Pogsiog Nang 1
1
“Allahri Eldamne Yame Walinge tatsilul,” aro Yesusti salag lebogha
1-2Teofilus nani, samenag mome pipsinge ane. Yesusti alniro ulamogti, yubu ambarelamsiogti, imag yingkiogpa, ni ulamogne sembe mome toro pipsi.#Lukas 1:1-4 El poneko anam imag yingkin komag Allah Eldamne Yame Walinge elag wamogpa, Yesusti nimi aobare wepsiogti pogsiog. Yesusti wepto pogsiog nang tanekoag, “A'undi nia mangkina undo-undo ulamlulom,” aro arukahiogpa, Allah imagneri kiliro tobogha sembe mome toro pipsi.#Lukas 24:46-53
3El obekpa, seklero tebaogti, kamag taogne, “Na kamag wamnange imneikti, ‘Sik uro kamag tao,’ sembaukang,” aro kekneba maikno sin haingag ulamog. Ulamogti Allahri mog so'oag nimi saelba uhiroba sembe ambarelamsiogti, “Naipsabori imnukang,” aro lag tangom tognop tangom alamogha inipna teng nhon epto naualbare taog. 4-5Ik nhon sum Yesusti wepto pogsiog nangap kwaneng nhon telamekti, yubu ambarelamsiogti, “Yohanes ponekori samenag nimi maghag pelengelamsiog aghana, olog wapmunba, Allahri Eldamne Yame Walinge a'unag pelengkipsilul.#Matius 3:11; Markus 1:8; Lukas 3:16; Yohanes 1:33 Ane sembe, Allahri Eldamne Yame Walinge a'unag anam tatsin komag as Yerusalem anea lamba peheng kom. Na Naniri, ‘Tatsinun,’ aro salag lebogne nari ambatsinonge neneko nang-nangaro wamlulom,” aro arukahiog.#Lukas 24:49
Yesus imag yingkiogha
6Yesusti wepto pogsiog nimi taneko ik nhon sum Yesusap winiro wamekti hailamekti, “Nai nu Saelba Uhiropne wamlam. Samenag Roma nimiri nu saelbamsiek komag wamubu saog uro wene wamap ko'o eneag nu Israel nimiri mog so'oag wamang nimi sembe yubu sia lero saelba uhiroba sekitlulam te?” aro haibaek.
7Wene aro haibaekpa Yesusti, “Nani Allahri, ‘Sumene ko'o enekoag uanun,’ aro tam karepto pibog nena a'undinge kom. Nani Allah el mori tam karepto pibogne mikip uro salelamla. 8Aghana Allah Eldamne Yame Walinge a'unag kulukul aleri, mikip nembahilul. Mikip nembahileba, as Yerusalem, mog so'o Yudea, mog so'o Samaria, as tala-tala im tiptobag so'o tiptobag wamang nimiag pimundi, a'undi haingdi iliropne na sembe sikne lag nenero ambarelamsululom,” seog.#Matius 28:19; Markus 16:15; Lukas 24:46-48
9Wene aro ambarelamsiog abeneko imag agha Allahri Yesus kiliro tolamogpa, toari niknilamogpa, elap nhon wamek nimi tanekori tiwalengkamek.#Markus 16:19; Lukas 24:50-51
10-11El imag yangkalamogpa, tiwalengelamek abeneko lo'om aro ag solomne enektop nimi phende sin peramag sekamdekne abenekori sin yubu ambarelamsirekti, “A'un mog so'o Galilea nimi. A'un sa'a sembe imag tiwalengelamlom? Yesus poneko a'un laplobi agha Allahri imag agha kiliro tolamlaba, tiwalengkalomne nene saog uro amik kulukul alulne babe yangkalamlaba tiwalengkalomne saog uro kulukul alul,” aro ambatsirek.
Yesusti wepto pogsiog nang, “Allah Yame Walinge kulukul alul,” aro nang-nangaro wameka
12-13Ambatsirekpa Yesusti wepto pogsiog nimi taneko yim Zaitun anekoa samoro as Yerusalem yaek. Zaitun yimag anekoa Yerusalem we komag,#1:12-13 Yunani yubuag mome toro pibog nena, “Sabat sum paiag ina panne,” mome toro pibog. Samenag Allahri Yahudi nimiag, “Sabat sum awe tolamlulom kom,” aro arukahiogne sunsunum uro nimiri tam karebi agha, “Kilometer nhon ina hae pina mamnep,” seek. Sum eneko pin tanena, pinep aghana, nen samoro yanep kom. samoro Yerusalem yingkina nimiri ae agha sesog wamekag aneko ae tika alikinag ae lomag waelbaekti wamek. Sin wamek nena, Petrusap, Yohanesap, Yakobusap, Andreasap, Filipusap, Tomasap, Bartolomeusap, Matiusap, Alfeus elme Yakobusap, Simon el si nhon mo sekukap aro yin saleropne ponekoap, Yakobus elme Yudasap sin wamek.#Matius 10:2-4; Markus 3:16-19; Lukas 6:14-16 14Sin ma'ap tangto wamekti, sol wali, wali uro Allahag yubu moloro longop tangto wamek. Longop tangto wamekne taneko Yesusag neleplamek kelabo etpareap, Yesus ilin Mariaap, Yesus ilipsabo taptopneap longop tangto wamek.
Yudas lunumna Matias webeka
15Ik nhon sum Yesusag wana paliro sikinkabo nenep tangtop nimi teng tombare eptopneap (120) saog uro longoro wamek. Longoro wamek sum eneko Petrus poneko, “Yubu lemnun,” aro sekog. 16Sekogti yubu lelamogti, “Nangkabo, Allah Eldamne Yame Walingeri samenag nunisang Daud pere agha lebog. Lebogne mome toro pairopne nhonag wamlangena, Yesus saelbanep nang poa yahionge poneko sembe mome toro pibogpa, el wamap. Allahri samenag, ‘Undo uro yabilul,’ aro lebogpa, mome toro pibogne sunup tangto uro yabinepneog wamog. Mome toro pibogne sunsunum uro Yudasti nimi topsiori, poa yahioba, Yesus saelbaong. 17Samenag Yudas poneko babe nu nimi a'ilin wamobori, Yesus sembe nimi ambatto yeplamsibo,” seog.
18Yudasti malia uaogne sembe kamna tobogne anekoag agha so'o nhon toploa saog uaogti, so'o enekoag tinilamogti, mon serero tisirik langtukto tebaog.#Matius 27:3-8 19Undo optaogne neneko Yerusalem nimi niri el taekti, so'o aneko, “Nimi eneng so'o,” alamekti sindi yubuag si, “Hakal-Dama,” aro engero yabiog.
20Petrusti lelamogti, “Allahri, ‘Undo uro yabilul,’ sembaogne ane sembe nunisang Daud pere agha Allah yubu sepna wamlangena,
‘El ua urobag langkop tale.
Nimi nhon babe aneko wamukang kom,’ seog.
Nen siplamogti,
‘Wenehiropne ponekori awe toro saelbamonge neneko yog nimiag tale,’
aro mome toro pibog.#Sepna 69:25; 109:8 21-22Ane sembe nimi nhon ebaberi webukap. Webebe andarina nimi aneri nunap nhon, ‘Yesus kamag taoba ibobo,’ aro sikne lag nenero nimi ambatsukap. Webukap nimi enekona, samenag Yohanesti nu Saelba Uhiropne Yesus maghag pelengkiboghag agha wamogti, sop-sop nunap nhon wamoboba, Yesus nu nusamag ua ulamogha iboboba, Allahri imag agha Yesus kiliro toboa babe ibo nimi nhon webukap. Webeberi nunap nhon yubu ambarelamsiberi, ‘Yesus kamag taoba, haingdi ibobo,’ aro nimi ambatsukap,” seog.#Matius 3:16; Markus 1:9; 16:19; Lukas 3:21; 24:51
23Wene seogpa, nimi wamekne tanekori, “Nimi phende wepsukap,” aro Yusupap Matiasap si topsiek. Yusup poneko si wilindi wamog. Si nhon Barsabas alamek, si nhon Yustus alamek. 24-25“Sin phende abeneko nhon webukap,” aro Allahag mololamekti, “Nai nu Saelba Ulamsilamne, andi nimi ni wanaag kemelamsilam. Samenag, ‘Nari yubu ambarelamsululom,’ aro nu aobare nang wepto pogsiom. Wepto pogsiomne nhon Yudas neneko eldamne sae pere agha apto aori, laplobi agha malia uaonge sunsunum urobag wamla. Laplobi agha pio ane sembe, wene nimi phende abene nhon Yudas lunuro aonge talul. Andi, ‘Nimi yepto ambarelamsululam,’ aro wepto poglamne poneko nunag lag nembatsululam,” aro molbaek.
26Wene aro Allahag molbaekti, “Kekneba ibukap,” aro kirik toboglamekpa, Matiasag po'obaog. Matiasag po'obaog sum eneko Yesusti wepto pogsiog nang ko'olombare mo wamek aghana, Matias aonge taog.
Currently Selected:
Pogsiog Nang 1: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
