Pogsiog Nang 7
7
Yahudi nimi sembe tam kareptop nang whingag Stefanusti yubu ambatsiogha
1Memne Allah sembe palirop nang sikini nubunge ponekori hailamogti, “Sindi lebangne sik te?” aro haibaog. 2Haibaogpa Stefanusti, “Nangkabo, nani yabo ka'eamsut! Anam nunisang Abraham Kharan pin komag Mesopotamia wamogpa, Allah imang wareropne poneko Abraham wamoghag lag taog.#Sumbaogha 11:27—17:14 3Lag taogti, Allahri yubu lelamogti, ‘Anenge mog so'o asag agha lambamendi, ankabo laploa nari mog so'o nhon ambatkenenge nhonag pululam,’ seog. 4Allahri Abrahamag wene seogpa, Kasdim nimi mog so'o laplobi agha as Kharan piogti wamog. As Kharan aneko wamogpa, Abraham ili tebaogpa, Allahri lebogha sunsunum uro nu Yahudi nimi wamap so'o eneag Allahri Abraham payaogpa, Abraham wamog. 5‘Pululam,’ seogpa yaoghag aneko, ‘So'o ologha babe an ngai talulam,’ ana babe lebog kom. ‘Ot anap andi mangarobari mangaroba mangkahyikneap amik ngai talulom,’ aro Allahri Abrahamag salag lero ambarog. Abene li elmabo babe nhon wamna komag, oroghag agha ambarog.#Sumbaogha 12:7; 13:15; 15:18; 17:8 6Ambarogti nen Allahri Abrahamag yubu lelamogti, ‘Andi mangaroba mangarobari mangkahyikne yog nimiri so'oag nimi sekelanan nang wamukang. Hengkun teng naual tarabare (400) saog ulamlea yog nimiri so'oag ua ulamikpa, so'o enekoag wamik nimiri sin oro aruklamsiikpa, ikinaba maghan og uro polamukang.#Sumbaogha 15:13-14 7Aghana sin arukna nembamsiik nimi sisa taneko nari tam karebi agha lunuro opsinun. Opsineba anisag yabo lambaikti, mog so'o Yerusalem ane na omekanukang,’ aro Abrahamag Allahri ambarog.#Sumbaogha 14:18 8Ambarogti Allahri Abrahamap yubu nikne lero salag palilamogti, ‘Nari salag palilamnange nene ekon tamunag aro anap, anmaboap, nengabo niap nengabo kon karebel dalamlulom,’ aro yubu nikne lero salag pibog.#Sumbaogha 17:10 Abrahamdi elme Ishak mangaro aogti, ‘Allahap nari mangarobari mangaroba mangkahyikneap ma'ap tabunge ekon taikag,’ aro ae ik lin sum Allah ambarogne sunsunum uro elme Ishak nengabo kon karebaog. Abrahamdi Ishak mangkaogpa, Ishakti Yakub mangkaogpa, Yakubti kongap nang aobare mangkahiogpa, sindi nimi sisa aobare likto piekti, nunisa yabo nubunang taek,” aro Stefanusti ambarelamsiog.#Sumbaogha 21:2-4; 25:26; 29:31—30:24; 35:16-18
9Stefanusti nen tipto ambarelamsiogti, “Nunisa yabo aobare nubunang tanekori sikinipsae Yusup sembe, ‘Nuni Yakubti nu sembe olog uro o'ona senelamsildi, elme Yusup sembe agha maikno o'ona senelamla,’ aro wana mali senelamek. Wana mali senelamekti, ‘Mesir nimi arukna talul,’ aro eldo yabori el kamna kapto tobek aghana, Allahri sikinipsae Yusup yepto paiamog.#Sumbaogha 37:1—50:14 10Yusup ni seklenne seklelamogneag agha Allahri el towalengkia yeplamogpa, Mesir nimi sembe yubu sia leropne Firaunag yaog. Elag yaogpa, Allahri Yusup wana heklamogpa, Firaundi Yusupag wana yororo awi senelamog. Yusup sembe awi senelamogti Firaundi, ‘Mesir so'o saelbalulam,’ aro towalengkaogpa, Yusupti Mesir so'o saelbamog. Mesir so'o saelbamogpa, Firaundi aeag uropne babe, Firaun el tamag awe toro ulamekne babe, ‘Paia ulamlulam,’ aro Yusup saeag nembaog. 11Towalengkaogpa wamekpa, Mesir so'oag babe, Kanaan so'oag babe, kwaneng yo nubunge waelbaogpa, kwaneng yo seklelamek. Kwaneng yo seklelamekpa, nunisa yabo Kanaan wamek nimi babe kwaneng telamek kom. 12Unuamogpa, ‘Mog so'o Mesir kwaneng telamang,’ ana Yakubti ka'ebaogti, nunisa yabo nubunangag ‘Mesir kwaneng tol pululom,’ aro pogsiog. Pogsiogpa sin sumene alnirop sum, ‘Kwaneng tobukap,’ aro piekti, kwaneng samoro payaekti, olog wamek. 13Nen ik phendep sum babe piekpa Yusupti, ‘Na a'unipsae wamna,’ aro eldo yabo ambatsiogpa, Firaun babe Yusup ili eldo yabo wamekne sembe el taog. 14El taogpa, Yusupti iliap, eldo yabori maboap kelaboap, ‘Na yaghag yalulom,’ aro yopsiogpa, ili Yakubap nhon yaek nimi taneko teng phende eptopne saek tarabare (75) yaek. 15Mog so'o Mesir piekti wamekpa, Yakub tebaogpa, nunisa yabo nubunang babe wamekti tebaek. 16Nunisa yabo nubunang teplameka Sikhem poa pina kirik lomag wirikil palamsiek. Wirikil palamsiekag aneko samen Abrahamdi Hemor elmabo saeag agha kamna kapto kirik wana solomneag agha toboghag aneko Sikhem mog so'oag kirik lomag wirikil palamsiek,” aro Stefanusti ambatsiog.#Sumbaogha 23:16; 33:19; 49:29-32; Yosua 24:32
17Stefanusti nen tipto ambarelamsiogti, “Allahri Abrahamag salag lero pibogne neneko, Israel nimi Mesir wamekne maikno tangto palamogpa, Allahri salag lebogne sunsunup tanepne peram talamog.#Keluaran - Lambaeka 1:7—3:10 18Peram talamogpa, Mesir nimi yubu sia leropne Yusupti uaogne ekonne nhon mog so'o Mesir saelba uhiropne waelbaog. 19Waelbaogne ponekori nunisa yaboag orolenange lero unulamsiogti, ‘Maikno taikag,’ aro sin aruklamsiogti, ‘A'undi mabo maghag tobogsiro sin ohiro ulamlulom,’ aro aruklamsiog. 20Undo unulamog li enekoag Musa mangap taogpa, Allahri Musa sembe wali senelamog. Ili ilindi aeag wal wilindi tognoro mo'oro paiamdek. 21Wal wilindi taogpa, mag abolag pabiogti pibog. Pibogpa Firaun elmangkeldi me aneko ibogti tobogti, eltangkeldi me saog uro mo'ol tolamog. 22Musa poneko Mesir nimiri nia mangkina uropne ambarelamekpa, sindi lero uropne el talamogti, wana heklamsiog. Musa ponekori yubu lenne babe, nia ua unne babe mikip uro ulamsiog. 23El mangkaekne hengkun tai puka tau puka ulamogha teng nhon epto naualbare wamogpa, ‘Nangkabo Israel nimi kemel pihinun,’ aro wanaag seneraghog. 24‘Kemel pihinun,’ aro palamoghag agha Mesirne nhondi elkae Israelne nhon tam oroghag agha olamogha ibog. Ibogti Musari elkae pelepto elkae Israelne ponekoag sip taogti, Mesirne poneko ya'ag obog. 25Musa eldamne wanaag agha seneraglamog nena, ‘Nangkabo Israel nimiri na sembe wali sembanukang. “Mesir nimiri Israel nimi olamsiangba Allahri, ‘Taulbahilulam,’ aro poghol alne Musa ane,” sembanukang,’ sembaog aghana, el sembe undo seneraglamek kom. 26Mabogha kwelekaogpa, lukunap Israel nang phende ol dalamdeka kembahiogti, ‘Nari ma'abahinun,’ aro piog. Sinag piogti, ‘Nangkabo, sa'a sembe a'un mamun, “Omnun,” aro wal dalamdom? A'unna eldo ilipsae saog uro wamdom kom te?’ seog. 27Seogpa ol dalamdekti, elkae obogne ponekori Musa wepto pail piogti, yubu lelamogti, ‘Etneri an, “Nu saelbamsilul,” aro towalengkagheo? Etneri, “Tam kareplamlulam,” seori towalengkagheo? 28Ambuhum Mesirne obomne neneko saog uro wene na babe omnululam te?’ aro haibaog.
29Wene seogpa, Musa ka'ebaogti, log lelem laplobi agha mog so'o Midian piogti, nimi sekel ingkiropne saog uro wamog. Aneko pina wamogti, me nengabo me phende mangkahiog.#Keluaran - Lambaeka 18:3-4
30Mog so'o Midian piogpa, hengkun tai puka tau puka ulamogha teng nhon epto naualbare taog. Ik nhon sum Musa poneko Yim Sinai tamag yabalamogti, pai aldesag wamog. Yim Sinai tamag yabalamogti, kemelamogpa Allahri el arukna imagne malaikat poghogne yingkina kal werengkel alog saog kal anekoag auk pog tag-tag alamog. 31Musari ibogti, lo'om seogti, ‘Mane agha ililamna,’ aro peramag piog. Peramag piogti, ‘Kembanun,’ aro ulamoghag agha nu Saelba Uhiropne Allah yubu lilim ka'ebaog. 32Allahri Musaag yubu lelamogti, ‘Na Allah, anisag yaboap, Abrahamap, Ishakap, Yakubap paia uhiropne Allah wamna,’ seog. Seogpa Musa log lelem pet-pet alamogti, whing ebom agha kal werengkel alog kalag auk pog tag-tag alamogha anekoag tiboghanep kom wamog. 33Unuaogpa nu Saelba Uhiropne ponekori nen yubu lelamogti, ‘Na whingag ane memag sekamlam. Memag sekamlam ane sembe, yan wangana tobongkamlama ane olobalulam,’ seog. 34‘Na Namabo Israel nimi mog so'o Mesir wamangne tiplengelamsinba, whin maikno seklelamangti, “Yaghe,” alamangne na ka'eamna. Na kulukulan nena, “Sin towalengkia taulbahinun,” aro kulukulan. Wene nari an pogkeneba, samoro Mesir pululam,’ seog. 35Samenag Israel nimiri Musa sembe, ‘Nu karong,’ aro wa'epto toboghaekne neneko, ‘Etneri an, “Nu saelbamsilul,” aro towalengkagheo? Etneri, “Tam kareplamlulam,” seori towalengkagheo?’ seek.
Wene seek aghana, Allahri el arukna imagne malaikat poghogpa, werengkel auk pog tag-tag alamoghag aneko Musa whingag lag taog. Malaikat aneko pere agha Allahrina Musa ponekoag, ‘Israel nimi saelbamsimendi, haing sae lopto taulbahilulam,’ aro ambarog. 36Musari ulamog nena, ‘Yaghe, Allah mikibari uanepne el pere agha ual,’ senenne kekneba ulamogti, Mesir so'oag agha Israel nimi ni poa lambahiog. Mesira mag longorop mag Uwong Mag Sin agha, pai aldesag aneko babe ulamogpa, hengkun tai puka tau puka ulamogha teng nhon epto naualbare taog.#Keluaran - Lambaeka 7:3; 14:21; Bilangan - A'iliroba 14:33 37Musa ponekori Israel nimiag yubu lelamogti, ‘Allahri a'unkabo Israel nimi nusamag agha eldi yubu silimu tiptopne na saog uropne nhon sekitlul,’ seog.#Ulangan - Sariktoba 18:15,18
38Wene seogti, Musa ponekoap nu Israel nimi nunisag yaboap pai aldesag nhon wamekpa, nunisag yabo poloro winil dalamek. Winil dalameka laplobi agha Musa Sinai Yimag waelbaogpa, Allahri el arukna imagne malaikat poghogne ponekori yubu ambarog. Eldina, ‘Yubu ambatsinne sunsunum uro unulapmundi, Allahap ma'ap tangto kamag wamnep,’ aro yubu ambarogpa, Musa ponekori nunisag yabo nen tipto ambarelamsiog.#Keluaran - Lambaeka 20:18-21 39Ambarog yubu neneko ambatsiog aghana, nunisa yabo eldi lebogne karong aro ka'ero nelebaek komdi, wanaag agha, ‘Mesir samoro pukap,’ sembaek.
40Wene senelamekti, Harunag yubu lelamekti, ‘Musari nu saelbamsioba, Mesira lambabo aghana, “Wela uaori, tala pio?” senelamap. Ane sembe an Harundi saeri sumbatsululama nuri phalamsibenge samenag menangal palamikti, nu yeplamsukanga saeri sumbatsululam,’ alamek.#Keluaran - Lambaeka 32:1-6
41Wene alamekti, pham sapi me saog uro sunumna Harunapti sumbaekti, ‘Nuni nundam nimiri sumbaba aneri nu paiamsilul,’ aro awi uro seplamekti, sani yoro telamek. Sani yoro telamekti, sumbaek mema anekoag pham oro aukag taro phalamek.
42Undo mema phalamekpa, Allahri sinag wail ibatsiogti lipsiog. Allahri senelamogti, ‘Sinba tibin nenenne imag wareropneag phalamik,’ aro lipsiog. Imag wareropneag phalamekne sembe babe, Allahri sin wail ibatsiogne sembe babe, Allahri yubu silimu tiptop nimiri mome toro pibog. Mome toro pibog nena,
‘A'un Israel nimi hengkun teng nhon epto naualbare pai aldesag wamlumdi,
“Allah sembe pham oro aukag taro Allah sembe tarelamap,” senelamlum.
43“Allah sembe tarelamap,” senelamlum aghana, “Mema si Molokh omeklamukap,” aro mema paia urop ae kalun ae kwerekto poa pang-yang ulamlum.
Apna, “Mema Refan omeklamukap,” aro el kekneba imberea saogne nimi saeri sunuropne babe poa pang-yang ulamlum.
Ane sembe nari popsineri, toboghol pihinebag Babel kauro nimi saeag nenel pihinun,’
aro mome tobog.#Amos 5:25-27
44Nunisag yabori anam mema Refanap Molokhap poa pang-yang ulamek komag agha, Mesira lambaekti, pai aldesag wamek. Wamekpa Allahri Musaag ambarelamogti, ‘A'un nusamag wamneri paiamsineba, na Allah omeklamnululom ae kalun ae nhon sobalulom. Sunumna sikne lag nenero ambatkenba, kembalam sunsunum uro sobalulom,’ aro Allahri ambarog. Ambarogne sunsunum uro nunisa yabori pai aldesag sobaekti, kwerekto poa pang-yang ulamek.#Keluaran - Lambaeka 25:9,40
45Allah omektop ae kalun ae eneko sobaekti, kwerekto poa pang-yang ulamek. Israel nimi salehiropne Musa tebanep liag, Yosua Musa lunuro waelbaog. Yosuari saelbamsiog li eneko mog so'o wene wamabag payaekpa, mog so'o enekoag wamek nimi sisa Allahri talup lambahiogpa, nunisa yabo lelnero wa'iek. Lelnero wa'iekti, sisa nhondi nhon, nhondi nhon pogto mog so'o tobekti, wamek paghabog Daud waelbaog.
46Nunisa Daud poneko sembe Allahri wana elag yorolamogti awi sembaog. Daudti Allahag mololamogti, ‘Ae nhon Yakub paia uropne Allah ua unag nhon an sembe sobanun,’ aro molbaog.#2 Samuel 7:2 47Molbaogpa Allahrina, ‘Molbanelam aghana, andi sobalulam kom. Anme Salomori nari ae sobalul,’ seogpa sobaog.#1 Raja - Yubu Sia Lennang 6:1-38
48Sobaog aghana, ‘Allah tane wamlul,’ aro nimiri saeri sorop ae enekoag aghabog Mikip Phelektopne Imag wamlange wamnep kom. Samenag babe Allah eldamneri yubu silimu tiptopneag ambarogpa, sunsunum uro mome toro pibog nena,
49‘Imap so'oap Saelba Uhiropne Allahri lelamog nena,
“Na pukamneri, nimi ni saelbahinuna sunsunumag aneko im tiwalengka ulamlomne saog wamla.
Imag pukamnari, mog so'o ni aneko na yan pelengka unag saog wamla.
Na ua ulamnaba, imap so'oap to'op tal ane sembe a'undi, ‘ “Allah wamlulag,” aro ae soro pibukap,’ sembamunne welaro ae sobalulom?
‘Allah tane wamnebag,’ sunsunum urobag tala wamlul sembamlom?
50Na nadamne saeri nia sumbahi,” seog,’
aro Allahri eldi yubu silimu tiptopne pere agha ambatsiog,” aro Stefanusti ambatsiog.#Yesaya 66:1-2
51Wene seogti, Stefanusti nen tipto tam kareptop nangag ambarelamsiogti, “A'un usog mikip nimi. Allahri samenag, ‘Na Israel nimiap ma'ap tabunge, “Ekon taikag,” aro nengabo kon kareplamlulom,’ aro arukahiogne aori ka'ebalumdi, kon kareplamlom aghana, yubu eneko wanaag seneragna koma ingisaplamlom. A'undi sop-sop Allah Eldamne Yame Walinge wailag nenero wa'eplamlom. Nu Israel nimi nunisa yabori ulamek saog uro wene a'undi babe ulamlom.#Yesaya 63:10
52Nunisa yabori Allahri yubu silimu tiptop nimi ni, ‘Seklebaik,’ aro malia ulamsiek. Unulamsiekti el Nimi Sikne poneko yanepne sembe ambarelamsiek nimi ya'ag olamsiek. Samenag agha wene babe a'undi Nimi Sikne Yesus poneko yaonge a'undi pan khero uaomdi, el poneko ya'ag obom. 53Allahri el arukna imagnang malaikat pogsiogpa, nunisa Musaag yubu ambarek. Musa pere agha Allahri arukahiog yubu neneko, ‘Salero ul palamap,’ alamlom aghana ingisaplamlom,” seog.
Stefanus kirikti olopsieka
54Stefanusti wene aro ambatsiogpa, nimi nubunang wamek nang tanekori ka'ebaekti, wanaag yo maikno walelamsiogpa, si keleng tebongkia yo uro seneraglamek. 55Wanaag yo uro seneraglamekpa, Allah Eldamne Yame Walingeri seneragna Stefanusti wanaag to'opto pibogpa, imag tiwalengelamog. Stefanusti tiwalengelamogpa, Allah ua urobag Allah imang wareropne sae sirik sip#7:55 sae sirik sip - Nimi nubunge sunsunum urobag sip wamla. Yesus sekamogha tiwalengkaog. 56Tiwalengkaogti yubu lelamogti, “Nangkabo, im phoamlaba, el mog so'oag nimi taogne poneko Allah sae sirik sip sekamlaba tiwalengkan,” seog.
57Wene alamog abeneko sin ao lep tangom agha sin yo lelem yanghang alamekti, nimi ni tanekori Stefanusag merero saelbaek. 58Saelbaekti kiliro asag agha pabiekti, paiag simbik toboghol piekti, kirikti olamek. Kirikti olameka ipsiek nimiri, “Nu babe ag pibeberi, Stefanus kirikti ol pukap,” aro sindi ag wangaro siliplengka urop ag kwiriplamek. Ag kwiriplamekti, kabuni me nhon sina Saulusti yan tamag, “Paiamsululam,” aro pibek. 59Stefanus kirikti olamek abeneko Stefanusti Yesusag yoplamogti, “Yesus nu Saelba Uhiropne, nari yame anag yale tanena, ‘Nanap wamnunam,’ sululam!” aro mololamog. 60Mololamogti yabu sanukto pulingkiogti, nen yubu mikip uro mololamogti, “Nu Saelba Uhiropne, sindi undo malia ulamangne sembe tam pimna koma wailag nembalulam,” seogti tebaog.
Currently Selected:
Pogsiog Nang 7: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
