2 AkwaKorinte 6
6
1Ko kwikara awa kwamena pofoci na Nyambi, twaa mi adikanena ci mwa tambura thsihemo thsa Nyambi mu kengekenge.
2Nyambi a amba ci,
“Na ni ku yuvu mu thsikati ethsi thsi na roera.
Na ni ku kwathsa mu diyuwa dyo kuyoyithsiwa.”
O teerere, thsino po thsodiyo thsikati thso thsihemo thsa Nyambi! Dyo rero dyodiyo diyuwa dyo kuyoyithsiwa.
3Ka tu pakire thsiparaka mu dikuñwa dyo munu yomuhe, ci ekwama yetu ya shomororiwa. 4Uno honi mwinu yoihe eyi tu tenda, twaa monithsa ci yoshemwa twangamba Nyambi. Inene twaa citanarithsa ko ku cithzua micima mu makando, mwiereka no mwikarupa. 5Na tu furiwa, ku pakiwa mu kamenga no kwikara mu mikwangarakanyi. Na tu kwamithsiwa nene, ku cithzua mathsiku o kukana ku rara turo no mu nthzara. 6Twaa cimonithsa twathsinda kokenu wetu, kodimukero wetu, ko kukwatamicima kwetu, ko thsihemo thsetu, ko Mupepo Oukenu no thsishimo thsetu thso shemwa. 7Twaa honga muthzimbu oshemwa kokoro wa Nyambi. Owawa thsodiyo thsirwithso thsetu thso ku rwithsa no ku ciamwena. 8Twaa kwamena Nyambi, ikare ci anu aa tu remeka nji aa tu shwahura, nji anu aa amba omango ku kwetu nji aa tu shangara. Twaa amba yoshemwa, unone twaa shimbiwa ci twakwa kwangera. 9Twaa dimukiwa nene, unone twaa shimbiwa eci ka tu dimukiwire. Twaa yoya unone twaa shimbiwa eci twaa fa. Twaa furiwa, unone kadi twakwa ku paiwa. 10Shaanga ci twaa yuvithsiwa kukora ku micima, uno honi thsikati thsothsihe twaa nyanyuka. Twaa monahara ohepwe, unone twaa fumithsa anu owangi. Twaa monahara eci anu o kupira thsimweya, unone tu di nenu yoihe.
11Amwe mwakwa Korinte, tu na amba ku kwenu enu yoihe ko kukana ku horeka thsimweya. Tu na mi yanthzurwera micima thzetu. 12Ka tu thzi mi yanthzererire, unone yamwe mu na tu yanthzerera micima thzenu. 13Uno honi naa amba ku kwenu eci naa amba nanange, mu yanthzurure nene micima thzenu namwe.
Tembere thza Nyambi oyu yoya
14Mwa paniwa ku njoko thzofoci nakwakukana ku tawa. Inene owawa nomango ne ngepi nga i kwamena pofoci? Nji thsiciwano mwine ethsi nga wikara nathso mwethzi no mirema? 15Kuciyuva mwine nga kwikara mu kaci ka Krisitu na Satana#6.15 Beliari.? Thsiciwano mwine nga thsikara mu kaci ka mukwakutawa na mukwakukana kutawa? 16Karo tembere thza Nyambi ne ngepi nga thzi twethsa ku ciyuva nekupuro yo mathzimu. Inene yatwe twa tembere thza Nyambi oyu yoya. Eci edi a i ambire Nyambi ci,
“Kenge na ku yoyano,
no ku enda pa kaciko.
Kenge na kwikara Nyambi wo,
karo kenge a kwikara anuange.”
17Mweyo, Fumu a amba ci,
“Mu tunde kukwo,
mu citepe kukwo,
mwa kwata yo dithziro,
mbeci nga ni mi tambure.
18Karo kenge na kwikara Tata wenu,
karo kenge mwa kwikara anange wakwerume nambuyama,
eyi yodiyo a amba aye Fumu Shokoro Ouhe.”
Currently Selected:
2 AkwaKorinte 6: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company