Lukas 13
13
Yesusti nimiag, “Malia seneragto ulamlomne lilobi agha Allahri senenne saelbapmun kom tanena tebalulom,” seogha
1Yesusti nimi yubu ambarelamsiogpa, nimi wamek nimi tanekori Yesusag, “Galilea nimi etpareri pham domba poa, ‘Allah sembe oro pibukap,’ aro ulamong abeneko nimi nubunge Pilatus ponekori opsioba, eneng lanaro tebaong,” aro Yesusag ambarek. 2Sindi wene aro ambarekne ka'ebaogti, Yesusti yubu lelamogti, “A'undi senelamlomne, ‘Sin Galilea nimi tanekori mali-malia maikno ulamekne sembe seklero tebaong aghana, Galilea nimi yog nimiri malia maikno uan koma tebaong kom,’ senelamlom te? 3‘Kom,’ alamna! Ot sin tebaong nimi aghabog malia maikno urop nimi sembaheng kom. Ambarelamsinne ka'elapmundi, el uro wamlulom! A'undi malia seneragto ulamlomne lilobi agha Allahri senenne saelbapmun kom tanena, sin tebaong saog uro a'un babe tebalulom. 4As Yerusalem nimiag uro yabiogne sembe babe olog ambatsinun. Mag Siloam peramag nimi yae uhin ae sopso waelbaek ae wenge tuplamogti, nimi sa'o tarabare niknibahiogpa tebaek. Tebaek nimi taneko sembe a'undina, ‘Sindi malia maikno ulamongne sembe tebaong aghana, yog nimi as Yerusalem wamang nimi taneko malia urop komdi teptop koma kamag wamang,’ senelamlom te? 5‘Kom,’ alamna! Sikne agha ambarelamsin. A'undi malia seneragto ulamlomne lilobi agha Allahri senenne saelbapmun kom tanena, sin tebaong saog uro a'un babe tebalulom,” aro Yesusti ambatsiog.
Yesusti kal ara wana maurop kom kalag sunumna tol pina ambatsiogha
6Yesusti wene aro ambatsiogti, nen sunumna nhon ambatsiogne ane.
“Nimi nhondi eldi anggur merop aweag kal ara nhon meamog. Meamog aneko ik etpare, ‘Wana mauamla to?’ aro yingkina kemelaog. Kemelaog aghana, kal aneko wana mauamog kom. 7Ane sembe eldi awe o'ol lero yae ua uropne ponekoag yubu lelamogti, ‘Na hengkun wilindi, “Kal ara ane wana nhon mauamla to?” aro kemelang pang ulamno aghana, wana nhon maua unne imno kom. Kal ane pongoro ua ulamlange wana maubanep kom aghana, so'o si mag abeneko telamla. Ane sembe kal ane khaebalulam,’ seog. 8Aghana awe o'ol lero yae ua urop nimi enekori samoro yubu lelamogti, ‘Nai, kal ane khaebaheng kom. Hengkun ene kal ane so'o ya'aro mo'obaneri, urumna pimneba uale agha. 9Hengkun nonoag wana maubanep ulamlea sembe, wana mauban kom pagha tanena, nai andi nimiag, “Khaebalulom,” senep,’ aro awe o'ol lero yae ua uropne ponekori wene seog,” aro Yesusti nimi wamek nimi tanekoag ambatsiog.
Sabat sum eneko Yesusti maghan kiniptop kel wali nembaogha
10Wamekpa Yahudi nimiri tektek paptop sum Sabat sum taogpa, Yesusti Allah yubu lero winirop ae nhonag yubu amoro ambarelamsiog. 11Aneko kelabo nhon hengkun sa'o tarabare phia yonge kel enekoag wamogpa, naikto ulamog kel nhon wamog. Kel eneko maghan kiniplobogpa, peket seknange erarukti, maghan kiniptoba ua ulamog. 12Undo ua ulamogne Yesusti ibogti, kel enekoag, “Yae,” aro yoplamogti, “Kain, anag naikna ulangkelne wene orog tal,” seog.
13Wene seogti, Yesusti kel enekoag sae pibog abeneko pere maghan kiniptopne neneko orog taogpa, peket sekelabiogti, Allah omeklamog. 14Wali tangka Allah omeklamog aghana, Yesusti kel eneko Sabat sum agha wali nembaogne sembe Allah yubu lero winirop ae saelba uropne ponekori karongdi wana yo sembaog. Yo sembaogti, yubu lelamogti, “Ae ik no'opbare sa'a-sa'a awe wero tomnep sum wamlaba, ik nhon sum ane agha yingkina, ‘Wali nembanelul,’ aro yalamlom. Ot sumenena tektek paptop sum Sabat sum wamlaba, nimi wali nembahinep kom,” aro nimi tanekoag ambatsiog.
15Wene seogne sembe nu Saelba Uhiropne Yesusti nimi enekoag samoro, “A'unna, ‘Wali sembanukang,’ aro lero urop nimi wamlom! A'undam nimiri tektek paptop sum Sabat sum agha a'undi pham sapiap keledaiap a'ero-a'ero leka lomag agha, ‘Mag tukang,’ aro poa la'anilamsilomba, mag telamang te? 16Sabat sum agha pham mo'olamsilom aghana, wene ane Abraham sisa mangarop kel nhon phia sikini nubunge Satanasti hengkun sa'o tarabare haing kauploa saog ulamloba, maghan kinipto ua ulamlo. Ko'o we uro seklelamla aghana, a'undi senenne phiari el haing kauplobogne nene tektek paptop sum Sabat sum agha el wali nembanep kom senelamlom te?” aro wene seog.
17Yesusti samoro nimi enekoag wene seogne ka'ebi agha nimi tanekori, “Yesusti uanep komne ual,” senelamek nimi taneko ni ali sembaek. Aghana yog nimi niri yaghe senelamekti, “Wana waliri wali-walia maikno ulamla,” aro awi senelamek.
Allahri elap ma'arop nimi maikno saelba uhiroba sembe Yesusti sunumna ambatsiogha
(Matius 13:31-33; Markus 4:30-32)
18Yesusti nimi hairo ambarelamsiogti, “Allahri amik ma'arop nimi maikno saelba uhiroba welaro wamnepne ane huropneag agha sunuro ambatsinep? Tam huropneag agha a'unag tibin nenero sumbatsinun? 19Kwarang si so'oag togtopne saog uro wamla. Nimiri kwarang si olog sirikne nene toro eldi aweag memna tanena, pongoro waelbanba, winang im toman yabirop winang tanekori kal sae tanekoag ae solanep,” aro Yesusti sunuro ambatsiog.
20Nen nhon babe hairo ambarelamsiogti, “Allahri mog so'oag nimi saelba uhiroba sembe tam huropneag agha a'unag tibin nenero sumbatsinun? 21Sunumnana undo. Kelabo nhondi, ‘Kwaneng roti winiro tamneba walero nubu talul,’ aro yamoro pairoba kwaneng roti anekoag ma'aro pimnep. Ma'aro piple tanena, anam aukag tamna komag kwaneng roti tamneba aneko nubu talul. Ane saog uro Allahri mog so'oag nimi saelba uhiroba mo nubu talul,” aro likiptop yubuag ambatsiog.
“Ina ologne toman wa'ilulom,” aro Yesusti likiptop yubuag agha ambatsiogha
(Matius 7:13-14,21-23)
22“As soro kalurop as Yerusalem pinun,” aro Yesus palamogti, as nhonag pang, nhonag pang nimi yubu ambare-ambare palamsiog. 23Eldi yubu ambare-ambare palamsiogpa, nimi nhondi hailamogti, “Nai, nu saelbamsilamne. Anag haibaghenun. Allahri nimi talulamsil nena, nimi ologha taulba ulamsil te?” aro haibaog.
24-25Wene aro haibaogpa, Yesusti samoro nimi enekoag, “Amik sum nimi maiknori, ‘Allahri nimi taluro paia uhirobag wa'inun,’ aro ulamukang aghana, nari a'un ambarelamsinne, amik sum eneko ae ngainge poneko sekel aleri, ina serekale tanena, wa'inep kom wamukang. Ane sembe, wene anamag a'un nong ningkiri, ‘Ina to'op ina ane toman wa'inun,’ aro sumene ulamlulom. Sumene uamun kom pagha tanena, amik ae ngainge ponekori ina serekale sum eneko a'undi paiag sip sekapmundi, ‘Nai, nu ina kubatsimenba wa'aukap,’ aro ina kaungulamlulom. Ina kaungulamlulom aghana, ae ngainge ponekori, ‘A'unna na ekonne wamlom. A'un talaba yalomne babe na ekon,’ selul.
26Wene seleba, a'undi lelapmundi, ‘Nu anap kwaneng mag nhon telamobori, nuri as wamobongeag andi nuri ina toman yubu nunag amoro ambatsiom,’ sululom.
27Wene sululom aghana, ae ngainge ponekori nen yubu lelamleri, ‘A'unna na ekonne wamlom. A'un talaba yalomne babe na ekon. A'un yoaba ulamlom nimi wene na wamnaag anea pululom,’ selul.
28Wene seleba, a'undi kemelamsimunba, nunisag yabo Abrahamap, Ishakap, Yakubap, Allah yubu silimu tiplamek nangap ni Allahri nimi saelba uhirobag wamika a'undi ipsululom. Kemelamsimundi a'unna, ‘Nu babe Allahri nimi saelba uhirobag wamsebe aghana, nu yag lambahil,’ aro si keleng tereba yo lelem engero wamlulom. 29Nimi heng walelingkirobag siba, heng purukul pirobag siba, mag luag siba, mag kwasag siba yalamikti, ‘Allahri na saelba ulamnelul,’ aro wa'alamukang. Eldi saelba ulamsil nimi taneko salero pipsileri, sani yoro kwaneng tatsirobag aneko pul aukang. 30A'un el uro wamlulom! Amik uro yabile sum eneko nimi wailagne wene wamang nimi agha, nimi maikno amik whingag sip taukang. Nimi whingagne wene wamang nimi agha, nimi maikno wailag sip taukang,” aro Yesusti ambatsiog.
Yesusti as Yerusalem nimi sembe wana ikin uro lelamogha
(Matius 23:37-39)
31Abeneko ko'o enekoag agha babe Farisi nimi etpare Yesusag yaekti ambarelamekti, “Herodes yubu sia leropneri an sembe karongdi, ‘Opsene,’ senelangkel. Aneag agha lambamendi, yogneag pululam,” aro ambarek.
32Wene aro ambarekpa, Yesusti samoro sinag, “Wene a'un samoro pimundi, pai kam anekoag ambarel pululom. Ambarel pululom nena, ‘Yesusna yubu lelamori, “Sumeneap ambuhumap nari awe tolamneri, nimi phia kulomag ua ulamsilne yag lanalamsineri, nimi naiktopne wali nenelamsinun. Wilindip sum aneko nari awe komopto tomnun,” sel,’ aro ambarel pululom. 33Wene, ‘Opkelul,’ selom aghana, nari awe sumeneap ambuhumap amniap wero pabalamnea as Yerusalem pinun. Allah yubu silimu tiptopne nhon as Yerusalem wamna komag tebanep kom saog ane sembe, na babe as Yerusalem pineba omnukang.
34Yerusalem, Yerusalem! A'un Yerusalem nimiri Allah yubu silimu tiplamek nimi olamsilumdi, Allahri wepto poglamsiog nimi babe kirikti olamsilum! Ik sulu nari, ‘A'un paiamsisene,’ senelamsiri winang ayamdi eldi mabo winiro ol niknia urop saog uro, ‘As ene nimiri mabo ni paiamsisene,’ aro yoplamsisi aghana, a'undi karong aro kom alamlum. 35Ane sembe kembahut! A'undi sobalum ae anekoag Allah a'unap nhon ua ulamlul kom. Nari yubu ambatnuahin nena, a'un Yerusalem nimiri na wene anea nen imnululom kom. Ot na nen amik yane sum agha a'undi lelapmundi, ‘Nu Saelba Uhiropneri poglaba, el siag kekhaekto yalamlange poneko paliag uropne omeklamsut!’ aro lelapmun sum eneko agha imnululom,” aro Yesusti yubu lebog.#Sepna 118:26; Lukas 19:38
Currently Selected:
Lukas 13: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
Lukas 13
13
Yesusti nimiag, “Malia seneragto ulamlomne lilobi agha Allahri senenne saelbapmun kom tanena tebalulom,” seogha
1Yesusti nimi yubu ambarelamsiogpa, nimi wamek nimi tanekori Yesusag, “Galilea nimi etpareri pham domba poa, ‘Allah sembe oro pibukap,’ aro ulamong abeneko nimi nubunge Pilatus ponekori opsioba, eneng lanaro tebaong,” aro Yesusag ambarek. 2Sindi wene aro ambarekne ka'ebaogti, Yesusti yubu lelamogti, “A'undi senelamlomne, ‘Sin Galilea nimi tanekori mali-malia maikno ulamekne sembe seklero tebaong aghana, Galilea nimi yog nimiri malia maikno uan koma tebaong kom,’ senelamlom te? 3‘Kom,’ alamna! Ot sin tebaong nimi aghabog malia maikno urop nimi sembaheng kom. Ambarelamsinne ka'elapmundi, el uro wamlulom! A'undi malia seneragto ulamlomne lilobi agha Allahri senenne saelbapmun kom tanena, sin tebaong saog uro a'un babe tebalulom. 4As Yerusalem nimiag uro yabiogne sembe babe olog ambatsinun. Mag Siloam peramag nimi yae uhin ae sopso waelbaek ae wenge tuplamogti, nimi sa'o tarabare niknibahiogpa tebaek. Tebaek nimi taneko sembe a'undina, ‘Sindi malia maikno ulamongne sembe tebaong aghana, yog nimi as Yerusalem wamang nimi taneko malia urop komdi teptop koma kamag wamang,’ senelamlom te? 5‘Kom,’ alamna! Sikne agha ambarelamsin. A'undi malia seneragto ulamlomne lilobi agha Allahri senenne saelbapmun kom tanena, sin tebaong saog uro a'un babe tebalulom,” aro Yesusti ambatsiog.
Yesusti kal ara wana maurop kom kalag sunumna tol pina ambatsiogha
6Yesusti wene aro ambatsiogti, nen sunumna nhon ambatsiogne ane.
“Nimi nhondi eldi anggur merop aweag kal ara nhon meamog. Meamog aneko ik etpare, ‘Wana mauamla to?’ aro yingkina kemelaog. Kemelaog aghana, kal aneko wana mauamog kom. 7Ane sembe eldi awe o'ol lero yae ua uropne ponekoag yubu lelamogti, ‘Na hengkun wilindi, “Kal ara ane wana nhon mauamla to?” aro kemelang pang ulamno aghana, wana nhon maua unne imno kom. Kal ane pongoro ua ulamlange wana maubanep kom aghana, so'o si mag abeneko telamla. Ane sembe kal ane khaebalulam,’ seog. 8Aghana awe o'ol lero yae ua urop nimi enekori samoro yubu lelamogti, ‘Nai, kal ane khaebaheng kom. Hengkun ene kal ane so'o ya'aro mo'obaneri, urumna pimneba uale agha. 9Hengkun nonoag wana maubanep ulamlea sembe, wana mauban kom pagha tanena, nai andi nimiag, “Khaebalulom,” senep,’ aro awe o'ol lero yae ua uropne ponekori wene seog,” aro Yesusti nimi wamek nimi tanekoag ambatsiog.
Sabat sum eneko Yesusti maghan kiniptop kel wali nembaogha
10Wamekpa Yahudi nimiri tektek paptop sum Sabat sum taogpa, Yesusti Allah yubu lero winirop ae nhonag yubu amoro ambarelamsiog. 11Aneko kelabo nhon hengkun sa'o tarabare phia yonge kel enekoag wamogpa, naikto ulamog kel nhon wamog. Kel eneko maghan kiniplobogpa, peket seknange erarukti, maghan kiniptoba ua ulamog. 12Undo ua ulamogne Yesusti ibogti, kel enekoag, “Yae,” aro yoplamogti, “Kain, anag naikna ulangkelne wene orog tal,” seog.
13Wene seogti, Yesusti kel enekoag sae pibog abeneko pere maghan kiniptopne neneko orog taogpa, peket sekelabiogti, Allah omeklamog. 14Wali tangka Allah omeklamog aghana, Yesusti kel eneko Sabat sum agha wali nembaogne sembe Allah yubu lero winirop ae saelba uropne ponekori karongdi wana yo sembaog. Yo sembaogti, yubu lelamogti, “Ae ik no'opbare sa'a-sa'a awe wero tomnep sum wamlaba, ik nhon sum ane agha yingkina, ‘Wali nembanelul,’ aro yalamlom. Ot sumenena tektek paptop sum Sabat sum wamlaba, nimi wali nembahinep kom,” aro nimi tanekoag ambatsiog.
15Wene seogne sembe nu Saelba Uhiropne Yesusti nimi enekoag samoro, “A'unna, ‘Wali sembanukang,’ aro lero urop nimi wamlom! A'undam nimiri tektek paptop sum Sabat sum agha a'undi pham sapiap keledaiap a'ero-a'ero leka lomag agha, ‘Mag tukang,’ aro poa la'anilamsilomba, mag telamang te? 16Sabat sum agha pham mo'olamsilom aghana, wene ane Abraham sisa mangarop kel nhon phia sikini nubunge Satanasti hengkun sa'o tarabare haing kauploa saog ulamloba, maghan kinipto ua ulamlo. Ko'o we uro seklelamla aghana, a'undi senenne phiari el haing kauplobogne nene tektek paptop sum Sabat sum agha el wali nembanep kom senelamlom te?” aro wene seog.
17Yesusti samoro nimi enekoag wene seogne ka'ebi agha nimi tanekori, “Yesusti uanep komne ual,” senelamek nimi taneko ni ali sembaek. Aghana yog nimi niri yaghe senelamekti, “Wana waliri wali-walia maikno ulamla,” aro awi senelamek.
Allahri elap ma'arop nimi maikno saelba uhiroba sembe Yesusti sunumna ambatsiogha
(Matius 13:31-33; Markus 4:30-32)
18Yesusti nimi hairo ambarelamsiogti, “Allahri amik ma'arop nimi maikno saelba uhiroba welaro wamnepne ane huropneag agha sunuro ambatsinep? Tam huropneag agha a'unag tibin nenero sumbatsinun? 19Kwarang si so'oag togtopne saog uro wamla. Nimiri kwarang si olog sirikne nene toro eldi aweag memna tanena, pongoro waelbanba, winang im toman yabirop winang tanekori kal sae tanekoag ae solanep,” aro Yesusti sunuro ambatsiog.
20Nen nhon babe hairo ambarelamsiogti, “Allahri mog so'oag nimi saelba uhiroba sembe tam huropneag agha a'unag tibin nenero sumbatsinun? 21Sunumnana undo. Kelabo nhondi, ‘Kwaneng roti winiro tamneba walero nubu talul,’ aro yamoro pairoba kwaneng roti anekoag ma'aro pimnep. Ma'aro piple tanena, anam aukag tamna komag kwaneng roti tamneba aneko nubu talul. Ane saog uro Allahri mog so'oag nimi saelba uhiroba mo nubu talul,” aro likiptop yubuag ambatsiog.
“Ina ologne toman wa'ilulom,” aro Yesusti likiptop yubuag agha ambatsiogha
(Matius 7:13-14,21-23)
22“As soro kalurop as Yerusalem pinun,” aro Yesus palamogti, as nhonag pang, nhonag pang nimi yubu ambare-ambare palamsiog. 23Eldi yubu ambare-ambare palamsiogpa, nimi nhondi hailamogti, “Nai, nu saelbamsilamne. Anag haibaghenun. Allahri nimi talulamsil nena, nimi ologha taulba ulamsil te?” aro haibaog.
24-25Wene aro haibaogpa, Yesusti samoro nimi enekoag, “Amik sum nimi maiknori, ‘Allahri nimi taluro paia uhirobag wa'inun,’ aro ulamukang aghana, nari a'un ambarelamsinne, amik sum eneko ae ngainge poneko sekel aleri, ina serekale tanena, wa'inep kom wamukang. Ane sembe, wene anamag a'un nong ningkiri, ‘Ina to'op ina ane toman wa'inun,’ aro sumene ulamlulom. Sumene uamun kom pagha tanena, amik ae ngainge ponekori ina serekale sum eneko a'undi paiag sip sekapmundi, ‘Nai, nu ina kubatsimenba wa'aukap,’ aro ina kaungulamlulom. Ina kaungulamlulom aghana, ae ngainge ponekori, ‘A'unna na ekonne wamlom. A'un talaba yalomne babe na ekon,’ selul.
26Wene seleba, a'undi lelapmundi, ‘Nu anap kwaneng mag nhon telamobori, nuri as wamobongeag andi nuri ina toman yubu nunag amoro ambatsiom,’ sululom.
27Wene sululom aghana, ae ngainge ponekori nen yubu lelamleri, ‘A'unna na ekonne wamlom. A'un talaba yalomne babe na ekon. A'un yoaba ulamlom nimi wene na wamnaag anea pululom,’ selul.
28Wene seleba, a'undi kemelamsimunba, nunisag yabo Abrahamap, Ishakap, Yakubap, Allah yubu silimu tiplamek nangap ni Allahri nimi saelba uhirobag wamika a'undi ipsululom. Kemelamsimundi a'unna, ‘Nu babe Allahri nimi saelba uhirobag wamsebe aghana, nu yag lambahil,’ aro si keleng tereba yo lelem engero wamlulom. 29Nimi heng walelingkirobag siba, heng purukul pirobag siba, mag luag siba, mag kwasag siba yalamikti, ‘Allahri na saelba ulamnelul,’ aro wa'alamukang. Eldi saelba ulamsil nimi taneko salero pipsileri, sani yoro kwaneng tatsirobag aneko pul aukang. 30A'un el uro wamlulom! Amik uro yabile sum eneko nimi wailagne wene wamang nimi agha, nimi maikno amik whingag sip taukang. Nimi whingagne wene wamang nimi agha, nimi maikno wailag sip taukang,” aro Yesusti ambatsiog.
Yesusti as Yerusalem nimi sembe wana ikin uro lelamogha
(Matius 23:37-39)
31Abeneko ko'o enekoag agha babe Farisi nimi etpare Yesusag yaekti ambarelamekti, “Herodes yubu sia leropneri an sembe karongdi, ‘Opsene,’ senelangkel. Aneag agha lambamendi, yogneag pululam,” aro ambarek.
32Wene aro ambarekpa, Yesusti samoro sinag, “Wene a'un samoro pimundi, pai kam anekoag ambarel pululom. Ambarel pululom nena, ‘Yesusna yubu lelamori, “Sumeneap ambuhumap nari awe tolamneri, nimi phia kulomag ua ulamsilne yag lanalamsineri, nimi naiktopne wali nenelamsinun. Wilindip sum aneko nari awe komopto tomnun,” sel,’ aro ambarel pululom. 33Wene, ‘Opkelul,’ selom aghana, nari awe sumeneap ambuhumap amniap wero pabalamnea as Yerusalem pinun. Allah yubu silimu tiptopne nhon as Yerusalem wamna komag tebanep kom saog ane sembe, na babe as Yerusalem pineba omnukang.
34Yerusalem, Yerusalem! A'un Yerusalem nimiri Allah yubu silimu tiplamek nimi olamsilumdi, Allahri wepto poglamsiog nimi babe kirikti olamsilum! Ik sulu nari, ‘A'un paiamsisene,’ senelamsiri winang ayamdi eldi mabo winiro ol niknia urop saog uro, ‘As ene nimiri mabo ni paiamsisene,’ aro yoplamsisi aghana, a'undi karong aro kom alamlum. 35Ane sembe kembahut! A'undi sobalum ae anekoag Allah a'unap nhon ua ulamlul kom. Nari yubu ambatnuahin nena, a'un Yerusalem nimiri na wene anea nen imnululom kom. Ot na nen amik yane sum agha a'undi lelapmundi, ‘Nu Saelba Uhiropneri poglaba, el siag kekhaekto yalamlange poneko paliag uropne omeklamsut!’ aro lelapmun sum eneko agha imnululom,” aro Yesusti yubu lebog.#Sepna 118:26; Lukas 19:38
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.