Pogsiog Nang 4
4
Yahudi nimi sembe tam kareptop nangdi Petrusap Yohanesap kop aeag tobongkipsieka
1Petrusap Yohanesapti nimi maikno yubu ambarelamsirekpa, Yahudi nimi nubunang wamek. Memnang Allah sembe palirop nangap, Allahri Mem Ae yae ua urop nang sikindoap, Saduki nimiap sin phendeag yaek. 2Yaekti ka'elamsiekpa, Petrusap Yohanesapti, “Nimi etneri Yesusag sikne aro wana palilamleri, tebale tanena Yesus kamag tao saog uro kamag talul,” aro nimi maikno ambarelamsirek. Ambarelamsirekpa ka'ebaekti, Yahudi nimi nubunang taneko yo sembaek. 3Yo sembaekti, “Sin phende abeneko tam kareptop nang whingag pabahukap,” aro saelbahiek aghana imbaogpa, “Ambuhum samoro yaberi, tam kareptop nang whingag pabahukap,” aro sae kaupto kop aeag tobongkipsiek. 4Tobongkipsiek aghana, Yesus sembe ambarelamsirek yubu eneko nimi maikno tanekori ka'elamekti, sikne aro seneraglamek. Sikne aro seneragtop nimi taneko kabuni aghabog a'iliro agha teng-tengne (5.000) wamek.
5-6Mabeka kwelekaogne Yahudi nimi saelba uhirop nangap, Yahudi nimi sembe wenehirop nangap, Musari yubu amohirop nangap, memne Allah sembe palirop nang sikini nubunge Hanasap, eldi nimi sisa nhonne, Kayafas, Yohanes, Aleksander, ora nimiap, “Petrusap Yohanesap sembe tam karebaukap,” aro as Yerusalem winip taek. 7Winip taekti, Petrusap Yohanesap abeneko enero poa yahiekpa, nimi poloro winip tangkamek nang tanekori sinag hailamsiekti, “Nimi etne mikipneag agha, nimi etne siag agha ulamdomdi, nimi ene wali nembahirom?” aro haibahiek.
8Wene aro haibahiekpa, Allah Eldamne Yame Walingeri Petrus nongag to'opto wa'ina mikipne pibog. Mikipne pibogpa, Petrusti yubu ambarelamsiogti, “Nani yabo a'un Yahudi nimi saelbamsilom nangap, wenehirop nangap, nari yubu lemnunne ka'eamlulom! 9Sumene nimi yan malinge nhon yepnamne nene wali uanam aghana, a'undi nunag hailamsilomdi, ‘Nimi ene hurop mikibag yan wali tao?’ aro tam kemero hailamsilom,” seog.
10Wene seogti, “A'un Israel nimiap, a'un nimi ni wamlom nimi tane el tahile. Allahri webogne Kristus Yesus Nazaretne poneko siag kekhaektopneag agha moloro ul tongolamnam. Yesus poneko a'undi kalag sipto olobom aghana, Allahri nimi teptobag agha nen kamag nembao. Kamag nembaonge poneko siag kekhaektopneag agha nimi eneko yan wali talba, a'un whingag sekamla,” seog.
11Nen ambarelamsiogti, “Samenag Yesus anam mangap tan komag Allahri yubuag Yesus sembe mome tobog nena,
‘Ae sorop nangdi, “Kirik nene mali,” aro toboghaek,
aghana kirik nene yangan kirik o'omne yangap tao,’
aro mome toro pibog.#Sepna 118:22 ‘Ae sorop nang,’ seog nena, a'un Israel nimi nubunangdi Yesus wa'epto toboghaomne sembe lebog. 12Wa'epto toboghaomne poneko Allahri, ‘Mog so'oag nimi taulbahilul,’ aro Yesus wepto sekirog. Mog so'oag nimiri mali-malia uropne sembe, ‘Allahri opsileag,’ aro taulbahinep nena, ot eldi siag kekhaektopne toman agha nimi taulbahinep. Imagneri nia mangkina im tamag mog so'o sirikag-sirikag tatsiogneag agha, ora nimiri siag kekhaektopne toman agha nimi taulbahinep kom,” seog.
13Wene seogpa, nimi yubu tam kareptop nang poloro winip taek nimi tanekori Petrusap Yohanesap sembe, “Sin mome lerop kom nimi apna, kembi agha el urop kom nimi sao wamdang. Nubunang ambarelamsirang aghana, sin log kom uro lero ulamdang,” aro lo'om seek. “Sin phende Yesusap nhon yabalamdong nimi,” aro el wamsiog. 14Nimi yan wali taogne poneko sin Petrusap Yohanesap peramag sekamogpa ibekti, “Nuri sinag sa'a sukap kom,” aro yubu koma wamek.
15Wameka, “A'un asag lambalulom,” aro wene seekpa lambaek. Lambaekpa Yahudi nimi sembe yubu tam kareptop nang Mahkamah Agama nimi mo yubu lelamekti, 16“Nimi phende abeneri Allah mikibari uanepne sin pere agha kekneba uaoba, Yerusalem nimi ni whingag lag tao. Ane sembe nuri, ‘Sindi orolenange lelamdang,’ aro lemnep kom saog wamla. Undop pagha tanena, nurina sinag huaukap? 17Sindi yubu alnibarongne nene nimi maiknori ka'ebaikpa, nubu taleag aro nimi abeneag walamsiberi, ‘ “Si Yesus ponekoag mikipne wamla,” aro nen tipto ambatsiseng kom,’ aro yubu mikip uro wembahukap,” seek.
18Wene seekti, sin abenekoag, “Wa'al alulom,” aro yopsiekti, “Yesus sembe ambarelamsirom yubu nene sik komne ambarelamsirom. Nimiag yubu lelamtumundi, ‘Si Yesus ponekoag mikipne wamla,’ aro ambatsiseng kom,” aro wembahiek. 19Wembahiek aghana, Petrusap Yohanesapti, “A'undam nimiri wanaag agha tam karebalulom. Nelagha Allah whingag sikne? A'un yubu mombolag wamukap to, Allah yubu mombolag wamukap to? Allah whingag sikne uanep tanena, nelagha wali sembalom? 20Sik uro yabionge nuri aori ka'ebabori, haingdi babe ibobo. Ane sembe nimi ambatsin koma wamnep kom,” serek.
21Wene serekpa, yubu mikip uro sin phende abeneko wembahiekti, “Pururom,” aro yag lambahiek. Nimi wali nembarekne neneko ibekti, nimi maiknori Allah omeklamek. Tam kareptop nangdi yog nimiri Allah omeklameka ipsiekti sindi, “Sin phendeag huaukap,” alamek. Allah omeklameka ipsiekti, tam kareptop nangdi, “Logti tam lolohinne orog,” sembaekti sin lipsiek. 22Lipsiek nena, nimi yan malinge wali nembarek nimi eneko mangkaekne hengkun-kunne palamogha teng nhon eptopne naualbare (40) taogpa, Allah mikibari uanepne kekneba uarekne toman wali nembarek. Ane sembe, tam kareptop nangdi, “Tam lolohinne orog,” sembaekti lipsiek.
Yesusag sikne aro seneragtop nimiri Allahag molona molbaeka
23Petrusap Yohanesap, “Pururom,” aro sae lipsiekpa, sikinkaboag pirek. Pirekti sikinkaboag ambarelamsirekti, “Memnang Allah sembe palirop nang sikini yaboap, Yahudi nimi sikini yaboapti nunag undo-undo wene seang,” aro sikinkaboag ambatsirek. 24Ambatsirekpa sikinkabori ka'ebaekti, sin ma'ap tangto Allah omekto mololamekti, “Nuni Allah nia mangkina Saelbamsilamne, andi imap, so'oap, nubu longorop maghap nia mangkina ni an mori sumbalum.#Keluaran - Lambaeka 20:11; Nehemia 9:6; Sepna 146:6 25Andi Andamne Yame Walinge neneko andi arukna nunisag Daud pere agha elag piplum. Elag piplum yubu nenekona,
‘Yahudi sisa kom nimi Allah omektop kom nimiri sa'a sembe yanghang alamsiang?
Sa'a sembe as tala-tala wamang nimiri, “Undo-undo uaukap,” senelamangdi lelamang aghana, uro yabilul kom?
26Nuni Allahri, “Taulbahimendi saelbamsululam,” aro wepto aogne Kristus ot nhonog wamla.
Allahri wepto aog aghana, mog so'oag yubu sia lerop nang tanekoap, sikin tamag salehirop nangapti, “Karong,” aro poloro winil dalamang.
Poloro winil dalamangdi, nu Saelba Uhiropne Allahap, eldamneri wepto aogneap, “Mal tabaukap,” aro yin singilamsiangdi wamang,’
aro Daudti samenag ambatsiog.#Sepna 2:1-2
27Samenag ambatsiogne sunsunum uro sik uro yabiog. Anme#4:27 Seneragna nhon babe, “eldi arukna,” aro seneragnep (Pogsiog Nang 3:13, 26; 4:30). sol walinge andi, ‘Taluro saelbamsululam,’ aro wepto alumne Yesus poneko, ‘Obukap,’ aro Herodesap, Pontius Pilatusap, Yahudi sisa kom nimiap, Israel nimiap, as aneag poloro winip taong.#Matius 27:1-2; Markus 15:1; Lukas 23:1,7-11; Yohanes 18:28-29 28Sin winip taong nimi tanekori, ‘Uaukap,’ sembaongdi ulamongne, an sae mikipne ponekori samenag agha, ‘Undo uaukang,’ sembalumne saog uro ulamong. 29Nu Saelba Uhiropne, andi wene nu kembamsululam. Yahudi nimi tam kareptop nang taneri nunag, ‘Opsukap,’ alamang. ‘Opsukap,’ alamangdi walamsianga andi kembahi. Anenge yubu log kom uro ambarelamsinepne sembe nu an arukna wamapne tane mikip nembahi. 30Anme #4:30 Seneragna nhon babe, “eldi arukna,” aro seneragnep (Pogsiog Nang 3:13, 26; 4:27). sol walinge Yesus poneko siag kekhaektopneag agha mololamebeba, ‘Allah mikibari sin pere agha ual,’ senenne kekneba nunag piplulam. An sae pelengkamendi yepsimenba, nimi naiktopne wali nenelamseberi, ‘Yaghe,’ senenne babe ulamukap,” seek.
31Wene aro Allahag omekto mololamekpa, sin poloro winil dalamekag aneko sa'uma saog uro pot-porolamog. Pot-porolamogpa Allah Eldamne Yame Walingeri sin nongag wa'isiogti, mikipne pipsiogpa, Allah yubu log kom uro ambarelamsiek.
“Andinge naringe,” sen koma, “Nuringe aghabog,” senelameka
32Yesusag sikne aro seneraglamek nimi taneko wana ot nhonog uro sin ma'ap tangto wamek. Ma'ap tangto wamekti, nimi nhondinge saeagha ua ulamogha, “Andinge naringe” sen koma, “Nuringe aghabog” senelamek.#Pogsiog Nang 2:44-45 33Allahri mikip nenelamsiogpa, Yesusti wepto pogsiog nangdi, “Nu Saelba Uhiropne Yesus Allahri kamag nembaonge ibobo,” aro sikne ambarelamsiek. Sin ni tanekori, “Allahri wana nunag yorolamsil,” senelamekti sin mamun wana yororo senel dalamek. 34-35Wana yororo senel dalamekti, sin ni taneko nhon babe saeagha elenge orog uro wamek kom. Yesusag sikne aro seneragtop nimi taneko anabiag awe ae ngai nimi wamek. Sikinenge awe ae ngai nimi tanekori nimi yogneag awe ae tarelamsiekti, kamna kaptoba tolamek. Kamna tolamekne Yesusti wepto pogsiog nangdi saeag aghabog nenelamsiek. Saeag nenelamsiekpa, sindi nimi tipto kwema ua ulamsiogha sunsunum uro tarelamsiek. 36Nimi nhon si Yusup, Yesusti wepto pogsiog nangdi Barnabas engkaekne, “Wana mikip nenehinne,” aro engkaek. Elna sisa Lewinge mog so'o Siprusne wamog. 37El ponekori so'o eldamneringe nimiag kamna kapto tobogti, so'o kamna kaptoba tareka aneko Yesusti wepto pogsiog nangdi saeag nenel aog.
Currently Selected:
Pogsiog Nang 4: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
