AkwaEfese 2
2
Munu aa yoyithsiwa ko thsihemo thsa Nyambi
1Shime mwaa fa mukaci ko mirandu nevi yenu. 2Kethsiya thsikati mwa shupwerire etenda yoimango yo kaye no ku shupwera Satana muendithsi o mipepo thzoshokoro thzo mu wiruwiru, ao mupepo u endithsa thsino thsikati anu awa na kana ku remeka Nyambi. 3Twahe dyo twekarire eci awo, shime twaa tendanga eshima yerama neanekera yetu. Eci munu yomuhe, natwe wa tu roerire oanthzi wa Nyambi.
4Unone pakuninga ci Nyambi wa ñeke nene, wa tu shimine nene, 5shaanga ci shime twaa fa mukaci kevi yetu, wa tu pindurire kwafu pofoci na Krisitu. Mukaci ko thsihemo thsenthzi, na mu yoyithsiwa. 6Nyambi wa tu pindurire pofoci na Krisitu no ku twikarithsa nenthzi mu mandau o mu wiru mwa Krisitu Yesu. 7Nyambi wa tendire kengeyo ci mwikati eyi i keya nga a ku monithse okuru o thsihemo thsenthzi ethsi a tu shimine mwa Krisitu Yesu.
8Inene na mu yoyithsiwa ko thsihemo thsa Nyambi ko thsitawo. Oko kuyoyithsiwa kadi cingwa kwaa tunda ku kwenu, unone thsipa thsa Nyambi. 9Kuyoyithsiwa po kadi cingwa kwaa tunda pekwama, mweyo, kwithsa oyu nga ku cishangarera. 10Inene atwe po twekwama yo moko enthzi. Wa tumbire mwa Krisitu Yesu ci tu tende ekwama yoiwa eyi a tu roithserire cimo Nyambi ci tu i tende.
Kwikara thsofoci mwa Krisitu
11Mweyo, amwe mwerekiwire Anukenge, mu vuruke ci shime na mwithsiwanga ku Majuda ci “akwakukana ku thza ku mukanda,” ao ou u na tendiwanga perama ko moko anu. 12Mu vuruke ci kethsiya thsikati shime mwa tepiwire kwa Krisitu. Mwekarire enda mu ditunga dya Isiraele, karo ka mwa vandire kwiyuvano yo thsikumbwethzo thsa Nyambi kwanuenthzi. Mwa yoyire muno mu kaye ko kupira okurupero no kupira Nyambi. 13Uno honi mwa Krisitu Yesu, amwe mwekarire kokure na Nyambi na mu retiwa po pepi nenthzi konyinga wa Krisitu.
14Inene aye Krisitu shemwa yodiyo thsiyaro thsetu, oyu naa waneka Majuda nAnukenge kwikara mbunga thzofoci. Ko ku pa erama yenthzi pa mbinda, naa umburura mufuo o thsithzimbo ethsi thsa tu tepire. 15Wa pwithsire murao netumina neraerera yao ci nga a cikwamene mu mwenthzi aye thsinda mbunga thzofoci thzothzipe pethzo mishovo thzidi ci a rete thsiyaro. 16Ko kufa kwenthzi pa mbinda, Yesu na a waneka mishovo thzidi kwikara erama yofoci no ku thzi huthsera kwa Nyambi. Mweyo, na a mana thsithzimbo thso.
17Krisitu wa keyire ku na honga Muthzimbu Ouwa o thsiyaro ku kwenu amwe mwAnukenge amwe mwekarire kokure na Nyambi, no ku Majuda awa ekarire po pepi nenthzi. 18Inene kenthzi aye Krisitu twahe twaa twethsa ku kuma kwa Nyambi Tata ko Mupepo ofoci.
19Apo honi amwe mwAnukenge ka mu di karo mwenda nji matundakure, unone mwakwa ditunga dyofoci nanua Nyambi, mwakwa mwanda ofoci wa Nyambi. 20Namwe kengeyo na mu umbiwa pa mushisho o tunganda nakwakukethza, Krisitu Yesu yodiyo diunthzi dyo nthzio. 21Pa penthzi podiyo thsi na umbiwa thsiumba no ku kura kwikara Tembere thzothzikenu thza Fumu. 22Mu mwenthzi, namwe mwaa umbiwera pofoci namweya ku tenda nthzio omu a yoya Nyambi ko Mupepo wenthzi.
Currently Selected:
AkwaEfese 2: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company