متّی 11
11
یُوحنّا بپتِسمہ ݙیوَݨ آلا اَتے یِسُوع
(رَلدا مِلدا حوالہ: لُوقا 7:18-35)
1جیویں ای یِسُوع اپݨے ٻارھاں خاص شاگِردئیں کُوں ہِدایتاں ݙے ݙِتیاں تاں وَل او اُتھاؤں نال دے شہریں دو چلیا ڳیا تاں جو اُتھاں تعلیم ݙیوے اَتے پرچار کرے۔
یُوحنّا بپتِسمہ ݙیوَݨ آلے دے شاگِرد
(رَلدا مِلدا حوالہ: لُوقا 7:18-35)
2جݙّاں یُوحنّا بپتِسمہ ݙیوَݨ آلا قید اِچ ہا اُوں لوکیں کنُوں مسِیح دے کَمیں بارے سُݨیا تاں اُوں اپݨے کُجھ شاگِردئیں کُوں اُوندے کولھ بھیڄیا۔ 3اُنہیں یِسُوع کنُوں پُچھیا، ”جَیں آوَݨا ہا او تُوں ہَئیِں یا اَساں کہیں ٻئے دا بَھالا کروں؟“ 4یِسُوع اُنہیں کُوں جواب ݙِتا، ”جیرھا کُجھ تُساں سُݨدو اَتے ݙیہدو یُوحنّا کُوں وَنڄ ݙساؤ، 5جو اَندھے ݙیہدِن اَتے مَنڈے ٹُردے پِھردِن اَتے کوڑھی پاک صاف کیتے ویندِن اَتے ݙورے سُݨدِن اَتے مُردئیں کُوں زندہ کیتا ویندے اَتے غریبیں کُوں خُوشخبری سُݨائی ویندی ہے۔ 6اَتے چَنڳا ہے او جیرھا میݙے بارے شک نَئیِں کریندا۔“ 7جیرھے ویلے اُوندے شاگِرد ڳئے تاں یِسُوع بھِیڑ کُوں یُوحنّا بارے آکھݨ لڳا، ”تُساں بَربیابان اِچ یُوحنّا کولھ کیا ݙیکھݨ کیتے ڳئے ہاوے؟ کیا ہِلدے ہوئے کانے کُوں ݙیکھݨ ڳئے ہاوے؟ 8تاں وَل کیا ݙیکھݨ ڳئے ہاوے؟ کیا وَدھائے کپڑے پاتی وَدے بندے کُوں ݙیکھݨ ڳئے ہاوے؟ ݙیکھو وَدھائے کپڑے آلے تاں بادشاہیں وانگوں مَحلیں اِچ رَہندِن۔ 9وَل تُساں کیا ݙیکھݨ ڳئے ہاوے؟ کیا ہِک نبی کُوں؟ بیشک، مَیں تُہاکُوں اَہداں اصل اِچ نبی کنُوں وی وَݙّے کُوں۔ 10یُوحنّا دے بارے ای پاک کلام اِچ لِکھیا لاتھے،
’ݙیکھ مَیں اپݨے پیغمبر کُوں تیݙے اَڳوں بھیڄینداں جیرھا تیݙے کیتے رَستہ تیار کریسی۔‘
11مَیں تُہاکُوں سچّ اَہداں جو جیرھے اَڄ تَئِیں ڄائین ہَن اُنہیں اِچوں یُوحنّا کنُوں وَݙّا کُوئی کَینی۔ وَل وی اَسمان دی بادشاہی اِچ سب کنُوں نِکا بندہ اُوں کنُوں وَݙّا ہے۔ 12یُوحنّا دے پیغام سُݨاوݨ کنُوں گھِن کرائیں اَڄ تَئیِں اَسمان دی بادشاہی اُتے حملے تھِیندے ریہے اَتے ݙاڈھے اُوندے اُتے قابض تھی ویندِن۔ 13کیوں جو نبیئیں اَتے تورات اِچ یُوحنّا تَئیِں اَسمان دی بادشاہت بارے پیش گوئی کیتی ڳئی ہے۔ 14جے تُساں اُنہیں دے پیغام کُوں مَنݨ کیتے راضی ہِوے تاں ایہ اِیمان رکھو جو یُوحنّا ای اِیلیّاہ ہے جَیں آوَݨا ہا۔ 15کَن لا کرائیں سݨو اَتے سمجھو۔
16مَیں اِیں پیڑھی کُوں کَیندے نال رَلاواں، جیرھے بازار اِچ ٻیٹھے اُنہیں ٻالیں وانگوں ہِن جیرھے اپݨے سنگتئِیں کُوں سَݙ مار کرائیں اَہدِن، 17اَساں تُہاݙے کیتے شرنائی وَڄیندے ریہے پَر تُساں نہ نّچے وَل اَساں ماتمی دُھن وَڄیندے ریہے پَر تُساں وَیݨ نہ کیتے۔ 18جݙّاں یُوحنّا آیا او کھندا پِیندا نہ ہا اَتے لوک اَہدِے ہَن، ’اُوندے اِچ بَدرُوح ہے۔‘ 19پَر جݙّاں اِبنِآدم یعنی مَیں آیاں تاں لوک اَہدِن، ’ݙیکھو ایہ تاں پیٹو اَتے شرابی ہے، مصُول گھِنݨ آلئیں اَتے گُنہگاریں دا سنگتی وی ہے،‘ پَر خُدا دی حِکمت اُوندے کَمیں کنُوں ثابت تھِیندی ہے۔“
توباں نہ کرَݨ آلئیں بارے یِسُوع دا فرمان
(رَلدا مِلدا حوالہ: لُوقا 10:13-15)
20اِیندے بعد یِسُوع اُنہیں شہریں دے لوکیں کُوں اپݨے گناہیں کنُوں توباں نہ کرَݨ تے شرم ݙِیواوَݨ لڳا جِتھاں اُوں ٻَہُوں سارے مُعجِزے کیتے ہَن۔ 21”اَے شہر خرازین اَتے شہر بَیتصیدا دے رَہݨ آلو! تُہاݙے اُتے افسوس، جیرھے مُعجِزے تُہاݙے شہریں اِچ تھئین جے او شہر صُور اَتے شہر صَیدا اِچ تھئے ہوندے تاں اُتھوں دے لوک کݙاں دا ٹاٹ دا جوڑا #11:21 ٹاٹ دا جوڑا اُوں زمانے اِچ خُدا اَڳوں توباں تائب تھِیوَن دا نشان ہا۔ پا کرائیں اَتے سِر اِچ سُئوا#11:21 سِر اِچ سُئوا اُوں زمانے اِچ لوک ٻَہُوں ݙُکھ دا اِظہار اِیویں کریندِن ہَن۔ سَٹ کرائیں اپݨے گناہیں کنُوں توباں کر گھِندے۔ 22اَتے مَیں تُہاکُوں سچّ اَہداں جو مَحشر دے ݙینہہ شہر صُور اَتے شہر صَیدا دے لوکیں اُتے خُدا تُہاݙے کنُوں ڈھیر رَحم کریسی۔ 23اَتے اَے شہر کفرنحوم! کیا تَیکُوں اَسمان جِتنا اُچا رُتبہ ݙِتا ویسی؟ اصلوں کَینا! تُوں تاں تَلے پاتال اِچ لَہا ݙِتا ویسیں، جے مُلک سدُوم اِچ او مُعجِزے کیتے ویندے جیرھے تیݙے اِچ کیتے ڳئین تاں او شہر اَڄ تَئیِں قائم رَہندا۔ 24پَر مَیں تُہاکُوں سچّ اَہداں جو مَحشر دے ݙینہہ مُلک سدُوم دے لوکیں اُتے خُدا تُہاݙے کنُوں ڈھیر رَحم کریسی۔“
یِسُوع کولھ اَرام مِلدے
(رَلدا مِلدا حوالہ: لُوقا 10:21-22)
25اُوں ویلے یِسُوع آکھݨ لڳا، ”اَے اَسمانی باپ! اَسمان اَتے زمین دے مالک مَیں تیݙی حمدوثنا کرینداں جو تَیں ایہ ڳالھیں سیاݨئیں اَتے عقل مند لوکیں کنُوں لُکا کرائیں عام لوکیں اُتے ظاہر کیتیاں۔ 26جِیا اَے اَسمانی باپ! ایہ سارا کُجھ تَیں اپݨی رضا اَتے خُشی نال کیتے۔“
27اَتے یِسُوع اُنہیں کُوں آکھیا، ”میݙے اَسمانی باپ مَیکُوں کُل اِختیار ݙِتے اَتے اَسمانی باپ دے سِوا پُتر کُوں کُوئی نَئیِں ڄاݨدا اَتے پُتر دے سِوا اَتے اُنہیں لوکیں دے جنہیں اُتے پُتر اپݨے اَسمانی باپ کُوں ظاہر کرَݨ چاہندے اَسمانی باپ کُوں کوئی نَئیِں ڄاݨدا۔ 28اَے تَھکے تُرٹے اَتے بار تَلے دٻیڄئے لوکو میݙے کولھ آؤ مَیں تُہاکُوں اَرام ݙیساں۔ 29میݙی تعلیم تے اِیویں چلو جیویں ݙاند پنڄالی اِچ واہندے اَتے مَیں کنُوں سِکھو کیوں جو مَیں ترس کرَݨ آلا اَتے نرم دِل ہاں تاں تُہاݙی جانیں کُوں اَرام مِلسی۔ 30کیوں جو میݙی تعلیم دی پنڄالی کُولی اَتے ہولی ہے۔“
Currently Selected:
متّی 11: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
