1 AkwaKorinte 2
2
Erongithsa yo kufa kwa Krisitu pa mbinda
1Andengenu, uya na keyire ku kwenu ku na mi rongithsa yo diano dyo shemwa dya Nyambi, ka na na cikwathsithsire maywi oakaru nji onyanyami o kupiterera. 2Inene uya na nekarire nenu na na cihangwerire kukana ku twarera maano kwinu imweya shime ya Yesu Krisitu pohuma, aye oyu wambiwire pa mbinda. 3Uno honi uya na keyire ku kwenu shime na keyire ko kufaratera no ku yapa no ku tutuma nene. 4Diywi dyange no kuhonga kwange nedi kadi yonyanyami nji ku rakwithsa anu, unone nedi kombangi o Mupepo Oukenu nokoro. 5Na na tendire kengeyo ci thsitawo thsenu thsa tanarera ponyanyami wanu, unone pokoro wa Nyambi.
Onyanyami wa Nyambi
6Uno honi naa amba ko maywi onyanyami kowa a na kuru mu thsitawo, unone kadi onyanyami o kano kaye, nji waendithsi o kano kaye, awa a kokera ku kupwa. 7Dyombo, onyanyami ou ni amba po onyanyami wa Nyambi, onyanyami o diano edi dya horekiwire. Nyambi wa di turekerire kutethzima kwetu kaye o ku ka shime kumbiwa. 8Kwithsa shaanga yofoci ku manguvuru o kano kaye oyu naa dimuka ou onyanyami. Inene nga shime na u dimuka nga kambire Fumu o kutethzima pa mbinda. 9Unone eci edi i na ñoriwa ci:
“Eyi a kana ku mona meho,
nji matwi ku yuva.
Kwithsa munu oyu wa anekerire ci yaa twethsa ku tendahara,
enu eyi a roithserire Nyambi anuenthzi awa a na mu shimi.”
10Unone Nyambi naa hokora eyi enu ku kwetu ko Mupepo wenthzi. Inene Mupepo waa fotithsithsa enu yoihe, shaanga eanekera ya Nyambi eyi i na cihoreka. 11Kwithsa o ku dimuka eanekera yo munu shime mupepo wenthzi ou u di ku kwenthzi. Mofoci, kwithsa o ku dimuka eanekera ya Nyambi shime Mupepo wa Nyambi. 12Eyi na tu tambura po kadi mupepo o kaye, unone Mupepo oyu naa tunderera kwa Nyambi, ci tu twethse ku yuvithsithsa enu yoiwa eyi naa tu pa Nyambi kengekenge.
13Mweyo, ka tu ambire ko maywi aa na tu rongithsiwa konyanyami wanu, unone ko maywi aa naa tu rongithsa Mupepo, ku tongonona enu yo Mupepo kowa a di no Mupepo. 14Munu o kupira Mupepo tumba a tambura enu eyi i tunda ku Mupepo wa Nyambi, unone aye aa i mona ci otomba karo ka a twethsa ku i yuvithsithsa nawa, inene yaa dimukiwa pohuma ko Mupepo. 15Munu oyu di no Mupepo wa Nyambi aa twethsa ku tatufa nawa enu yoihe, unone aye kwithsa o ku twethsa ku tatufa edi ekara. 16Eci edi ku na ñoriwa ci:
“Edye o ku dimuka eanekera ya Fumu?
Edye nga mu ronga?#Isa 40.13.”
Uno honi atwe po tu di no maano a Krisitu.
Currently Selected:
1 AkwaKorinte 2: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company