متّی 16
16
فرِیسی اَتے صدوقی، یِسُوع کنُوں نِشان مَنگدِن
(رَلدا مِلدا حوالہ: مرقس 8:11-13؛ لُوقا 12:54-56)
1اَتے کُجھ فرِیسیئیں اَتے صدوقیئیں یِسُوع کولھ آ کرائیں اُونکُوں پھساوَݨ کیتے پُچھیا جو ساکُوں کُوئی اِینجھا نِشان ݙِکھا جِتھوں پتا چلے جو تُوں اَسمان کنُوں اَئیں۔ 2پَر اُوں اُنہیں کُوں جواب ݙِتا، ”جݙّاں تُساں سِجھ لَہندئیں ویلے اَسمان کُوں ٻَلدی بھاہ وانگوں ݙیہدو تاں اَہدو،’موسم چَنڳاں ہوسی۔‘ 3اَتے سِجھ اُبھردئیں ویلے اَسمان کُوں ٻَلدی بھاہ وانگوں اَتے کُجھ مَلہار وی تھئی ݙیکھ کرائیں’اَہدو جو اَڄ اَندھاری گُھلسی‘ اِیں طرحاں تُساں اَسمان دی حالت ݙیکھ کرائیں موسم دا پتا لا گھِندو پَر زمانے دی نِشانیاں ݙیکھ کرائیں کیوں نَئیِں سمجھدے جو کینجھا ویلا آ ڳئے۔ 4اِیں پیڑھی دے لوک بُرے اَتے نافرمان ہِن۔ ایہ میݙے کنُوں نِشان مَنگدِن پَر اِنہیں کُوں یُوناہ نبی آلے نِشان دے سِوا ٻِیا کُوئی نِشان نہ ݙِتا ویسی۔“ ایہ آکھ کرائیں یِسُوع اُنہیں کُوں چھوڑ کرائیں لڳا ڳیا۔
یِسُوع فرِیسیئیں اَتے صدوقیئیں دی تعلیم بارے ہُشیار کریندِن
(رَلدا مِلدا حوالہ: مرقس 8:14-21)
5ہِک دفعہ شاگِرد جھیل دے پَرلے کنارے ویندئیں ویلے اپݨے نال روٹی چاوَݨ بُھل ڳئے۔ 6تاں یِسُوع اُنہیں کُوں چِتا کرائیں آکھیا، ”فرِیسیئیں اَتے صدوقیئیں دے خمیر کنُوں ہُشیار رَواہے۔“ 7اُنہیں خمیر بارے یِسُوع دا اِشارہ نہ سمجھیا وَل او آپت اِچ بحث کرَݨ لڳ پئے، ”اَساں روٹی اپݨے نال نَئیِں گھِن آئے۔“ 8یِسُوع ایہ ڄاݨدئیں ہوئیں جو او کیا بحث کریندے پَئیِن، پُچھیا، ”اَے بےیقینو! تُساں آپت اِچ کیوں بحث کریندے پئے ہِوے جو ساݙے کولھ روٹی کَینی؟ 9کیا ہُݨ تَئیِں نَئیِں سمجھئے اَتے نہ تُہاکُوں یاد ہے جو مَیں پنج روٹئیں نال پنج ہزار بندئیں کُوں کھاݨا کھوا ݙِتا ہا، اَتے تُساں بچیے ہوئیں ٹُکڑئیں دیاں کتنی ٹوکریاں چاتیاں ہَن؟ 10اَتے سَت روٹئیں نال چار ہزار بندئیں کُوں کھاݨا کھواوَݨ یاد کَینی، اَتے تُساں ٹُکڑئیں دیاں کتنی ٹوکریاں چاتیاں ہَن؟ 11تُساں کیوں نَئیِں سمجھدے جو مَیں تُہاݙے نال روٹی دی ڳالھ نَئیِں پِیا کریندا؟ بلکہ میݙی ڳالھ سُݨو! فرِیسیئیں اَتے صدوقیئیں دے خمیر یعنی تعلیم کنُوں ہُشیار رَواہے۔“ 12اِیندے بعد اُنہیں کُوں سمجھ اَئی جو یِسُوع اُنہیں کُوں روٹی دے خمیر بارے نَئیِں بلکہ فرِیسیئیں اَتے صدوقیئیں دی تعلیم بارے ݙِسیندا پئے۔
یِسُوع دے مسِیحا ہووَن بارے پطرس دا اِقرار
(رَلدا مِلدا حوالہ: مرقس 8:27-30؛ لُوقا 9:18-21)
13جݙّاں یِسُوع قیصریہ فِلپی شہر دے علاقے اِچ آیا تاں اُوں اپݨے شاگِردئیں کنُوں پُچھیا، ”لوک اِبنِآدم کُوں جیرھا مَیں ہاں، کیا اَہدِن؟“ 14اُنہیں جواب ݙِتا، کُجھ اَہدِن جو تُوں یُوحنّا بپتِسمہ ݙیوَݨ آلا ہَئیِں کُجھ ایلیاہ نبی اَتے کُجھ یرمیاہ نبی یا نبیئیں اِچوں کُوئی ہِک۔ 15وَل یِسُوع اُنہیں کنُوں پُچھیا، ”تُساں مَیکُوں کیا سمجھدے ہِوے جو مَیں کون ہاں؟“ 16شمعُون پطرس جواب ݙِتا، ”تُوں زندہ خُدا دا پُتر، مسِیحا ہَئیِں۔“
17یِسُوع جواب ݙِتا، ”اَے یُوناہ دے پُتر شمعُون! تُوں چَنڳاں ہَئیِں کیوں جو ایہ ڳالھ تاں اِنسان دے وہموگمان اِچ وی کائنی پَر ایہ میݙے اَسمانی باپ تیݙے اُتے ظاہر کیتی ہے۔ 18مَیں تَیکُوں پطرس سݙیساں جَیندا مطلب چٹان ہے اَتے مَیں اِیں چٹان اُتے اپݨی کلیسیا بݨیساں جَیں کنُوں موت اَتے پاتال وی نہ جِت سڳسی۔ 19مَیں اَسمان دی بادشاہی دی کُنجیاں تَیکُوں ݙیساں اَتے جیرھا کُجھ تُوں زمین اُتے ٻَدھیسیں او اَسمان اُتے ٻَدھیڄ ویسی اَتے جیرھا کُجھ تُوں زمین اُتے کُھلیسیں او اَسمان اُتے کُھل ویسی۔“ 20اِیندے بعد یِسُوع اپݨے شاگِردئیں کُوں حُکم ݙِتا، ”میݙے مسِیحا ہووَن بارے کہیں کُوں وی نہ ݙسائے۔“
یِسُوع پہلی واری اپݨے ݙُکھیں، موت اَتے زندہ تھِیوَن بارے ݙسیندِن
(رَلدا مِلدا حوالہ: مرقس 8:31—9:1؛ لُوقا 9:22-27)
21اِیندے بعد کنُوں یِسُوع اپݨے شاگِردئیں کُوں صاف صاف ݙساوَݨ لڳا، ”ایہ ضروری ہے جو مَیں شہر یروشلم دو وَنڄاں اَتے اِسرائیلی قوم دے وَݙّیرے، وَݙّے مذہبی پیشوائیں اَتے شرع دے عالمیں کنُوں ٻَہُوں ݙُکھ چاواں اَتے قتل کیتا وَنڄاں اَتے تریجھے ݙینہہ مَیں وَلا زندہ تھی وَنڄاں۔“ 22اَتے پطرس، یِسُوع کنُوں ناراض تھِیندئیں ہوئیں اُونکُوں اَنجھ گھِن ڳیا اَتے آکھیا، ”اَے خُداوند! خُدا نہ کرے تیݙے نال کݙاہیں اِیویں تِھیوے۔“ 23یِسُوع پِچھُوں مُڑ کرائیں پطرس کُوں آکھیا، ”اَے شیطان! میݙی اَکھیں کنُوں پَرے تھی وَنڄ کیوں جو تُوں میݙے کَم کُوں رُوکݨ چاہندیں، کیوں جو تیݙی ایہ سوچ خُدا وَلّوں نَئیِں بلکہ تُوں اِنسان وانگوں سوچیندیں۔“ 24وَل یِسُوع اپݨے شاگِردئیں کُوں آکھیا، ”جیرھا وی میݙے پِچھُوں آوَݨ چاہندے او اپݨی سُولی چاوے یعنی جان ݙِیوَݨ کیتے تیار رَہوے اَتے میݙے پِچھُوں ٹُر پووے۔ 25کیوں جو جیرھا اپݨی جان کُوں بچاوَݨ چاہسی، او ہمیشاں دی حیاتی کُوں ضائع کریسی اَتے جیرھا میݙے کیتے اپݨی جان چَٹ کر ݙیسی او ہمیشاں دی حیاتی پئیسی۔ 26جے کہیں اِنسان کُوں ساری دُنیاں تاں مِل پووے پَر اُوندی اپݨی جان نہ رَہوے تاں کیا فائدہ؟ کیا اِنسان کُجھ وی ݙے کرائیں اپݨی جان وَلا گھِن سڳدے؟ 27پَر جݙّاں اِبنِآدم یعنی مَیں اپݨے اَسمانی باپ دی شان اِچ، فرِشتئیِں دی ڄنج گھِن کرائیں اَوساں، اِیندے بعد مَیں ہر کہیں کُوں اُوندے کیتئیِں ہوئے عملیں دا اجر ݙیساں۔ 28مَیں تُہاکُوں سچّ اَہداں جو اِتھاں کھڑے لوکیں اِچوں کُجھ او تَئیِں کَینا مرسِن جے تَئیِں اِبنِآدم یعنی مَیکُوں اپݨی بادشاہی اِچ اَندے نہ ݙیکھ گھِنن۔“
Currently Selected:
متّی 16: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
