متّی 27
27
گورنر پِیلاطُس دے سامݨے یِسُوع دی پیشی
(رَلدا مِلدا حوالہ: مرقس 15:1؛ لُوقا 23:1-2؛ یُوحنّا 18:28-32)
1ݙینہہ تھِیندئیں ای سارے وَݙّے مذہبی پیشوائیں اَتے قوم دے وَݙّیرئیں آپت اِچ یِسُوع دے خلاف صلاح کیتی جو اُونکُوں مار گھتوں۔ 2او اُونکُوں ٻَدھ کرائیں اُتھوں گھِن ڳئے اَتے رومی گورنر پِیلاطُس دے حوالے کر ݙِتا۔
یہُوداہ اِسکریُوتی خُود کشی کریندے
(رَلدا مِلدا حوالہ: اعمال 1:18-19)
3جݙّاں اُونکُوں پکڑاوَݨ آلے یہُوداہ ایہ ݙِٹھا جو یِسُوع کُوں مجرم بݨا ݙِتا ڳئے تاں اُوں پَچھتا کرائیں چاندی دے تَریہہ سِکّے وَݙّے مذہبی پیشوائیں اَتے قوم دے وَݙّیرئیں کُوں واپس کریندئیں ہوئیں آکھیا، 4”مَیں کنُوں گُناہ تھئے کیوں جو ہِک بےقصُور بندے کُوں پکڑوا چھوڑے اَتے اُونکُوں میݙی وجہ کنُوں سزائے موت تھی ڳئی ہے۔“ پَر اُنہیں جواب ݙِتا، ”ساکُوں کیا؟ ایہ تیݙا مسئلہ ہے۔“ 5یُہوداہ چاندی دے تَریہہ سِکّے ہَیکل اِچ سَٹ تے لڳا ڳیا اَتے وَنڄ کرائیں خُود کُوں پھاسی ݙے ݙِتی۔
6وَݙّے مذہبی پیشوائیں چاندی دے تَریہہ سِکّے چا کرائیں آکھیا، ”ایہ خُون دا مُل ہے جَینکُوں ہَیکل دے خزانے اِچ پاوݨ شرع دے خلاف ہے۔“ 7اَتے آپت اِچ مشورہ کرَݨ دے بعد اُنہیں چاندی دے سِکیئں نال پردیسیئیں کُوں دفن کرَݨ کیتے کُمبَھار دا کھیت مُل گھِدا۔ 8اِیں کیتے اُوں کھیت کُوں اَڄ تَئیِں خون دا کھیت اَہدِن۔
9اِیویں یرمیاہ نبی دی ایہ ڳالھ پوری تھئی،
”اُنہیں چاندی دے تَریہہ سِکّے گھِدے او مُل جیرھا اِسرائیلئیں اُوندے کیتے لایا ہا، 10اَتے اِیں تَریہہ سِکئیں نال کُمبَھار دا کھیت مُل گھِدا جیویں خُداوند مَیکُوں حُکم ݙِتا ہا۔“
پِیلاطُس تفتیش کریندے
(رَلدا مِلدا حوالہ: مرقس 15:2-5؛ لُوقا 23:3-5؛ یُوحنّا 18:33-38)
11وَل یِسُوع کُوں گورنر پِیلاطُس دے سامݨے پیش کیتا ڳیا اَتے گورنر تفتیش کریندئیں ہوئیں اُوں کنُوں پُچھیا، ”کیا تُوں بنی اِسرائیل دا بادشاہ ہَئیِں؟“
یِسُوع جواب ݙِتا، ”تُوں آپ اَہدیں۔“ 12پَر جیرھے ویلے وَݙّے مذہبی پیشوائیں اَتے قوم دے وَݙیرے اُوندے اُتے اِلزام لَیندے پئے ہَن، اُوں کُوئی جواب نہ ݙِتا۔
13وَل پِیلاطُس یِسُوع کُوں آکھیا، ”کیا تُوں اپݨے خلاف ایہ اِلزام نَئیِں سُݨدا پِیا جیرھے ایہ لوک تیڈے تے لیندے پَئیِن؟“
14اَتے گورنر ٻَہُوں حیران تھِیا جو یِسُوع ہِک لفظ وی نہ الایا۔
یِسُوع کُوں موت دی سزا سُݨائی ڳئی
(رَلدا مِلدا حوالہ: مرقس 15:6-15؛ لُوقا 23:13-25؛ یُوحنّا 18:39—19:16)
15ہر فسح دی عید تے رِیت ہَئی جو گورنر لوکیں دی مرضی تے ہِک قیدی کُوں چھوڑیندا ہا۔
16اَتے اُوں ویلے ہِک ٻَہُوں بَدنام قیدی ہا جَیندا ناں بَرابّا ہا۔ 17جیرھے ویلے بِھیڑ کٹھی تھئی اَتے پِیلاطُس بِھیڑ کنُوں پُچھیا، ”تُساں کیا چاہندو، مَیں تُہاݙے کیتے بَرابّا کُوں چھوڑ ݙیواں یا یِسُوع کُوں جیرھا مسِیحا اَکھویندے؟“ 18او ڄاݨدا ہَئی جو لوکیں صرف حسد کنُوں یِسُوع کُوں اُوندے حوالے کیتے۔
19جیرھے ویلے پِیلاطُس عدالت دی کُرسی اُتے ٻیٹھا تاں اُوندی ذال اُونکُوں اَکھوا بھیڄیا، ”اِیں بےقصُور بندے کُوں ہَتھ نہ لاویں کیوں جو اَڄ مَیں اِیندے بارے خاب ݙِٹھے اَتے مَیں ٻَہُوں پریشان ہاں۔“
20پَر وَݙّے مذہبی پیشوائیں اَتے قوم دے وَݙّیرئیں بھِیڑ کُوں سِکھایا،”او پِیلاطُس کُوں آکھن جو او بَرابّا کُوں چھوڑ ݙیوے اَتے یِسُوع کُوں موت دی سزا سݨاوے۔“ 21جݙّاں پِیلاطُس پُچھیا، ”اِنہیں ݙُوہائیں اِچوں تُہاݙے کیتے کئیں کُوں چھوڑ ݙیواں؟“
اُنہیں ولدا ݙِتا، ”بَرابّا کُوں۔“
22پِیلاطُس اُنہیں کُوں پُچھیا، ”وَل یِسُوع نال جیرھا مسِیحا اکھویندے کیا کراں؟“
اُنہیں ساریاں آکھیا، ”اِینکُوں سُولی چڑھا ݙے۔“
23تاں پِیلاطُس پُچھیا، ”کیوں، اُوں کیا گُناہ کیتے؟“
پَر او ٻِیا وی زور زور نال آکھݨ لڳے،”اُونکُوں سُولی چاڑھ۔“
24جݙّاں پِیلاطُس ݙِٹھا جو کُجھ نَئیِں بَݨدا پِیا اَتے لڑائی تھِیوَن والی ہے تاں اُوں پاݨی گھِن کرائیں بھِیڑ دے سامݨے اپݨے ہَتھ دھوتے اَتے آکھیا، ”مَیں اِیں بےقصُور بندے کُوں قتل کیتے وَنڄن دا ذمہوار نِمی! اِیندے ذمہوار تُساں ہِوے۔“
25اَتے سارے لوکیں ولدا ݙِتا، ”اِیندے قتل دی ذمہواری ساݙے اَتے ساݙی اولاد اُتے ہوسی۔“
26اِیندے بعد پِیلاطُس، اُنہیں دے آکھݨ تے بَرابّا کُوں چھوڑ ݙِتا اَتے یِسُوع کُوں کوڑے مَروا کرائیں سُولی اُتے چڑھاوَݨ کیتے سِپاہیئیں دے حوالے کر ݙِتا۔
سپاہی، یِسُوع دا مذاق بݨیدِن
(رَلدا مِلدا حوالہ: مرقس 15:16-20؛ یُوحنّا 19:2-3)
27اِیندے بعد گورنر دے سپاہی یِسُوع کُوں اُوندے مَحل اِچوں گھِن ڳئے اَتے او سارے اُوندے چَودھاروں کٹھے تھی ڳئے۔ 28اَتے اُوندے کپڑے لہا کرائیں اُونکُوں شوخ رَتا چولا پوا ݙِتا۔ 29اَتے کَنڈیاں دا تاج بݨا کرائیں اُوندے سِر تے رکھ ݙِتا اَتے ہِک کانا اُوندے سَڄے ہَتھ اِچ پکڑا ݙِتا اَتے اُوندے اَڳوں ڳُوݙِے ٹیک کرائیں اُوندا مذاق بݨیندئیں ہوئیں ایہ آکھݨ لڳ پئے، ”اَے یہُودئیں دے بادشاہ! اَداب۔“ 30اَتے اُوندے چہرے اُتے تُھکاں سَٹیندے اَتے کانا اُوندے سِر اُتے مَریندے ریہے۔ 31جݙّاں اُوندے نال مخولیاں کر گھِدیاں، تاں اُنہیں یِسُوع دا چولا لَہا کرائیں اُوندے کپڑے اُونکُوں پوا ݙِتے اَتے سُولی اُتے چڑھاوَݨ کیتے اُونکُوں گھِن ڳئے۔
یِسُوع کُوں سُولی اُتے چڑھایا ویندے
(رَلدا مِلدا حوالہ: مرقس 15:21-32؛ لُوقا 23:26-43؛ یُوحنّا 19:17-27)
32جݙّاں او شہر کنُوں ٻاہر ویندے پئے ہَن تاں سپاہئیں شہر کُرین دے ہِک بندے کُوں ݙِٹھا جَیندا ناں شمعُون ہَئی، اُنہیں اُونکُوں وِنگار اِچ یِسُوع دی سُولی چَوائی۔ 33اَتے اُوں جاہ تے پُڄے جَینکُوں گُلگُتا اَہدِن جِیندا مطلب کھوپڑی ہے۔ 34اُتھاں مَے اِچ سرکہ رَلا کرائیں یِسُوع کُوں پیوَݨ کیتے ݙِتا، جݙّاں اُوں چَکھی تاں نہ پِیتی۔ 35اَتے اُنہیں اُونکُوں سُولی اُتے چڑھا ݙِتا اَتے اُوندے کپڑیں اُتے پُکھا سَٹ کرائیں وَنݙا گھِدے۔ 36اَتے اُتھاں ٻَہہ کرائیں رکھوالی کریندے ریہے۔ 37اَتے سُولی اُتے یِسُوع دے سِر کنُوں اُتے ہِک تختی ٹنڳ ݙِتی جَیندے اُتے ایہ اِلزام لکھیا ہا، ”ایہ یَہُودئیں دا بادشاہ یِسُوع ہے۔“ 38اِیندے بعد ݙُو ڈاکو وی اُوندے نال سُولی چڑھائے ڳئے، ہِک اُوندے سَڄے اَتے ہِک اُوندے کھَٻے پاسے۔
39اَتے اُتھوں اَندے ویندے لوک سِر ہَلا ہَلا کرائیں اَتے مہݨے مار کرائیں اَہدے ہَن، 40”اَے ہَیکل کُوں ڈھہا کرائیں اِینکُوں ترائے ݙینہہ اِچ وَلا بݨاوَݨ آلے پہلے اپݨے آپ کُوں تاں بچا، جے تُوں خُدا دا پُتر ہَئیِں تاں سُولی کنُوں تَلے لَہہ آ۔“
41اِیویں ای قوم دے وَݙّیرئیں، وَݙّے چھوٹے مذہبی پیشوائیں، شرع دے عالمیں اَتے رِہنما وی کھِلدے ہوئے اَہدے ہَن، 42”اِیں ٻنہیں کُوں بچائے پَر اپݨے آپ کُوں نَئیِں بچا سڳدا، ایہ بنیاِسرائیل دا بادشاہ ہے! جے ہُݨ ایہ سُولی کنُوں تَلے لَہہ آوے تاں اَساں اِیندے تے اِیمان گھِن آؤسوں۔ 43اِیں خُدا دا یقین کیتے جے او اِینکُوں چاہندے تاں ہُن اُوہو ای اِینُکوں بچاوے، کیوں جو اِیں آپ آکھیا ہا جو ’مَیں خُدا دا پُتر ہاں۔‘“ 44اَتے جیرھے ڈاکو اُوندے کٹھے سُولی اُتے چڑھائے ڳئے ہَن، اُنہیں وی ٻَہُوں لعن طعن کیتی۔
یِسُوع دی سُولی اُتے وفات
(رَلدا مِلدا حوالہ: مرقس 15:33-41؛ لُوقا 23:44-49؛ یُوحنّا 19:28-30)
45اَتے ݙینہہ دے ٻارھاں وَڄے کنُوں سارے مُلک اِچ اندھارا تھی ڳیا جیرھا تَرائے گھنٹے تَئِیں ریہا۔ 46اَتے تَرائے وَڄے یِسُوع اُچی اَواز اِچ آکھیا،”ایلی ایلی لَما شَبقتنِی#27:46 ایلی ایلی لَما شَبقتنِی ایہ ارامی زبان دے الفاظ ہَن“ جَیندا مطلب ہے،”اَے میݙے خُدا! اَے میݙے خُدا! تَیں مَیکُوں کیوں چھوڑ ݙِتے؟“
47جیرھے اُتھاں کھڑے ہَن اُنہیں اِچوں کُجھ لوکیں ایہ سُݨ کرائیں آکھیا،”ایہ اِیلیّاہ نبی کُوں سَݙیندا پئے۔“ 48اُنہیں اِچوں ہِک بندہ بَھڄ کرائیں فوم وانگوں ہِک شے کُوں کانے اُتے ٻَدھ کرائیں اُونکُوں اَنگوریں دے سِرکے اِچ ٻوڑیا اَتے یِسُوع کُوں چُسوایا۔
49پَر ٻنہیں آکھیا،”ذرا ڄَمٻ! ݙیکھوں تاں سَہی اِیلیّاہ نبی اِینکُوں بچاوَݨ اَندے۔“
50اَتے یِسُوع وَلا ٻَہُوں زور دی چیک ماری اَتے اپݨی جان ݙے ݙِتی۔
51اَتے ݙیکھو اُوں ویلے ہَیکل اِچ لڳیا پردہ اُتوں کنُوں تَلے تَئیِں پڑیڄ کرائیں ݙُو ٹوٹے تھی ڳیا اَتے زمین کَمب ڳئی اَتے چٹاناں ݙَلیج ڳئیاں۔ 52اَتے قبراں کُھل ڳئیاں اَتے ٻَہُوں سارے لوک جیرھے فوت تھی ڳئے ہَن او زندہ تھی ڳئے۔ 53او قبریں اِچوں نِکل ڳئے اَتے یِسُوع دے زندہ تھِیوَن دے بعد مُقدّس شہر یروشلم اِچ لڳے ڳئے جِتھاں ٻَہُوں سارے لوکیں اُنہیں کُوں ݙِٹھا۔
54اَتے اُتھاں صوبیدار اَتے اُوندے کٹھے کھڑے سپاہی زلزلے کُوں اَتے ایہ یکا حال ݙیکھ کرائیں آکھݨ لڳے،”بیشک ایہ خُدا دا پُتر ہَئی۔“ 55اَتے ٻَہُوں ساریاں تریمتیں وی اُتھاں ہَن جیرھیاں پَرے کنُوں ایہ ݙیہدیاں پِیاں ہَن، او گلِیل کنُوں یِسُوع دے پِچھُوں ٹُریاں ہَن اَتے اُوندی خدمت کیتی ہَئی۔ 56اُنہیں اِچ مریم مگدلینی، یعقُوب اَتے یُوسف دی ماء مریم اَتے زبدی دے پُتر یعقُوب اَتے یُوحنّا دی ماء وی ہَئی۔
یِسُوع کُوں دفن کریندِن
(رَلدا مِلدا حوالہ: مرقس 15:42-47؛ لُوقا 23:50-56؛ یُوحنّا 19:38-42)
57جݙّاں شام تھئی تاں شہر ارِمَتیِاہ دا رَہوݨ آلا ہِک اَمیر بندہ جَیندا ناں یُوسف ہا اَتے جیرھا آپ وی یِسُوع دا شاگِرد ہا، 58پِیلاطُس دو وَنڄ کرائیں یِسُوع دی میّت مَنگی۔ تاں پِیلاطُس ݙے ݙیوَݨ دا حُکم ݙِتا۔ 59اَتے یُوسف میّت گھِن کرائیں اُونکُوں مَلمَل دی نَویں چادر اِچ وَلھیٹیا، 60اَتے اُوں نَویں قبر اِچ رکھ ݙِتا جیرھی اُوں اپݨے کیتے پہاڑی اِچ کھٹوائی ہَئی۔ اَتے ہِک وَݙّا پَتھر ریڑھ کرائیں قبر دا مُونہہ بند کیتا اَتے لڳا ڳیا۔ 61اُوں ویلے مریم مگدلینی اَتے ݙُوجھی مریم اُتھاں قبر دے سامݨے ٻِیٹھیاں ہَن۔
یِسُوع دی قبر اُتے پہرہ
62اڳلے ݙینہہ جیرھا سبت دا ہا، وَݙّا مذہبی پیشوا اَتے فرِیسی پِیلاطُس دے کولھ ڳئے، 63اَتے آکھیا سَئیِں! ساکُوں یاد ہے جو اُوں دھوکےباز جݙّاں او زندہ ہا، آکھیا ہَئی، ”مَیں تریجھے ݙینہہ وَلا زندہ تھی ویساں۔“ 64اِیں کیتے حُکم ݙِیو جو قبر کُوں تریجھے ݙینہہ تَئیِں حفاظت اِچ رکھیا وَنڄے۔ اِیں نہ تِھیوے جو اُوندے شاگِرد آ کرائیں اُوندی میّت چوری کر وَنڄن اَتے لوکیں کُوں ݙساوَݨ جو او مُردئیں اِچوں زندہ تھی ڳئے، جے اِیویں تھِیا تاں ایہ دھوکا پہلے دھوکے کنُوں وی ٻَہُوں وَݙّا ہوسی۔
65پِیلاطُس جواب ݙِتا، ”پہرہ ݙیوَݨ آلئیں کُوں گھِن وَنڄو اَتے قبر تے پہرے کُوں اِتنا سخت کر ݙیو جتنا تُساں کر سڳدو۔“
66بَس او سپاہئیِں کُوں قبر تے گھِن ڳئے اَتے قبر دے مُونہہ تے پئے پَتھر اُتے مُہر لا ݙِتی اَتے پہرے دار ٻلہا ݙِتے۔
Currently Selected:
متّی 27: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
