Lukas 11
11
Allahag molona moloropne sembe Yesusti ambatsiogha
(Matius 6:9-15; 7:7-11)
1Ik nhon sum Yesus eldi yubu ka'ero neleptop nangap nikag wamekti, Yesusti Allahag molona mololamog. Allahag molona molbaogpa, elag neleptopne nhondi Yesusag lelamogti, “Nai, nu Saelbamsilamne. Yohanesti eldi yubu ka'ero neleptop nangag ambarelamsiori, ‘Allahag molona mololapmundi, undo-undo lero mololamlulom,’ aro ambatsio. Ane saog uro andi babe nunag ambatsululam te?” aro Yesusag molbaog.
2Wene aro molbaogpa, Yesusti sinag amoro ambarelamsiogti, “A'undi Allahag molona mololapmun tanena, undo lelamlulom.
‘Nai, an sembenga orogha wamlamne si o'omne nenero kiplangkeap.
Andi nu yubu sia lero saelbamsilama lag nembatsululam.
3Nuri sop-sop kwaneng telamukapne sunsunum uro tarelamsululam.
4Nimiri nunag malia ulamangne sembe nuri sae lilobi agha tam wailag nenelamsiap ane sembe,
nuri malia ulamapne sembe babe tam wailag nembatsululam.
Nu menangaro poa palamsimendi, nu mipsinebag poa pihiseng kom,’ alapmundi Allahag molona mololamlulom,”
aro Yesusti eldi yubu ka'ero neleptop nangag ambatsiog.
5Wene aro ambatsiogti, nen tipto sunumna nhon ambarelamsiogti, “A'un wamlom nimi abene agha nimi nhondi a'unkabori aeag ae inipna tom nusam pindi lelamnari, ‘Nangkae! Kwaneng roti wana wilindi tatnohom. 6Nangkae nhon inaag yalamlange weneog, “Tektek papneri pinun,” aro nari aeag wa'alal. Wa'alalba nari el sembe kwaneng tatneba, el tenne orogti, anag mololangken,’ aro wene senep.
7Wene senep aghana, ankae anekori ae lomag agha yubu lemnepti, ‘Namaboap ina soptangka malamapti, nu kaombahiseng kom. Na pukneri tatkenepne eka'ukti, yepkenep kom,’ aro lemnep.
8Wene ae lomag nimiri, ‘Nangkae, eka'ukti yepkenep kom,’ aro lemnep aghana, nari sik uro a'unag lelamnange, pukleri elag kwema aro molona moloropne sunsunum uro tatlul tiog. Nimi enekori pukleri, tatlenge sembe, nangkae senenne agha tatlul kom aghana, asag nimi enekori ali semban koma molom-molom alamnaba, malamlange poneko puknepti, tatnepneog wamla.
9Ane saog uro, nari a'unag lelamnange, a'undi Allahag mololapmunba tatsilul. Elapmundi iplulom. Ina siramag kaunguro yoplapmunba, a'un sembe ina kubatsilul. 10Nimi etneri mololamle tanena, saeri toplul. Nimi etneri el tolamle tanena, haingdi iplul. Nimi etneri ina siramag kaunguro yoplamle tanena, el sembe ina kup talul.
11Sunumnana undo. A'un nimiri me nhondi iliag mololamleri, ‘Naiyong, ikan sop tatnemenba tenun,’ aro molbagheleba, a'un tane wamlom nimi nhondi paghae el saeag piplulam te? 12An meri anag, ‘Naiyong, winang wana tatnemenba tenun,’ aro molbagheleba, eldi saeag yamneneng nhon piplulam te? 13A'un mog so'oag nimi wanaag yo urop nimi aghana, a'un maboag, ‘Walinge agha tatsisebe,’ aro ulamlom. Undop pagha tanena, a'un nimi etneri A'uni Imagne ponekoag mololapmun tanena, el Imag wamlange ponekori, ‘Name,’ aro phelekto tarelamsileri, Eldamne Yame Walinge neneko tatsilul,” aro Yesusti eldi yubu ka'ero neleptop nang ambatsiog.
“Phia yonge sikini Beelzebul mikipne pere agha Yesusti phia yag lanalamsil,” aro nimiri lebeka
(Matius 12:22-30; Markus 3:20-27)
14Ik nhon sum Yesus wamoghag aneko nimi pam kaupsirop phia nhon wamog. Yesusti phia yonge nimi yubu lerop kom nimiag wamogne yag lanalamogpa, phia nimi enekoag wamogne lambaog abeneko nimi eneko yubu lelamog. Nimi eneko yubu lambaogti, yubu lelamogpa, nimi wamek nimiri ibekti, “Map, mane agha ual,” aro lo'om seek. 15Aghana nimi nenneri yubu lelamekti, “Phia sikini nubunge si Beelzebul nenekori Yesusag mikipne pibongeag agha eldi phia yag lanalamsil,” seek. 16Sin nenneri wene alamekpa, nimi nenneri, “Yesus mibukap,” aro ulamekti, “Imagne ponekori sik uro an pere agha ulamla tanena, kekneba nhon ualulam,” aro Yesusag ambarek.
17Wene alamek aghana Yesusti sin nimi tanekori seneraglamekne el taogti, Yesusti nimi tanekoag yubu lelamogti, “Nimi nubungeri mog so'o nhon saelba ulamsinba, mog so'o anekoag urop nimiri a'ep tangto mal dalamnep. A'ep tangto mal dalamnep tanena, mog so'o nikag ua urop nimi taneko nimi nhonog umag khapto wamnep komdi, ya'ag loba tanep. Ae lom nhon nimi babe a'ep tangto sin mamun aisa nenep tangkamna tanena, undo wamnangeag agha khapto wali uro wamnep komdi, loba tanep. 18A'undi na sembe lelamlomne, ‘Eldi phia yonge sikini nubunge Beelzebul nenekori mikipneag agha phia yonge yag lanalamsil,’ alamlom. Wene alamlom aghana, phia yonge sikini nubunge si nhon Satanas nenekori eldamne aisa nenep tangto elkabo yag lanalamsisoba, sin lia peheng tanena, Satanasti saelba ulamsil phia taneko welaro mikip uro khapto wamnep? 19A'undi na sembe lelamlomne, ‘Phia yonge sikini nubunge Beelzebul nenekori mikipneag agha phia yag lanalamsil,’ alamlom. Undop pagha tanena, a'unag nelepsirop nimiri babe phia yag lanalamsiang nena, etneri mikipneag agha phia yag lanalamsiang? Hae sindi ka'elamikpa, a'undi na sembe yubu lelamlomne yubu kiki telekto seneraglamikti, ‘Phia yonge sikini mikipneag agha phia yonge yag lambahinep kom,’ aro tam karebaukang. 20Aghana nari nimi kulomag agha phia yonge yag lanalamsin nena, Allahri sae mikipneag agha yag lanalamsin. Nari yubu lelamnange sembe, ‘Sik lepla,’ aro seneraglapmun tanena, a'unna el talapmundi, ‘Wene Allahri yubu sia lero mog so'oag nimi saelba uhiroba nunag lag tal,’ aro el talulom.
21-22Phia yonge sikini nubunge neneko mikipne wamla. Sunumna nhon sumbatsinun. Mikipne nhondi yin salero seng enekamnari, eldinge ae yae wamnaba, orangeri elenge aba taluro tomnep kom. Elenge aba taluro tomnep kom tanena, mikipne nenekori, ‘Yin salero seng enekamnaba, orangeri na luknubanukang kom,’ aro mal tananne anekoag wana paliro aingniro wamnep. Ot nimi mikip phelektopne nhondi elag yingkina oro luknubanep. Mikip phelektopne ponekori el aisange oro luknubongkia nia mal tananne togto topsori, mikipne nenekoringe wali-waliaba saeag agha ni taluro elkaboag pogsinep. 23A'undi na sembe yubu lelamlomne wali uro seneragto ulamlulom. Nanag sip tangtop kom nimina, nanag aisa nenenerop. Nimi etneri nimi winihiro nanag sip payingkihirop kom tanena, nimi talup lanahirop,” aro Yesusti wenero ambatsiog.
Phia nimi kulomag samoro wa'al ingkiropne sembe Yesusti ambatsiogha
(Matius 12:43-45)
24Yesusti nen tipto ambarelamsiogti, “Phia yonge nhondi nimi kulomag agha lamba pin tanena, phia aneko mektop so'oag pang-yang uro tektek papto wamneba ero pirop. Ero pirop aghana, el wamnebag olog imnep kom tanena, eldi sembanep nena, ‘Na nen samoro samen ae wamnoag aneko wa'al pinun,’ senep.
25Wene aro lemnari, samoro yingkina kemelamnaba, samen laplomna ae aneko lomag sembenga wali uro po'oropti, togto kemerop wamneba imnep. 26Wali togto kemerop wamnaba imnari, phia samne olog yo aghana, nen samoro pina phia saekpare yo sirikne eldi enero poa wa'al ahinep. Poa wa'al ahindi, nimi eneko kulomag wamnep. Nimi eneko kulomag ua urop tanena, nimi eneko samenag wamnepne olog mali aghana, sin wa'iro ua urop tanena, ya'ag mali sirik tanep,” aro ambatsiog.
“Etne awi uro wamlul,” aro Yesusti ambatsiogha
27Yesusti wene aro ambatsiogpa, kel nhon nimi maikno wamekne nusamag agha yubu lelamogti, “An mangkagheogti, maum timbagheog kel ene wali kel wana awi uro wamle alamna,” aro wene seog.
28Wene seog aghana, Yesusti samoro kel enekoag yubu lelamogti, “Na mangkaneogti, maum timbaneog kel ene wana awi uro wamnep aghana, nimi etneri Allah yubu wali uro ka'ebaikti, saelba ulamik tanena, nimi taneko wana awi sirik uro wali wamukang,” aro kel enekoag wene seog.
Nimiri Yesusag, “Kekneba nhon ualulam,” seekne sembe Yesusti wembahiogha
(Matius 12:38-42; Markus 8:12)
29Nimi maiknori Yesusag kemero longolamekpa, Yesusti alniro yubu ambarelamsiogti, “Nimi wene ko'o ene likto palamlange yo sirik nimi wamang. Sindi nanag molbaneangne, ‘Kekneba ualulam,’ aro mololamneang aghana, undo unuanun kom. Ot sin whingag uro yabileba, el nembahinepne kekneba nhonog wamlul nena, Yunus ponekoag uro yabiogne saog uro sin whingag uro yabileba, sin el nembahinepne kekneba talul. 30Yunus ponekoag uro yabiog nena, mog so'o Niniwe nimiri whingag uro yabiogpa, sindi el sembe, ‘Imagne ponekori el pere agha ulamla,’ aro el tanep. Ane saog uro na mog so'oag nimi tahinge nanag undo uro yabile tanena, ko'o wene wamlom nimi sembe, ‘Allahri el pere agha ulamla,’ senenne kekneba kembamundi, el tanep. 31Sik yubu ka'ebaek saog uro samenag weag mog so'o Syeba nimi sembe yubu sia lerop kel nhon wamog. Kel enekori, ‘Israel nimi sembe yubu sia lenne Salomo kemel pineri, eldi wana hekahinep yubu ka'ebanun,’ aro im so'o tiptobag agha elag yaog. Salomo samenag wana hektopne wamogpa, wene el phelektopne nubunge nhon ane wamla aghana, a'un tane wamlom nimiri ka'elamlom kom. Ane sembe Allahri ni tam kemero kareplamle sum eneko Allah whingag sekapmunba, Syeba nimi sembe yubu sia lerop kel enekori a'un Yahudi nangag tam piplul. Tam palilamleri, ‘El nimi nubu sirikne ponekori yubu teba'en sembaek,’ aro a'unag tam piplul. 32Sin Niniwe so'oag wamek nimiri babe Yunusti Allah yubu ambatsiog yubu ka'ebaekti, sindi malia seneragto ulameka lipsiek. Yunusti yubu ka'ebaekpa, wene Yunus phelektopne nubunge nhon wamla aghana, a'un wamlom nimiri ka'elamlom kom. Ane sembe, Allahri ni tam kemero kareplamle sum eneko Allah whingag sekapmunba, Niniwe so'oag wamek nimiri a'un Yahudi nimiag tam pibukang. Tam palilamikti, ‘El nimi nubu sirikne ponekori yubu teba'en sembaek,’ aro a'unag tam pibukang,” aro Yesusti ambatsiog.
Nimi nongag tibinne sembe Yesusti ambatsiogha
(Matius 5:15; 6:22-23)
33Yesusti tipto lelamogti, “Nimiri whea timbi agha tognorobag pairop komdi, kau agha niknirop kom. Nimi nhondi whea timbi agha elba whea tinina yan iktoba anekoag mebitnep andarina, nimi ni ae lomag wa'ilamik nimiri tibin aneko imnep. 34A'undi haing wana wamlange aneko a'un nong ningki kemel tananne sembe whea auk pog saogne wamla. Andi haing wali tanena, andi wana nong ningki anekoag babe tibin wareropne wamnep. Aghana andi haing mali tanena, a'un wana nong ningki aneko inibin sogmondo aropne mo wamnep. 35Ane sembe, tibinne a'undi wanaag wamlange neneko inibin taleagti, wali uro tibin aneko yae wamlulom. 36Wanaag agha seneraglamlomne ni aneko inibin tan koma tibin sirik wamle tanena, a'un wana nong ningkiri seneraglamlomne ni aneko tibin whea wareropne saogne tibin warebatsilul,” aro ambatsiog.
Musari yubu amohirop nangap, Farisi nimiap tanekori ulamekne sembe Yesusti wenehirop yubu ambatsiogha
(Matius 23:1-36; Markus 12:38-40; Lukas 20:45-47)
37Yesusti nimi yubu ambatsiogti wamogpa, Farisinge nhondi, “Nari aeag kwaneng nhon tununam,” aro yobog. Yobogpa Yesus Farisinge ponekori aeag wa'iogti, kwaneng pairo terobag peramag pukog. 38Ae lomag wa'ina pukogti, kwaneng tenep uloghog. Kwaneng tenep uloghogpa, Farisi nimi enekori, “Nu Farisi nimiri kwaneng anam ten komag sae maghag a'elero ulamap saog uro Yesusti sae a'elban koma kwaneng tenual,” aro lo'om seog.
39Farisinge ponekori wene senelamogne nu Saelba Uhiropne Yesus samenag el taogti, Farisinge ponekoag yubu lelamogti, “A'un Farisi nimiri ulamlomne sembe sunumna undo. Nimiri mag ma'i lomag sip kwaneng maghap inginag a'elban koma, ‘Nimiri ibukang,’ aro alibag sip a'elerop saog uro ulamlom. A'undi wanaag iriktan koma a'undi wanaag yongeap aboabaap to'opto wamlaba ulamlom. 40A'un Farisi nimi limituk nimi wamlom! Eldi nimi sumbahiogne ponekori nimi kulomag sip babe, nimi konag sip babe ni phende sumbahiog kom te? 41Ane sembe, a'undi wanaag agha kulomag yareag senelamsimundi, saeagha orog nimiag tarelamsimun tanena, kulomag sip babe konag sip babe ni phende Allah whingag wali uro a'elerop talul.
42A'un Farisi nimi seklero wamlulom! A'undi Allahag tarelamlom nena, ni kwaneng yona ologne babe a'undi saeag agha pogto palu sa'obare nenep tangka sa'onge Allah sembe wali palilamlom. Ot Allahri, ‘Ulamlulom,’ senenne o'omne lia ulamlom. A'undi Allah sembe wanaag agha o'ona senelamlom komdi, nimi wali wamnepne sembe tam sik uro kemero kareplamlom kom. Kwaneng yona ologha ane Allah sembe palilamlomne babe wali, aghana o'ona senehinneap, porog uro tam karebatsinepneap lia ulamlomne a'undi unuaheng kom, ane sembe seklebalulom.
43A'un Farisi nimi seklelamlulom! A'undi yeng senero ulamlom nena, nimi poloro Allah yubu lero winirop aeag, ‘Nimi nubunang purobag aghabog pukamsene,’ aro pulamlom. A'undi nimiri pail wa'ina kamna kapto toro longorobag wa'alamlomdi, ‘Wali sembanehengdi kipneheng,’ aro nimi whing toman pang yang ulamlom. Ane sembe a'un amik seklelamlulom.
44A'un Farisi nimi seklelamlulom! A'un wamlom nena, nimiri kekneba pimna koma nimi teptoba so'oag siksiroba saog wamlom. Nimiri nimi teptoba so'oag siksiroba ane phibom agha ingisaplamangne saog wamlom. Ane sembe a'un amik seklelamlulom,” aro Yesusti ambatsiog.#11:44 Nimiri nimi teptoba so'oag siksiroba ane ekonne agha phiban tanena, sembenga Allah whingag pabinep. Yesusti sinag likipto ambarelamsiog nena, “A'undi malia ulamlomneag nimiri babe ekonne agha neleplamsiangdi, Allah whingag malia ulamang,” aro likipto ambatsiog.
45Wene seogpa, Musari aruksirop yubu amohiropne nhondi Yesusag samoro yubu lelamogti, “Nai, nimiag yubu amolamsilamne. Ot andi wene selamneag agha nu Musari yubu amolamsiap nang babe san tiliplamsilam,” seog.
46Wene seogpa, Yesusti sinag yubu lelamogti, “A'un Musari aruksirop yubu amohirop nang babe seklelamlulom! A'undi ikinne nimiri poa pinep komne nimiag pobililamsiloa saog uro ulamlom. A'undi ikinne sinag pobililamsilom aghana, a'undi sae nhon nginikto, ‘Keyagman uropne olog yepto pabinun,’ semban koma ologha babe sin yeplamsilom kom. Ane sembe a'un babe seklelamlulom.
47A'un Musari aruksirop yubu amohirop nang seklelamlulom! A'undi Allah yubu silimu tiptop nimi tebaekne sembe, ‘Kipsukap,’ aro sin teptoba so'o siktoba alibag ae solamlom. Undo ae solamlom aghana, a'unisag yabori Allah yubu silimu tiptop nang taneko olamsiek. 48A'unisag yabori Allah yubu silimu tiptop nang olamsiekpa, a'un mori, ‘Sin teptoba kibukap,’ aro ae solamlom. ‘Kibukap,’ aro ae solamlom aghana, a'undi tapto ulamlom nena, ‘Nunisag yabori sin olamsiekne sembe nu babe wali saekag wamap,’ aro lag nenero ulamlom.
49Ane sembe Allah wana hektopne ponekori anamag el uro yubu lelamogti, ‘Nari yubu silimu tipto lelamik nimi babe, nari wepto pogsine nimi babe nari wepto Israel nimiag poglamsinun. Sin poglamsineba, nari pogsine nimi nenne Israel nimiri, “Seklebaik,” aro ulamsiikti, nenne ya'ag olamsukang,’ aro seneraghogti pogsiog. 50-51Pogsiogpa a'unisag yabori olamsiekpa, eneng lanaro tebaekne sembe, Allahri a'un wene wamlom nimiag tam nene pipsilul. Allahri mog so'o sumbaog sumag agha wene babe Allah yubu silimu tiptop nimiri lelamlong. Adam elme Habel yum-yum samenag ya'ag obogneag agha, amik sum Zakharia poneko Allahri Mem Ae aramag obekne babe, a'un wene wamlom nimiag Allahri tam nene pipsileri, ‘Nari nimi ni olamsiekne lumbanun,’ aro a'unag lumbahilul. Zakharia poneko Allahri Mem Ae aramag obekne, Allah sembe pail pirobag anabi, Allahri Mem Ae anabiag wamogpa obek. Nari a'un ambarelamsinne, Allah yubu tiptop nimi ni olamsiekne a'un wene wamlom nimiag Allahri lumbahilul.
52A'un Musari aruksirop yubu amohirop nang seklelamlulom! A'un mo el wamnepne agha yubu sikne porog ina aneko kupto wa'isom. Aghana a'undam nimi porog ina ane kupto wa'in koma nimi orange babe, ‘Wa'iseng kom,’ aro iriklamsilom. Ane sembe a'un seklelamlulom,” aro Yesusti ambatsiog.
53-54Wene aro ambatsiogti Yesus anekoa piogpa, Farisi nimiap, Musari yubu amohirop nangap tanekori alniro, “Yesusag monag aluktop yubu maikno haibabeba, Yesusti yubu malinge leplea agha el luknubaukap,” aro wea ulamek.
Currently Selected:
Lukas 11: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
Lukas 11
11
Allahag molona moloropne sembe Yesusti ambatsiogha
(Matius 6:9-15; 7:7-11)
1Ik nhon sum Yesus eldi yubu ka'ero neleptop nangap nikag wamekti, Yesusti Allahag molona mololamog. Allahag molona molbaogpa, elag neleptopne nhondi Yesusag lelamogti, “Nai, nu Saelbamsilamne. Yohanesti eldi yubu ka'ero neleptop nangag ambarelamsiori, ‘Allahag molona mololapmundi, undo-undo lero mololamlulom,’ aro ambatsio. Ane saog uro andi babe nunag ambatsululam te?” aro Yesusag molbaog.
2Wene aro molbaogpa, Yesusti sinag amoro ambarelamsiogti, “A'undi Allahag molona mololapmun tanena, undo lelamlulom.
‘Nai, an sembenga orogha wamlamne si o'omne nenero kiplangkeap.
Andi nu yubu sia lero saelbamsilama lag nembatsululam.
3Nuri sop-sop kwaneng telamukapne sunsunum uro tarelamsululam.
4Nimiri nunag malia ulamangne sembe nuri sae lilobi agha tam wailag nenelamsiap ane sembe,
nuri malia ulamapne sembe babe tam wailag nembatsululam.
Nu menangaro poa palamsimendi, nu mipsinebag poa pihiseng kom,’ alapmundi Allahag molona mololamlulom,”
aro Yesusti eldi yubu ka'ero neleptop nangag ambatsiog.
5Wene aro ambatsiogti, nen tipto sunumna nhon ambarelamsiogti, “A'un wamlom nimi abene agha nimi nhondi a'unkabori aeag ae inipna tom nusam pindi lelamnari, ‘Nangkae! Kwaneng roti wana wilindi tatnohom. 6Nangkae nhon inaag yalamlange weneog, “Tektek papneri pinun,” aro nari aeag wa'alal. Wa'alalba nari el sembe kwaneng tatneba, el tenne orogti, anag mololangken,’ aro wene senep.
7Wene senep aghana, ankae anekori ae lomag agha yubu lemnepti, ‘Namaboap ina soptangka malamapti, nu kaombahiseng kom. Na pukneri tatkenepne eka'ukti, yepkenep kom,’ aro lemnep.
8Wene ae lomag nimiri, ‘Nangkae, eka'ukti yepkenep kom,’ aro lemnep aghana, nari sik uro a'unag lelamnange, pukleri elag kwema aro molona moloropne sunsunum uro tatlul tiog. Nimi enekori pukleri, tatlenge sembe, nangkae senenne agha tatlul kom aghana, asag nimi enekori ali semban koma molom-molom alamnaba, malamlange poneko puknepti, tatnepneog wamla.
9Ane saog uro, nari a'unag lelamnange, a'undi Allahag mololapmunba tatsilul. Elapmundi iplulom. Ina siramag kaunguro yoplapmunba, a'un sembe ina kubatsilul. 10Nimi etneri mololamle tanena, saeri toplul. Nimi etneri el tolamle tanena, haingdi iplul. Nimi etneri ina siramag kaunguro yoplamle tanena, el sembe ina kup talul.
11Sunumnana undo. A'un nimiri me nhondi iliag mololamleri, ‘Naiyong, ikan sop tatnemenba tenun,’ aro molbagheleba, a'un tane wamlom nimi nhondi paghae el saeag piplulam te? 12An meri anag, ‘Naiyong, winang wana tatnemenba tenun,’ aro molbagheleba, eldi saeag yamneneng nhon piplulam te? 13A'un mog so'oag nimi wanaag yo urop nimi aghana, a'un maboag, ‘Walinge agha tatsisebe,’ aro ulamlom. Undop pagha tanena, a'un nimi etneri A'uni Imagne ponekoag mololapmun tanena, el Imag wamlange ponekori, ‘Name,’ aro phelekto tarelamsileri, Eldamne Yame Walinge neneko tatsilul,” aro Yesusti eldi yubu ka'ero neleptop nang ambatsiog.
“Phia yonge sikini Beelzebul mikipne pere agha Yesusti phia yag lanalamsil,” aro nimiri lebeka
(Matius 12:22-30; Markus 3:20-27)
14Ik nhon sum Yesus wamoghag aneko nimi pam kaupsirop phia nhon wamog. Yesusti phia yonge nimi yubu lerop kom nimiag wamogne yag lanalamogpa, phia nimi enekoag wamogne lambaog abeneko nimi eneko yubu lelamog. Nimi eneko yubu lambaogti, yubu lelamogpa, nimi wamek nimiri ibekti, “Map, mane agha ual,” aro lo'om seek. 15Aghana nimi nenneri yubu lelamekti, “Phia sikini nubunge si Beelzebul nenekori Yesusag mikipne pibongeag agha eldi phia yag lanalamsil,” seek. 16Sin nenneri wene alamekpa, nimi nenneri, “Yesus mibukap,” aro ulamekti, “Imagne ponekori sik uro an pere agha ulamla tanena, kekneba nhon ualulam,” aro Yesusag ambarek.
17Wene alamek aghana Yesusti sin nimi tanekori seneraglamekne el taogti, Yesusti nimi tanekoag yubu lelamogti, “Nimi nubungeri mog so'o nhon saelba ulamsinba, mog so'o anekoag urop nimiri a'ep tangto mal dalamnep. A'ep tangto mal dalamnep tanena, mog so'o nikag ua urop nimi taneko nimi nhonog umag khapto wamnep komdi, ya'ag loba tanep. Ae lom nhon nimi babe a'ep tangto sin mamun aisa nenep tangkamna tanena, undo wamnangeag agha khapto wali uro wamnep komdi, loba tanep. 18A'undi na sembe lelamlomne, ‘Eldi phia yonge sikini nubunge Beelzebul nenekori mikipneag agha phia yonge yag lanalamsil,’ alamlom. Wene alamlom aghana, phia yonge sikini nubunge si nhon Satanas nenekori eldamne aisa nenep tangto elkabo yag lanalamsisoba, sin lia peheng tanena, Satanasti saelba ulamsil phia taneko welaro mikip uro khapto wamnep? 19A'undi na sembe lelamlomne, ‘Phia yonge sikini nubunge Beelzebul nenekori mikipneag agha phia yag lanalamsil,’ alamlom. Undop pagha tanena, a'unag nelepsirop nimiri babe phia yag lanalamsiang nena, etneri mikipneag agha phia yag lanalamsiang? Hae sindi ka'elamikpa, a'undi na sembe yubu lelamlomne yubu kiki telekto seneraglamikti, ‘Phia yonge sikini mikipneag agha phia yonge yag lambahinep kom,’ aro tam karebaukang. 20Aghana nari nimi kulomag agha phia yonge yag lanalamsin nena, Allahri sae mikipneag agha yag lanalamsin. Nari yubu lelamnange sembe, ‘Sik lepla,’ aro seneraglapmun tanena, a'unna el talapmundi, ‘Wene Allahri yubu sia lero mog so'oag nimi saelba uhiroba nunag lag tal,’ aro el talulom.
21-22Phia yonge sikini nubunge neneko mikipne wamla. Sunumna nhon sumbatsinun. Mikipne nhondi yin salero seng enekamnari, eldinge ae yae wamnaba, orangeri elenge aba taluro tomnep kom. Elenge aba taluro tomnep kom tanena, mikipne nenekori, ‘Yin salero seng enekamnaba, orangeri na luknubanukang kom,’ aro mal tananne anekoag wana paliro aingniro wamnep. Ot nimi mikip phelektopne nhondi elag yingkina oro luknubanep. Mikip phelektopne ponekori el aisange oro luknubongkia nia mal tananne togto topsori, mikipne nenekoringe wali-waliaba saeag agha ni taluro elkaboag pogsinep. 23A'undi na sembe yubu lelamlomne wali uro seneragto ulamlulom. Nanag sip tangtop kom nimina, nanag aisa nenenerop. Nimi etneri nimi winihiro nanag sip payingkihirop kom tanena, nimi talup lanahirop,” aro Yesusti wenero ambatsiog.
Phia nimi kulomag samoro wa'al ingkiropne sembe Yesusti ambatsiogha
(Matius 12:43-45)
24Yesusti nen tipto ambarelamsiogti, “Phia yonge nhondi nimi kulomag agha lamba pin tanena, phia aneko mektop so'oag pang-yang uro tektek papto wamneba ero pirop. Ero pirop aghana, el wamnebag olog imnep kom tanena, eldi sembanep nena, ‘Na nen samoro samen ae wamnoag aneko wa'al pinun,’ senep.
25Wene aro lemnari, samoro yingkina kemelamnaba, samen laplomna ae aneko lomag sembenga wali uro po'oropti, togto kemerop wamneba imnep. 26Wali togto kemerop wamnaba imnari, phia samne olog yo aghana, nen samoro pina phia saekpare yo sirikne eldi enero poa wa'al ahinep. Poa wa'al ahindi, nimi eneko kulomag wamnep. Nimi eneko kulomag ua urop tanena, nimi eneko samenag wamnepne olog mali aghana, sin wa'iro ua urop tanena, ya'ag mali sirik tanep,” aro ambatsiog.
“Etne awi uro wamlul,” aro Yesusti ambatsiogha
27Yesusti wene aro ambatsiogpa, kel nhon nimi maikno wamekne nusamag agha yubu lelamogti, “An mangkagheogti, maum timbagheog kel ene wali kel wana awi uro wamle alamna,” aro wene seog.
28Wene seog aghana, Yesusti samoro kel enekoag yubu lelamogti, “Na mangkaneogti, maum timbaneog kel ene wana awi uro wamnep aghana, nimi etneri Allah yubu wali uro ka'ebaikti, saelba ulamik tanena, nimi taneko wana awi sirik uro wali wamukang,” aro kel enekoag wene seog.
Nimiri Yesusag, “Kekneba nhon ualulam,” seekne sembe Yesusti wembahiogha
(Matius 12:38-42; Markus 8:12)
29Nimi maiknori Yesusag kemero longolamekpa, Yesusti alniro yubu ambarelamsiogti, “Nimi wene ko'o ene likto palamlange yo sirik nimi wamang. Sindi nanag molbaneangne, ‘Kekneba ualulam,’ aro mololamneang aghana, undo unuanun kom. Ot sin whingag uro yabileba, el nembahinepne kekneba nhonog wamlul nena, Yunus ponekoag uro yabiogne saog uro sin whingag uro yabileba, sin el nembahinepne kekneba talul. 30Yunus ponekoag uro yabiog nena, mog so'o Niniwe nimiri whingag uro yabiogpa, sindi el sembe, ‘Imagne ponekori el pere agha ulamla,’ aro el tanep. Ane saog uro na mog so'oag nimi tahinge nanag undo uro yabile tanena, ko'o wene wamlom nimi sembe, ‘Allahri el pere agha ulamla,’ senenne kekneba kembamundi, el tanep. 31Sik yubu ka'ebaek saog uro samenag weag mog so'o Syeba nimi sembe yubu sia lerop kel nhon wamog. Kel enekori, ‘Israel nimi sembe yubu sia lenne Salomo kemel pineri, eldi wana hekahinep yubu ka'ebanun,’ aro im so'o tiptobag agha elag yaog. Salomo samenag wana hektopne wamogpa, wene el phelektopne nubunge nhon ane wamla aghana, a'un tane wamlom nimiri ka'elamlom kom. Ane sembe Allahri ni tam kemero kareplamle sum eneko Allah whingag sekapmunba, Syeba nimi sembe yubu sia lerop kel enekori a'un Yahudi nangag tam piplul. Tam palilamleri, ‘El nimi nubu sirikne ponekori yubu teba'en sembaek,’ aro a'unag tam piplul. 32Sin Niniwe so'oag wamek nimiri babe Yunusti Allah yubu ambatsiog yubu ka'ebaekti, sindi malia seneragto ulameka lipsiek. Yunusti yubu ka'ebaekpa, wene Yunus phelektopne nubunge nhon wamla aghana, a'un wamlom nimiri ka'elamlom kom. Ane sembe, Allahri ni tam kemero kareplamle sum eneko Allah whingag sekapmunba, Niniwe so'oag wamek nimiri a'un Yahudi nimiag tam pibukang. Tam palilamikti, ‘El nimi nubu sirikne ponekori yubu teba'en sembaek,’ aro a'unag tam pibukang,” aro Yesusti ambatsiog.
Nimi nongag tibinne sembe Yesusti ambatsiogha
(Matius 5:15; 6:22-23)
33Yesusti tipto lelamogti, “Nimiri whea timbi agha tognorobag pairop komdi, kau agha niknirop kom. Nimi nhondi whea timbi agha elba whea tinina yan iktoba anekoag mebitnep andarina, nimi ni ae lomag wa'ilamik nimiri tibin aneko imnep. 34A'undi haing wana wamlange aneko a'un nong ningki kemel tananne sembe whea auk pog saogne wamla. Andi haing wali tanena, andi wana nong ningki anekoag babe tibin wareropne wamnep. Aghana andi haing mali tanena, a'un wana nong ningki aneko inibin sogmondo aropne mo wamnep. 35Ane sembe, tibinne a'undi wanaag wamlange neneko inibin taleagti, wali uro tibin aneko yae wamlulom. 36Wanaag agha seneraglamlomne ni aneko inibin tan koma tibin sirik wamle tanena, a'un wana nong ningkiri seneraglamlomne ni aneko tibin whea wareropne saogne tibin warebatsilul,” aro ambatsiog.
Musari yubu amohirop nangap, Farisi nimiap tanekori ulamekne sembe Yesusti wenehirop yubu ambatsiogha
(Matius 23:1-36; Markus 12:38-40; Lukas 20:45-47)
37Yesusti nimi yubu ambatsiogti wamogpa, Farisinge nhondi, “Nari aeag kwaneng nhon tununam,” aro yobog. Yobogpa Yesus Farisinge ponekori aeag wa'iogti, kwaneng pairo terobag peramag pukog. 38Ae lomag wa'ina pukogti, kwaneng tenep uloghog. Kwaneng tenep uloghogpa, Farisi nimi enekori, “Nu Farisi nimiri kwaneng anam ten komag sae maghag a'elero ulamap saog uro Yesusti sae a'elban koma kwaneng tenual,” aro lo'om seog.
39Farisinge ponekori wene senelamogne nu Saelba Uhiropne Yesus samenag el taogti, Farisinge ponekoag yubu lelamogti, “A'un Farisi nimiri ulamlomne sembe sunumna undo. Nimiri mag ma'i lomag sip kwaneng maghap inginag a'elban koma, ‘Nimiri ibukang,’ aro alibag sip a'elerop saog uro ulamlom. A'undi wanaag iriktan koma a'undi wanaag yongeap aboabaap to'opto wamlaba ulamlom. 40A'un Farisi nimi limituk nimi wamlom! Eldi nimi sumbahiogne ponekori nimi kulomag sip babe, nimi konag sip babe ni phende sumbahiog kom te? 41Ane sembe, a'undi wanaag agha kulomag yareag senelamsimundi, saeagha orog nimiag tarelamsimun tanena, kulomag sip babe konag sip babe ni phende Allah whingag wali uro a'elerop talul.
42A'un Farisi nimi seklero wamlulom! A'undi Allahag tarelamlom nena, ni kwaneng yona ologne babe a'undi saeag agha pogto palu sa'obare nenep tangka sa'onge Allah sembe wali palilamlom. Ot Allahri, ‘Ulamlulom,’ senenne o'omne lia ulamlom. A'undi Allah sembe wanaag agha o'ona senelamlom komdi, nimi wali wamnepne sembe tam sik uro kemero kareplamlom kom. Kwaneng yona ologha ane Allah sembe palilamlomne babe wali, aghana o'ona senehinneap, porog uro tam karebatsinepneap lia ulamlomne a'undi unuaheng kom, ane sembe seklebalulom.
43A'un Farisi nimi seklelamlulom! A'undi yeng senero ulamlom nena, nimi poloro Allah yubu lero winirop aeag, ‘Nimi nubunang purobag aghabog pukamsene,’ aro pulamlom. A'undi nimiri pail wa'ina kamna kapto toro longorobag wa'alamlomdi, ‘Wali sembanehengdi kipneheng,’ aro nimi whing toman pang yang ulamlom. Ane sembe a'un amik seklelamlulom.
44A'un Farisi nimi seklelamlulom! A'un wamlom nena, nimiri kekneba pimna koma nimi teptoba so'oag siksiroba saog wamlom. Nimiri nimi teptoba so'oag siksiroba ane phibom agha ingisaplamangne saog wamlom. Ane sembe a'un amik seklelamlulom,” aro Yesusti ambatsiog.#11:44 Nimiri nimi teptoba so'oag siksiroba ane ekonne agha phiban tanena, sembenga Allah whingag pabinep. Yesusti sinag likipto ambarelamsiog nena, “A'undi malia ulamlomneag nimiri babe ekonne agha neleplamsiangdi, Allah whingag malia ulamang,” aro likipto ambatsiog.
45Wene seogpa, Musari aruksirop yubu amohiropne nhondi Yesusag samoro yubu lelamogti, “Nai, nimiag yubu amolamsilamne. Ot andi wene selamneag agha nu Musari yubu amolamsiap nang babe san tiliplamsilam,” seog.
46Wene seogpa, Yesusti sinag yubu lelamogti, “A'un Musari aruksirop yubu amohirop nang babe seklelamlulom! A'undi ikinne nimiri poa pinep komne nimiag pobililamsiloa saog uro ulamlom. A'undi ikinne sinag pobililamsilom aghana, a'undi sae nhon nginikto, ‘Keyagman uropne olog yepto pabinun,’ semban koma ologha babe sin yeplamsilom kom. Ane sembe a'un babe seklelamlulom.
47A'un Musari aruksirop yubu amohirop nang seklelamlulom! A'undi Allah yubu silimu tiptop nimi tebaekne sembe, ‘Kipsukap,’ aro sin teptoba so'o siktoba alibag ae solamlom. Undo ae solamlom aghana, a'unisag yabori Allah yubu silimu tiptop nang taneko olamsiek. 48A'unisag yabori Allah yubu silimu tiptop nang olamsiekpa, a'un mori, ‘Sin teptoba kibukap,’ aro ae solamlom. ‘Kibukap,’ aro ae solamlom aghana, a'undi tapto ulamlom nena, ‘Nunisag yabori sin olamsiekne sembe nu babe wali saekag wamap,’ aro lag nenero ulamlom.
49Ane sembe Allah wana hektopne ponekori anamag el uro yubu lelamogti, ‘Nari yubu silimu tipto lelamik nimi babe, nari wepto pogsine nimi babe nari wepto Israel nimiag poglamsinun. Sin poglamsineba, nari pogsine nimi nenne Israel nimiri, “Seklebaik,” aro ulamsiikti, nenne ya'ag olamsukang,’ aro seneraghogti pogsiog. 50-51Pogsiogpa a'unisag yabori olamsiekpa, eneng lanaro tebaekne sembe, Allahri a'un wene wamlom nimiag tam nene pipsilul. Allahri mog so'o sumbaog sumag agha wene babe Allah yubu silimu tiptop nimiri lelamlong. Adam elme Habel yum-yum samenag ya'ag obogneag agha, amik sum Zakharia poneko Allahri Mem Ae aramag obekne babe, a'un wene wamlom nimiag Allahri tam nene pipsileri, ‘Nari nimi ni olamsiekne lumbanun,’ aro a'unag lumbahilul. Zakharia poneko Allahri Mem Ae aramag obekne, Allah sembe pail pirobag anabi, Allahri Mem Ae anabiag wamogpa obek. Nari a'un ambarelamsinne, Allah yubu tiptop nimi ni olamsiekne a'un wene wamlom nimiag Allahri lumbahilul.
52A'un Musari aruksirop yubu amohirop nang seklelamlulom! A'un mo el wamnepne agha yubu sikne porog ina aneko kupto wa'isom. Aghana a'undam nimi porog ina ane kupto wa'in koma nimi orange babe, ‘Wa'iseng kom,’ aro iriklamsilom. Ane sembe a'un seklelamlulom,” aro Yesusti ambatsiog.
53-54Wene aro ambatsiogti Yesus anekoa piogpa, Farisi nimiap, Musari yubu amohirop nangap tanekori alniro, “Yesusag monag aluktop yubu maikno haibabeba, Yesusti yubu malinge leplea agha el luknubaukap,” aro wea ulamek.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.