Yohanes 21

Yesusti yubu ka'ero neleptop nang saekpare whingag lag taogha

1Undo uro yabiogpa, amik sum babe mag longorop mag Tiberias abolag agha Yesus nen eldi yubu ka'ero neleptop nang whingag agha lag taog. Sin whingag lag taogha undo uro yabalamog.

2Ik nhon sum Simon Petrusap, Tomas si nhon Didimus aro engelamekne ponekoap, Natanael as Kanange Galilea so'oagneap, Zebedeus elmabo abenekoap, yog nimi phende Yesusti yubu ka'ero neleptop nang abeneap sin nikag wamek. 3Sin nikag wamekti, Simon Petrusti, “Na ikan aghag liptaneba toboghol pinun,” seog.

Wene seogpa, sin nenneri, “Nu babe anap nhon pukap,” seek.

Wene seekti, anekoa lamba piekti, kabong lomag waelbaek. Kabong lomag waelbaekti, mag alip toman piek. Piekti ae inipna anekoag ikan lip tangtop ag pelengelamekpa, ikan nhon babe lip taog kom.

4Heng tingilamogpa, Yesus mag longorop mag abolag sekamog. Sekamog aghana, eldi yubu ka'ero neleptop nang taneko ekondi, “Yesus agha sekamla,” sembamek kom. 5“Nu ekonne,” sembamekpa Yesusti sinag yoplamsiogti, “Namabo-e! Kwaneng ma'abanepne ologha a'unag wamla te?” aro haibahiogpa, sindi elag samoro, “Orog,” seek.

6Wene seekpa, Yesusti sinag yubu lelamogti, “Ikan lip tangtop ag ane kabong tara sirik sip toboghamunba, ikan lip taikpa, kiliro saelbalulom,” seog.

Wene seogne sunsunum uro ikan lip tangtop ag aneko sangaro toboghaekpa, ikan maikno lip taekpa, kiliro toro pimnep kom uaog.

7Pimnep kom uaogpa, eldi yubu ka'ero neleptopne Yesusti o'ona sembaneogne ponekori Petrusag, “Elna nu Saelba Uhiropne poneko,” seog.

“Elna nu Saelba Uhiropne,” seogpa Simon Petrusti ka'ebaogti, kerebenang wamog aneko ag enekom agha lebogti, longorop mag anekoag wa'alulum seog. 8Petrus samenag piogpa, Yesusti yubu ka'ero neleptop nang yog nang kabongag wamek aghana, sin wamekag anabi mag abolag anabiag mag alip toman panne we kom. So'oag wamseng tanena, yan ingiro panne teng wilindi eptopneap saog uro sin kabongag agha mag alip toman mag abolag pinep. Palamek abeneko ikan aghag lip taogne kiliro poa piek. 9Kabongag agha loplengka mag abolag pina tilamekpa, auk sikiag ikan mektoba tiboghaekti, kwaneng roti babe tiboghaek.

10Yesusti sinag yubu lelamogti, “Ikan aghag lip talne saelbalomne nene agha nhon-nhon payalulom,” aro ambatsiog.

11Wene seogpa, Simon Petrus kabongag walelem agha lebogti, ikan lip taog ag aneko kiliro poa so'oag pabiog. Ikan nubunge agha lip taog nena, teng lambareap epto sa'o tarabare (153) lip taog. Ikan maikno lip taog aghana, ikan lip tangtop ag aneko tilipto yabiog kom.

12Yesusti sinag, “Wene yahutti, kwaneng telahut,” seog. Wene seogpa, eldi yubu ka'ero neleptop nang nhondi babe sang-sang uro, “Nai anna etne?” aro haibaek kom. Sin senelamek nena, “Nu Saelba Uhiropne wamla,” aro el uro wamek. 13El wamekpa, Yesus sin peramag yaogti, kwaneng roti tobogti tatsiog. Ikan babe nika uro tatsiog. 14Sum eneko anam haiptan komag, Yesus tebaogha kamag nembaogpa, ik nhon, ik phende eldi yubu ka'ero neleptop nimi whingag lag taog. Sum eneko Yesus ik wilindipne sin whingag lag taog.

Yesusti Petrusag hailamogha

15Kwanengap ikanap tatsiogpa teekpa, Yesusti Simon Petrusag yubu lelamogti, “Simon, Yohanes elme, sin nenne phelekto andi na o'ona senelamnelam te?” aro haibaog.

Wene aro haibaogpa Petrusti, “Nai nu Saelbamsilamne. Sik, nari an o'ona senelangkenne an el wamlam,” seog.

Wene seogpa, Yesusti Petrusag, “Pham domba me naringe yae paiamsululam,” seog.

16Yesus nen ik phendepne Simon Petrusag hailamogti, “Simon, Yohanes elme, andi na o'ona senelamnelam te?” aro haibaog.

Wene aro haibaogpa Petrusti, “Nai nu Saelbamsilamne. Sik, nari an o'ona senelangkenne an el wamlam,” seog.

Wene seogpa Yesusti elag, “Pham domba naringe yae wamsululam,” seog.

17Ik wilindipne Yesusti elag hailamogti, “Simon, Yohanes elme, andi na o'ona senelamnelam te?” aro haibaog.

Undo ik wilindipne, “Andi na o'ona senelamnelam te?” aro haibaogne sembe Petrus wana ikin taog. Wana ikindi Yesusag samoro yubu lelamogti, “Nai nu Saelbamsilamdi, nia mangkina el wamlam. Nari an o'ona senelangkenne an el wamlam,” seog.

Wene seogpa Yesusti elag, “Pham domba naringe yae paiamsululam. 18Nari yubu sikne agha anag ambatnuaghen. An ngauk wamlumagna, andamneri ag enekel dalamlumdi, uwoghag noptangka, ‘Pinun,’ senenag palamlum. Aghana amik an sabal tamen tanena, an sae nginikamenba, ora nimiri an nobitkeikti andi, ‘Pinun kom,’ senenag an poa pukukang,” seog. 19Yesusti wene seog nena, Petrus amik tebanepne toman agha Allah paliag uropne kiplulne sembe anamag likipto ambarog. Wene aro ambarogti, nen Petrusag, “Nanag nelebanululam,” seog.

20Petrusti wailag sip tangom agha tilamogpa, Yesusti yubu ka'ero neleptopne eldi o'ona sembaneogne poneko amik yalamogha tibaog. Tiboghaog nimi enekona, samenag Yesusap kwaneng nikag telamek sum eneko Yesus peramag puka hailamogti, “Nu Saelbamsilamne, etneri an pan khelangkel,” aro haiamogne poneko Petrusti tiboghaog. 21Petrusti yalamog nimi eneko tiboghaogti, Yesusag yubu lelamogti, “Nu Saelbamsilamne, el nimi eneko welaro wamlul?” aro haibaog.

22Wene aro haibaogpa, Yesusti samoro Petrusag, “Nari sembanep nena, ‘El kamag wamle paghabog na samoro yanun,’ sembahanea babe, nene tam andinge kom. Aghana anna nanag nelebanululam,” seog. 23Yesusti wene seogne sembe, nunipsabo tangtop nimi sin mamun ambarel dalamekne toman, “Eldi yubu ka'ero neleptopne poneko tebalul kom,” alameka sabo taog. “Tebalul kom,” alameka sabo taog aghana Yesustina, “El tebalul kom,” aro lebog kom. Yesusti Petrusag lelamog nena, “Nari sembanep nena, ‘El kamag wamle paghabog na samoro yanun,’ sembahanea babe, nene tam andinge kom,” seog.

24Eldi yubu ka'ero neleptopne ponekona, “Nia ni ulamogne neneko nari haingdi ipsi,” aro sikne lag neneropne wamnari, nari mome eneag liro palilamna. Nu el wamap nena, “Eldi lag nenero ambatsirop yubu eneko sikne agha lebog,” aro el wamsil.

25Yesusti ulamogne yogne babe maikno sirik ulamog aghana, mome toro pairopne eneag liro pairop kom. Eldi nia mangkina ulamogne neneko yabo teleng-telenga nhon-nhon liro pimnep tanena, mog so'oag liro palinag orog wamnepba, mog so'o to'op tanep sembamna.

Abenda.

Currently Selected:

Yohanes 21: kklKOS

Highlight

Copy