1 AkwaKorinte 6
6
Eamba mu kaci kakwakutawa
1Ngeci yumweya mu kaci kenu o di neamba na muenthzenthzi mukwakutawa, aa keshuka ngepi ku i twara mu kuta thzanu wevi kupita ku i twara kwaenthzenthzi akwakutawa? 2Ene ka mu dimukire ci akwakutawa kenge mba ratura kano kaye? Uno honi ngeci kenge mba mu ratura kano kaye, ene nga ka mu twethsa ku ratura eamba yoionye mu kaci kenu? 3Ene ka mu dimukire ci kenge mba tu ratura tungeru, yoshemwa mwaa twethsa enu yo uno mwoyo. 4Uno honi ngeci mu di no murandu weamba yo kengeyo ne, ine honi yo ku i twarera ku kuta kwanu awa a na kana ku remekiwa mu kereke? 5Eyi naa i amba ci mu fe honyi. Ene mu kaci kenu kwithsa shaanga munu yofoci o maano oyu nga twethsa ku ratura eamba mu kaci kawo akwakutawa nji? 6Unone kupita ci a tende kengeyo, mukwakutawa aa twara muenthzenthzi mukwakutawa ku kuta ci akwakukana ku tawa a ka mu rature.
7Mwaa thza ku makuta yoihe mwikara neamba mu kaci kenu, eyi yaa monithsa ci mu na kwanga. Ine eyi mu kana ku tawa ku mi pithsera mukaci ko mithzeko? Ine yo kukana ku tawa ku mithzera? 8Uno honi amwe mwathsinda mwa epithsa no ku kupakupa, karo mwaa tenda eyi shaanga kwaenthzenu akwakutawa.
9Nji ka mu dimuka ci akwetenda yoimango mbera ka tambura Kutumina kwa Nyambi? Mwa ciangera mwathsinda, akwetenda yoimango eci akwaruthziho, akwakurombera ekupuro, akwamirembe, maherehere oakwerume nji akwerume wakwa ku tenda yo honyi naenthzo akwerume, 10ethzi, anu o rununa, etakwa, akwa kwipithsa amweya mathzina, nakwa makupakupa, awo wahe mbera ka tambura Kutumina kwa Nyambi. 11Amweya ku kwenu dyekarire kengeyo, unone na mu yoiwa, na mu kenithsiwa, na mu tendiwa owawawa pa meho a Nyambi mu dithzina dya Fumu Yesu Krisitu no ku Mupepo wa Nyambi wetu.
Mu tunde ku ruthziho
12Mwaa amba ci “Ni na tawethziwa ku tenda enu yoihe.” Ii, dyo i di. Uno honi kadi cingwa enu yoihe iwa ku kwenu. Shaanga ci naa tawethziwa ku tenda ngara thsinu, ka na ku tawa ci ni endithsiwe ku ngara thsinu. 13Karo mwaa amba ci edya po ya dira no dira po dyedya, yashemwa uno honi Nyambi kenge mba a i pwithsa momu widi wayo. Erama ka ya kwamiwerire ruthziho, unone erama ya Fumu karo Fumu po werama. 14Nyambi wa pindurire Fumu kwafu karo natwe kenge mbera a tu pindura kwafu kokoro wenthzi.
15Ene ka mu dimuka ci erama yenu po epo yerama ya Krisitu? Ene kenge nga ni shimba thsipo thserama ya Krisitu ku thsi tenda thsipo thserama yo diherehere? Tumba i tawa. 16Nji ka mu dimukire ci mukwerume o ku ciwaneka erama yenthzi neyi yo diherehere o na piruka kwikara thsirama thsofoci noya mbuyama? Inene ku na ñoriwa ci awo aidi kenge a piruka thsirama thsofoci. 17Unone munu o ku ciwaneka kwa Fumu aa piruka thsofoci nenthzi ko Mupepo.
18Mu cire ku ruthziho! Thsivi thsothsihe thso ku tenda munu po thsa pora thzerama, unone o ku yoya ko ruthziho a epithsera erama yenthzi. 19Ene ka mu dimukire ci erama yenu po Tembere thzo Mupepo Oukenu ou u di mu mwenu oyu na mu piwa kwa Nyambi. Mweyo, ka mu ciendithsire mwathsinda, 20inene Nyambi na a mi uru ko muuro oukuru. Mweyo mu remeke Nyambi kerama yenu.
Currently Selected:
1 AkwaKorinte 6: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company