Yohanes 18

Yesus pan khebaogpa saelbaeka

(Matius 26:47-56; Markus 14:43-50; Lukas 22:47-53)

1Yesusti wene aro molona Allahag molbaogti, elap eldi yubu ka'ero neleptop nangap nhon lamba palamekti, mag Kidron pirop ina kauro tara sip piek. Sin piekag aneko nimiri awe wero meroba nhonag Yesus eldi yubu ka'ero neleptop nangap aneko wa'al piek.

2Yesus sinap piekag anekona, ik nhon-nhon babe Yesus eldi yubu ka'ero neleptop nangap aneko yingkina ua urop. Ane sembe, Yudas Yesus pan khebanepne ponekona el uro wamog mog so'oag piek. 3Aneko pina wamekpa, memnang Allah sembe palirop nang sikini yaboap, Farisi nimiap tanekori Allahri Mem Ae yae ua urop nangap Roma nimi yin salerop nang teng etpareap, “Yesus sae salel pululom,” aro poloro wimbahiek. Wimbahiek nimi tanekona, wheaap, tibin warena yogneap, mal tarobaap salelamekpa, Yudasti enero pabalamsiogti, Yesus elkaboap wamekag aneko piek.

4Yalamekpa Yesusti elag uro yabinepne ni el uro wamogti, yaek nimi tanekoag lamba piog. Sinag piogti hailamsiogti, “A'unna etne elamlom?” aro haibahiog.

5Wene aro haibahiogpa sindina, “Yesus Nazaretne poneko elamap,” seek.

Wene seekpa Yesusti, “Na wamna,” seog. Yudas Yesus pan khebaogne poneko babe sin nimi tanekoap nikag sekamog. 6Yesusti, “Na wamna,” seogne sembe sin wailag sip ko'ol piekti, so'oag malingkiek.

7Yesusti nen sinag hailamsiogti, “A'undi etne elamlom?” aro haibahiog.

Wene aro haibahiogpa sindi, “Yesus Nazaretne poneko elamap,” seek.

8Wene seekpa Yesusti, “Nari usa aneko lemnange, ‘Na wamna,’ sen. A'undi na sembe elamnelom pagha tanena, nimi nenne tane sae lipsimunba pukang,” seog. 9Wene seog nena, Yesusti samenag Allahag, “Nari saeag pipsilum nimi ni wamangne nhon babe ka'eseptangto kom tal kom,” aro lebogne sunsunup talul aro nimi tanekoag, “Sae lipsimunba pukang,” seog.#Yohanes 6:39

10Undo uro yabiogpa, Simon Petrusti karog nhon payamogne kilbom agha lebogti, sin yaek nimi anabiag agha memne Allah sembe palirop nang sikini nubunge arukna nhon si Malkhus babe yingkina wamog. Wamogpa Petrusti karog payaogha kilbom agha lebogti, Malkhus ponekori ao sirikne pubom agha pelengkaog. 11Ao pubom agha pelengkaogpa, Yesusti Petrusag yubu lelamogti, “Karog ane nen samoro karog liroba aeag tobongkiplulam. Na Naniri nanag, ‘Seklero tebalulam,’ aro mag tebatneloa saog uro tatnelne nari tenepneog wamla,” seog.

Memnang Allah sembe palirop nang sikini nubunge whingag Yesus poa pieka

(Matius 26:57-58; Markus 14:53-54; Lukas 22:54)

12Wene seog ane sembe, Roma nimi yin salerop nang maikno tanekoap, sikini wamogne ponekoap, Yahudi nimiri Allahri Mem Ae yae ua urop nangap tanekori Yesus saelbaekti haing sae kaubek. 13Yesus haing sae kaupto poa lebekti, samenagna Hanas ponekoag poa piek. Hanasag poa piek nena, Kayafasti Hanas elmangkel toropne poneko wamog. Kayafas ponena, hengkun enekoag el agha memnang Allah sembe palirop nang sikini nubunge wamog. 14Kayafas poneri samenag Yahudi nimi nubunangag, “Nun nimi sembe nimi nhon tebale tanena wali,” seogne pone wamog.

Petrusti Yesus sembe, “Na ekonne,” seogha

(Matius 26:69-70; Markus 14:66-68; Lukas 22:55-57)

15Simon Petrusap, Yesusti yubu ka'ero neleptopne nhonapti sin Yesus salero poa palameka keme nelero palamdek. Yesusti yubu ka'ero neleptopne nhon nena, memnang Allah sembe palirop nang sikini nubungeri el nimi wamog. Ane sembe el babe Allah sembe palirop nang sikini nubungeri aramag Yesus poa wa'alameka nelepto wa'iog. 16Ot Petrusna wa'in koma asag siba ina siramag sekamog. Asag siba sekamog ane sembe, elkae Yesusti yubu ka'ero neleptopne memnang Allah sembe palirop nang sikini nubungeri el wamogne poneko nen samoro lambaog. Lambaogti ina siramag yae ulamog kel enekoag yubu lebogti, Petrus embaogti, ae aramag sip poa wa'al piog. 17Ina siramag yae uro yeplamsiog kel enekori Petrusag yubu lelamogti, “An babe nimi enekori yubu ka'ero neleptopne nhon wamlam kom te?” aro haibaog.

Wene aro haibaogpa Petrusti, “Na kom,” seog.

18Memnang Allah sembe palirop nang sikini nubunge arukna tanekoap, Allahri Mem Ae yae ua urop nangap aneko wamek. Son uahiogne sembe auk lolbamekag aneko auk lekto sekamek. Wamekpa Petrus babe sekel pina sinap nhon auk lekto sekamog.

Memnang Allah sembe palirop nang sikini nubungeri Yesus haim-haim alamogha

(Matius 26:59-66; Markus 14:55-64; Lukas 22:66-71)

19Wamekpa memnang Allah sembe palirop nang sikini nubungeri Yesusag yubu lelamogti, eldi yubu ka'ero neleptop nang sembe babe, eldi amoro ambatsirop yubu sembe babe haim-haim alamog.

20Haibaogpa Yesusti samoro, “Nari yubu ambarelamsinne mog so'o eneag wamang nimi whingag agha lag phoro ambarelamsin. Allah yubu lero winirop aeag agha babe, Allahri Mem Ae aramag agha babe, Yahudi nimi ni winip tangtobag aneko sop-sop yubu ambarelamsin. Nari nimiag tognoro yubu ambatsiropne nen nhon wamla kom. 21Undop pagha tanena, sa'a sembe nanag haibanelam? Nari yubu ka'elamong nimi taneri nari sinag ambatsinonge el wamang. Ane sembe sinag haibahimenba ambatkukang,” seog.

22Yesusti wene seogne sembe yae wamsiogne nhon el peramag sekamogne nhondi Yesus whingag taeplam lobog. Taeplam lobogti, “Andi memnang Allah sembe palirop nang sikini nubungeag undo lemnep kom,” seog.

23Wene seogpa, Yesusti samoro, “Nari yubu malinge lepsene tanena, wene ane, ‘Yubu malinge undo leplam,’ aro sikne lag nembatsinep. Aghana ot sikne agha lemna ane sembe, sa'a sembe omnelam?” seog.

24Wene seogti, Yesus anam haing sae kaupto wamogpa, Hanasti nimi aruklamsiogti, “Memnang Allah sembe palirop nang sikini nubunge Kayafas yaghag poa pululom,” aro arukahiog.

Petrusti nen Yesus sembe, “Na ekonne,” seogha

(Matius 26:71-75; Markus 14:69-72; Lukas 22:58-62)

25Simon Petrus ae aramag wamogti, auk lekto sekamogpa, nimi wamek nimi tanekori elag hailamekti, “An babe nimi enekori yubu ka'ero neleptopne nhon wamlam kom te?” aro haibaek.

Wene aro haibaekpa Petrusti, “Na kom,” seog.

26“Na kom,” seog aghana, anamag Petrusti karog kilbom agha ao pupto pelengkaog nimi eneko elkae sisa nik nimi ane babe wamog. Elkae eneko babe memnang Allah sembe palirop nang sikini nubunge arukna wamogti Petrusag, “Usa nu awe meroba anekoag wamapba, an nimi nenekoap nhon wamlamne ipken kom te?” seog.

27Wene seogpa, Petrusti nen kom alamog abeneko winang ayamdi kau seog.

Yesus Pilatus whingag pabieka

(Matius 27:1-2,11-14; Markus 15:1-5; Lukas 23:1-5)

28Yesus Kayafasti aeag agha poa lebekti, mog so'o saelba uropne gubernur ua urop aeag aneko poa piek. Poa palamekag aneko lukun taogpa, poa palamek. Ane sembe Yahudi nimi tanekori senelamekti, “Gubernur pone Yahudi nimi komdina, eldi aeag wa'ibe tanena, nunag sembenga kalup tanep. Sembenga nunag kalup tanepne sembe nuri Paskah sum kwaneng roti walerop komne tero ulamnep kom,” senelamekti wa'iek kom. 29Wa'iek kom ane sembe, Pilatus sinag lambaogti hailamsiogti, “Nimi neneri huaoba, elag tam piplomdi payamlom?” aro haibahiog.

30Wene aro haibahiogpa, sindi samoro, “Nimi eneri malia uaho kom tanena, elna andi saeag nembahabe kom,” seek.

31Wene seekpa, Pilatusti sinag yubu lelamogti, “Nimi ene poa pimundi, a'undam nimiri aruksirop yubu sunsunum uro elag tam piplomne karebalulom,” aro wene seog.

Wene seogpa, Yahudi nimi nubunang tanekori, “Nu Yahudi nimi an umag wamaptina, nuri nimiag tam karebi agha, ‘El tebalul,’ aro tam pelengkanep kom wamap,” seek. 32Sindi wene seek nena, Yesusti samenag el wamogti, “Undo tebanun,” aro yubu lebog. Eldi yubu lebogneap sunsunum uro sindi wene aro lelamekne uro yabiog.

33Pilatus samoro eldi aeag wa'al piog. Yesus yobogti hailamogti, “Anna Yahudi nimi sembe yubu sia leropne poneko te?” aro haibaog.

34Wene aro haibaogpa, Yesusti elag samoro, “Andi na haibanelam yubu ene an mori to, nimi orangeri na sembe samenag ambatkeangpa, yubu leplam to?” aro hairo ambarog.

35Wene aro ambarogpa Pilatusti, “Na Yahudinge wamna te? Andi sisa nik nimi tanekoap, andam nimiri memnang Allah sembe palirop nang sikini yaboapti saelbagheongdi, nari saeag nembagheong. Andi sa'a uaom?” aro haibaog.

36Wene aro haibaogpa, Yesusti elag samoro ambarelamogti, “Nari saelba uhiroba neneko mog so'o eneag wamang nimiri seneragto ul piropne sunsunum uropne kom. Mog so'oag nimiri seneragto ul piropne sunsunum uro saelbamsisene tanena, na yae ua unerop nimi tanekori mal nembaheng. Mal nembaheng andarina, na Yahudi nimi nubunangdi saeag nembaneheng kom. Aghana nari wene saelba uhiroba neneko mog so'o aneag agha wamla kom,” seog.

37Wene seogpa, Pilatusti hailamogti, “Wene selam tanena, anna yubu sia lenne wamlam te?” aro haibaog.

Wene seogpa, Yesusti samoro, “Andi na sembe, ‘Yubu sia lenne wamlam,’ selamne andi yubuag leplam. Na mangaro yabahiri, na mog so'oag ane yahingena, tam ot nhonog sembe yahi. Ot nhonogne sembe yahingena, nimiag sikne agha lag nenero ambatsinne sembe yahi. Nimi etneri sikneag agha seneragto ul pirop tanena, nari yubu ambarelamsinne ka'elamnel,” seog.

38Wene seogpa Pilatusti, “Andi, ‘Sikne’ alamlamne sa'ange sembe leplam?” seog.

“Yesus tebalul,” aro yubu karepto pibeka

(Matius 27:15-31; Markus 15:6-20; Lukas 23:13-25)

Wene seogti, Pilatus eldi ae lomag wamogha nen lambaogti, Yahudi nimi nubunang tanekoag yaog. Sinag yubu lelamogti, “Nari tam kembanba, nimi eneag tam palinne nhon babe imna kom. 39Aghana samenag agha a'undi ul palamlomne sunsunum uro, a'undi ik nubu sum Paskah seneragto ul palamlomne abeneko pere haing sae kauptop nimi nhon nari a'un sembe sae lobarelamsin. Ane sembe nari wene nimi sae lobatsinep tanena, a'undi awi senen nena, ‘Yahudi nimi sembe yubu sia lenne pone sae lobatsiso,’ senelamlom te?” aro haibahiog.

40Wene aro haibahiogpa, nimi tanekori haum aro yubu lelamekti, “Nimi neneko kom. Barabas agha sae lobatsululam,” alamek. Ot Barabas ponena, nimi ohiro haoghaba toropne wamog.

Currently Selected:

Yohanes 18: kklKOS

Highlight

Copy