Yohanes 9

Yesusti haing uroba mangaro yabiog nimi nhon wali nembaogha

1Yesus palamogti kemelamogpa, nimi nhon mangap tangto yangkaoghag agha haing uroba mangaro yabiogne nhon wamog.

2Haing uroba wamogha ibekti, Yesusti yubu ka'ero neleplamek nimi tanekori Yesusag hailamekti, “Nai, an yubu amohinne nubunge wamlamne. Nimi etneri malia uropneag agha nimi ene haing uroba mangkaek? Eldamneri malia uaogneag agha to, ili ilindi malia uarekneag agha to, el haing uroba mangaro yabiog?” aro haibaek.

3Wene aro haibaekpa, Yesusti samoro, “El haing uro yabiog nena, el mori malia uaogneag agha haing uro yabiog kom. Apna ili ilindi malia uarekneag agha el haing uro yabiog kom. Aghana, ‘Allah mikibari elag ualenge lag talul,’ aro el haing uro yabiog.

4Wene wamabagna, yo'obi saog uro tibin warelamlea abeneko na pogneogne ponekori awe nuri tolamnepneog wamla. Amik uro yabinual ko'o nenekoag nimi nhondi awe tomnep koma wamleba, inipnag saog talul. 5Ot na wene mog so'oag ane wamnange na mog so'o tibin wareropne wamna,” seog.

6Wene seogti, Yesusti so'oag silumag subongkia lebogti, so'oag wiriro pensal nembaog. Yesusti pensal olog tobongkia haing uropne ponekori haingag selebi agha, 7yubu lelamogti, “Pimendi mag Siloam sinag mag a'alep talulam,” seog.

Wene seog mag si, “Siloam,” aro si engeropne nenena, “Nimi pogtopne,” aro lerop. “Mag Siloam sinag pululam,” seogpa nimi eneko piog. Piogti maghag a'alep taogti, samoro yalamogpa, nimi enekori haing kwelekaog. 8Samenag nimi eneko saeagha orog lelem nimiag mololamsiogpa, el peramag ua ulamek nimiap yog nimiapti ililamekti, el uro wamek. Wene wali taog nimi eneko samoro yaogpa, ibekti sin nimi taneko mamun hail dalamekti, “Nimi enekona, samenag puka mololamsio nimi eneko kom te?” alamek.

9Nenneri yubu lelamekti, “Nimi eneko ane,” alamek. Aghana nenneri, “El kom aghana, nimi eneko whing saog nimi,” alamek.

Wene alamek aghana, eldamne ponekori, “Ot sik na a'undi yubu leplomne poneko ane,” aro ambatsiog.

10Wene aro ambatsiogpa, sin nimi tanekori hailamekti, “Wene selam pagha tanena, welaro andi haing kwelekto yabil?” aro haibaek.

11Wene aro haibaekpa, haing kwelekaog nimi enekori, “Nari haing kwelekanel nena, nimi si Yesus alamang nimi enekori pensal olog nembi agha toplari, nari haingag selebal. Selebaneldi yubu lelamlari, ‘Pimendi mag Siloam sinag mag a'alep talulam,’ sel. Wene selba, na pindi, nari haing a'alep tanba, nari haing kwelekanel,” aro ambatsiog.

12Wene aro ambatsiogpa, nimi tanekori hailamekti, “Nimi eneko wene tala wamla?” aro haibaekpa, haing kwelekaog nimi enekori, “Na ekon,” seog.

Haing kwelekaog nimi sembe Farisi nimiri haim-haim alamsieka

13El samenag haing urop agha haing kwelekaog nimi eneko Farisi nimi whingag enero poa piek. 14Yesusti silumag agha pensal nembi agha nimi eneko haing kwelekaog sum enekona, Sabat sum agha ulamog.

15Ane sembe Farisi nimiri babe nen sap nimi enekoag, “Welaro andi haing kwelekagheo?” aro haibaek.

Wene aro haibaekpa, eldi samoro, “Eldi pensal nari haingag selepto pimneoba, na maghag pina a'alep tano. Wene haing ililamna,” seog.

16Wene seogpa, Farisi nimi nhon-nhondi yubu lelamekti, “El Allahri pogsonge agha yaho tanena, nu Yahudi nimiri Sabat sum enekoag tektek papto ulamapne phiro uanep kom. Ane sembe el Allahri poghogne kom,” alamek. Sin nenneri babe yubu lelamekti, “Nimi enekori Allah mikibari ulamnep kekneba ulamo. Malia uropne wamso tanena, welaro kekneba undopne ulamnep?” alamek. Wene alamekti, sin mamun yubu nenep tangka lel dalamek.

17Yubu lel dalamekne sembe, sindi el samenag haing uamogne ponekoag nen hailamekti, “El nenekori andi haing kwelekagheo. Ane sembe andi el sembe sa'a semenba ka'ebaukap,” seek.

Wene seekpa, eldi samoro, “Nari senelamnange, el Allahri yubu silimu tiptopne wamla,” seog.

18Haing kwelekaog nimi enekori ambatsiog yubu sik semban koma, Yahudi nimi nubunang tanekori senelamekti, “El samenag haing uropne agha haing kwelekao kom,” aro ili ilinap yopsiek. 19Yopsiekti nimi tanekori nong nimi hailamsiekti, “Nimi ene sik a'undi me samenag mangaro tinilamoghag haing uroba mangaro timbaog alamdomne te? Undop pagha tanena, eldi wene haing kwelekalne welaro uro yabio?” aro haibahiek. 20Wene aro haibahiekpa, ili ilindi samoro yubu lelamdekti, “El ane nuri me. El mangaro yangkaoghag haing uroba mangap taogne nu el uro wamnam. 21Aghana eldi haing wene kwelekaonge welaro uro yabio nu babe ekon. Eldi haing kwelekao nimi eneko babe nu ekon. El nubu tao ane sembe, elag agha haibalulom. Eldi agha a'un ambatsilul,” serek. 22Ili ilinapti wene serek nena, sin Yahudi nimi nubunang sembe log senelamdekti, wene serek. Yahudi nimi nubunang tanekori samenag agha yubu saekag karepto paiamek nena, “Nimi etneri Yesus sembe, ‘Allahri wepto poghogne Kristus wamla,’ aro lag phoro lebukang kom. Lag phoro lelamle nimi eneko nu Yahudi nimiri Allah yubu lero winirop aeag agha yag lambaukap,” aro saekag karepto paiamek. 23Saekag karepto paiamekne sembe log sembarek ane sembe, nimi eneko ili ilindi, “El nubu tao ane sembe elag agha haibalulom,” aro wene serek.

24Wene serekpa, nubunang tanekori haing urop nimi agha haing kwelekto yabiog nimi eneko nen ik phendep sum yobekti hailamekti, “Yubu sikne lepmenne agha Allah paliag uropne lag nembahut. Nu el wamapne haing kwelekagheo nimi enena malia urop nimi wamla,” aro wene seek.

25Wene seekpa, el ponekori samoro yubu lelamogti, “El malia urop nimi to, kom to, anena na ekon. Ot tam nhonog na el wamnangena, na samenag haing uroba wamsi aghana, wene nari haingdi ililamna,” seog.

26Wene seogpa, sindi nen nimi eneko hailamekti, “Eldi andi haingagna sa'a uao? Welaro andi haingagna uaoba, haing kwelekto yabikeoba ililamlam?” aro haibaek.

27Wene aro haibaekpa, nimi enekori, “Na wali nembaneonge sembe nari a'unag ambatsino aghana, a'undi ka'eamlom kom. Sa'ange agha nari nen ambatsinenge a'undi, ‘Ka'ebahabe,’ senelamlom? A'undi babe el sembe senelamlomdi, ‘Eldi yubu ka'ero neleptop nimi taukap,’ senelamlom te?” aro wene seog.

28Wene seogne sembe sindi elag loloro luknulamekti, “An agha elag yubu ka'ero neleptopne wamlam. Nuna kom. Nuna Musari yubu ka'ero neleptop nimi wamap. 29Nu el wamap nena, Allahri yubu Musaag pibogne agha el wamap. Andi wene alamlam nimi nene, tala nimiri el poghogpa, nunag yaogne nu ekon,” seek.

30Wene seekpa, nimi enekori samoro sinag, “A'undi yaghe senenne agha lelamlom. ‘El tala nimi agha yaonge nu ekon,’ alamlom aghana, el ponekori nanag uaongeag agha nari haing kwelekto yabineoba ililamna. 31Nu el wamsilba, el uro wamap nena, nimi malia urop nimiri Allahag molbanne neneko Allahri ka'erop kom. Aghana Allah omektopne Allahri senenne ul pirop nimiri elag molbanne neneko, ‘Allahri ka'elamla,’ aro nu el wamap. 32Anam yum-yum samenag agha wene ua ulamabag babe nimi nhon mangap tangto tiniloghoghag haing uropne wali nenero haing kwelekanep nimi nhon sembe ka'ebabo kom. 33Nimi eneko Allahri poghogpa, yaogne wamso kom tanena, eldi ulamlange sa'a-sa'a uro yabinep kom,” seog.

34Wene seogpa, sindi samoro elag yubu lelamekti, “An malia maikno teknero wangkelne toman agha mangap talum. Andi, ‘Amolamsinun,’ aro nunag ambatsilam te?” aro wene seek. Wene seek sum enekoa sindi elag, “Nunap nhon nen wimbalulam kom,” aro yag lambaek.

Allahri uropne imnep kom nimi sembe Yesusti ambatsiogha

35Yesusti ka'elamogpa, nimi haing urop nimi agha haing kwelekaog nimi eneko yag lambaekne ka'ebaog. Ka'ebaogti Yesusti elamogti, nimi eneko ibog. Ibogti yubu lelamogti, “Mog so'oag nimi tangtopne ponekoag sikne aro wana palilamlam te?” aro haibaog.

36Wene aro haibaogpa, nimi enekori samoro Yesusag, “Nai, etne sembe leplam? Na ambatnemenba, nari elag sikne aro wana palilamnun,” seog.

37Wene seogpa Yesusti, “Wene ane iamnelamba, wene anap yubu lelamna ane,” seog.

38Wene seogpa, nimi enekori, “Nu Saelba Ulamsilamne nari sik senelamna,” seogti elag yabu sanukto u amupto pulingkina omekaog.

39Wene aro omeklamogpa, Yesusti nimi enekoag yubu lelamogti, “Na mog so'o eneag yahingena, ‘Nimi tam karebanun,’ aro yahi. Yahi andarina nari nimi haing uropne haing kweleklamsineri, nimi haing kwelektop nimi haing ulopsinun,” seog.

40Wene seogne Farisi nimi nhon-nhon aneko wamek nimiri ka'ebaekti, “Andi wene selamne nu babe haing urop nimi sembahilamdi leplam te?” aro haibaek.

41Wene aro haibaekpa, Yesusti samoro sinag yubu lelamogti, “A'un tapto haing uropti imnep kom tanena, a'undi malia uropne sembe a'unag ikinne pimnepne orog. Aghana wene a'undam nimi sembe, ‘Ililamap,’ alamlom ane sembe, a'undi malia uropne sembe ikinne pimnepne wamlange wamlul,” seog.

Currently Selected:

Yohanes 9: kklKOS

Highlight

Copy