Pogsiog Nang 15

Yerusalem nimi Yesusag sikne aro seneraglamek nimiri Yahudi sisa kom nimi sembe yubu lebeka

1As Antiokhia Siria so'oag wamekpa, mog so'o Yudea nimi as Antiokhia piek. Piekti sin Antiokhia nimi Yesusag wana paliro sikinkabo nenep tangtop nimi taneko ambarelamsiekti, “Musari samenag, ‘Nengabo ni, “Allahap ma'ap taukap,” aro kon kareplamukang,’ aro mome toro pibog.#Imamat - Memnang 12:3 Mome toro pibogne sunsunum uro nengabo kon kareplamik kom tanena, Yesusti kon kareptop kom nimi taneko taulbahilul kom,” aro ambarelamsiek.

2Wene aro ambatsiekpa, Paulusap Barnabasapti, “A'undi lelamlomne nene orolena lelamlom,” aro Yudea so'oag agha yaek nimiap yubu maiknoro lel dalamek. “Nelagha sikne,” aro yubu maiknoro lel dalamekpa, Yesusag seneragtop nimi as Antiokhia winil dalamek nimiri Paulusap Barnabasap Yesusag sikne aro seneragtop nimi etpareap wepsiek. Wepsiekti, “A'un as Yerusalem pululom. Pimundi Yesusti samenag wepto pogsiog nangap, Yesusag seneragtop nimi as Yerusalem winil dalamang nimi wenehirop nangap haiptamundi, ‘Nengabo kon kareptopne sembe tam karebaukap,’ aro as Yerusalem pululom,” aro pogsiek.

3Yesusag seneragto winil dalamek nimi tanekori wene aro pogsiekpa, Paulusap, Barnabasap, sikinkabo nikag palamek nang tanekoap as Antiokhia agha lambaekti, Fenisia so'o ina agha Samaria so'o ina agha palamek. Sin palamek abeneko pere nimi so'o anekoag wamek nimiag tibin uro el nenelamsirekti, “Yahudi sisa kom nimiri malia seneragto ulamangne laplobi agha Allahri senenne salero ul palamang,” aro ambare-ambare palamsiek. Yahudi sisa kom nimiag uro yabalamogne sembe ambare-ambare palamsiekpa, sikinkabo Yesusag sikne aro seneragtop nimi ina palamekag wamekne ka'ebaekti, awi maikno senelamek. 4As Yerusalem piekpa, Yesusti samenag wepto pogsiog nangap, Yesusag sikne aro seneragtop nimi winil dalamek nimiap, sin wenehirop nangap as Yerusalem wamekne tanekori sin piek nimi taneko enero poa wa'isiekti kipsiek. Kipsiekpa el nenero ambarelamsiekti, sindi lero ulamekne pere agha Allahri ulamogne ni ambatsiek.

5Wene aro ambatsiekpa, Yesusag sikne aro seneragtop nimi taneko ka'ebaek. Ambatsieka ka'ebaek nimi anabiag wamek nimina, Yahudi nimi seneragna nhonog uro kong nhon ma'ap tangtop nimi Farisi nimi alamek nang wamek. Farisi nimi nhon-nhon taneko sekekti, yubu lelamekti, “Yahudi sisa kom nimi babe nengabo kon karebanepneog wamla. Kon karebel dalamikpa, sinag aruklamsibenge, ‘Allahri aruksirop yubu Musari samenag mome toro pibogne ni sunsunum uro ul palamlulom,’ aro ambatsukap,” seek.

6Wene seekpa, tam abeneko sembe Yesusti samenag wepto pogsiog nangap, wenehirop nang tanekoap winip taekti, “Yahudi sisa kom nimiri Yesusag sikne aro wana palilamang tanena, nengabo kon karebel dalamikti, aruksirop yubuag nelepto uanepneog wamla to, kom to?” aro yubu lelamek. 7Yubu tam neneko sembe ko'o olog maiknoro sin mamun lero libekti, Petrus sin whingag sekel ingkiog. Sekogti ambarelamsiogti, “Nangkabo, a'un el wamlomne, nu samenag wamububa, Allahri seneraghogti, ‘Yahudi sisa kom nimiri yubu walinge Yesus sembe ka'ebaikti, elag sikne aro wana palilamukang,’ aro Allahri a'un anabiag agha na wepneog. Wepneogpa yubu walinge ane nari pamag agha Yahudi sisa kom nimi tipto ambarel ahisi. Samenag uro yabiogne sembe a'un ni el wamlom.#Pogsiog Nang 10:5 8Allahri nimi wana kemelamsilne ponekori Eldamne Yame Walinge nu tatsiog. Nu Yahudi nimi agha Yesusag seneragtop nimi tatsiog saog uro sin Yahudi sisa kom nimi babe tarelamsiogti, ‘Namabo taukang,’ sembaogne lag nembatsiogpa, nu el tabu. 9Allahri, ‘Nimi tane Yahudi sisa nimi to, kom to?’ aro wana phende semban koma, Yahudi sisa kom nimiri wanaag agha Yesusag sikne aro wana palilameka Allahri kemelamsiog. Kemelamsiogti sembenga sindi wanaag wamogne Allahri lupsiogpa, sembenga kaolban kom nimi taek. 10Allah Eldamneri undo unuaogne sembe a'un ni el wamlom aghana, sa'a sembe a'undi, ‘Allahri uaogne wali to, kom to,’ aro miplamlom? Tam ikinne sin Yahudi sisa kom nimi Yesus yubu ka'ero neleplamang nimi taneag palilamsilom.#Pogsiog Nang 15:5 Nunisa yabori babe nuri babe wali uro ul pinep kom aghana, sa'a sembe sin sa'oag ikinne palilamsilom? 11Undo unuaheng kom. Nuri wanaag sik senelamap nena, ‘Yesusti nu Saelba Uhiropne ponekori nu Yahudi sisa nimiag wana yororo paiamsildi, nu taulbahiog saog uro, sin Yahudi sisa kom nimiag babe wana yororo paiamsildi talulamsil,’ aro wanaag seneraglamap,” aro ambatsiog.

12Wene aro ambatsiogpa, winil dalamek nimi taneko yubu koma wamek. Wamekti ka'elamekpa, Barnabasap Paulusapti, “Samenag Yahudi sisa kom nimi yog asag nimiap nhon wamoboba, Allahri nu yeplamsioba, ‘Yaghe, Allah mikibari uanepne sin pere agha ual,’ senenne kekneba undo-undo uanomo,” aro ambatsirek. 13Abeneko komopto ambatsirekpa, Yakobusti sin winil dalamek nimi anabiag sekogti, yubu lelamogti, “Nangkabo yubu lemnunne ka'eamlulom. 14Allahri Yahudi sisa kom nimi taneko o'ona sembamsiogti, ‘Nari siag kekhaektop nimi taukang,’ aro samenag Allahri sin wepsiogne sembe wene abeneko Simondi ambatsil. 15Leplange nene samenag Allahri yubu silimu tiptop nangdi mome toro pibekne sunsunum uro ambatsil. Samenag Allahri yubu silimu tiptop nimiri mome toro pibekne pere agha, ‘Allahrina,

16“Na samoro yaneri, Daudti ae kalun ae kwerek taog ae eneko

meneng ae ene agha ae soro ae walinge wendogne saog urop ae soro sekitnun.#15:16 Allahri Daud poneko sembe lebogne ane, “Yesus ilisag wamlul,” aro Allahri yubu silimu tiptopne Amosti mome toro pibog.

17Sekitneba, ‘Yahudi nimi pogto wamik nimiap, Yahudi sisa kom nimiapti na imap so'oap Saelba Uhiropne wamnange elamneikti, nari siag kekhaekto engerop nimi taukang,’ aro

Daudti ae kalun ae kwerek taogne nen ae soro sekitnun,” aro Allahri ambatsiog,’

aro mome toro pibog.#Amos 9:11-12 18Undo mome toro pibogpa, samenag agha ‘Undo uro yabilul,’ aro nimiri ka'ebaekti, el taek.

19Undo Allahri, ‘Daudti ae kalun ae wendogne saog urop ae soro sekitnun,’ aro ambatsiogne ane sembe, na mori tam karebanne lemnuan. Yahudi sisa kom nimiri malinge seneragto ulamangne laplobi agha Allahri senenne salero ul palamang nimi taneko sembe ikin nembaukap kom sembamna. 20-21Yahudi sisa kom nimi sembe ikin nembaukap kom aghana, samenag agha Yahudi nimi as ni wamek nimiri Musari mome toro pibog yubu ambarelamsiekpa ka'elamek. Wene babe Allah yubu lerop sum Sabat sum talamlaba, Yahudi nimiri Allah yubu lero winirop aeag wa'alamangdi, Musari mome toro pibogne lelamang. Ane sembe, Yahudi sisa kom nimi Yesusag sikne aro wana palirop nimiag ambatsukap nena,

‘ “Lebe aroba eneng la'imbaleag,” aro homamanga lepto oroba sopap, enengap telamlulom kom. Eneng lambaleba, sop agha telamlulom.

Ora nimiri, “Mem phabaukap,” aro lebe aroba sop palilamikti, mektop sop babe yoro tarelamsiikpa, telamlulom kom.

Apna, nengaboap kelaboap top tangkamna koma salik-malik walel dalamseng kom,’ aro mome toro pibeberi, yubu ambatsukap,”

aro Yakobusti ambatsiog.

Yahudi nimiri Yahudi sisa kom nimi Yesusag seneragtop nimi sembe mome toro pibeka

22Yakobusti wene aro ambatsiogpa, Yesusti wepto pogsiog nangap, as Yerusalem nimi Yesusag sikne aro winil dalamek nimiap, sin wenehirop nangapti, “Yakobusti leplange wali,” sembaek. Wali sembaekti, “Paulusap Barnabasap nhon as Antiokhia palamik nimi ebahukap,” aro yubu lebekti, Yudas si nhon Barsabasap, Silasap wepsiekti pogsiek. Sin phende wepsiekne abeneko sembe sikinkabo Yesusag seneragtop nimi tanekori, “Nimi nubunge wamdang,” senelamsiek. 23Sin phende abeneko poglamsiekti, mome toro sin saeag pibek. Mome sindi saeag pibek nena,

“Nun Yesusti wepto pogsiog nangap, a'unkabo Yesusag seneragtop nimi Yerusalem wamap nimiap, sin wenehirop nangapti, a'un kiplamsiap. A'un Yahudi sisa kom nimi Yesusag sikne aro wana palilamlom nimi as Antiokhia wamlom nimiap, mog so'o Siria wamlom nimiap, mog so'o Kilikia wamlom nimiap sembe nuri a'un kiplamsiap.

24Nun yubu ka'ebabongena, nu nungkabo anabiag agha samenag, nuri babe sin pogsin koma samenag a'unag yaong nimiri ambarelamsiongdi, a'un wana samsamolopsiongdi, wana ikin nenelamsiongba ka'ebabo.#Pogsiog Nang 15:1 25Ane sembe nuri ka'ebabori, nu ma'aro wamobori, yubu nikne lebobori, ‘Nungkabo wanaagne Barnabasap Paulusap nhon pululom,’ aro nimi phende ero wepsibori, poghol alamsiap. 26Paulusap Barnabasap abeneri Yesus sembe ambarelamsirang yubu sembe sin ya'ag tebanebag, ‘Nu Saelba Uhiropne Yesus Kristus si nubu talul,’ aro yubu ambarelamsirang. 27Samenag nimiri a'un wana samsamolopsiongne sembe, nuri nimi phende, ‘Barnabasap Paulusap nhon palamukang,’ aro wepto poglamsiap nimina, Yudasap Silasap a'unag yarikpa, mome ane palilamapne kembamunne sunsunum uro sindi pamag agha babe yubu nikne ambatsurukang. 28-29Ambatsurukang nena, Allahri Eldamne Yame Walingeri senelamlange nunag el nenelamsiori, ‘Tam ikinne maikno Yahudi sisa kom nimiag piplulom kom,’ aro el nembahioba, wali senelamap. Ot Allah yubu sunsunum uro irikna ologha ane, ‘Ualulom kom,’ aro yubu lel pang-pang mome ane palilamap.

‘Lebe aroba eneng la'imbaleag,’ aro homamanga lepto oroba sopap, enengap telamlulom kom. Eneng lambaleba, sop agha telamlulom.

Ora nimiri, ‘Mem phabaukap,’ aro lebe aroba sop palilamikti, mektop sop babe yoro tarelamsiikpa, telamlulom kom.

Apna nengaboap kelaboap top tangkamna koma salik-malik walel dalamseng kom.

‘Teheng kom, uaheng kom,’ aro palilamapne nene saelba ul palapmunba, a'un wali wamlulom. Nangkabo ot abenda ambatsiap,”

aro mome toro pibek.

30Wene aro mome toro pibekti, “Wali pululom,” aro kipsiekpa, sin pogsiek nang taneko as Antiokhia piekti, Yesusag sikne aro seneragtop nimi poloro wimbahiekti, mome aneko tatsiek. 31Mome aneko tatsiekpa kembaekti, “Wana aingnirop yubu nu sembe pipsiong,” aro as Antiokhia nimi taneko sin awi sembaek. 32Yudasap Silasap abeneko Allahri yubu silimu tiptop nang wamdekti, sikinkabo Yesusag wana palirop nimi taneko yubu ambatto wana aingniro poa tongolamsirek. 33Allah yubu ambarelamsiekti, as Antiokhia anekoa ik etpare ua ulamekpa, sikinkabo as Antiokhia Yesusag sikne aro seneragtop nimi tanekori wana wali uro lelamekti, “A'unkabo poghol ahiong nangag nen samoro pirumundi, nuri sin sembe, ‘Nungkabo,’ aro kiplamsiapne ambatsururom,” seek. [34“Pururom,” seek aghana, Silas ponekori, “Na a'unap wamukap,” seogti ta'ap seog. 35Ta'ap seogpa,] Paulusap Barnabasap abeneko babe as Antiokhia olog maiknoro wamdek. Sinap nhon yog nimi maikno nikag wamekti, yubu walinge nu Saelba Uhiropne Yesus sembe tibin nenero ambarelamsirek.

Paulusap Barnabasap a'ep tareka

36Ambatto wameka Paulusti, Barnabasag yubu lelamogti, “Nuri samenag nu Saelba Uhiropne Yesus yubu ambarelamsinumu asag nungkabo Yesusag sikne aro seneragtop nimi, ‘Wali wamang to, kom to?’ aro kemeroa yabahinunam,” seog.

37Wene seogpa Barnabasti, “Nungkae Yohanes, si nhon Markus babe nhon pukap,” seog.#15:37 Markus ponekona Barnabasti sisa nimiri mangaroba wamog (Kolose 4:10). 38“Nhon pukap,” seogpa Paulusti, “Yohanes Markus nimi enena samenag nunap nhon pibo aghana, as Pamfilia wamoboba, elna awe lilobi agha nu laplobi agha samoro yao. Ane sembe, el nen nunap pukapne sunsunum kom,” seog.

39Wene seogpa, Paulusap Barnabasapti yubu yo uro lel dalamdekne nubu tang-tang yabiogpa, sin a'ep tarek. A'ep tarekti, Barnabas ponekori Markus enero agha kabong mag alip toman ina agha mog so'o Siprus pirek.#15:39 Barnabas poneko Siprusne wamog (Pogsiog Nang 4:36). 40Paulus ponekori babe Silas enero agha, “Pinunam,” seogpa elkabo Yesusag sikne aro seneragtop nimi tanekori, “Nu Saelba Uhiropne ponekori wana a'unag yororo paiamsilul,” aro pogsiek.

41Wene aro pogsiekpa, Paulusap Silasap lambarekti, mog so'o Siria ina agha mog so'o Kilikia palamdekti, Yesusag sikne aro seneragtop nimi winil dalamek nimi mikip nenero poa palamsirek.

Currently Selected:

Pogsiog Nang 15: kklKOS

Highlight

Copy