na̰ la. 57Na jeel wo tɨ wani paa ndil ɓə Josep hina. Yḭr tɨ wo tɨ lɔr ɗəng tɨ Arimate. Yḭr kaw ər tɨ Jesu na wo tɨ tomni la. 58Ɓər ne si tɨ guberno̰ Pilat maan tɨ Jesu na ulu ɓiri. Pilat naa gṵ ka a naa gɨ ər Jesu na ulu. 59Gorne Josep ko Jesu na ulu gɨna, ər bini ər na sər bor kar-kar la, 60ər bili ər tɨ may ngalɨm ɓaani ne a yel tɨ nan hul. Ər ɓɨrgɨ kura ɗəng, ər hul na ngalɨm mu, la ər si. 61Mari tɨ Magdala la, Mari ne paa la a wo nin. A ti tɨ nəgri, a yiga a ji tɨ ngalɨm sul.

Ngalɨm na ɓaw

62Na ɗa̰y tɨ plaa, ne tɨ ɗa̰y tɨ ndɔ kaaw tɨ saw bɛ bəgri, bi tɨ hima ɓina na woom la Parisyḛ-a la a tay peer gun tɨ Pilat maan. 63A ja ɓə: «I Baali, yini jani i ho̰ni tɨ wo tɨ ɓura ne sul gorne ɗang ər ti jili, ər ja ɓə: “Na ɗa̰y tɨ tedi tɨ ər ulu bəgri, ən ɓə duga wag tɨm jili.” 64Naa əm gṵ ka əli ɓaw ngalɨm marway ɗa̰y tɨ tedi hul. Jo in lo a, ər bi tɨ wa̰y edɨ ɓə ər ulu sila la a ɓə gɨ bi ja: “Ər duga ər wag tɨ ngalɨm!” Jo in lo gɨna, ɓura tɨ plaa ɓə ne tɨ toni ura ara!» 65Pilat duga gɨ a: «Yḭ na əli wo nin, yḭ si i ɓaw ngalɨm sul kuna i hul taam!» 66A si a kay ngalɨm tali la a kay kura tɨ mu kag-kag. La ta a kay bi tɨ ɓaw tɨ sul la.

Currently Selected:

Matyo 27: nie

Highlight

Copy